৬. মেল়জিনত্থেরগাথাৰণ্ণনা

যদাহং ধম্মমস্সোসিন্তিআদিকা আযস্মতো মেল়জিনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সুমেধস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং ভগৰন্তং পিণ্ডায গচ্ছন্তং দিস্ৰা পসন্নমানসো মধুরং আমোদফলং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে বারাণসিযং খত্তিযকুলে নিব্বত্তিত্ৰা মেল়জিনোতি লদ্ধনামো ৰিজ্জাসিপ্পেসু নিপ্ফত্তিং গতো পণ্ডিতো ব্যত্তো দিসাসু পাকটো অহোসি. সো ভগৰতি বারাণসিযং ইসিপতনে ৰিহরন্তে ৰিহারং গন্ত্ৰা সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা তদহেৰ অরহত্তং পাপুণি. তেন ৰুত্তং অপদানে (অপ. থের ২.৫১.৫৭-৬২) –

‘‘সহস্সরংসী ভগৰা, সযম্ভূ অপরাজিতো;

ৰিৰেকা ৰুট্ঠহিত্ৰান, গোচরাযাভিনিক্খমি.

‘‘ফলহত্থো অহং দিস্ৰা, উপগচ্ছিং নরাসভং;

পসন্নচিত্তো সুমনো, অৰটং অদদিং ফলং.

‘‘চতুন্নৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অপরভাগে ভিক্খূহি, ‘‘আৰুসো, কিং তযা উত্তরিমনুস্সধম্মো অধিগতো’’তি পুট্ঠো সীহনাদং নদন্তো –

১৩১. ‘‘যদাহং ধম্মমস্সোসিং, ভাসমানস্স সত্থুনো;

ন কঙ্খমভিজানামি, সব্বঞ্ঞূ অপরাজিতে.

১৩২. ‘‘সত্থৰাহে মহাৰীরে, সারথীনং ৰরুত্তমে;

মগ্গে পটিপদাযং ৰা, কঙ্খা ময্হং ন ৰিজ্জতী’’তি. – গাথাদ্ৰযং অভাসি;

তত্থ যদাতি যস্মিং কালে. অহন্তি অত্তানং নিদ্দিসতি. ধম্মন্তি চতুসচ্চধম্মং. অস্সোসিন্তি সুণিং. সত্থুনোতি দিট্ঠধম্মিকাদিঅত্থেহি ৰেনেয্যানং সাসনট্ঠেন সত্থুনো. কঙ্খন্তি সংসযং. সঙ্খতমসঙ্খতঞ্চ অনৰসেসতো জাননট্ঠেন সব্বঞ্ঞূ. কুতোচিপি পরাজিতা ভাৰেন অপরাজিতে. ৰেনেয্যসত্তানং সংসারকন্তারতো নিব্বানং পটিৰাহনট্ঠেন সত্থৰাহে. ইদং ৰুত্তং হোতি – যতো পভুতি অহং সত্থুনো ধম্মং দেসেন্তস্স চতুসচ্চধম্মং অস্সোসিং সোতদ্ৰারানুসারেন উপধারেসিং উপলভিং, ততো পট্ঠায অনৰসেসসঙ্খতাসঙ্খতসম্মুতিধম্মানং সযম্ভূঞাণেন জাননতো সব্বঞ্ঞূ অনাৰরণদস্সাৰিম্হি, পঞ্চন্নম্পি মারানং অভিভৰনতো তেহি অপরাজিতত্তা সদেৰকে লোকে অপ্পটিহতধম্মচক্কত্তা চ অপরাজিতে, ৰেনেয্যসত্তানং লোভকন্তারাদিতো ৰাহনট্ঠেন সত্থৰাহে, মহাৰিক্কন্ততায মহাৰীরে, অঞ্ঞেহি দুদ্দমানং পুরিসদম্মানং সরণতো অচ্চন্তিকেন দমথেন দমনতো সারথীনং পৰরভূতে উত্তমে সম্মাসম্বুদ্ধে, ‘‘বুদ্ধো নু খো নো নু খো’’তি কঙ্খং নাভিজানামি অপরপ্পচ্চযভাৰতো. তথারূপে দেসিতে অরিযমগ্গে তদুপাদাযভূতায চ সীলাদিপটিপদায ‘‘নিয্যানিকো নু খো ন নু খো’’তি কঙ্খা ৰিচিকিচ্ছা ন ৰিজ্জতি নত্থীতি. এত্থ চ অরিযধম্মে সংসযাভাৰকথনেন অরিযসঙ্ঘেপি সংসযাভাৰো কথিতোযেৰাতি দট্ঠব্বং তত্থ পতিট্ঠিতস্স অনঞ্ঞথাভাৰতোতি.

মেল়জিনত্থেরগাথাৰণ্ণনা নিট্ঠিতা.