১০. কণ্হদিন্নত্থেরগাথাৰণ্ণনা

উপাসিতা সপ্পুরিসাতি আযস্মতো কণ্হদিন্নত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো চতুনৰুতে কপ্পে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সোভিতং নাম পচ্চেকবুদ্ধং দিস্ৰা পসন্নচিত্তো পুন্নাগপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে ব্রাহ্মণকুলে নিব্বত্তিত্ৰা কণ্হদিন্নোতি লদ্ধনামো ৰযপ্পত্তো উপনিস্সযসম্পত্তিযা চোদিযমানো ধম্মসেনাপতিং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৮.৬১-৬৫) –

‘‘সোভিতো নাম সম্বুদ্ধো, চিত্তকূটে ৰসী তদা;

গহেত্ৰা গিরিপুন্নাগং, সযম্ভুং অভিপূজযিং.

‘‘চতুন্নৰুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তো –

১৭৯. ‘‘উপাসিতা সপ্পুরিসা, সুতা ধম্মা অভিণ্হসো;

সুত্ৰান পটিপজ্জিস্সং, অঞ্জসং অমতোগধং.

১৮০. ‘‘ভৰরাগহতস্স মে সতো, ভৰরাগো পুন মে ন ৰিজ্জতি;

ন চাহু ন চ মে ভৰিস্সতি, ন চ মে এতরহি ৰিজ্জতী’’তি. –

গাথাদ্ৰযং অভাসি.

তত্থ উপাসিতাতি পরিচরিতা পটিপত্তিপযিরুপাসনায পযিরুপাসিতা. সপ্পুরিসাতি সন্তেহি সীলাদিগুণেহি সমন্নাগতা পুরিসা, অরিযপুগ্গলা সারিপুত্তত্থেরাদযো. এতেন পুরিমচক্কদ্ৰযসম্পত্তিমত্তনো দস্সেতি. ন হি পতিরূপদেসৰাসেন ৰিনা সপ্পুরিসূপনিস্সযো সম্ভৰতি. সুতা ধম্মাতি সচ্চপটিচ্চসমুপ্পাদাদিপটিসংযুত্তধম্মা সোতদ্ৰারানুসারেন উপধারিতা. এতেন অত্তনো বাহুসচ্চং দস্সেন্তো পচ্ছিমচক্কদ্ৰযসম্পত্তিং দস্সেতি. অভিণ্হসোতি বহুসো ন কালেন কালং. ইদঞ্চ পদং ‘‘উপাসিতা সপ্পুরিসা’’তি এত্থাপি যোজেতব্বং. সুত্ৰান পটিপজ্জিস্সং, অঞ্জসং অমতোগধন্তি তে ধম্মে সুত্ৰা তত্থ ৰুত্তরূপারূপধম্মে সলক্খণাদিতো পরিগ্গহেত্ৰা অনুক্কমেন ৰিপস্সনং ৰড্ঢেত্ৰা অমতোগধং নিব্বানপতিট্ঠং তংসম্পাপকং অঞ্জসং অরিযং অট্ঠঙ্গিকং মগ্গং পটিপজ্জিং পাপুণিং.

ভৰরাগহতস্স মে সতোতি ভৰরাগেন ভৰতণ্হায অনাদিমতি সংসারে হতস্স উপদ্দুতস্স মম সতো সমানস্স, অগ্গমগ্গেন ৰা হতভৰরাগস্স. ভৰরাগো পুন মে ন ৰিজ্জতীতি ততো এৰ পুন ইদানি ভৰরাগো মে নত্থি. ন চাহু ন মে ভৰিস্সতি, ন চ মে এতরহি ৰিজ্জতীতি যদিপি পুব্বে পুথুজ্জনকালে সেক্খকালে চ মে ভৰরাগো অহোসি, অগ্গমগ্গপ্পত্তিতো পন পট্ঠায ন চাহু ন চ অহোসি, আযতিম্পি ন মে ভৰিস্সতি, এতরহি অধুনাপি ন চ মে ৰিজ্জতি ন চ উপলব্ভতি, পহীনোতি অত্থো. ভৰরাগৰচনেনেৰ চেত্থ তদেকট্ঠতায মানাদীনম্পি অভাৰো ৰুত্তোতি সব্বসো পরিক্খীণভৰসংযোজনতং দস্সেতি.

কণ্হদিন্নত্থেরগাথাৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.