৩. ৰল্লিযত্থেরগাথাৰণ্ণনা

মক্কটো পঞ্চদ্ৰারাযন্তিআদিকা আযস্মতো ৰল্লিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একতিংসে কপ্পে কুলগেহে নিব্বত্তিত্ৰা ৰিঞ্ঞুতং পত্তো একদিৰসং কেনচিদেৰ করণীযেন অরঞ্ঞং গতো তত্থ নারদং নাম পচ্চেকসম্বুদ্ধং রুক্খমূলে ৰসন্তং দিস্ৰা পসন্নমানসো নল়েহি সালং কত্ৰা তিণেহি ছাদেত্ৰা অদাসি. চঙ্কমনট্ঠানঞ্চস্স সোধেত্ৰা ৰালুকা ওকিরিত্ৰা অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণমহাসালস্স পুত্তো হুত্ৰা নিব্বত্তি, ৰল্লিযোতিস্স নামং অহোসি. সো ৰযপ্পত্তো যোব্বনমনুপ্পত্তো ইন্দ্রিযৰসিকো হুত্ৰা ৰিচরন্তো কল্যাণমিত্তসংসগ্গেন ভগৰন্তং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫০.৯৩-১০৩) –

‘‘হিমৰন্তস্সাৰিদূরে, হারিতো নাম পব্বতো;

সযম্ভূ নারদো নাম, রুক্খমূলে ৰসী তদা.

‘‘নল়াগারং করিত্ৰান, তিণেন ছাদযিং অহং;

চঙ্কমং সোধযিত্ৰান, সযম্ভুস্স অদাসহং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘তত্থ মে সুকতং ব্যম্হং, নল়কুটিকনিম্মিতং;

সট্ঠিযোজনমুব্বেধং, তিংসযোজনৰিত্থতং.

‘‘চতুদ্দসেসু কপ্পেসু, দেৰলোকে রমিং অহং;

একসত্ততিক্খত্তুঞ্চ, দেৰরজ্জমকারযিং.

‘‘চতুত্তিংসতিক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

‘‘ধম্মপাসাদমারুয্হ, সব্বাকারৰরূপমং;

যদিচ্ছকাহং ৰিহরে, সক্যপুত্তস্স সাসনে.

‘‘একতিংসে ইতো কপ্পে, যং কম্মমকরিং তদা;

দুগ্গতিং নাভিজানামি, নল়কুটিযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা পুথুজ্জনকালে অত্তনো চিত্তস্স রূপাদিআরম্মণেসু যথাকামপ্পৰত্তিযা, ইদানি অরিযমগ্গেন নিগ্গহিতভাৰস্স চ ৰিভাৰনেন অঞ্ঞং ব্যাকরোন্তো –

১২৫. ‘‘মক্কটো পঞ্চদ্ৰারাযং, কুটিকাযং পসক্কিয;

দ্ৰারেন অনুপরিযেতি, ঘট্টযন্তো মুহুং মুহুং.

১২৬. ‘‘তিট্ঠ মক্কট মা ধাৰি, ন হি তে তং যথা পুরে;

নিগ্গহীতোসি পঞ্ঞায, নেৰ দূরং গমিস্সসী’’তি. – গাথাদ্ৰযং অভাসি;

তত্থ ঘট্টযন্তোতি অত্তনো লোলভাৰেন রুক্খস্স অঞ্ঞং সাখং মুঞ্চিত্ৰা অঞ্ঞস্স গহণেন অনেকৰারং তত্থ রুক্খং চালেন্তো ফলূপভোগমক্কটো ৰিয তেন তেন চক্খাদিদ্ৰারেন রূপাদিআরম্মণেসু অঞ্ঞং মুঞ্চিত্ৰা অঞ্ঞং গণ্হন্তো চিত্তসন্তানস্স সমাদানৰসেন নিচ্চলং ঠাতুং অপ্পদানেন অভিক্খণং ঘট্টযন্তো চালেন্তো তস্মিংযেৰ রূপাদিআরম্মণে অনুপরিৰত্ততি যথাকামং ৰিচরতি. ৰত্তমানসমীপতায চেত্থ ৰত্তমানৰচনং. এৰং অনুপরিযন্তো চ তিট্ঠ, মক্কট, মা ধাৰি ত্ৰং, চিত্তমক্কট, ইদানি তিট্ঠ মা ধাৰি, ইতো পট্ঠায তে ধাৰিতুং ন সক্কা, তস্মা ন হি তে তং যথা পূরে যস্মা তং অত্তভাৰগেহং পুব্বে ৰিয ন তে সেৰিতং পিহিতদ্ৰারভাৰতো, কিঞ্চ নিগ্গহীতোসি পঞ্ঞায সযঞ্চ ইদানি মগ্গপঞ্ঞায কিলেসাভিসঙ্খারসঙ্খাতানং পাদানং ছেদনেন অচ্চন্তিকং নিগ্গহং পত্তোসি, তস্মা নেৰ দূরং গমিস্সসি ইতো অত্তভাৰতো দূরং দুতিযাদিঅত্তভাৰং নেৰ গমিস্সসি যাৰচরিমকচিত্তং এৰ তে গমনন্তি দস্সেতি. ‘‘নেতো দূর’’ন্তিপি পাঠো, সো এৰত্থো.

ৰল্লিযত্থেরগাথাৰণ্ণনা নিট্ঠিতা.