৭. রাধত্থেরগাথাৰণ্ণনা

যথা অগারং দুচ্ছন্নন্তিআদিকা আযস্মতো রাধত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্তো ৰিহারং গন্ত্ৰা সত্থারং উপসঙ্কমিত্ৰা ৰন্দিত্ৰা একমন্তং নিসিন্নো সত্থারা একং ভিক্খুং পটিভানেয্যকানং অগ্গট্ঠানে ঠপিযমানং দিস্ৰা সযং তং ঠানন্তরং পত্থেত্ৰা মহাদানং পৰত্তেসি. সত্থু উল়ারঞ্চ পূজং অকাসি. সো এৰং কতপণিধানো ততো চুতো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং পিণ্ডায গচ্ছন্তং দিস্ৰা পসন্নমানসো মধুরানি অম্বফলানী অদাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো অম্হাকং ভগৰতো কালে রাজগহে ব্রাহ্মণকুলে নিব্বত্তিত্ৰা রাধোতি লদ্ধনামো ৰযপ্পত্তো হুত্ৰা ঘরাৰাসং ৰসন্তো মহল্লককালে পুত্তদারেহি অপসাদিতো, ‘‘কিং মে ঘরাৰাসেন, পব্বজিস্সামী’’তি ৰিহারং গন্ত্ৰা থেরে ভিক্খূ উপসঙ্কমিত্ৰা পব্বজ্জং যাচিত্ৰা তেহি ‘‘অযং ব্রাহ্মণো জিণ্ণো ন সক্কোতি ৰত্তপটিৰত্তং পূরেতু’’ন্তি পটিক্খিত্তো সত্থু সন্তিকং গন্ত্ৰা অত্তনো অজ্ঝাসযং পৰেদেত্ৰা সত্থারা উপনিস্সযসম্পত্তিং ওলোকেত্ৰা আণত্তেন ধম্মসেনাপতিনা পব্বাজিতো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫১.৬৩-৬৭) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, পাদফলং অদাসহং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থু সন্তিকাৰচরো হুত্ৰা ৰিচরন্তো সত্থু ধম্মদেসনাপটিভানস্স পচ্চযভূতানং পটিভানজাননকানং অগ্গো জাতো. থেরস্স হি দিট্ঠিসমুদাচারঞ্চ আগম্ম দসবলস্স নৰনৰা ধম্মদেসনা পটিভাতি. তেনাহ ভগৰা – ‘‘এতদগ্গং, ভিক্খৰে, মম সাৰকানং ভিক্খূনং পটিভানেয্যকানং যদিদং রাধো’’তি (অ. নি. ১.২১৯, ২৩৩). সো একদিৰসং ‘‘ইমে সত্তা অভাৰনায রাগেন অভিভুয্যন্তি, ভাৰনায সতি তং নত্থী’’তি ভাৰনং থোমেন্তো ‘‘যথা অগার’’ন্তিআদিনা গাথাদ্ৰযমাহ.

১৩৩-৪. তত্থ অগারন্তি যংকিঞ্চি গেহং. দুচ্ছন্নন্তি ৰিরল়চ্ছন্নং ছিদ্দাৰছিদ্দং. সমতিৰিজ্ঝতীতি ৰস্সৰুট্ঠি ৰিনিৰিজ্ঝতি. অভাৰিতন্তি তং অগারং ৰুট্ঠি ৰিয ভাৰনায রহিতত্তা অভাৰিতং চিত্তং. রাগো সমতিৰিজ্ঝতীতি ন কেৰলং রাগোৰ দোসমোহমানাদযোপি সব্বকিলেসা তথারূপং চিত্তং অতিৰিজ্ঝন্তিযেৰ. সুভাৰিতন্তি সমথৰিপস্সনাভাৰনাহি সুট্ঠু ভাৰিতং, এৰরূপং চিত্তং সুচ্ছন্নং গেহং ৰুট্ঠি ৰিয রাগাদযো কিলেসা অতিৰিজ্ঝিতুং ন সক্কোন্তীতি.

রাধত্থেরগাথাৰণ্ণনা নিট্ঠিতা.