১. অঞ্ঞতরাথেরীগাথাৰণ্ণনা

ইদানি থেরীগাথানং অত্থসংৰণ্ণনায ওকাসো অনুপ্পত্তো. তত্থ যস্মা ভিক্খুনীনং আদিতো যথা পব্বজ্জা উপসম্পদা চ পটিলদ্ধা, তং পকাসেত্ৰা অত্থসংৰণ্ণনায করীযমানায তত্থ তত্থ গাথানং অট্ঠুপ্পত্তিং ৰিভাৰেতুং সুকরা হোতি সুপাকটা চ, তস্মা তং পকাসেতুং আদিতো পট্ঠায সঙ্খেপতো অযং অনুপুব্বিকথা –

অযঞ্হি লোকনাথো ‘‘মনুস্সত্তং লিঙ্গসম্পত্তী’’ত্যাদিনা ৰুত্তানি অট্ঠঙ্গানি সমোধানেত্ৰা দীপঙ্করস্স ভগৰতো পাদমূলে কতমহাভিনীহারো সমতিংসপারমিযো পূরেন্তো চতুৰীসতিযা বুদ্ধানং সন্তিকে লদ্ধব্যাকরণো অনুক্কমেন পারমিযো পূরেত্ৰা ঞাতত্থচরিযায লোকত্থচরিযায বুদ্ধত্থচরিযায চ কোটিং পত্ৰা তুসিতভৰনে নিব্বত্তিত্ৰা তত্থ যাৰতাযুকং ঠত্ৰা দসসহস্সচক্কৰাল়দেৰতাহি বুদ্ধভাৰায –

‘‘কালো খো তে মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি. (বু. ৰং. ১.৬৭) –

আযাচিতমনুস্সূপপত্তিকো তাসং দেৰতানং পটিঞ্ঞং দত্ৰা, কতপঞ্চমহাৰিলোকনো সক্যরাজকুলে সুদ্ধোদনমহারাজস্স গেহে সতো সম্পজানো মাতুকুচ্ছিং ওক্কন্তো দসমাসে সতো সম্পজানো তত্থ ঠত্ৰা, সতো সম্পজানো ততো নিক্খন্তো লুম্বিনীৰনে লদ্ধাভিজাতিকো ৰিৰিধা ধাতিযো আদিং কত্ৰা মহতা পরিহারেন সম্মদেৰ পরিহরিযমানো অনুক্কমেন ৰুড্ঢিপ্পত্তো তীসু পাসাদেসু ৰিৰিধনাটকজনপরিৰুতো দেৰো ৰিয সম্পত্তিং অনুভৰন্তো জিণ্ণব্যাধিমতদস্সনেন জাতসংৰেগো ঞাণস্স পরিপাকতং গতত্তা, কামেসু আদীনৰং নেক্খম্মে চ আনিসংসং দিস্ৰা, রাহুলকুমারস্স জাতদিৰসে ছন্নসহাযো কণ্ডকং অস্সরাজং আরুয্হ, দেৰতাহি ৰিৰটেন দ্ৰারেন অড্ঢরত্তিকসমযে মহাভিনিক্খমনং নিক্খমিত্ৰা, তেনেৰ রত্তাৰসেসেন তীণি রজ্জানি অতিক্কমিত্ৰা অনোমানদীতীরং পত্ৰা ঘটিকারমহাব্রহ্মুনা আনীতে অরহত্তদ্ধজে গহেত্ৰা পব্বজিতো, তাৰদেৰ ৰস্সসট্ঠিকত্থেরো ৰিয আকপ্পসম্পন্নো হুত্ৰা, পাসাদিকেন ইরিযাপথেন অনুক্কমেন রাজগহং পত্ৰা, তত্থ পিণ্ডায চরিত্ৰা পণ্ডৰপব্বতপব্ভারে পিণ্ডপাতং পরিভুঞ্জিত্ৰা, মাগধরাজেন রজ্জেন নিমন্তিযমানো তং পটিক্খিপিত্ৰা, ভগ্গৰস্সারামং গন্ত্ৰা, তস্স সমযং পরিগ্গণ্হিত্ৰা ততো আল়ারুদকানং সমযং পরিগ্গণ্হিত্ৰা, তং সব্বং অনলঙ্করিত্ৰা অনুক্কমেন উরুৰেলং গন্ত্ৰা তত্থ ছব্বস্সানি দুক্করকারিকং কত্ৰা, তায অরিযধম্মপটিৰেধস্সাভাৰং ঞত্ৰা ‘‘নাযং মগ্গো বোধাযা’’তি ওল়ারিকং আহারং আহরন্তো কতিপাহেন বলং গাহেত্ৰা ৰিসাখাপুণ্ণমদিৰসে সুজাতায দিন্নং ৰরভোজনং ভুঞ্জিত্ৰা, সুৰণ্ণপাতিং নদিযা পটিসোতং খিপিত্ৰা, ‘‘অজ্জ বুদ্ধো ভৰিস্সামী’’তি কতসন্নিট্ঠানো সাযন্হসমযে কাল়েন নাগরাজেন অভিত্থুতিগুণো বোধিমণ্ডং আরুয্হ অচলট্ঠানে পাচীনলোকধাতুঅভিমুখো অপরাজিতপল্লঙ্কে নিসিন্নো চতুরঙ্গসমন্নাগতং ৰীরিযং অধিট্ঠায, সূরিযে অনত্থঙ্গতেযেৰ মারবলং ৰিধমিত্ৰা, পঠমযামে পুব্বেনিৰাসং অনুস্সরিত্ৰা, মজ্ঝিমযামে দিব্বচক্খুং ৰিসোধেত্ৰা, পচ্ছিমযামে পটিচ্চসমুপ্পাদে ঞাণং ওতারেত্ৰা, অনুলোমপটিলোমং পচ্চযাকারং সম্মসন্তো ৰিপস্সনং ৰড্ঢেত্ৰা সব্ববুদ্ধেহি অধিগতং অনঞ্ঞসাধারণং সম্মাসম্বোধিং অধিগন্ত্ৰা, নিব্বানারম্মণায ফলসমাপত্তিযা তত্থেৰ সত্তাহং ৰীতিনামেত্ৰা, তেনেৰ নযেন ইতরসত্তাহেপি বোধিমণ্ডেযেৰ ৰীতিনামেত্ৰা, রাজাযতনমূলে মধুপিণ্ডিকভোজনং ভুঞ্জিত্ৰা, পুন অজপালনিগ্রোধমূলে নিসিন্নো ধম্মতায ধম্মগম্ভীরতং পচ্চৰেক্খিত্ৰা অপ্পোস্সুক্কতায চিত্তে নমন্তে মহাব্রহ্মুনা আযাচিতো বুদ্ধচক্খুনা লোকং ৰোলোকেন্তো তিক্খিন্দ্রিযমুদিন্দ্রিযাদিভেদে সত্তে দিস্ৰা মহাব্রহ্মুনা ধম্মদেসনায কতপটিঞ্ঞো ‘‘কস্স নু খো অহং পঠমং ধম্মং দেসেয্য’’ন্তি আৰজ্জেন্তো আল়ারুদকানং কালঙ্কতভাৰং ঞত্ৰা, ‘‘বহুপকারা খো মে পঞ্চৰগ্গিযা ভিক্খূ, যে মং পধানপহিতত্তং উপট্ঠহিংসু, যংনূনাহং পঞ্চৰগ্গিযানং ভিক্খূনং পঠমং ধম্মং দেসেয্য’’ন্তি (মহাৰ. ১০) চিন্তেত্ৰা, আসাল়্হিপুণ্ণমাযং মহাবোধিতো বারাণসিং উদ্দিস্স অট্ঠারসযোজনং মগ্গং পটিপন্নো অন্তরামগ্গে উপকেন আজীৰকেন সদ্ধিং মন্তেত্ৰা, অনুক্কমেন ইসিপতনং পত্ৰা তত্থ পঞ্চৰগ্গিযে সঞ্ঞাপেত্ৰা ‘‘দ্ৰেমে, ভিক্খৰে, অন্তা পব্বজিতেন ন সেৰিতব্বা’’তিআদিনা (মহাৰ. ১৩; সং. নি. ৫.১০৮১; পটি. ম. ২.৩০) ধম্মচক্কপৰত্তনসুত্তন্তদেসনায অঞ্ঞাসিকোণ্ডঞ্ঞপ্পমুখা অট্ঠারসব্রহ্মকোটিযো ধম্মামতং পাযেত্ৰা পাটিপদে ভদ্দিযত্থেরং, পক্খস্স দুতিযাযং ৰপ্পত্থেরং, পক্খস্স ততিযাযং মহানামত্থেরং, চতুত্থিযং অস্সজিত্থেরং, সোতাপত্তিফলে পতিট্ঠাপেত্ৰা, পঞ্চমিযং পন পক্খস্স অনত্তলক্খণসুত্তন্তদেসনায (মহাৰ. ২০; সং. নি. ৩.৫৯) সব্বেপি অরহত্তে পতিট্ঠাপেত্ৰা ততো পরং যসদারকপ্পমুখে পঞ্চপণ্ণাসপুরিসে, কপ্পাসিকৰনসণ্ডে তিংসমত্তে ভদ্দৰগ্গিযে, গযাসীসে পিট্ঠিপাসাণে সহস্সমত্তে পুরাণজটিলেতি এৰং মহাজনং অরিযভূমিং ওতারেত্ৰা বিম্বিসারপ্পমুখানি একাদসনহুতানি সোতাপত্তিফলে নহুতং সরণত্তযে পতিট্ঠাপেত্ৰা ৰেল়ুৰনং পটিগ্গহেত্ৰা তত্থ ৰিহরন্তো অস্সজিত্থেরস্স ৰাহসা অধিগতপঠমমগ্গে সঞ্চযং আপুচ্ছিত্ৰা, সদ্ধিং পরিসায অত্তনো সন্তিকং উপগতে সারিপুত্তমোগ্গল্লানে অগ্গফলং সচ্ছিকত্ৰা সাৰকপারমিযা মত্থকং পত্তে অগ্গসাৰকট্ঠানে ঠপেত্ৰা কাল়ুদাযিত্থেরস্স অভিযাচনায কপিলৰত্থুং গন্ত্ৰা, মানত্থদ্ধে ঞাতকে যমকপাটিহারিযেন দমেত্ৰা, পিতরং অনাগামিফলে, মহাপজাপতিং সোতাপত্তিফলে পটিট্ঠাপেত্ৰা, নন্দকুমারং রাহুলকুমারঞ্চ পব্বাজেত্ৰা, সত্থা পুনদেৰ রাজগহং পচ্চাগচ্ছি.

অথাপরেন সমযেন সত্থরি ৰেসালিং উপনিস্সায কূটাগারসালাযং ৰিহরন্তে সুদ্ধোদনমহারাজা সেতচ্ছত্তস্স হেট্ঠাৰ অরহত্তং সচ্ছিকত্ৰা পরিনিব্বাযি. অথ মহাপজাপতিযা গোতমিযা পব্বজ্জায চিত্তং উপ্পজ্জি, ততো রোহিনীনদীতীরে কলহৰিৰাদসুত্তন্তদেসনায (সু. নি. ৮৬৮ আদযো) পরিযোসানে নিক্খমিত্ৰা, পব্বজিতানং পঞ্চন্নং কুমারসতানং পাদপরিচারিকা একজ্ঝাসযাৰ হুত্ৰা মহাপজাপতিযা সন্তিকং গন্ত্ৰা, সব্বাৰ ‘‘সত্থু সন্তিকে পব্বজিস্সামা’’তি মহাপজাপতিং জেট্ঠিকং কত্ৰা সত্থু সন্তিকং গন্তুকামা অহেসুং. অযঞ্চ মহাপজাপতি পুব্বেপি একৰারং সত্থারং পব্বজ্জং যাচিত্ৰা নালত্থ, তস্মা কপ্পকং পক্কোসাপেত্ৰা কেসে ছিন্দাপেত্ৰা কাসাযানি অচ্ছাদেত্ৰা সব্বা তা সাকিযানিযো আদায ৰেসালিং গন্ত্ৰা আনন্দত্থেরেন দসবলং যাচাপেত্ৰা, অট্ঠগরুধম্মপটিগ্গহণেন পব্বজ্জং উপসম্পদঞ্চ অলত্থ. ইতরা পন সব্বাপি একতো উপসম্পন্না অহেসুং. অযমেত্থ সঙ্খেপো. ৰিত্থারতো পনেতং ৰত্থু তত্থ তত্থ পাল়িযং (চূল়ৰ. ৪০২) আগতমেৰ.

এৰং উপসম্পন্না পন মহাপজাপতি সত্থারং উপসঙ্কমিত্ৰা অভিৰাদেত্ৰা একমন্তং অট্ঠাসি. অথস্সা সত্থা ধম্মং দেসেসি. সা সত্থু সন্তিকে কম্মট্ঠানং গহেত্ৰা অরহত্তং পাপুণি. সেসা চ পঞ্চসতভিক্খুনিযো নন্দকোৰাদপরিযোসানে (ম. নি. ৩.৩৯৮) অরহত্তং পাপুণিংসু. এৰং ভিক্খুনিসঙ্ঘে সুপ্পতিট্ঠিতে পুথুভূতে তত্থ তত্থ গামনিগমজনপদরাজধানীসু কুলিত্থিযো কুলসুণ্হাযো কুলকুমারিকাযো বুদ্ধসুবুদ্ধতং ধম্মসুধম্মতং সঙ্ঘসুপ্পটিপত্তিতঞ্চ সুত্ৰা, সাসনে অভিপ্পসন্না সংসারে চ জাতসংৰেগা অত্তনো সামিকে মাতাপিতরো ঞাতকে চ অনুজানাপেত্ৰা, সাসনে উরং দত্ৰা পব্বজিংসু. পব্বজিত্ৰা চ সীলাচারসম্পন্না সত্থুনো চ তেসং থেরানঞ্চ সন্তিকে ওৰাদং লভিত্ৰা ঘটেন্তিযো ৰাযমন্তিযো নচিরস্সেৰ অরহত্তং সচ্ছাকংসু. তাহি উদানাদিৰসেন তত্থ তত্থ ভাসিতা গাথা পচ্ছা সঙ্গীতিকারকেহি একজ্ঝং কত্ৰা এককনিপাতাদিৰসেন সঙ্গীতিং আরোপযিংসু ‘‘ইমা থেরীগাথা নামা’’তি. তাসং নিপাতাদিৰিভাগো হেট্ঠা ৰুত্তোযেৰ. তত্থ নিপাতেসু এককনিপাতো আদি. তত্থপি –

১. ‘‘সুখং সুপাহি থেরিকে, কত্ৰা চোল়েন পারুতা;

উপসন্তো হি তে রাগো, সুক্খডাকংৰ কুম্ভিয’’ন্তি. –

অযং গাথা আদি. তস্সা কা উপ্পত্তি? অতীতে কির অঞ্ঞতরা কুলধীতা কোণাগমনস্স ভগৰতো কালে সাসনে অভিপ্পসন্না হুত্ৰা সত্থারং নিমন্তেত্ৰা দুতিযদিৰসে সাখামণ্ডপং কারেত্ৰা ৰালিকং অত্থরিত্ৰা উপরি ৰিতানং বন্ধিত্ৰা গন্ধপুপ্ফাদীহি পূজং কত্ৰা সত্থু কালং আরোচাপেসি. সত্থা তত্থ গন্ত্ৰা পঞ্ঞত্তে আসনে নিসীদি. সা ভগৰন্তং ৰন্দিত্ৰা পণীতেন খাদনীযেন ভোজনীযেন পরিৰিসিত্ৰা, ভগৰন্তং ভুত্তাৰিং ওনীতপত্তপাণিং তিচীৰরেন অচ্ছাদেসি. তস্সা ভগৰা অনুমোদনং কত্ৰা পক্কামি. সা যাৰতাযুকং পুঞ্ঞানি কত্ৰা আযুপরিযোসানে দেৰলোকে নিব্বত্তিত্ৰা একং বুদ্ধন্তরং সুগতীসু এৰ সংসরন্তী কস্সপস্স ভগৰতো কালে গহপতিকুলে নিব্বত্তিত্ৰা ৰিঞ্ঞুতং পত্ৰা, সংসারে জাতসংৰেগা সাসনে পব্বজিত্ৰা উপসম্পজ্জিত্ৰা ৰীসতিৰস্সহস্সানি ভিক্খুনিসীলং পূরেত্ৰা, পুথুজ্জনকালকিরিযং কত্ৰা, সগ্গে নিব্বত্তা একং বুদ্ধন্তরং সগ্গসম্পত্তিং অনুভৰিত্ৰা ইমস্মিং বুদ্ধুপ্পাদে ৰেসালিযং খত্তিযমহাসালকুলে নিব্বত্তি. তং থিরসন্তসরীরতায থেরিকাতি ৰোহরিংসু. সা ৰযপ্পত্তা কুলপ্পদেসাদিনা সমানজাতিকস্স খত্তিযকুমারস্স মাতাপিতূহি দিন্না পতিদেৰতা হুত্ৰা ৰসন্তী সত্থু ৰেসালিগমনে সাসনে পটিলদ্ধসদ্ধা উপাসিকা হুত্ৰা, অপরভাগে মহাপজাপতিগোতমীথেরিযা সন্তিকে ধম্মং সুত্ৰা পব্বজ্জায রুচিং উপ্পাদেত্ৰা ‘‘অহং পব্বজিস্সামী’’তি সামিকস্সারোচেসি. সামিকো নানুজানাতি. সা পন কতাধিকারতায যথাসুতং ধম্মং পচ্চৰেক্খিত্ৰা রূপারূপধম্মে পরিগ্গহেত্ৰা ৰিপস্সনং অনুযুত্তা ৰিহরতি.

অথেকদিৰসং মহানসে ব্যঞ্জনে পচ্চমানে মহতী অগ্গিজালা উট্ঠহি. সা অগ্গিজালা সকলভাজনং তটতটাযন্তং ঝাযতি. সা তং দিস্ৰা তদেৰারম্মণং কত্ৰা সুট্ঠুতরং অনিচ্চতং উপট্ঠহন্তং উপধারেত্ৰা ততো তত্থ দুক্খানিচ্চানত্ততঞ্চ আরোপেত্ৰা ৰিপস্সনং ৰড্ঢেত্ৰা অনুক্কমেন উস্সুক্কাপেত্ৰা মগ্গপটিপাটিযা অনাগামিফলে পতিট্ঠহি. সা ততো পট্ঠায আভরণং ৰা অলঙ্কারং ৰা ন ধারেতি. সা সামিকেন ‘‘কস্মা ত্ৰং, ভদ্দে, ইদানি পুব্বে ৰিয আভরণং ৰা অলঙ্কারং ৰা ন ধারেসী’’তি ৰুত্তা অত্তনো গিহিভাৰে অভব্বভাৰং আরোচেত্ৰা পব্বজ্জং অনুজানাপেসি. সো ৰিসাখো উপাসকো ৰিয ধম্মদিন্নং মহতা পরিহারেন মহাপজাপতিগোতমিযা সন্তিকং নেত্ৰা ‘‘ইমং, অয্যে, পব্বাজেথা’’তি আহ. অথ মহাপজাপতিগোতমী তং পব্বাজেত্ৰা উপসম্পাদেত্ৰা ৰিহারং নেত্ৰা সত্থারং দস্সেসি. সত্থাপিস্সা পকতিযা দিট্ঠারম্মণমেৰ ৰিভাৰেন্তো ‘‘সুখং সুপাহী’’তি গাথমাহ.

তত্থ সুখন্তি ভাৰনপুংসকনিদ্দেসো. সুপাহীতি আণত্তিৰচনং. থেরিকেতি আমন্তনৰচনং. কত্ৰা চোল়েন পারুতাতি অপ্পিচ্ছতায নিযোজনং. উপসন্তো হি তে রাগোতি পটিপত্তিকিত্তনং. সুক্খডাকংৰাতি উপসমেতব্বস্স কিলেসস্স অসারভাৰনিদস্সনং. কুম্ভিযন্তি তদাধারস্স অনিচ্চতুচ্ছাদিভাৰনিদস্সনং.

সুখন্তি চেতং ইট্ঠাধিৰচনং. সুখেন নিদুক্খা হুত্ৰাতি অত্থো. সুপাহীতি নিপজ্জনিদস্সনঞ্চেতং চতুন্নং ইরিযাপথানং, তস্মা চত্তারোপি ইরিযাপথে সুখেনেৰ কপ্পেহি সুখং ৰিহরাতি অত্থো. থেরিকেতি ইদং যদিপি তস্সা নামকিত্তনং, পচুরেন অন্ৰত্থসঞ্ঞাভাৰতো পন থিরে সাসনে থিরভাৰপ্পত্তে, থিরেহি সীলাদিধম্মেহি সমন্নাগতেতি অত্থো. কত্ৰা চোল়েন পারুতাতি পংসুকূলচোল়েহি চীৰরং কত্ৰা অচ্ছাদিতসরীরা তং নিৰত্থা চেৰ পারুতা চ. উপসন্তো হি তে রাগোতি হি-সদ্দো হেত্ৰত্থো. যস্মা তৰ সন্তানে উপ্পজ্জনককামরাগো উপসন্তো অনাগামিমগ্গঞাণগ্গিনা দড্ঢো, ইদানি তদৰসেসং রাগং অগ্গমগ্গঞাণগ্গিনা দহেত্ৰা সুখং সুপাহীতি অধিপ্পাযো. সুক্খডাকংৰ কুম্ভিযন্তি যথা তং পক্কে ভাজনে অপ্পকং ডাকব্যঞ্জনং মহতিযা অগ্গিজালায পচ্চমানং ঝাযিত্ৰা সুস্সন্তং ৰূপসম্মতি, যথা ৰা উদকমিস্সে ডাকব্যঞ্জনে উদ্ধনং আরোপেত্ৰা পচ্চমানে উদকে ৰিজ্জমানে তং চিচ্চিটাযতি চিটিচিটাযতি, উদকে পন ছিন্নে উপসন্তমেৰ হোতি, এৰং তৰ সন্তানে কামরাগো উপসন্তো, ইতরম্পি ৰূপসমেত্ৰা সুখং সুপাহীতি.

থেরী ইন্দ্রিযানং পরিপাকং গতত্তা সত্থু দেসনাৰিলাসেন চ গাথাপরিযোসানে সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.১.২৬-৩০).

‘‘কোণাগমনবুদ্ধস্স, মণ্ডপো কারিতো মযা;

ধুৰং তিচীৰরংদাসিং, বুদ্ধস্স লোকবন্ধুনো.

‘‘যং যং জনপদং যামি, নিগমে রাজধানিযো;

সব্বত্থ পূজিতো হোমি, পুঞ্ঞকম্মস্সিদং ফলং.

‘‘কিলেসা ঝাপিতা ময্হং, ভৰা সব্বে সমূহতা;

নাগীৰ বন্ধনং ছেত্ৰা, ৰিহরামি অনাসৰা.

‘‘স্ৰাগতং ৰত মে আসি, বুদ্ধসেট্ঠস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

অরহত্তং পন পত্ৰা থেরী উদানেন্তী তমেৰ গাথং অভাসি, তেনাযং গাথা তস্সা থেরিযা গাথা অহোসি. তত্থ থেরিযা ৰুত্তগাথায অনৰসেসো রাগো পরিগ্গহিতো অগ্গমগ্গেন তস্স ৰূপসমস্স অধিপ্পেতত্তা. রাগৰূপসমেনেৰ চেত্থ সব্বেসম্পি কিলেসানং ৰূপসমো ৰুত্তোতি দট্ঠব্বং তদেকট্ঠতায সব্বেসং কিলেসধম্মানং ৰূপসমসিদ্ধিতো. তথা হি ৰুচ্চতি –

‘‘উদ্ধচ্চৰিচিকিচ্ছাহি, যো মোহো সহজো মতো;

পহানেকট্ঠভাৰেন, রাগেন সরণো হি সো’’তি.

যথা চেত্থ সব্বেসং সংকিলেসানং ৰূপসমো ৰুত্তো, এৰং সব্বত্থাপি তেসং ৰূপসমো ৰুত্তোতি ৰেদিতব্বং. পুব্বভাগে তদঙ্গৰসেন, সমথৰিপস্সনাক্খণে ৰিক্খম্ভনৰসেন, মগ্গক্খণে সমুচ্ছেদৰসেন, ফলক্খণে পটিপ্পস্সদ্ধিৰসেন ৰূপসমসিদ্ধিতো. তেন চতুব্বিধস্সাপি পহানস্স সিদ্ধি ৰেদিতব্বা. তত্থ তদঙ্গপ্পহানেন সীলসম্পদাসিদ্ধি, ৰিক্খম্ভনপহানেন সমাধিসম্পদাসিদ্ধি, ইতরেহি পঞ্ঞাসম্পদাসিদ্ধি দস্সিতা হোতি পহানাভিসমযোপসিজ্ঝনতো. যথা ভাৰনাভিসমযং সাধেতি তস্মিং অসতি তদভাৰতো, তথা সচ্ছিকিরিযাভিসমযং পরিঞ্ঞাভিসমযঞ্চ সাধেতি এৰাতি. চতুরাভিসমযসিদ্ধিযা তিস্সো সিক্খা, পটিপত্তিযা তিৰিধকল্যাণতা, সত্তৰিসুদ্ধিযো চ পরিপুণ্ণা ইমায গাথায পকাসিতা হোন্তীতি ৰেদিতব্বং. অঞ্ঞতরাথেরী অপঞ্ঞাতা নামগোত্তাদিৰসেন অপাকটা, একা থেরী লক্খণসম্পন্না ভিক্খুনী ইমং গাথং অভাসীতি অধিপ্পাযো.

অঞ্ঞতরাথেরীগাথাৰণ্ণনা নিট্ঠিতা.