১১. মুত্তাথেরীগাথাৰণ্ণনা

সুমুত্তা সাধুমুত্তাম্হীতিআদিকা মুত্তাথেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে কুসলং উপচিনিত্ৰা ইমস্মিং বুদ্ধুপ্পাদে কোসলজনপদে ওঘাতকস্স নাম দলিদ্দব্রাহ্মণস্স ধীতা হুত্ৰা নিব্বত্তি, তং ৰযপ্পত্তকালে মাতাপিতরো একস্স খুজ্জব্রাহ্মণস্স অদংসু. সা তেন ঘরাৰাসং অরোচন্তী তং অনুজানাপেত্ৰা পব্বজিত্ৰা ৰিপস্সনায কম্মং করোতি. তস্সা বহিদ্ধারম্মণেসু চিত্তং ৰিধাৰতি, সা তং নিগ্গণ্হন্তী ‘‘সুমুত্তা সাধুমুত্তাম্হী’’তি গাথং ৰদন্তীযেৰ ৰিপস্সনং উস্সুক্কাপেত্ৰা সহ পটিসম্ভিদাহি অরহত্তং পাপুণি. তেন ৰুত্তং অপদানে –

‘‘পদুমুত্তরো নাম জিনো, সব্বধম্মেসু চক্খুমা;

পাণিনে অনুগণ্হন্তো, পিণ্ডায পাৰিসী পুরং.

‘‘তস্স আগচ্ছতো সত্থু, সব্বে নগরৰাসিনো;

হট্ঠতুট্ঠা সমাগন্ত্ৰা, ৰালিকা আকিরিংসু তে.

‘‘ৰীথিসম্মজ্জনং কত্ৰা, কদলিপুণ্ণকদ্ধজে;

ধূমং চুণ্ণঞ্চ মাসঞ্চ, সক্কারং কচ্চ সত্থুনো.

‘‘মণ্ডপং পটিযাদেত্ৰা, নিমন্তেত্ৰা ৰিনাযকং;

মহাদানং দদিত্ৰান, সম্বোধিং অভিপত্থযি.

‘‘পদুমুত্তরো মহাৰীরো, হারকো সব্বপাণিনং;

অনুমোদনিযং কত্ৰা, ব্যাকাসি অগ্গপুগ্গলো.

‘‘সতসহস্সে অতিক্কন্তে, কপ্পো হেস্সতি ভদ্দকো;

ভৰাভৰে সুখং লদ্ধা, পাপুণিস্সসি বোধিযং.

‘‘হত্থকম্মঞ্চ যে কেচি, কতাৰী নরনারিযো;

অনাগতম্হি অদ্ধানে, সব্বা হেস্সন্তি সম্মুখা.

‘‘তেন কম্মৰিপাকেন, চেতনাপণিধীহি চ;

উপ্পন্নদেৰভৰনে, তুয্হং তা পরিচারিকা.

‘‘দিব্বং সুখমসঙ্খ্যেয্যং, মানুসঞ্চ অসঙ্খিযং;

অনুভোন্তি চিরং কালং, সংসরিম্হ ভৰাভৰে.

‘‘সতসহস্সিতো কপ্পে, যং কম্মমকরিং তদা;

সুখুমালা মনুস্সেসু, অথো দেৰপুরেসু চ.

‘‘রূপং ভোগং যসং আযুং, অথো কিত্তিসুখং পিযং;

লভামি সততং সব্বং, সুকতং কম্মসম্পদং.

‘‘পচ্ছিমে ভৰে সম্পত্তে, জাতাহং ব্রাহ্মণে কুলে;

সুখুমালহত্থপাদা, রমণিযে নিৰেসনে.

‘‘সব্বকালম্পি পথৰী, ন পস্সামনলঙ্কতং;

চিক্খল্লভূমিং অসুচিং, ন পস্সামি কুদাচনং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা উদানেন্তী –

১১. ‘‘সুমুত্তা সাধুমুত্তাম্হি, তীহি খুজ্জেহি মুত্তিযা;

উদুক্খলেন মুসলেন, পতিনা খুজ্জকেন চ;

মুত্তাম্হি জাতিমরণা, ভৰনেত্তি সমূহতা’’তি. – ইমং গাথং অভাসি;

তত্থ সুমুত্তাতি সুট্ঠু মুত্তা. সাধুমুত্তাম্হীতি সাধু সম্মদেৰ মুত্তা অম্হি. কুতো পন সুমুত্তা সাধুমুত্তাতি আহ ‘‘তীহি খুজ্জেহি মুত্তিযা’’তি, তীহি ৰঙ্ককেহি পরিমুত্তিযাতি অত্থো. ইদানি তানি সরূপতো দস্সেন্তী ‘‘উদুক্খলেন মুসলেন, পতিনা খুজ্জকেন চা’’তি আহ. উদুক্খলে হি ধঞ্ঞং পক্খিপন্তিযা পরিৰত্তেন্তিযা মুসলেন কোট্টেন্তিযা চ পিট্ঠি ওনামেতব্বা হোতীতি খুজ্জকরণহেতুতায তদুভযং ‘‘খুজ্জ’’ন্তি ৰুত্তং. সামিকো পনস্সা খুজ্জো এৰ. ইদানি যস্সা মুত্তিযা নিদস্সনৰসেন তীহি খুজ্জেহি মুত্তি ৰুত্তা. তমেৰ দস্সেন্তী ‘‘মুত্তাম্হি জাতিমরণা’’তি ৰত্ৰা তত্থ কারণমাহ ‘‘ভৰনেত্তি সমূহতা’’তি. তস্সত্থো – ন কেৰলমহং তীহি খুজ্জেহি এৰ মুত্তা, অথ খো সব্বস্মা জাতিমরণাপি, যস্মা সব্বস্সাপি ভৰস্স নেত্তি নাযিকা তণ্হা অগ্গমগ্গেন মযা সমুগ্ঘাটিতাতি.

মুত্তাথেরীগাথাৰণ্ণনা নিট্ঠিতা.