১০. কপ্পটকুরত্থেরগাথাৰণ্ণনা

অযমিতি কপ্পটোতি আযস্মতো কপ্পটকুরত্থেরস্স গাথা. কা উপ্পত্তি. অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং ভগৰন্তং ৰিনতায নাম নদিযা তীরে অঞ্ঞতরস্মিং রুক্খমূলে নিসিন্নং দিস্ৰা পসন্নমানসো কেতকপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং দুগ্গতকুলে নিব্বত্তিত্ৰা যাৰ ৰযপ্পত্তি, তাৰ অঞ্ঞং উপাযং অজানন্তো কপ্পটখণ্ডনিৰাসনো সরাৰহত্থো তত্থ তত্থ কুরং পরিযেসন্তো ৰিচরি, তেন কপ্পটকুরোত্ৰেৰ পঞ্ঞাযিত্থ. সো ৰযপ্পত্তো তিণং ৰিক্কিণিত্ৰা জীৰিকং কপ্পেন্তো একদিৰসং তিণলাৰনত্থং অরঞ্ঞং গতো তত্থ অঞ্ঞতরং খীণাসৰত্থেরং দিস্ৰা তং উপসঙ্কমিত্ৰা ৰন্দিত্ৰা নিসীদি. তস্স থেরো ধম্মং কথেসি. সো ধম্মং সুত্ৰা পটিলদ্ধসদ্ধো ‘‘কিং মে ইমায কিচ্ছজীৰিকাযা’’তি পব্বজিত্ৰা অত্তনো নিৰত্থকপ্পটচোল়ং একস্মিং ঠানে নিক্খিপি. যদা চস্স অনভিরতি উপ্পজ্জতি, তদা তং কপ্পটং ওলোকেন্তস্স অনভিরতি ৰিগচ্ছতি, সংৰেগং পটিলভি. এৰং করোন্তো সত্তক্খত্তুং উপ্পব্বজি. তস্স তং কারণং ভিক্খূ ভগৰতো আরোচেসুং. অথেকদিৰসং কপ্পটকুরো ভিক্খু ধম্মসভাযং পরিসপরিযন্তে নিসিন্নো নিদ্দাযতি, তং ভগৰা চোদেন্তো –

১৯৯. ‘‘অযমিতি কপ্পটো কপ্পটকুরো, অচ্ছায অতিভরিতায;

অমতঘটিকাযং ধম্মকটমত্তো, কতপদং ঝানানি ওচেতুং.

২০০. ‘‘মা খো ত্ৰং কপ্পট পচালেসি, মা ত্ৰং উপকণ্ণম্হি তাল়েস্সং;

ন হি ত্ৰং কপ্পট মত্তমঞ্ঞাসি, সঙ্ঘমজ্ঝম্হি পচলাযমানো’’তি. –

গাথাদ্ৰযং অভাসি.

তত্থ অযমিতি কপ্পটো কপ্পটকুরোতি কপ্পটকুরো ভিক্খু ‘‘অযং মম কপ্পটো, ইমং পরিদহিত্ৰা যথা তথা জীৰামী’’তি এৰং উপ্পন্নমিচ্ছাৰিতক্কো অচ্ছায অতিভরিতায অমতঘটিকাযং মম অমতঘটে তহং তহং ৰস্সন্তে ‘‘অমতমধিগতং অহমনুসাসামি, অহং ধম্মং দেসেমি’’ (মহাৰ. ১২; ম. নি. ১.২৮৬; ২.৩৪২). ‘‘অন্ধীভূতস্মিং লোকস্মিং, আহঞ্ছং অমতদুন্দুভি’’ন্তিআদিনা (মহাৰ. ১১; ম. নি. ১.২৮৫; ২.৩৪১) ঘোসেত্ৰা মযা ধম্মামতে পৰস্সিযমানে কতপদং ঝানানি ওচেতুং লোকিযলোকুত্তরজ্ঝানানি উপচেতুং ভাৰেতুং কতপদং কটমগ্গৰিহিতভাৰনামগ্গং ইদং মম সাসনং, তথাপি ধম্মকটমত্তো মম সাসনধম্মতো উক্কণ্ঠচিত্তো অপগতমানসো কপ্পটকুরোতি তং চোদেত্ৰা পুনপিস্স সহোড্ঢং চোরং গণ্হন্তো ৰিয পমাদৰিহারং দস্সেন্তো ‘‘মা খো ত্ৰং, কপ্পট, পচালেসী’’তি গাথমাহ.

তত্থ মা খো ত্ৰং, কপ্পট, পচালেসীতি ত্ৰং, কপ্পটকুর, ‘‘মম ধম্মং সুণিস্সামী’’তি নিসীদিত্ৰা মা খো পচালেসি মা পচলাহি মা নিদ্দং উপগচ্ছি. মা ত্ৰং উপকণ্ণম্হি তাল়েস্সন্তি তং নিদ্দাযমানং উপকণ্ণম্হি কণ্ণসমীপে দেসনাহত্থেন অহং মা পতাল়েস্সং. যথা ইতো পরং কিলেসপ্পহানায অহং তং ন ওৰদেয্যং, তথা পটিপজ্জাহীতি অত্থো. ন হি ত্ৰং, কপ্পট, মত্তমঞ্ঞাসীতি ত্ৰং, কপ্পট, সঙ্ঘমজ্ঝম্হি পচলাযমানো মত্তং পমাণং ন ৰা মঞ্ঞসি, ‘‘অযমতিদুল্লভো খণো পটিলদ্ধো, সো মা উপজ্ঝগা’’তি এত্তকম্পি ন জানাসি, পস্স যাৰ চ তে অপরদ্ধন্তি চোদেসি.

এৰং ভগৰতা দ্ৰীহি গাথাহি গাল়্হং তং নিগ্গয্হ চোদনায কতায অট্ঠিৰেধৰিদ্ধো ৰিয চণ্ডগজো মগ্গং ওতরন্তো ৰিয চ সঞ্জাতসংৰেগো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫২.১৭-২২) –

‘‘ৰিনতানদিযা তীরে, ৰিহাসি পুরিসুত্তমো;

অদ্দসং ৰিরজং বুদ্ধং, একগ্গং সুসমাহিতং.

‘‘মধুগন্ধস্স পুপ্ফেন, কেতকস্স অহং তদা;

পসন্নচিত্তো সুমনো, বুদ্ধসেট্ঠমপূজযিং.

‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থারা ৰুত্তগাথাদ্ৰযমেৰ অত্তনো অরহত্তাধিগমনস্স অঙ্কুসভূতন্তি পচ্চুদাহাসি. তেনস্স তদেৰ অঞ্ঞাব্যাকরণং অহোসীতি.

কপ্পটকুরত্থেরগাথাৰণ্ণনা নিট্ঠিতা.

চতুত্থৰগ্গৰণ্ণনা নিট্ঠিতা.