১০. ৰসভত্থেরগাথাৰণ্ণনা

পুব্বে হনতি অত্তানন্তি আযস্মতো ৰসভত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো বুদ্ধসুঞ্ঞে লোকে ব্রাহ্মণকুলে নিব্বত্তিত্ৰা ৰযপ্পত্তো ব্রাহ্মণানং ৰিজ্জাসিপ্পেসু নিপ্ফত্তিং গন্ত্ৰা নেক্খম্মজ্ঝাসযতায ঘরাৰাসং পহায তাপসপব্বজ্জং পব্বজিত্ৰা চুদ্দসসহস্সতাপসপরিৰারো হিমৰন্তস্স অৰিদূরে সমগ্গে নাম পব্বতে অস্সমং কারেত্ৰা ৰসন্তো ঝানাভিঞ্ঞাযো নিব্বত্তেত্ৰা তাপসানং ওৰাদানুসাসনিযো দেন্তো একদিৰসং এৰং চিন্তেসি – ‘‘অহং খো দানি ইমেহি তাপসেহি সক্কতো গরুকতো পূজিতো ৰিহরামি, মযা পন পূজেতব্বো ন উপলব্ভতি, দুক্খো খো পনাযং লোকে যদিদং অগরুৰাসো’’তি. এৰং পন চিন্তেত্ৰা পুরিমবুদ্ধেসু কতাধিকারতায পুরিমবুদ্ধানং চেতিযে অত্তনা কতং পূজাসক্কারং অনুস্সরিত্ৰা ‘‘যংনূনাহং পুরিমবুদ্ধে উদ্দিস্স পুলিনচেতিযং কত্ৰা পূজং করেয্য’’ন্তি হট্ঠতুট্ঠো ইদ্ধিযা পুলিনথূপং সুৰণ্ণমযং মাপেত্ৰা সুৰণ্ণমযাদীহি তিসহস্সমত্তেহি পুপ্ফেহি দেৰসিকং পূজং করোন্তো যাৰতাযুকং পুঞ্ঞানি কত্ৰা অপরিহীনজ্ঝানো কালং কত্ৰা ব্রহ্মলোকে নিব্বত্তো. তত্থপি যাৰতাযুকং ঠত্ৰা ততো চুতো তাৰতিংসে নিব্বত্তিত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং লিচ্ছৰিরাজকুলে নিব্বত্তিত্ৰা ৰসভোতি লদ্ধনামো ৰযপ্পত্তো ভগৰতো ৰেসালিগমনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫০.৫৭-৯২) –

‘‘হিমৰন্তস্সাৰিদূরে, সমগ্গো নাম পব্বতো;

অস্সমো সুকতো ময্হং, পণ্ণসালা সুমাপিতা.

‘‘নারদো নাম নামেন, জটিলো উগ্গতাপনো;

চতুদ্দসসহস্সানি, সিস্সা পরিচরন্তি মং.

‘‘পটিসল্লীনকো সন্তো, এৰং চিন্তেসহং তদা;

সব্বো জনো মং পূজেতি, নাহং পূজেমি কিঞ্চনং.

‘‘ন মে ওৰাদকো অত্থি, ৰত্তা কোচি ন ৰিজ্জতি;

অনাচরিযুপজ্ঝাযো, ৰনে ৰাসং উপেমহং.

‘‘উপাসমানো যমহং, গরুচিত্তং উপট্ঠহে;

সো মে আচরিযো নত্থি, ৰনৰাসো নিরত্থকো.

‘‘আযাগং মে গৰেসিস্সং, গরুং ভাৰনিযং তথা;

সাৰস্সযো ৰসিস্সামি, ন কোচি গরহিস্সতি.

‘‘উত্তানকূলা নদিকা, সুপতিত্থা মনোরমা;

সংসুদ্ধপুলিনাকিণ্ণা, অৰিদূরে মমস্সমং.

‘‘নদিং অমরিকং নাম, উপগন্ত্ৰানহং তদা;

সংৰড্ঢযিত্ৰা পুলিনং, অকং পুলিনচেতিযং.

‘‘যে তে অহেসুং সম্বুদ্ধা, ভৰন্তকরণা মুনী;

তেসং এতাদিসো থূপো, তং নিমিত্তং করোমহং.

‘‘করিত্ৰা পুলিনং থূপং, সোৰণ্ণং মাপযিং অহং;

সোণ্ণকিঙ্কণিপুপ্ফানি, সহস্সে তীণি পূজযিং.

‘‘সাযপাতং নমস্সামি, ৰেদজাতো কতঞ্জলী;

সম্মুখা ৰিয সম্বুদ্ধং, ৰন্দিং পুলিনচেতিযং.

‘‘যদা কিলেসা জাযন্তি, ৰিতক্কা গেহনিস্সিতা;

সরামি সুকতং থূপং, পচ্চৰেক্খামি তাৰদে.

‘‘উপনিস্সায ৰিহরং, সত্থৰাহং ৰিনাযকং;

কিলেসে সংৰসেয্যাসি, ন যুত্তং তৰ মারিস.

‘‘সহ আৰজ্জিতে থূপে, গারৰং হোতি মে তদা;

কুৰিতক্কে ৰিনোদেসিং, নাগো তুত্তট্টিতো যথা.

‘‘এৰং ৰিহরমানং মং, মচ্চুরাজাভিমদ্দথ;

তত্থ কালঙ্কতো সন্তো, ব্রহ্মলোকমগচ্ছহং.

‘‘যাৰতাযুং ৰসিত্ৰান, তিদিৰে উপপজ্জহং;

অসীতিক্খত্তুং দেৰিন্দো, দেৰরজ্জমকারযিং.

‘‘সতানং তীণিক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

‘‘সোণ্ণকিঙ্কণিপুপ্ফানং, ৰিপাকং অনুভোমহং;

ধাতীসতসহস্সানি, পরিৰারেন্তি মং ভৰে.

‘‘থূপস্স পরিচিণ্ণত্তা, রজোজল্লং ন লিম্পতি;

গত্তে সেদা ন মুচ্চন্তি, সুপ্পভাসো ভৰামহং.

‘‘অহো মে সুকতো থূপো, সুদিট্ঠামরিকা নদী;

থূপং কত্ৰান পুলিনং, পত্তোম্হি অচলং পদং.

‘‘কুসলং কত্তুকামেন, জন্তুনা সারগাহিনা;

নত্থি খেত্তং অখেত্তং ৰা, পটিপত্তীৰ সাধকা.

‘‘যথাপি বলৰা পোসো, অণ্ণৰংতরিতুস্সহে;

পরিত্তং কট্ঠমাদায, পক্খন্দেয্য মহাসরং.

‘‘ইমাহং কট্ঠং নিস্সায, তরিস্সামি মহোদধিং;

উস্সাহেন ৰীরিযেন, তরেয্য উদধিং নরো.

‘‘তথেৰ মে কতং কম্মং, পরিত্তং থোককঞ্চ যং;

তং কম্মং উপনিস্সায, সংসারং সমতিক্কমিং.

‘‘পচ্ছিমে ভৰে সম্পত্তে, সুক্কমূলেন চোদিতো;

সাৰত্থিযং পুরে জাতো, মহাসালে সুঅড্ঢকে.

‘‘সদ্ধা মাতা পিতা ময্হং, বুদ্ধস্স সরণং গতা;

উভো দিট্ঠপদা এতে, অনুৰত্তন্তি সাসনং.

‘‘বোধিপপটিকং গয্হ, সোণ্ণথূপমকারযুং;

সাযপাতং নমস্সন্তি, সক্যপুত্তস্স সম্মুখা.

‘‘উপোসথম্হি দিৰসে, সোণ্ণথূপং ৰিনীহরুং;

বুদ্ধস্স ৰণ্ণং কিত্তেন্তা, তিযামং ৰীতিনামযুং.

‘‘সহ দিস্ৰানহং থূপং, সরিং পুলিনচেতিযং;

একাসনে নিসীদিত্ৰা, অরহত্তমপাপুণিং.

‘‘গৰেসমানো তং ৰীরং, ধম্মসেনাপতিদ্দসং;

অগারা নিক্খমিত্ৰান, পব্বজিং তস্স সন্তিকে.

‘‘জাতিযা সত্তৰস্সেন, অরহত্তমপাপুণিং;

উপসম্পাদযী বুদ্ধো, গুণমঞ্ঞায চক্খুমা.

‘‘দারকেনেৰ সন্তেন, কিরিযং নিট্ঠিতং মযা;

কতং মে করণীযজ্জ, সক্যপুত্তস্স সাসনে.

‘‘সব্বৰেরভযাতীতো, সব্বসঙ্গাতিগো ইসি;

সাৰকো তে মহাৰীর, সোণ্ণথূপস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা দাযকানুগ্গহং করোন্তো তেহি উপনীতে পচ্চযে ন পটিক্খিপতি, যথালদ্ধেযেৰ পরিভুঞ্জতি. তং পুথুজ্জনা ‘‘অযং কাযদল়্হিবহুলো অরক্খিতচিত্তো’’তি মঞ্ঞমানা অৰমঞ্ঞন্তি. থেরো তং অগণেন্তোৰ ৰিহরতি. তস্স পন অৰিদূরে অঞ্ঞতরো কুহকভিক্খু পাপিচ্ছো সমানো অপ্পিচ্ছো ৰিয সন্তুট্ঠো ৰিয অত্তানং দস্সেন্তো লোকং ৰঞ্চেন্তো ৰিহরতি. মহাজনো তং অরহন্তং ৰিয সম্ভাৰেতি. অথস্স সক্কো দেৰানমিন্দো তং পৰত্তিং ঞত্ৰা থেরং উপসঙ্কমিত্ৰা, ‘‘ভন্তে, কিং নাম কুহকো করোতী’’তি পুচ্ছি. থেরো পাপিচ্ছং গরহন্তো –

১৩৯. ‘‘পুব্বে হনতি অত্তানং, পচ্ছা হনতি সো পরে;

সুহতং হন্তি অত্তানং, ৰীতংসেনেৰ পক্খিমা.

১৪০. ‘‘ন ব্রাহ্মণো বহিৰণ্ণো, অন্তোৰণ্ণো হি ব্রাহ্মণো;

যস্মিং পাপানি কম্মানি, স ৰে কণ্হো সুজম্পতী’’তি. – গাথাদ্ৰযমাহ;

তত্থ পুব্বে হনতি অত্তানন্তি কুহকপুগ্গলো অত্তনো কুহকৰুত্তিযা লোকং ৰঞ্চেন্তো পাপিচ্ছতাদীহি পাপধম্মেহি পঠমমেৰ অত্তানং হনতি, অত্তনো কুসলকোট্ঠাসং ৰিনাসেতি. পচ্ছা হনতি সো পরেতি সো কুহকো পঠমং তাৰ ৰুত্তনযেন অত্তানং হন্ত্ৰা পচ্ছা পরে যেহি ‘‘অযং ভিক্খু পেসলো অরিযো’’তি ৰা সম্ভাৰেন্তেহি কারা কতা, তে হনতি তেসং কারানি অত্তনি কতানি অমহপ্ফলানি কত্ৰা পচ্চযৰিনাসনেন ৰিনাসেতি. সতিপি কুহকস্স উভযহননে অত্তহননে পন অযং ৰিসেসোতি দস্সেন্তো আহ সুহতং হন্তি অত্তানন্তি. সো কুহকো অত্তানং হনন্তো সুহতং কত্ৰা হন্তি ৰিনাসেতি, যথা কিং? ৰীতংসেনেৰ পক্খিমাতি, ৰীতংসোতি দীপকসকুণো, তেন. পক্খিমাতি সাকুণিকো. যথা তেন ৰীতংসসকুণেন অঞ্ঞে সকুণে ৰঞ্চেত্ৰা হনন্তো অত্তানং ইধ লোকেপি হনতি ৰিঞ্ঞুগরহসাৰজ্জসভাৰাদিনা, সম্পরাযং পন দুগ্গতিপরিক্কিলেসেন হনতিযেৰ, ন পন তে সকুণে পচ্ছা হন্তুং সক্কোতি, এৰং কুহকোপি কোহঞ্ঞেন লোকং ৰঞ্চেত্ৰা ইধ লোকেপি অত্তানং হনতি ৰিপ্পটিসারৰিঞ্ঞুগরহাদীহি, পরলোকেপি দুগ্গতিপরিক্কিলেসেহি, ন পন তে পচ্চযদাযকে অপাযদুক্খং পাপেতি. অপিচ কুহকো দক্খিণায অমহপ্ফলভাৰকরণেনেৰ দাযকং হনতীতি ৰুত্তো, ন নিপ্ফলভাৰকরণেন. ৰুত্তঞ্হেতং ভগৰতা – ‘‘দুস্সীলস্স মনুস্সভূতস্স দানং দত্ৰা সহস্সগুণা দক্খিণা পাটিকঙ্খিতব্বা’’তি (ম. নি. ৩.৩৭৯). তেনাহ ‘‘সুহতং হন্তি অত্তান’’ন্তি.

এৰং বাহিরপরিমজ্জনমত্তে ঠিতা পুগ্গলা সুদ্ধা নাম ন হোন্তি, অব্ভন্তরসুদ্ধিযা এৰ পন সুদ্ধা হোন্তীতি দস্সেন্তো ‘‘ন ব্রাহ্মণো’’তি দুতিযং গাথমাহ. তস্সত্থো – ইরিযাপথসণ্ঠপনাদিবহিসম্পত্তিমত্তেন ব্রাহ্মণো ন হোতি. সম্পত্তিঅত্থো হি ইধ ৰণ্ণ-সদ্দো. অব্ভন্তরে পন সীলাদিসম্পত্তিযা ব্রাহ্মণো হোতি, ‘‘বাহিতপাপো ব্রাহ্মণো’’তি কত্ৰা. তস্মা ‘‘যস্মিং পাপানি লামকানি কম্মানি সংৰিজ্জন্তি, একংসেন সো কণ্হো নিহীনপুগ্গলো’’তি সুজম্পতি, দেৰানমিন্দ, জানাহি. তং সুত্ৰা সক্কো কুহকভিক্খুং তজ্জেত্ৰা ‘‘ধম্মে ৰত্তাহী’’তি ওৰদিত্ৰা সকট্ঠানমেৰ গতো.

ৰসভত্থেরগাথাৰণ্ণনা নিট্ঠিতা.

দুকনিপাতে পঠমৰগ্গৰণ্ণনা নিট্ঠিতা.