৮. সোমাথেরীগাথাৰণ্ণনা

যং তং ইসীহি পত্তব্বন্তিআদিকা সোমায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী সিখিস্স ভগৰতো কালে খত্তিযমহাসালকুলে নিব্বত্তিত্ৰা ৰিঞ্ঞুতং পত্ৰা অরুণরঞ্ঞো অগ্গমহেসী অহোসীতি সব্বং অতীতৰত্থু অভযত্থেরিযা ৰত্থুসদিসং. পচ্চুপ্পন্নৰত্থু পন অযং থেরী তত্থ তত্থ দেৰমনুস্সেসু সংসরন্তী ইমস্মিং বুদ্ধুপ্পাদে রাজগহে বিম্বিসারস্স রঞ্ঞো পুরোহিতস্স ধীতা হুত্ৰা নিব্বত্তি. তস্সা সোমাতি নামং অহোসি. সা ৰিঞ্ঞুতং পত্তা সত্থু রাজগহপৰেসনে পটিলদ্ধসদ্ধা উপাসিকা হুত্ৰা অপরভাগে সঞ্জাতসংৰেগা ভিক্খুনীসু পব্বজিত্ৰা কতপুব্বকিচ্চা ৰিপস্সনায কম্মং করোন্তী ন চিরস্সেৰ সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.১.৭১, ৮০-৯০) –

‘‘নগরে অরুণৰতিযা, অরুণো নাম খত্তিযো;

তস্স রঞ্ঞো অহুং ভরিযা, ৰারিতং ৰারযামহং.

‘‘যাৰতা…পে… কতং বুদ্ধস্স সাসন’’ন্তি. –

সব্বং অভযত্থেরিযা অপদানসদিসং.

অরহত্তং পন পত্ৰা ৰিমুত্তিসুখেন সাৰত্থিযং ৰিহরন্তী একদিৰসং দিৰাৰিহারত্থায অন্ধৰনং পৰিসিত্ৰা অঞ্ঞতরস্মিং রুক্খমূলে নিসীদি. অথ নং মারো ৰিৰেকতো ৰিচ্ছেদেতুকামো অদিস্সমানুরূপো উপগন্ত্ৰা আকাসে ঠত্ৰা –

৬০. ‘‘যং তং ইসীহি পত্তব্বং, ঠানং দুরভিসম্ভৰং;

ন তং দ্ৰঙ্গুলপঞ্ঞায, সক্কা পপ্পোতুমিত্থিযা’’তি. – ইমং গাথমাহ;

তস্সত্থো – সীলক্খন্ধাদীনং এসনট্ঠেন ‘‘ইসী’’তি লদ্ধনামেহি বুদ্ধাদীহি মহাপঞ্ঞেহি পত্তব্বং, তং অঞ্ঞেহি পন দুরভিসম্ভৰং দুন্নিপ্ফাদনীযং. যং তং অরহত্তসঙ্খাতং পরমস্সাসট্ঠানং, ন তং দ্ৰঙ্গুলপঞ্ঞায নিহীনপঞ্ঞায ইত্থিযা পাপুণিতুং সক্কা. ইত্থিযো হি সত্তট্ঠৰস্সকালতো পট্ঠায সব্বকালং ওদনং পচন্তিযো পক্কুথিতে উদকে তণ্ডুলে পক্খিপিত্ৰা ‘‘এত্তাৰতা ওদনং পক্ক’’ন্তি ন জানন্তি, পক্কুথিযমানে পন তণ্ডুলে দব্বিযা উদ্ধরিত্ৰা দ্ৰীহি অঙ্গুলীহি পীল়েত্ৰা জানন্তি, তস্মা দ্ৰঙ্গুলিপঞ্ঞাযাতি ৰুত্তা.

তং সুত্ৰা থেরী মারং অপসাদেন্তী –

৬১. ‘‘ইত্থিভাৰো নো কিং কযিরা, চিত্তম্হি সুসমাহিতে;

ঞাণম্হি ৰত্তমানম্হি, সম্মা ধম্মং ৰিপস্সতো.

৬২. ‘‘সব্বত্থ ৰিহতা নন্দী, তমোক্খন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি. –

ইতরা দ্ৰে গাথা অভাসি.

তত্থ ইত্থিভাৰো নো কিং কযিরাতি মাতুগামভাৰো অম্হাকং কিং করেয্য, অরহত্তপ্পত্তিযা কীদিসং ৰিবন্ধং উপ্পাদেয্য. চিত্তম্হি সুসমাহিতেতি চিত্তে অগ্গমগ্গসমাধিনা সুট্ঠু সমাহিতে. ঞাণম্হি ৰত্তমানম্হীতি ততো অরহত্তমগ্গঞাণে পৰত্তমানে. সম্মা ধম্মং ৰিপস্সতোতি চতুসচ্চধম্মং পরিঞ্ঞাদিৰিধিনা সম্মদেৰ পস্সতো. অযঞ্হেত্থ সঙ্খেপো – পাপিম, ইত্থী ৰা হোতু পুরিসো ৰা, অগ্গমগ্গে অধিগতে অরহত্তং হত্থগতমেৰাতি.

ইদানি তস্স অত্তনা অধিগতভাৰং উজুকমেৰ দস্সেন্তী ‘‘সব্বত্থ ৰিহতা নন্দী’’তি গাথমাহ. সা ৰুত্তত্থাযেৰ.

সোমাথেরীগাথাৰণ্ণনা নিট্ঠিতা.

তিকনিপাতৰণ্ণনা নিট্ঠিতা.