৫-১০. তিস্সাদিথেরীগাথাৰণ্ণনা

তিস্সে যুঞ্জস্সু ধম্মেহীতি তিস্সায থেরিযা গাথা. তস্সা ৰত্থু তিস্সাসিক্খমানায ৰত্থুসদিসং. অযং পন থেরী হুত্ৰা অরহত্তং পাপুণি. যথা চ অযং, এৰং ইতো পরং ধীরা, ৰীরা, মিত্তা, ভদ্রা, উপসমাতি পঞ্চন্নং থেরীনং ৰত্থু একসদিসমেৰ. সব্বাপি ইমা কপিলৰত্থুৰাসিনিযো বোধিসত্তস্স ওরোধভূতা মহাপজাপতিগোতমিযা সদ্ধিং নিক্খন্তা ওভাসগাথায চ অরহত্তং পত্তা ঠপেত্ৰা সত্তমিং. সা পন ওভাসগাথায ৰিনা পগেৰ সত্থু সন্তিকে লদ্ধং ওৰাদং নিস্সায ৰিপস্সনং উস্সুক্কাপেত্ৰা অরহত্তং পাপুণিত্ৰা উদানৰসেন ‘‘ৰীরা ৰীরেহী’’তি গাথং অভাসি. ইতরাপি অরহত্তং পত্ৰা –

৫. ‘‘তিস্সে যুঞ্জস্সু ধম্মেহি, খণো তং মা উপচ্চগা;

খণাতীতা হি সোচন্তি, নিরযম্হি সমপ্পিতা.

৬. ‘‘ধীরে নিরোধং ফুসেহি, সঞ্ঞাৰূপসমং সুখং;

আরাধযাহি নিব্বানং, যোগক্খেমমনুত্তরং.

৭. ‘‘ৰীরা ৰীরেহি ধম্মেহি, ভিক্খুনী ভাৰিতিন্দ্রিযা;

ধারেতি অন্তিমং দেহং, জেত্ৰা মারং সৰাহনং.

৮. ‘‘সদ্ধায পব্বজিত্ৰান, মিত্তে মিত্তরতা ভৰ;

ভাৰেহি কুসলে ধম্মে, যোগক্খেমস্স পত্তিযা.

৯. ‘‘সদ্ধায পব্বজিত্ৰান, ভদ্রে ভদ্ররতা ভৰ;

ভাৰেহি কুসলে ধম্মে, যোগক্খেমমনুত্তরং.

১০. ‘‘উপসমে তরে ওঘং, মচ্চুধেয্যং সুদুত্তরং;

ধারেহি অন্তিমং দেহং, জেত্ৰা মারং সৰাহন’’ন্তি. – গাথাযো অভাসিংসু;

তত্থ যুঞ্জস্সু ধম্মেহীতি সমথৰিপস্সনাধম্মেহি অরিযেহি বোধিপক্খিযধম্মেহি চ যুঞ্জ যোগং করোহি. খণো তং মা উপচ্চগাতি যো এৰং যোগভাৰনং ন করোতি, তং পুগ্গলং পতিরূপদেসে উপ্পত্তিক্খণো, ছন্নং আযতনানং অৰেকল্লক্খণো, বুদ্ধুপ্পাদক্খণো, সদ্ধায পটিলদ্ধক্খণো, সব্বোপি অযং খণো অতিক্কমতি নাম. সো খণো তং মা অতিক্কমি. খণাতীতাতি যে হি খণং অতীতা, যে চ পুগ্গলে সো খণো অভীতো, তে নিরযম্হি সমপ্পিতা হুত্ৰা সোচন্তি, তত্থ নিব্বত্তিত্ৰা মহাদুক্খং পচ্চনুভৰন্তীতি অত্থো.

নিরোধং ফুসেহীতি কিলেসনিরোধং ফুস্স পটিলভ. সঞ্ঞাৰূপসমং সুখং, আরাধযাহি নিব্বানন্তি কামসঞ্ঞাদীনং পাপসঞ্ঞানং উপসমনিমিত্তং অচ্চন্তসুখং নিব্বানং আরাধেহি.

ৰীরা ৰীরেহি ধম্মেহীতি ৰীরিযপধানতায ৰীরেহি তেজুস্সদেহি অরিযমগ্গধম্মেহি ভাৰিতিন্দ্রিযা ৰড্ঢিতসদ্ধাদিইন্দ্রিযা ৰীরা ভিক্খুনী ৰত্থুকামেহি সৰাহনং কিলেসমারং জিনিত্ৰা আযতিং পুনব্ভৰাভাৰতো অন্তিমং দেহং ধারেতীতি থেরী অঞ্ঞং ৰিয কত্ৰা অত্তানং দস্সেতি.

মিত্তেতি তং আলপতি. মিত্তরতাতি কল্যাণমিত্তেসু অভিরতা. তত্থ সক্কারসম্মানকরণতা হোহি. ভাৰেহি কুসলে ধম্মেতি অরিযমগ্গধম্মে ৰড্ঢেহি. যোগক্খেমস্সাতি অরহত্তস্স নিব্বানস্স চ পত্তিযা অধিগমায.

ভদ্রেতি তং আলপতি. ভদ্ররতাতি ভদ্রেসু সীলাদিধম্মেসু রতা অভিরতা হোহি. যোগক্খেমমনুত্তরন্তি চতূহি যোগেহি খেমং অনুপদ্দৰং অনুত্তরং নিব্বানং, তস্স পত্তিযা কুসলে বোধিপক্খিযধম্মে ভাৰেহীতি অত্থো.

উপসমেতি তং আলপতি. তরে ওঘং মচ্চুধেয্যং সুদুত্তরন্তি মচ্চু এত্থ ধীযতীতি মচ্চুধেয্যং, অনুপচিতকুসলসম্ভারেহি সুট্ঠু দুত্তরন্তি সুদুত্তরং, সংসারমহোঘং তরে অরিযমগ্গনাৰায তরেয্যাসি. ধারেহি অন্তিমং দেহন্তি তস্স তরণেনেৰ অন্তিমদেহধরা হোহীতি অত্থো.

তিস্সাদিথেরীগাথাৰণ্ণনা নিট্ঠিতা.

নিট্ঠিতা পঠমৰগ্গৰণ্ণনা.