৮. নিসভত্থেরগাথাৰণ্ণনা

পঞ্চ কামগুণে হিত্ৰাতি আযস্মতো নিসভত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং পিণ্ডায চরন্তং দিস্ৰা পসন্নচিত্তো কপিত্থফলমদাসি. সো তেন পুঞ্ঞকম্মেন সুগতীসুযেৰ সংসরন্তো ইমস্মিং বুদ্ধুপ্পাদে কোলিযজনপদে কুলগেহে নিব্বত্তিত্ৰা নিসভোতি লদ্ধনামো ৰযপ্পত্তো সাকিযকোলিযানং সঙ্গামে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা তদহেৰ অরহত্তং পাপুণি. তেন ৰুত্তং অপদানে (অপ. থের ২.৫২.৭-১১) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, কপিত্থং অদদিং ফলং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অরহত্তং পন পত্ৰা অত্তনো সহাযভিক্খূ পমাদৰিহারেন কালং ৰীতিনামেন্তে দিস্ৰা তে ওৰদন্তো –

১৯৫. ‘‘পঞ্চ কামগুণে হিত্ৰা, পিযরূপে মনোরমে;

সদ্ধায ঘরা নিক্খম্ম, দুক্খস্সন্তকরো ভৰে’’তি. –

পঠমং গাথং অভাসি.

তস্সত্থো – বালপুথুজ্জনস্স পিযাযিতব্বসভাৰতায পিযরূপে মনুঞ্ঞসভাৰতায মনোরমে রূপাদিকে পঞ্চ কামগুণে কামকোট্ঠাসে হিত্ৰা পহায পরিচ্চজিত্ৰা কম্মফলসদ্ধায রতনত্তযসদ্ধায চ ৰসেন ঘরা ঘরবন্ধনতো নিক্খম্ম নিক্খমিত্ৰা পব্বজ্জং উপগতো ৰিঞ্ঞুজাতিকো পব্বজিতকালতো পট্ঠায ঘটেন্তো ৰাযমন্তো ৰট্টদুক্খস্স অন্তকরো ভৰে ভৰেয্যাতি. এৰং তে ভিক্খূ ওৰদিত্ৰা ‘‘অযং পরে এৰ সঞ্ঞাপেন্তো ৰিহরতি, ‘‘সযং পন অকারকো’তি মা চিন্তযিত্থা’’তি তেসং অত্তনো পটিপন্নভাৰং পকাসেন্তো –

১৯৬. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, সম্পজানো পতিস্সতো’’তি. –

দুতিযগাথায অঞ্ঞং ব্যাকাসি. তত্থ নাভিনন্দামি মরণন্তি মরণং ন অভিকঙ্খামি. নাভিনন্দামি জীৰিতন্তি ইদং পন তস্স কারণৰচনং, যস্মা নাভিনন্দামি জীৰিতং, তস্মা নাভিনন্দামি মরণন্তি. যো হি আযতিং জাতিজরামরণায কিলেসাভিসঙ্খারে আচিনোতি উপচিনোতি, সো পুনব্ভৰাভিনিব্বত্তিং অভিনন্দন্তো নান্তরিযকতায অত্তনো মরণম্পি অভিনন্দতি নাম কারণস্স অপ্পহীনত্তা, খীণাসৰো পন সব্বসো আচযগামিধম্মে পহায অপচযগামিধম্মে পতিট্ঠিতো পরিঞ্ঞাতৰত্থুকো সব্বসো জীৰিতং অনভিনন্দন্তো মরণম্পি অনভিনন্দতি নাম কারণস্স এৰ সুপ্পহীনত্তা. তেনাহ – ‘‘নাভিনন্দামি মরণং, নাভিনন্দামি জীৰিত’’ন্তি. যদি এৰং খীণাসৰস্স পরিনিব্বানাভিকঙ্খা, যাৰ পরিনিব্বানা অৰট্ঠানঞ্চ কথন্তি আহ ‘‘কালঞ্চ পটিকঙ্খামি, সম্পজানো পতিস্সতো’’তি, কিলেসপরিনিব্বানে সিদ্ধে সতিপঞ্ঞাৰেপুল্লপ্পত্তিযা সতো সম্পজানো কেৰলং খন্ধপরিনিব্বানকালং পটিকঙ্খামি, তং উদিক্খমানো আগমযমানো ৰিহরামি, ন পন মে মরণে জীৰিতে ৰা অভিনন্দনা অত্থি অরহত্তমগ্গেনেৰ তস্স সমুগ্ঘাটিতত্তাতি.

নিসভত্থেরগাথাৰণ্ণনা নিট্ঠিতা.