৭. কাল়িগোধাপুত্তভদ্দিযত্থেরগাথাৰণ্ণনা

যাতং মে হত্থিগীৰাযাতিআদিকা আযস্মতো ভদ্দিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো পদুমুত্তরস্স ভগৰতো কালে মহাভোগকুলে নিব্বত্তিত্ৰা ৰিঞ্ঞুতং পত্তো একদিৰসং সত্থু সন্তিকে ধম্মং সুণন্তো সত্থারা একং ভিক্খুং উচ্চাকুলিকানং অগ্গট্ঠানে ঠপিযমানং দিস্ৰা সযম্পি তং ঠানন্তরং পত্থেত্ৰা সত্তাহং বুদ্ধপ্পমুখস্স ভিক্খুসঙ্ঘস্স মহাদানং দত্ৰা পণিধানং অকাসি. সত্থাপিস্স অনন্তরাযেন সমিজ্ঝনভাৰং দিস্ৰা ব্যাকাসি. সোপি তং ব্যাকরণং সুত্ৰা উচ্চাকুলিকসংৰত্তনিকং কম্মং পুচ্ছিত্ৰা ধম্মস্সৰনস্স কারাপনং, ধম্মমণ্ডপে আসনদানং, বীজনীদানং, ধম্মকথিকানং পূজাসক্কারকরণং, উপোসথাগারে পটিস্সযদানন্তি এৰমাদিং যাৰজীৰং বহুপুঞ্ঞং কত্ৰা ততো চুতো দেৰমনুস্সেসু সংসরন্তো কস্সপস্স ভগৰতো অপরভাগে অম্হাকং ভগৰতো উপ্পত্তিযা পুরেতরং বারাণসিযং কুটুম্বিযঘরে নিব্বত্তো সম্বহুলে পচ্চেকবুদ্ধে পিণ্ডায চরিত্ৰা একস্মিংযেৰ ঠানে সমাগন্ত্ৰা ভত্তৰিস্সগ্গং করোন্তে দিস্ৰা তত্থ পাসাণফলকানি অত্থরিত্ৰা পাদোদকাদিং উপট্ঠপেন্তো যাৰজীৰং উপট্ঠহি.

সো একং বুদ্ধন্তরং দেৰমনুস্সেসু সংসরিত্ৰা ইমস্মিং বুদ্ধুপ্পাদে কপিলৰত্থুনগরে সাকিযরাজকুলে নিব্বত্তি, ভদ্দিযোতিস্স নামং অহোসি. সো ৰযপ্পত্তো অনুরুদ্ধাদীহি পঞ্চহি খত্তিযেহি সদ্ধিং সত্থরি অনুপিযম্বৰনে ৰিহরন্তে সত্থু সন্তিকে পব্বজিত্ৰা অরহত্তং পাপুণি. তং সত্থা অপরভাগে জেতৰনে অরিযগণমজ্ঝে নিসিন্নো উচ্চাকুলিকানং ভিক্খূনং অগ্গট্ঠানে ঠপেসি. সো ফলসুখেন নিব্বানসুখেন চ ৰীতিনামেন্তো অরঞ্ঞগতোপি রুক্খমূলগতোপি সুঞ্ঞাগারগতোপি ‘‘অহো সুখং, অহো সুখ’’ন্তি অভিক্খণং উদানং উদানেসি. তং সুত্ৰা ভিক্খূ সত্থু আরোচেসুং – ‘‘আযস্মা ভদ্দিযো কাল়িগোধায পুত্তো অভিক্খণং ‘অহো সুখং, অহো সুখ’ন্তি ৰদতি, অনভিরতো মঞ্ঞে ব্রহ্মচরিযং চরতী’’তি. সত্থা তং পক্কোসাপেত্ৰা ‘‘সচ্চং কির ত্ৰং, ভদ্দিয, অভিক্খণং ‘অহো সুখং, অহো সুখ’ন্তি ৰদসী’’তি পুচ্ছি. সো ‘‘সচ্চং ভগৰা’’তি পটিজানিত্ৰা ‘‘পুব্বে মে, ভন্তে, রজ্জং কারেন্তস্স সুসংৰিহিতারক্খো অহোসিং, তথাপি ভীতো উব্বিগ্গো উস্সঙ্কিতো ৰিহাসিং. ইদানি পন পব্বজিতো অভীতো অনুব্বিগ্গো অনুস্সঙ্কিতো ৰিহরামী’’তি ৰত্ৰা –

৮৪২. ‘‘যাতং মে হত্থিগীৰায, সুখুমা ৰত্থা পধারিতা;

সালীনং ওদনো ভুত্তো, সুচিমংসূপসেচনো.

৮৪৩. ‘‘সোজ্জ ভদ্দো সাততিকো, উঞ্ছাপত্তাগতে রতো;

ঝাযতি অনুপাদানো, পুত্তো গোধায ভদ্দিযো.

৮৪৪. ‘‘পংসুকূলী সাততিকো, উঞ্ছাপত্তাগতে রতো;

ঝাযতি অনুপাদানো, পুত্তো গোধায ভদ্দিযো.

৮৪৫.

‘‘পিণ্ডপাতী সাততিকো…পে….

৮৪৬. ‘‘তেচীৰরী সাততিকো…পে….

৮৪৭. ‘‘সপদানচারী সাততিকো…পে….

৮৪৮. ‘‘একাসনী সাততিকো…পে….

৮৪৯. ‘‘পত্তপিণ্ডী সাততিকো…পে….

৮৫০. ‘‘খলুপচ্ছাভত্তী সাততিকো…পে….

৮৫১. ‘‘আরঞ্ঞিকো সাততিকো…পে….

৮৫২. ‘‘রুক্খমূলিকো সাততিকো…পে….

৮৫৩. ‘‘অব্ভোকাসী সাততিকো…পে….

৮৫৪. ‘‘সোসানিকো সাততিকো…পে….

৮৫৫. ‘‘যথাসন্থতিকো সাততিকো…পে….

৮৫৬. ‘‘নেসজ্জিকো সাততিকো…পে….

৮৫৭. ‘‘অপ্পিচ্ছো সাততিকো…পে….

৮৫৮. ‘‘সন্তুট্ঠো সাততিকো…পে….

৮৫৯. ‘‘পৰিৰিত্তো সাততিকো…পে….

৮৬০. ‘‘অসংসট্ঠো সাততিকো…পে….

৮৬১. ‘‘আরদ্ধৰীরিযো সাততিকো…পে….

৮৬২. ‘‘হিত্ৰা সতপলং কংসং, সোৰণ্ণং সতরাজিকং;

অগ্গহিং মত্তিকাপত্তং, ইদং দুতিযাভিসেচনং.

৮৬৩. ‘‘উচ্চে মণ্ডলিপাকারে, দল়্হমট্টালকোট্ঠকে;

রক্খিতো খগ্গহত্থেহি, উত্তমং ৰিহরিং পুরে.

৮৬৪. ‘‘সোজ্জ ভদ্দো অনুত্রাসী, পহীনভযভেরৰো;

ঝাযতি ৰনমোগয্হ, পুত্তো গোধায ভদ্দিযো.

৮৬৫. ‘‘সীলক্খন্ধে পতিট্ঠায, সতিং পঞ্ঞঞ্চ ভাৰযং;

পাপুণিং অনুপুব্বেন, সব্বসংযোজনক্খয’’ন্তি. –

ইমাহি গাথাহি সত্থু পুরতো সীহনাদং নদি.

তত্থ যাতং মে হত্থিগীৰাযাতি, ভন্তে, পুব্বে মযা গচ্ছন্তেনাপি হত্থিগীৰায হত্থিক্খন্ধে নিসীদিত্ৰা যাতং চরিতং. ৰত্থানি পরিহরন্তেনাপি সুখুমা সুখসম্ফস্সা কাসিকৰত্থৰিসেসা ধারিতা. ওদনং ভুঞ্জন্তেনাপি তিৰস্সিকানং পুরাণগন্ধসালীনং ওদনো তিত্তিরকপিঞ্জরাদিনা সুচিনা মংসেন উপসিত্ততায সুচিমংসূপসেচনো ভুত্তো, তথাপি তং সুখং ন ময্হং চিত্তপরিতোসকরং অহোসি, যথা এতরহি ৰিৰেকসুখন্তি দস্সেন্তো আহ ‘‘সোজ্জ ভদ্দো’’তিআদি. এত্থ চ হত্থিগ্গহণেনেৰ অস্সরথযানানি, ৰত্থগ্গহণেন সব্বরাজালঙ্কারা, ওদনগ্গহণেন সব্বভোজনৰিকতি গহিতাতি ৰেদিতব্বং. সোজ্জাতি সো অজ্জ এতরহি পব্বজ্জাযং ঠিতো. ভদ্দোতি সীলাদিগুণেহি সমন্নাগতত্তা ভদ্দো. সাততিকোতি সমণধম্মে দিট্ঠধম্মসুখৰিহারে সাতচ্চযুত্তো. উঞ্ছাপত্তাগতে রতোতি উঞ্ছাচরিযায পত্তে আগতে পত্তপরিযাপন্নে অভিরতো, তেনেৰ সন্তুট্ঠোতি অধিপ্পাযো. ঝাযতীতি ফলসমাপত্তিঝানেন ঝাযতি. পুত্তো গোধাযাতি কাল়িগোধায নাম খত্তিযায পুত্তো. ভদ্দিযোতি এৰংনামো অত্তানমেৰ থেরো অঞ্ঞং ৰিয কত্ৰা ৰদতি.

গহপতিচীৰরং পটিক্খিপিত্ৰা পংসুকূলিকঙ্গসমাদানেন পংসুকূলিকো. সঙ্ঘভত্তং পটিক্খিপিত্ৰা পিণ্ডপাতিকঙ্গসমাদানেন পিণ্ডপাতিকো. অতিরেকচীৰরং পটিক্খিপিত্ৰা তেচীৰরিকঙ্গসমাদানেন তেচীৰরিকো. লোলুপ্পচারং পটিক্খিপিত্ৰা সপদানচারিকঙ্গসমাদানেন সপদানচারী. নানাসনভোজনং পটিক্খিপিত্ৰা একাসনিকঙ্গসমাদানেন একাসনিকো. দুতিযকভাজনং পটিক্খিপিত্ৰা পত্তপিণ্ডিকঙ্গসমাদানেন পত্তপিণ্ডিকো. অতিরিত্তভোজনং পটিক্খিপিত্ৰা খলুপচ্ছাভত্তিকঙ্গসমাদানেন খলুপচ্ছাভত্তিকো. গামন্তসেনাসনং পটিক্খিপিত্ৰা আরঞ্ঞিকঙ্গসমাদানেন আরঞ্ঞিকো. ছন্নৰাসং পটিক্খিপিত্ৰা রুক্খমূলিকঙ্গসমাদানেন রুক্খমূলিকো. ছন্নরুক্খমূলানি পটিক্খিপিত্ৰা অব্ভোকাসিকঙ্গসমাদানেন অব্ভোকাসিকো. নসুসানং পটিক্খিপিত্ৰা সোসানিকঙ্গসমাদানেন সোসানিকো. সেনাসনলোলুপ্পং পটিক্খিপিত্ৰা যথাসন্থতিকঙ্গসমাদানেন যথাসন্থতিকো. সযনং পটিক্খিপিত্ৰা নেসজ্জিকঙ্গসমাদানেন নেসজ্জিকো. অযমেত্থ সঙ্খেপো. ৰিত্থারতো পন ধুতঙ্গকথা ৰিসুদ্ধিমগ্গে (ৰিসুদ্ধি. ১.২২ আদযো) ৰুত্তনযেনেৰ গহেতব্বা.

উচ্চেতি উচ্চাদিট্ঠানে, উপরিপাসাদতায ৰা উচ্চে. মণ্ডলিপাকারেতি মণ্ডলাকারেন পাকারপরিক্খিত্তে. দল়্হমট্টালকোট্ঠকেতি থিরেহি অট্টালেহি দ্ৰারকোট্ঠকেহি চ সমন্নাগতে, নগরেতি অত্থো.

সতিং পঞ্ঞঞ্চাতি এত্থ সতিসীসেন সমাধিং ৰদতি. ফলসমাপত্তিনিরোধসমাপত্তিযো সন্ধায ‘‘সতিং পঞ্ঞঞ্চ ভাৰয’’ন্তি ৰুত্তো. সেসং তত্থ তত্থ ৰুত্তনযত্তা উত্তানমেৰ.

এৰং থেরো সত্থু সম্মুখা সীহনাদং নদি. তং সুত্ৰা ভিক্খূ অভিপ্পসন্না অহেসুং.

কাল়িগোধাপুত্তভদ্দিযত্থেরগাথাৰণ্ণনা নিট্ঠিতা.