৭. সোণপোটিরিযপুত্তত্থেরগাথাৰণ্ণনা

ন তাৰ সুপিতুং হোতীতি আযস্মতো সোণস্স পোটিরিযপুত্তস্স গাথা. কা উপ্পত্তি? অযম্পি পুরিমবুদ্ধেসু কতাধিকারো সিখিস্স ভগৰতো কালে ৰনচরো হুত্ৰা জীৰন্তো একদিৰসং সত্থারং দিস্ৰা পসন্নচিত্তো কুরঞ্জিযফলং সত্থুনো অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুস্মিং পোটিরিযস্স নাম গামভোজকস্স পুত্তো হুত্ৰা নিব্বত্তি, সোণোতিস্স নামং অহোসি. সো ৰযপ্পত্তো ভদ্দিযস্স সাকিযরঞ্ঞো সেনাপতি অহোসি. অথ ভদ্দিযরাজে হেট্ঠা ৰুত্তনযেন পব্বজিতে, সেনাপতি ‘‘রাজাপি নাম পব্বজি, কিং ময্হং ঘরাৰাসেনা’’তি পব্বজি? পব্বজিত্ৰা পন নিদ্দারামো ৰিহরতি, ন ভাৰনমনুযুঞ্জতি. তং ভগৰা অনুপিযাযং অম্বৰনে ৰিহরন্তো অত্তনো ওভাসং ফরাপেত্ৰা তেনস্স সতিং জনেত্ৰা ইমায গাথায তং ওৰদন্তো –

১৯৩. ‘‘ন তাৰ সুপিতুং হোতি, রত্তি নক্খত্তমালিনী;

পটিজগ্গিতুমেৰেসা, রত্তি হোতি ৰিজানতা.

১৯৪. ‘‘হত্থিক্খন্ধাৰপতিতং, কুঞ্জরো চে অনুক্কমে;

সঙ্গামে মে মতং সেয্যো, যঞ্চে জীৰে পরাজিতো’’তি. – গাথাদ্ৰযং অভাসি;

তত্থ ন তাৰ সুপিতুং হোতি, রত্তি নক্খত্তমালিনীতি অট্ঠহি অক্খণেহি ৰজ্জিতং নৰমং খণং লভিত্ৰা ঠিতস্স ৰিঞ্ঞুজাতিকস্স যাৰ ন অরহত্তং হত্থগতং হোতি, তাৰ অযং নক্খত্তমালিনী রত্তি সুপিতুং নিদ্দাযিতুং ন হোতি, সুপনস্স কালো ন হোতি. অপিচ খো পটিজগ্গিতুমেৰেসা, রত্তি হোতি ৰিজানতাতি এসা রত্তি নাম মনুস্সানং মিগপক্খীনঞ্চ নিদ্দূপগমনেন ৰিসেসতো নিস্সদ্দৰেলাভূতা পটিপত্তিং অত্তনি সঞ্জগ্গিতুং জাগরিযানুযোগমনুযুঞ্জিতুমেৰ ৰিজানতা ৰিঞ্ঞুনা ইচ্ছিতা হোতীতি.

তং সুত্ৰা সোণো সংৰিগ্গতরমানসো হিরোত্তপ্পং পচ্চুপট্ঠপেত্ৰা অব্ভোকাসিকঙ্গং অধিট্ঠায ৰিপস্সনায কম্মং করোন্তো ‘‘হত্থিক্খন্ধোৰ পতিত’’ন্তি দুতিযং গাথমাহ. তত্থ অৰপতিতন্তি অৰমুখং পতিতং উদ্ধংপাদং অধোমুখং পতিতং. কুঞ্জরো চে অনুক্কমেতি কুঞ্জরো অনুক্কমেয্য চে. ইদং ৰুত্তং হোতি – যদাহং হত্থিমারুহিত্ৰা সঙ্গামং পৰিট্ঠো হত্থিক্খন্ধতো পতিতো, তদাহং সঙ্গামে তেন হত্থিনা মদ্দিতো মতো অহোসিং চে, তং মে মরণং সেয্যো, যঞ্চে ইদানি কিলেসেহি পরাজিতো জীৰেয্যং, তং ন সেয্যোতি. ইমং গাথং ৰদন্তোযেৰ ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৫২.১-৬) –

‘‘মিগলুদ্দো পুরে আসিং, ৰিপিনে ৰিচরং অহং;

অদ্দসং ৰিরজং বুদ্ধং, সব্বধম্মান পারগুং.

‘‘কুরঞ্জিযফলং গয্হ, বুদ্ধসেট্ঠস্সদাসহং;

পুঞ্ঞক্খেত্তস্স তাদিনো, পসন্নো সেহি পাণিভি.

‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ‘‘সত্থারা ৰুত্তং, অত্তনা ৰুত্ত’’ন্তি উভযঞ্হি গাথং ‘‘হত্থিক্খন্ধাৰপতিত’’ন্তিআদিনা পচ্চুদাহাসি. তেন ইদমেৰ অঞ্ঞাব্যাকরণং অহোসীতি.

সোণপোটিরিযপুত্তত্থেরগাথাৰণ্ণনা নিট্ঠিতা.