৬. নিতকত্থেরগাথাৰণ্ণনা

কস্স সেলূপমং চিত্তন্তি আযস্মতো নিতকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ৰিপস্সিস্স ভগৰতো কালে বন্ধুমতীনগরে আরামগোপকো হুত্ৰা জীৰন্তো একদিৰসং ভগৰন্তং আকাসেন গচ্ছন্তং দিস্ৰা পসন্নমানসো নাল়িকেরফলং দাতুকামো অহোসি. সত্থা তং অনুগ্গণ্হন্তো আকাসেযেৰ ঠত্ৰা পটিগ্গণ্হি. সো তং দত্ৰা উল়ারং পীতিসোমনস্সং পটিসংৰেদি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে ব্রাহ্মণকুলে নিব্বত্তিত্ৰা নিতকোতি লদ্ধনামো ৰিঞ্ঞুতং পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা কম্মট্ঠানং গহেত্ৰা অরঞ্ঞে ৰিহরন্তো ঘটেন্তো অরহত্তং পাপুণি. তেন ৰুত্তং অপদানে (অপ. থের ২.৫১.৯১-৯৯) –

‘‘নগরে বন্ধুমতিযা, আরামিকো অহং তদা;

অদ্দসং ৰিরজং বুদ্ধং, গচ্ছন্তং অনিলঞ্জসে.

‘‘নাল়িকেরফলং গয্হ, বুদ্ধসেট্ঠস্সদাসহং;

আকাসে ঠিতকো সন্তো, পটিগ্গণ্হি মহাযসো.

‘‘ৰিত্তিসঞ্জননো ময্হং, দিট্ঠধম্মসুখাৰহো;

ফলং বুদ্ধস্স দত্ৰান, ৰিপ্পসন্নেন চেতসা.

‘‘অধিগচ্ছিং তদা পীতিং, ৰিপুলঞ্চ সুখুত্তমং;

উপ্পজ্জতেৰ রতনং, নিব্বত্তস্স তহিং তহিং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘দিব্বচক্খু ৰিসুদ্ধং মে, সমাধিকুসলো অহং;

অভিঞ্ঞাপারমিপ্পত্তো, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরে ফলসুখেন নিব্বানসুখেন ৰিহরন্তে পধানপরিগ্গাহকো থেরো তং আরঞ্ঞাযতনং গন্ত্ৰা তত্থ ৰসন্তানং ভিক্খূনং পরিগ্গণ্হনত্থং ‘‘কস্স সেলূপম’’ন্তিআদিনা পঠমং গাথমাহ.

১৯১. তত্থ কস্স সেলূপমং চিত্তং, ঠিতং নানুপকম্পতীতি ইমস্মিং অরঞ্ঞাযতনে ৰসন্তেসু কস্স ভিক্খুনো চিত্তং অগ্গফলাধিগমেন একঘনসিলামযপব্বতূপমং সব্বেসং ইঞ্জনানং অভাৰতো ৰসীভাৰপ্পত্তিযা চ ঠিতং সব্বেহিপি লোকধম্মেহি নানুকম্পতি ন ৰেধতি. ইদানিস্স অকম্পনাকারং সদ্ধিং কারণেন দস্সেতুং ‘‘ৰিরত্ত’’ন্তিআদি ৰুত্তং. তত্থ ৰিরত্তং রজনীযেসূতি ৰিরাগসঙ্খাতেন অরিযমগ্গেন রজনীযেসু রাগুপ্পত্তিহেতুভূতেসু তেভূমকধম্মেসু ৰিরত্তং, তত্থ সব্বসো সমুচ্ছিন্নরাগন্তি অত্থো. কুপ্পনীযেতি পটিঘট্ঠানীযে, সব্বস্মিম্পি আঘাতৰত্থুস্মিং. ন কুপ্পতীতি ন দুস্সতি ন ৰিকারং আপজ্জতি. যস্সেৰং ভাৰিতং চিত্তন্তি যস্স অরিযপুগ্গলস্স চিত্তং মনো এৰং ৰুত্তনযেন তাদিভাৰেন ভাৰিতং, কুতো তং দুক্খমেস্সতীতি তং পুগ্গলং কুতো সত্ততো সঙ্খারতো ৰা দুক্খং উপগমিস্সতি, ন তাদিসস্স দুক্খং অত্থীতি অত্থো.

১৯২. এৰং অনিযমৰসেন পুচ্ছিতমত্থং নিতকত্থেরো অত্তূপনাযিকং কত্ৰা ৰিস্সজ্জেন্তো ‘‘মম সেলূপমং চিত্ত’’ন্তিআদিনা দুতিযগাথায অঞ্ঞং ব্যাকাসি. তং ৰুত্তত্থমেৰ.

নিতকত্থেরগাথাৰণ্ণনা নিট্ঠিতা.