৪. ইসিদিন্নত্থেরগাথাৰণ্ণনা

দিট্ঠা মযাতি আযস্মতো ইসিদিন্নত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো বীজনিং গহেত্ৰা বোধিযা পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সুনাপরন্তজনপদে সেট্ঠিকুলে নিব্বত্তিত্ৰা ইসিদিন্নোতি লদ্ধনামো ৰযপ্পত্তো সত্থু চন্দনমাল়পটিগ্গহণে পাটিহারিযং দিস্ৰা পসন্নমানসো সত্থারং উপসঙ্কমিত্ৰা ধম্মং সুত্ৰা সোতাপন্নো হুত্ৰা অগারং অজ্ঝাৰসতি. তস্স হিতানুকম্পিনী দেৰতা তং চোদেন্তী –

১৮৭. ‘‘দিট্ঠা মযা ধম্মধরা উপাসকা, কামা অনিচ্চা ইতি ভাসমানা;

সারত্তরত্তা মণিকুণ্ডলেসু, পুত্তেসু দারেসু চ তে অপেক্খা.

১৮৮. ‘‘অদ্ধা ন জানন্তি যতোধ ধম্মং, কামা অনিচ্চা ইতি চাপি আহু;

রাগঞ্চ তেসং ন বলত্থি ছেত্তুং, তস্মা সিতা পুত্তদারং ধনঞ্চা’’তি. –

গাথাদ্ৰযমভাসি.

তত্থ দিট্ঠা মযা ধম্মধরা উপাসকা, কামা অনিচ্চা ইতি ভাসমানাতি ইধেকচ্চে পরিযত্তিধম্মধরা উপাসকা মযা দিট্ঠা, পরিযত্তিধম্মধরত্তা এৰ ‘‘কামা নামেতে অনিচ্চা দুক্খা ৰিপরিণামধম্মা’’তি কামেসু আদীনৰপটিসংযুত্তং ধম্মং ভাসমানা, সযং পন সারত্তরত্তা মণিকুণ্ডলেসু, পুত্তেসু দারেসু চ তে অপেক্খাতি সারত্তা হুত্ৰা বহলরাগরত্তা মণীসু কুণ্ডলেসু চ, মণিচিতেসু ৰা কুণ্ডলেসু, পুত্তেসু পুত্তধীতাসু দারেসু চ অধিগতস্নেহা, অঞ্ঞং ভণন্তা অঞ্ঞং করোন্তা দিট্ঠা মযাতি অত্থো.

যতোতি যস্মা তে উপাসকা সারত্তরত্তা মণিকুণ্ডলেসু পুত্তেসু দারেসু চ অপেক্খৰন্তো, তস্মা ইধ ইমস্মিং বুদ্ধসাসনে ধম্মং যাথাৰতো অদ্ধা একংসেন ন জানন্তি. এৰং ভূতা চ ‘‘কামা অনিচ্চা’’ইতি চাপি আহু অহোসি, সত্তপকতি ৰিচিত্তসভাৰাতি অধিপ্পাযো. রাগঞ্চ তেসং ন বলত্থি ছেত্তুন্তি তেসং উপাসকানং যস্মা রাগং ছেত্তুং সমুচ্ছিন্দিতুং তাদিসং ঞাণবলং নত্থি, তস্মা তেন কারণেন সিতা তণ্হাৰসেন নিস্সিতা পুত্তদারং ধনঞ্চ অল্লীনা ন ৰিস্সজ্জেন্তীতি সব্বমেতং দেৰতা তংযেৰ উপাসকং উদ্দিস্স অঞ্ঞাপদেসেন কথেসি. তং সুত্ৰা উপাসকো সংৰেগজাতো পব্বজিত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৮.৪৬-৫০) –

‘‘ৰিপস্সিনো ভগৰতো, বোধিযা পাদপুত্তমে;

সুমনো বীজনিং গয্হ, অবীজিং বোধিমুত্তমং.

‘‘একনৰুতিতো কপ্পে, অবীজিং বোধিমুত্তমং;

দুগ্গতিং নাভিজানামি, বীজনায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তো ইমা এৰ গাথা অভাসীতি.

ইসিদিন্নত্থেরগাথাৰণ্ণনা নিট্ঠিতা.