১১. জতুকণ্ণিসুত্তৰণ্ণনা

১১০৩-৪. সুত্ৰানহন্তি জতুকণ্ণিসুত্তং. তত্থ সুত্ৰানহং ৰীরমকামকামিন্তি অহং ‘‘ইতিপি সো ভগৰা’’তিআদিনা নযেন ৰীরং কামানং অকামনতো অকামকামিং বুদ্ধং সুত্ৰা. অকামমাগমন্তি নিক্কামং ভগৰন্তং পুচ্ছিতুং আগতোম্হি. সহজনেত্তাতি সহজাতসব্বঞ্ঞুতঞ্ঞাণচক্খু. যথাতচ্ছন্তি যথাতথং. ব্রূহি মেতি পুন যাচন্তো ভণতি. যাচন্তো হি সহস্সক্খত্তুম্পি ভণেয্য, কো পন ৰাদো দ্ৰিক্খত্তুং. তেজী তেজসাতি তেজেন সমন্নাগতো তেজসা অভিভুয্য. যমহং ৰিজঞ্ঞং জাতিজরায ইধ ৰিপ্পহানন্তি যমহং জাতিজরানং পহানভূতং ধম্মং ইধেৰ জানেয্যং.

১১০৫-৭. অথস্স ভগৰা তং ধম্মমাচিক্খন্তো তিস্সো গাথাযো অভাসি. তত্থ নেক্খম্মং দট্ঠু খেমতোতি নিব্বানঞ্চ নিব্বানগামিনিঞ্চ পটিপদং ‘‘খেম’’ন্তি দিস্ৰা. উগ্গহিতন্তি তণ্হাদিট্ঠিৰসেন গহিতং. নিরত্তং ৰাতি নিরস্সিতব্বং ৰা, মুঞ্চিতব্বন্তি ৰুত্তং হোতি. মা তে ৰিজ্জিত্থাতি মা তে অহোসি. কিঞ্চনন্তি রাগাদিকিঞ্চনং ৰাপি তে মা ৰিজ্জিত্থ. পুব্বেতি অতীতে সঙ্খারে আরব্ভ উপ্পন্নকিলেসা. ব্রাহ্মণাতি ভগৰা জতুকণ্ণিং আলপতি. সেসং সব্বত্থ পাকটমেৰ.

এৰং ভগৰা ইমম্পি সুত্তং অরহত্তনিকূটেনেৰ দেসেসি. দেসনাপরিযোসানে চ পুব্বসদিসো এৰ ধম্মাভিসমযো অহোসীতি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায জতুকণ্ণিসুত্তৰণ্ণনা নিট্ঠিতা.