৩. তিকনিপাতো

১. অপরাসামাথেরীগাথাৰণ্ণনা

তিকনিপাতে পণ্ণৰীসতিৰস্সানীতিআদিকা অপরায সামায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ৰিপস্সিস্স ভগৰতো কালে চন্দভাগায নদিযা তীরে কিন্নরযোনিযং নিব্বত্তি. সা তত্থ কিন্নরেহি সদ্ধিং কীল়াপসুতা ৰিচরতি. অথেকদিৰসং সত্থা তস্সা কুসলবীজরোপনত্থং তত্থ গন্ত্ৰা নদীতীরে চঙ্কমি. সা ভগৰন্তং দিস্ৰা হট্ঠতুট্ঠা সল়লপুপ্ফানি আদায সত্থু সন্তিকং গন্ত্ৰা ৰন্দিত্ৰা তেহি পুপ্ফেহি ভগৰন্তং পূজেসি. সা তেন পুঞ্ঞকম্মেন দেৰমনুস্সেসু সংসরন্তী ইমস্মিং বুদ্ধুপ্পাদে কোসম্বিযং কুলঘরে নিব্বত্তিত্ৰা ৰযপ্পত্তা সামাৰতিযা সহাযিকা হুত্ৰা তস্সা মতকালে সংৰেগজাতা পব্বজিত্ৰা পঞ্চৰীসতি ৰস্সানি চিত্তসমাধানং অলভিত্ৰা মহল্লিকাকালে সুগতোৰাদং লভিত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.২.২২-২৯) –

‘‘চন্দভাগানদীতীরে, অহোসিং কিন্নরী তদা;

অদ্দসাহং দেৰদেৰং, চঙ্কমন্তং নরাসভং.

‘‘ওচিনিত্ৰান সল়লং, বুদ্ধসেট্ঠস্সদাসহং;

উপসিঙ্ঘি মহাৰীরো, সল়লং দেৰগন্ধিকং.

‘‘পটিগ্গহেত্ৰা সম্বুদ্ধো, ৰিপস্সী লোকনাযকো;

উপসিঙ্ঘি মহাৰীরো, পেক্খমানায মে তদা.

‘‘অঞ্জলিং পগ্গহেত্ৰান, ৰন্দিত্ৰা দ্ৰিপদুত্তমং;

সকং চিত্তং পসাদেত্ৰা, ততো পব্বতমারুহিং.

‘‘একনৰুতিতো কপ্পে, যং পুপ্ফমদদিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

৩৯. ‘‘পণ্ণৰীসতি ৰস্সানি, যতো পব্বজিতায মে;

নাভিজানামি চিত্তস্স, সমং লদ্ধং কুদাচনং.

৪০. ‘‘অলদ্ধা চেতসো সন্তিং, চিত্তে অৰসৰত্তিনী;

ততো সংৰেগমাপাদিং, সরিত্ৰা জিনসাসনং.

৪১. ‘‘বহূহি দুক্খধম্মেহি, অপ্পমাদরতায মে;

তণ্হক্খযো অনুপ্পত্তো, কতং বুদ্ধস্স সাসনং;

অজ্জ মে সত্তমী রত্তি, যতো তণ্হা ৰিসোসিতা’’তি. –

ইমা গাথা অভাসি.

তত্থ চিত্তস্স সমন্তি চিত্তস্স ৰূপসমং, চেতোসমথমগ্গফলসমাধীতি অত্থো.

ততোতি তস্মা চিত্তৰসং ৰত্তেতুং অসমত্থভাৰতো. সংৰেগমাপাদিন্তি সত্থরি ধরন্তেপি পব্বজিতকিচ্চং মত্থকং পাপেতুং অসক্কোন্তী পচ্ছা কথং পাপযিস্সামীতি সংৰেগং ঞাণুত্রাসং আপজ্জিং. সরিত্ৰা জিনসাসনন্তি কাণকচ্ছপোপমাদিসত্থুওৰাদং (সং. নি. ৫.১১১৭; ম. নি. ৩.২৫২) অনুস্সরিত্ৰা. সেসং ৰুত্তনযমেৰ.

অপরাসামাথেরীগাথাৰণ্ণনা নিট্ঠিতা.

২. উত্তমাথেরীগাথাৰণ্ণনা

চতুক্খত্তুং পঞ্চক্খত্তুন্তিআদিকা উত্তমায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ৰিপস্সিস্স ভগৰতো কালে বন্ধুমতীনগরে অঞ্ঞতরস্স কুটুম্বিকস্স গেহে ঘরদাসী হুত্ৰা নিব্বত্তি. সা ৰযপ্পত্তা অত্তনো অয্যকানং ৰেয্যাৰচ্চং করোন্তী জীৰতি. তেন চ সমযেন বন্ধুমরাজা পুণ্ণমীদিৰসে উপোসথিকো হুত্ৰা পুরেভত্তং দানানি দত্ৰা পচ্ছাভত্তং গন্ত্ৰা ধম্মং সুণাতি. অথ মহাজনা যথা রাজা পটিপজ্জতি, তথেৰ পুণ্ণমীদিৰসে উপোসথঙ্গানি সমাদায ৰত্তন্তি. অথস্সা দাসিযা এতদহোসি – ‘‘এতরহি খো মহারাজা মহাজনা চ উপোসথঙ্গানি সমাদায ৰত্তন্তি, যংনূনাহং উপোসথদিৰসেসু উপোসথসীলং সমাদায ৰত্তেয্য’’ন্তি. সা তথা করোন্তী সুপরিসুদ্ধং উপোসথসীলং রক্খিত্ৰা তাৰতিংসেসু নিব্বত্তা অপরাপরং সুগতীসুযেৰ সংসরন্তী ইমস্মিং বুদ্ধুপ্পাদে সাৰত্থিযং সেট্ঠিকুলে নিব্বত্তিত্ৰা ৰিঞ্ঞুতং পত্ৰা পটাচারায থেরিযা সন্তিকে ধম্মং সুত্ৰা পব্বজিত্ৰা ৰিপস্সনং পট্ঠপেত্ৰা তং মত্থকং পাপেতুং নাসক্খি. পটাচারা থেরী তস্সা চিত্তাচারং ঞত্ৰা ওৰাদমদাসি. সা তস্সা ওৰাদে ঠত্ৰা সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.২.১-২১) –

‘‘নগরে বন্ধুমতিযা, বন্ধুমা নাম খত্তিযো;

দিৰসে পুণ্ণমায সো, উপৰসি উপোসথং.

‘‘অহং তেন সমযেন, কুম্ভদাসী অহং তহিং;

দিস্ৰা সরাজকং সেনং, এৰাহং চিন্তযিং তদা.

‘‘রাজাপি রজ্জং ছড্ডেত্ৰা, উপৰসি উপোসথং;

সফলং নূন তং কম্মং, জনকাযো পমোদিতো.

‘‘যোনিসো পচ্চৰেক্খিত্ৰা, দুগ্গচ্চঞ্চ দলিদ্দতং;

মানসং সম্পহংসিত্ৰা, উপৰসিং উপোসথং.

‘‘অহং উপোসথং কত্ৰা, সম্মাসম্বুদ্ধসাসনে;

তেন কম্মেন সুকতেন, তাৰতিংসমগচ্ছহং.

‘‘তত্থ মে সুকতং ব্যম্হং, উব্ভযোজনমুগ্গতং;

কূটাগারৰরূপেতং, মহাসনসুভূসিতং.

‘‘অচ্ছরা সতসহস্সা, উপতিট্ঠন্তি মং সদা;

অঞ্ঞে দেৰে অতিক্কম্ম, অতিরোচামি সব্বদা.

‘‘চতুসট্ঠিদেৰরাজূনং, মহেসিত্তমকারযিং;

তেসট্ঠিচক্কৰত্তীনং, মহেসিত্তমকারযিং.

‘‘সুৰণ্ণৰণ্ণা হুত্ৰান, ভৰেসু সংসরামহং;

সব্বত্থ পৰরা হোমি, উপোসথস্সিদং ফলং.

‘‘হত্থিযানং অস্সযানং, রথযানঞ্চ সীৰিকং;

লভামি সব্বমেৰেতং, উপোসথস্সিদং ফলং.

‘‘সোণ্ণমযং রূপিমযং, অথোপি ফলিকামযং;

লোহিতঙ্গমযঞ্চেৰ, সব্বং পটিলভামহং.

‘‘কোসেয্যকম্বলিযানি, খোমকপ্পাসিকানি চ;

মহগ্ঘানি চ ৰত্থানি, সব্বং পটিলভামহং.

‘‘অন্নং পানং খাদনীযং, ৰত্থসেনাসনানি চ;

সব্বমেতং পটিলভে, উপোসথস্সিদং ফলং.

‘‘ৰরগন্ধঞ্চ মালঞ্চ, চুণ্ণকঞ্চ ৰিলেপনং;

সব্বমেতং পটিলভে, উপোসথস্সিদং ফলং.

‘‘কূটাগারঞ্চ পাসাদং, মণ্ডপং হম্মিযং গুহং;

সব্বমেতং পটিলভে, উপোসথস্সিদং ফলং.

‘‘জাতিযা সত্তৰস্সাহং, পব্বজিং অনগারিযং;

অড্ঢমাসে অসম্পত্তে, অরহত্তমপাপুণিং.

‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰপরিক্খীণা, নত্থি দানি পুনব্ভৰো.

‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, উপোসথস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

৪২. ‘‘চতুক্খত্তুং পঞ্চক্খত্তুং, ৰিহারা উপনিক্খমিং;

অলদ্ধা চেতসো সন্তিং, চিত্তে অৰসৰত্তিনী.

৪৩. ‘‘সা ভিক্খুনিং উপাগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৪৪. ‘‘তস্সা ধম্মং সুণিত্ৰান, যথা মং অনুসাসি সা;

সত্তাহং একপল্লঙ্কেন, নিসীদিং পীতিসুখসমপ্পিতা;

অট্ঠমিযা পাদে পসারেসিং, তমোখন্ধং পদালিযা’’তি. –

ইমা গাথা অভাসি.

তত্থ সা ভিক্খুনিং উপাগচ্ছিং , যা মে সদ্ধাযিকা অহূতি যা মযা সদ্ধাতব্বা সদ্ধেয্যৰচনা অহোসি, তং ভিক্খুনিং সাহং উপগচ্ছিং উপসঙ্কমিং, পটাচারাথেরিং সদ্ধায ৰদতি. ‘‘সা ভিক্খুনী উপগচ্ছি, যা মে সাধযিকা’’তিপি পাঠো. সা পটাচারা ভিক্খুনী অনুকম্পায মং উপগচ্ছি, যা ময্হং সদত্থস্স সাধিকাতি অত্থো. সা মে ধম্মমদেসেসি, খন্ধাযতনধাতুযোতি সা পটাচারা থেরী ‘‘ইমে পঞ্চক্খন্ধা, ইমানি দ্ৰাদসাযতনানি, ইমা অট্ঠারস ধাতুযো’’তি খন্ধাদিকে ৰিভজিত্ৰা দস্সেন্তী ময্হং ধম্মং দেসেসি.

তস্সা ধম্মং সুণিত্ৰানাতি তস্সা পটিসম্ভিদাপ্পত্তায থেরিযা সন্তিকে খন্ধাদিৰিভাগপুব্বঙ্গমং অরিযমগ্গং পাপেত্ৰা দেসিতসণ্হসুখুমৰিপস্সনাধম্মং সুত্ৰা. যথা মং অনুসাসি সাতি সা থেরী যথা মং অনুসাসি ওৰদি, তথা পটিপজ্জন্তী পটিপত্তিং মত্থকং পাপেত্ৰাপি সত্তাহং একপল্লঙ্কেন নিসীদিং. কথং? পীতিসুখসমপ্পিতাতি ঝানমযেন পীতিসুখেন সমঙ্গীভূতা. অট্ঠমিযা পাদে পসারেসিং, তমোখন্ধং পদালিযাতি অনৰসেসং মোহক্খন্ধং অগ্গমগ্গেন পদালেত্ৰা অট্ঠমে দিৰসে পল্লঙ্কং ভিন্দন্তী পাদে পসারেসিং. ইদমেৰ চস্সা অঞ্ঞাব্যাকরণং অহোসি.

উত্তমাথেরীগাথাৰণ্ণনা নিট্ঠিতা.

৩. অপরা উত্তমাথেরীগাথাৰণ্ণনা

যে ইমে সত্ত বোজ্ঝঙ্গাতিআদিকা অপরায উত্তমায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ৰিপস্সিস্স ভগৰতো কালে বন্ধুমতীনগরে কুলদাসী হুত্ৰা নিব্বত্তি. সা একদিৰসং সত্থু সাৰকং একং খীণাসৰত্থেরং পিণ্ডায চরন্তং দিস্ৰা পসন্নমানসা তীণি মোদকানি অদাসি. সা তেন পুঞ্ঞকম্মেন দেৰমনুস্সেসু সংসরন্তী ইমস্মিং বুদ্ধুপ্পাদে কোসলজনপদে অঞ্ঞতরস্মিং ব্রাহ্মণমহাসালকুলে নিব্বত্তিত্ৰা ৰিঞ্ঞুতং পত্তা জনপদচারিকং চরন্তস্স সত্থু সন্তিকে ধম্মং সুত্ৰা পটিলদ্ধসদ্ধা পব্বজিত্ৰা নচিরস্সেৰ সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.২.৩০-৩৬) –

‘‘নগরে বন্ধুমতিযা, কুম্ভদাসী অহোসহং;

মম ভাগং গহেত্ৰান, গচ্ছং উদকহারিকা.

‘‘পন্থম্হি সমণং দিস্ৰা, সন্তচিত্তং সমাহিতং;

পসন্নচিত্তা সুমনা, মোদকে তীণিদাসহং.

‘‘তেন কম্মেন সুকতেন, চেতনাপণিধীহি চ;

একনৰুতিকপ্পানি, ৰিনিপাতং ন গচ্ছহং.

‘‘সম্পত্তি তং করিত্ৰান, সব্বং অনুভৰিং অহং;

মোদকে তীণি দত্ৰান, পত্তাহং অচলং পদং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

৪৫. ‘‘যে ইমে সত্ত বোজ্ঝঙ্গা, মগ্গা নিব্বানপত্তিযা;

ভাৰিতা তে মযা সব্বে, যথা বুদ্ধেন দেসিতা.

৪৬. ‘‘সুঞ্ঞতস্সানিমিত্তস্স, লাভিনীহং যদিচ্ছকং;

ওরসা ধীতা বুদ্ধস্স, নিব্বানাভিরতা সদা.

৪৭. ‘‘সব্বে কামা সমুচ্ছিন্না, যে দিব্বা যে চ মানুসা;

ৰিক্খীণো জাতিসংসারো, নত্থি দানি পুনব্ভৰো’’তি. –

ইমা গাথা অভাসি.

তত্থ সুঞ্ঞতস্সানিমিত্তস্স, লাভিনীহং যদিচ্ছকন্তি সুঞ্ঞতসমাপত্তিযা চ অনিমিত্তসমাপত্তিযা চ অহং যদিচ্ছকং লাভিনী, তত্থ যং যং সমাপজ্জিতুং ইচ্ছামি যত্থ যত্থ যদা যদা, তং তং তত্থ তত্থ তদা তদা সমাপজ্জিত্ৰা ৰিহরামীতি অত্থো. যদিপি হি সুঞ্ঞতাপ্পণিহিতাদিনামকস্স যস্স কস্সচিপি মগ্গস্স সুঞ্ঞতাদিভেদং তিৰিধম্পি ফলং সম্ভৰতি. অযং পন থেরী সুঞ্ঞতানিমিত্তসমাপত্তিযোৰ সমাপজ্জতি. তেন ৰুত্তং – ‘‘সুঞ্ঞতস্সানিমিত্তস্স, লাভিনীহং যদিচ্ছক’’ন্তি. যেভুয্যৰসেন ৰা এতং ৰুত্তং. নিদস্সনমত্তমেতন্তি অপরে.

যে দিব্বা যে চ মানুসাতি যে দেৰলোকপরিযাপন্না যে চ মনুস্সলোকপরিযাপন্না ৰত্থুকামা, তে সব্বেপি তপ্পটিবদ্ধছন্দরাগপ্পহানেন মযা সম্মদেৰ উচ্ছিন্না, অপরিভোগারহা কতা. ৰুত্তঞ্হি – ‘‘অভব্বো, আৰুসো, খীণাসৰো ভিক্খু কামে পরিভুঞ্জিতুং. সেয্যথাপি পুব্বে অগারিযভূতো’’তি. সেসং ৰুত্তনযমেৰ.

অপরা উত্তমাথেরীগাথাৰণ্ণনা নিট্ঠিতা.

৪. দন্তিকাথেরীগাথাৰণ্ণনা

দিৰাৰিহারা নিক্খম্মাতিআদিকা দন্তিকায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী বুদ্ধসুঞ্ঞকালে চন্দভাগায নদিযা তীরে কিন্নরযোনিযং নিব্বত্তি. সা একদিৰসং কিন্নরেহি সদ্ধিং কীল়ন্তী ৰিচরমানা অদ্দস অঞ্ঞতরং পচ্চেকবুদ্ধং অঞ্ঞতরস্মিং রুক্খমূলে দিৰাৰিহারং নিসিন্নং. দিস্ৰান পসন্নমানসা উপসঙ্কমিত্ৰা সালপুপ্ফেহি পূজং কত্ৰা ৰন্দিত্ৰা পক্কামি. সা তেন পুঞ্ঞকম্মেন দেৰমনুস্সেসু সংসরন্তী ইমস্মিং বুদ্ধুপ্পাদে সাৰত্থিযং কোসলরঞ্ঞো পুরোহিতব্রাহ্মণস্স গেহে নিব্বত্তিত্ৰা ৰিঞ্ঞুতং পত্ৰা জেতৰনপটিগ্গহণে পটিলদ্ধসদ্ধা উপাসিকা হুত্ৰা পচ্ছা মহাপজাপতিগোতমিযা সন্তিকে পব্বজিত্ৰা রাজগহে ৰসমানা একদিৰসং পচ্ছাভত্তং গিজ্ঝকূটং অভিরুহিত্ৰা দিৰাৰিহারং নিসিন্না হত্থারোহকস্স অভিরুহনত্থায পাদং পসারেন্তং হত্থিং দিস্ৰা তদেৰ আরম্মণং কত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.২.৮৬-৯৬) –

‘‘চন্দভাগানদীতীরে, অহোসিং কিন্নরী তদা;

অদ্দসং ৰিরজং বুদ্ধং, সযম্ভুং অপরাজিতং.

‘‘পসন্নচিত্তা সুমনা, ৰেদজাতা কতঞ্জলী;

সালমালং গহেত্ৰান, সযম্ভুং অভিপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা কিন্নরীদেহং, তাৰতিংসমগচ্ছহং.

‘‘ছত্তিংসদেৰরাজূনং, মহেসিত্তমকারযিং;

মনসা পত্থিতং ময্হং, নিব্বত্ততি যথিচ্ছিতং.

‘‘দসন্নং চক্কৰত্তীনং, মহেসিত্তমকারযিং;

ওচিতত্তাৰ হুত্ৰান, সংসরামি ভৰেস্ৰহং.

‘‘কুসলং ৰিজ্জতে ময্হং, পব্বজিং অনগারিযং;

পূজারহা অহং অজ্জ, সক্যপুত্তস্স সাসনে.

‘‘ৰিসুদ্ধমনসা অজ্জ, অপেতমনপাপিকা;

সব্বাসৰপরিক্খীণা, নত্থি দানি পুনব্ভৰো.

‘‘চতুন্নৰুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, সালমালাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা পীতিসোমনস্সজাতা উদানৰসেন –

৪৮. ‘‘দিৰাৰিহারা নিক্খম্ম, গিজ্ঝকূটম্হি পব্বতে;

নাগং ওগাহমুত্তিণ্ণং, নদীতীরম্হি অদ্দসং.

৪৯. ‘‘পুরিসো অঙ্কুসমাদায, ‘দেহি পাদ’ন্তি যাচতি;

নাগো পসারযী পাদং, পুরিসো নাগমারুহি.

৫০. ‘‘দিস্ৰা অদন্তং দমিতং, মনুস্সানং ৰসং গতং;

ততো চিত্তং সমাধেসিং, খলু তায ৰনং গতা’’তি. – ইমা গাথা অভাসি;

তত্থ নাগং ওগাহমুত্তিণ্ণন্তি হত্থিনাগং নদিযং ওগাহং কত্ৰা ওগয্হ ততো উত্তিণ্ণং. ‘‘ওগয্হ মুত্তিণ্ণ’’ন্তি ৰা পাঠো. ম-কারো পদসন্ধিকরো. নদীতীরম্হি অদ্দসন্তি চন্দভাগায নদিযা তীরে অপস্সিং.

কিং করোন্তন্তি চেতং দস্সেতুং ৰুত্তং ‘‘পুরিসো’’তিআদি. তত্থ ‘দেহি পাদ’ন্তি যাচতীতি ‘‘পাদং দেহি’’ইতি পিট্ঠিআরোহনত্থং পাদং পসারেতুং সঞ্ঞং দেতি, যথাপরিচিতঞ্হি সঞ্ঞং দেন্তো ইধ যাচতীতি ৰুত্তো.

দিস্ৰা অদন্তং দমিতন্তি পকতিযা পুব্বে অদন্তং ইদানি হত্থাচরিযেন হত্থিসিক্খায দমিতদমথং উপগমিতং. কীদিসং দমিতং? মনুস্সানং ৰসং গতং যং যং মনুস্সা আণাপেন্তি, তং তং দিস্ৰাতি যোজনা. ততো চিত্তং সমাধেসিং, খলু তায ৰনং গতাতি খলূতি অৰধারণত্থে নিপাতো. ততো হত্থিদস্সনতো পচ্ছা, তায হত্থিনো কিরিযায হেতুভূতায, ৰনং অরঞ্ঞং গতা চিত্তং সমাধেসিংযেৰ. কথং? ‘‘অযম্পি নাম তিরচ্ছানগতো হত্থী হত্থিদমকস্স ৰসেন দমথং গতো, কস্মা মনুস্সভূতায চিত্তং পুরিসদমকস্স সত্থু ৰসেন দমথং ন গমিস্সতী’’তি সংৰেগজাতা ৰিপস্সনং ৰড্ঢেত্ৰা অগ্গমগ্গসমাধিনা মম চিত্তং সমাধেসিং অচ্চন্তসমাধানেন সব্বসো কিলেসে খেপেসিন্তি অত্থো.

দন্তিকাথেরীগাথাৰণ্ণনা নিট্ঠিতা.

৫. উব্বিরিথেরীগাথাৰণ্ণনা

অম্ম, জীৰাতিআদিকা উব্বিরিযা থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্তা একদিৰসং মাতাপিতূসু মঙ্গলং অনুভৰিতুং গেহন্তরগতেসু অদুতিযা সযং গেহে ওহীনা উপকট্ঠায ৰেলায ভগৰতো সাৰকং একং খীণাসৰত্থেরং গেহদ্ৰারসমীপেন গচ্ছন্তং দিস্ৰা ভিক্খং দাতুকামা, ‘‘ভন্তে, ইধ পৰিসথা’’তি ৰত্ৰা থেরে গেহং পৰিট্ঠে পঞ্চপতিট্ঠিতেন থেরং ৰন্দিত্ৰা গোনকাদীহি আসনং পঞ্ঞাপেত্ৰা অদাসি. নিসীদি থেরো পঞ্ঞত্তে আসনে. সা পত্তং গহেত্ৰা পিণ্ডপাতস্স পূরেত্ৰা থেরস্স হত্থে ঠপেসি. থেরো অনুমোদনং কত্ৰা পক্কামি. সা তেন পুঞ্ঞকম্মেন তাৰতিংসেসু নিব্বত্তিত্ৰা তত্থ যাৰতাযুকং উল়ারদিব্বসম্পত্তিং অনুভৰিত্ৰা ততো চুতা সুগতীসুযেৰ সংসরন্তী ইমস্মিং বুদ্ধুপ্পাদে সাৰত্থিযং গহপতিমহাসালকুলে নিব্বত্তিত্ৰা উব্বিরীতি লদ্ধনামা অভিরূপা দস্সনীযা পাসাদিকা অহোসি. সা ৰযপ্পত্তকালে কোসলরঞ্ঞা অত্তনো গেহং নীতা, কতিপযসংৰচ্ছরাতিক্কমেন একং ধীতরং লভি. তস্সা জীৰন্তীতি নামং অকংসু. রাজা তস্সা ধীতরং দিস্ৰা তুট্ঠমানসো উব্বিরিযা অভিসেকং অদাসি. ধীতা পনস্সা আধাৰিত্ৰা পরিধাৰিত্ৰা ৰিচরণকালে কালমকাসি. মাতা যত্থ তস্সা সরীরনিক্খেপো কতো, তং সুসানং গন্ত্ৰা দিৰসে দিৰসে পরিদেৰতি. একদিৰসং সত্থু সন্তিকং গন্ত্ৰা ৰন্দিত্ৰা থোকং নিসীদিত্ৰা গতা অচিরৰতীনদিযা তীরে ঠত্ৰা ধীতরং আরব্ভ পরিদেৰতি. তং দিস্ৰা সত্থা গন্ধকুটিযং যথানিসিন্নোৰ অত্তানং দস্সেত্ৰা ‘‘কস্মা ৰিপ্পলপসী’’তি পুচ্ছি. ‘‘মম ধীতরং আরব্ভ ৰিপ্পলপামি, ভগৰা’’তি. ‘‘ইমস্মিং সুসানে ঝাপিতা তৰ ধীতরো চতুরাসীতিসহস্সমত্তা, তাসং কতর সন্ধায ৰিপ্পলপসী’’তি. তাসং তং তং আল়াহনট্ঠানং দস্সেত্ৰা –

৫১. ‘‘অম্ম জীৰাতি ৰনম্হি কন্দসি, অত্তানং অধিগচ্ছ উব্বিরি;

চুল্লাসীতিসহস্সানি, সব্বা জীৰসনামিকা;

এতম্হাল়াহনে দড্ঢা, তাসং কমনুসোচসী’’তি. – সউপড্ঢগাথমাহ;

তত্থ, অম্ম, জীৰাতি মাতুপচারনামেন ধীতুযা আলপনং, ইদঞ্চস্সা ৰিপ্পলপনাকারদস্সনং. ৰনম্হি কন্দসীতি ৰনমজ্ঝে পরিদেৰসি. অত্তানং অধিগচ্ছ উব্বিরীতি উব্বিরি তৰ অত্তানমেৰ তাৰ বুজ্ঝস্সু যাথাৰতো জানাহি. চুল্লাসীতিসহস্সানীতি চতুরাসীতিসহস্সানি. সব্বা জীৰসনামিকাতি তা সব্বাপি জীৰন্তি, যা সমাননামিকা. এতম্হাল়াহনে দড্ঢাতি এতম্হি সুসানে ঝাপিতা. তাসং কমনুসোচসীতি তাসু জীৰন্তীনামাসু চতুরাসীতিসহস্সমত্তাসু কং সন্ধায ত্ৰং অনুসোচসি অনুসোকং আপজ্জসীতি এৰং সত্থারা ধম্মে দেসিতে দেসনানুসারেন ঞাণং পেসেত্ৰা ৰিপস্সনং আরভিত্ৰা সত্থু দেসনাৰিলাসেন অত্তনো চ হেতুসম্পত্তিযা যথাঠাতাৰ ৰিপস্সনং উস্সুক্কাপেত্ৰা মগ্গপটিপাটিযা অগ্গফলে অরহত্তে পতিট্ঠাসি. তেন ৰুত্তং অপদানে (অপ. থেরী ২.২.৩৭-৬০) –

‘‘নগরে হংসৰতিযা, অহোসিং বালিকা তদা;

মাতা চ মে পিতা চেৰ, কম্মন্তং অগমংসু তে.

‘‘মজ্ঝন্হিকম্হি সূরিযে, অদ্দসং সমণং অহং;

ৰীথিযা অনুগচ্ছন্তং, আসনং পঞ্ঞপেসহং.

‘‘গোনকাৰিকতিকাহি, পঞ্ঞপেত্ৰা মমাসনং;

পসন্নচিত্তা সুমনা, ইদং ৰচনমব্রৰিং.

‘‘সন্তত্তা কুথিতা ভূমি, সূরো মজ্ঝন্হিকে ঠিতো;

মালুতা চ ন ৰাযন্তি, কালো চেৰেত্থ মেহিতি.

‘‘পঞ্ঞত্তমাসনমিদং, তৰত্থায মহামুনি;

অনুকম্পং উপাদায, নিসীদ মম আসনে.

‘‘নিসীদি তত্থ সমণো, সুদন্তো সুদ্ধমানসো;

তস্স পত্তং গহেত্ৰান, যথারন্ধং অদাসহং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘তত্থ মে সুকতং ব্যম্হং, আসনেন সুনিম্মিতং;