৯. অঙ্কুরপেতৰত্থুৰণ্ণনা

যস্স অত্থায গচ্ছামাতি ইদং সত্থা সাৰত্থিযং ৰিহরন্তো অঙ্কুরপেতং আরব্ভ কথেসি. কামঞ্চেত্থ অঙ্কুরো পেতো ন হোতি, তস্স পন চরিতং যস্মা পেতসম্বন্ধং, তস্মা তং ‘‘অঙ্কুরপেতৰত্থূ’’তি ৰুত্তং.

তত্রাযং সঙ্খেপকথা – যে তে উত্তরমধুরাধিপতিনো রঞ্ঞো মহাসাগরস্স পুত্তং উপসাগরং পটিচ্চ উত্তরাপথে কংসভোগে অসিতঞ্জননগরে মহাকংসস্স ধীতুযা দেৰগব্ভায কুচ্ছিযং উপ্পন্না অঞ্জনদেৰী ৰাসুদেৰো বলদেৰো চন্দদেৰো সূরিযদেৰো অগ্গিদেৰো ৰরুণদেৰো অজ্জুনো পজ্জুনো ঘটপণ্ডিতো অঙ্কুরো চাতি ৰাসুদেৰাদযো দস ভাতিকাতি একাদস খত্তিযা অহেসুং, তেসু ৰাসুদেৰাদযো ভাতরো অসিতঞ্জননগরং আদিং কত্ৰা দ্ৰারৰতীপরিযোসানেসু সকলজম্বুদীপে তেসট্ঠিযা নগরসহস্সেসু সব্বে রাজানো চক্কেন জীৰিতক্খযং পাপেত্ৰা দ্ৰারৰতিযং ৰসমানা রজ্জং দস কোট্ঠাসে কত্ৰা ৰিভজিংসু. ভগিনিং পন অঞ্জনদেৰিং ন সরিংসু. পুন সরিত্ৰা ‘‘একাদস কোট্ঠাসে করোমা’’তি ৰুত্তে তেসং সব্বকনিট্ঠো অঙ্কুরো ‘‘মম কোট্ঠাসং তস্সা দেথ, অহং ৰোহারং কত্ৰা জীৰিস্সামি, তুম্হে অত্তনো অত্তনো জনপদেসু সুঙ্কং ময্হং ৰিস্সজ্জেথা’’তি আহ. তে ‘‘সাধূ’’তি সম্পটিচ্ছিত্ৰা তস্স কোট্ঠাযং ভগিনিযা দত্ৰা নৰ রাজানো দ্ৰারৰতিযং ৰসিংসু.

অঙ্কুরো পন ৰণিজ্জং করোন্তো নিচ্চকালং মহাদানং দেতি. তস্স পনেকো দাসো ভণ্ডাগারিকো অত্থকামো অহোসি. অঙ্কুরো পসন্নমানসো তস্স একং কুলধীতরং গহেত্ৰা অদাসি. সো পুত্তে গব্ভগতেযেৰ কালমকাসি. অঙ্কুরো তস্মিং জাতে তস্স পিতুনো দিন্নং ভত্তৰেতনং তস্স অদাসি. অথ তস্মিং দারকে ৰযপ্পত্তে ‘‘দাসো ন দাসো’’তি রাজকুলে ৰিনিচ্ছযো উপ্পজ্জি. তং সুত্ৰা অঞ্জনদেৰী ধেনূপমং ৰত্ৰা ‘‘মাতু ভুজিস্সায পুত্তোপি ভুজিস্সো এৰা’’তি দাসব্যতো মোচেসি.

দারকো পন লজ্জায তত্থ ৰসিতুং অৰিসহন্তো রোরুৰনগরং গন্ত্ৰা তত্থ অঞ্ঞতরস্স তুন্নৰাযস্স ধীতরং গহেত্ৰা তুন্নৰাযসিপ্পেন জীৰিকং কপ্পেসি. তেন সমযেন রোরুৰনগরে অসয্হমহাসেট্ঠি নাম অহোসি. সো সমণব্রাহ্মণকপণদ্ধিকৰনিব্বকযাচকানং মহাদানং দেতি. সো তুন্নৰাযো সেট্ঠিনো ঘরং অজানন্তানং পীতিসোমনস্সজাতো হুত্ৰা অসয্হসেট্ঠিনো নিৰেসনং দক্খিণবাহুং পসারেত্ৰা দস্সেসি ‘‘এত্থ গন্ত্ৰা লদ্ধব্বং লভন্তূ’’তি. তস্স কম্মং পাল়িযংযেৰ আগতং.

সো অপরেন সমযেন কালং কত্ৰা মরুভূমিযং অঞ্ঞতরস্মিং নিগ্রোধরুক্খে ভুম্মদেৰতা হুত্ৰা নিব্বত্তি, তস্স দক্খিণহত্থো সব্বকামদদো অহোসি. তস্মিংযেৰ চ রোরুৰে অঞ্ঞতরো পুরিসো অসয্হসেট্ঠিনো দানে ব্যাৰটো অস্সদ্ধো অপ্পসন্নো মিচ্ছাদিট্ঠিকো পুঞ্ঞকিরিযায অনাদরো কালং কত্ৰা তস্স দেৰপুত্তস্স ৰসনট্ঠানস্স অৰিদূরে পেতো হুত্ৰা নিব্বত্তি. তেন চ কতকম্মং পাল়িযংযেৰ আগতং. অসয্হমহাসেট্ঠি পন কালং কত্ৰা তাৰতিংসভৰনে সক্কস্স দেৰরঞ্ঞো সহব্যতং উপগতো.

অথ অপরেন সমযেন অঙ্কুরো পঞ্চহি সকটসতেহি, অঞ্ঞতরো চ ব্রাহ্মণো পঞ্চহি সকটসতেহীতি দ্ৰেপি জনা সকটসহস্সেন ভণ্ডং আদায মরুকন্তারমগ্গং পটিপন্না মগ্গমূল়্হা হুত্ৰা বহুং দিৰসং তত্থেৰ ৰিচরন্তা পরিক্খীণতিণোদকাহারা অহেসুং. অঙ্কুরো অস্সদূতেহি চতূসু দিসাসু পানিযং মগ্গাপেসি. অথ সো কামদদহত্থো যক্খো তং তেসং ব্যসনপ্পত্তিং দিস্ৰা অঙ্কুরেন পুব্বে অত্তনো কতং উপকারং চিন্তেত্ৰা ‘‘হন্দ দানি ইমস্স মযা অৰস্সযেন ভৰিতব্ব’’ন্তি অত্তনো ৰসনৰটরুক্খং দস্সেসি. সো কির ৰটরুক্খো সাখাৰিটপসম্পন্নো ঘনপলাসো সন্দচ্ছাযো অনেকসহস্সপারোহো আযামেন ৰিত্থারেন উব্বেধেন চ যোজনপরিমাণো অহোসি. তং দিস্ৰা অঙ্কুরো হট্ঠতুট্ঠো তস্স হেট্ঠা খন্ধাৰারং বন্ধাপেসি. যক্খো অত্তনো দক্খিণহত্থং পসারেত্ৰা পঠমং তাৰ পানীযেন সব্বং জনং সন্তপ্পেসি. ততো যো যো যং যং ইচ্ছতি, তস্স তস্স তং তং অদাসি.

এৰং তস্মিং মহাজনে নানাৰিধেন অন্নপানাদিনা যথাকামং সন্তপ্পিতে পচ্ছা ৰূপসন্তে মগ্গপরিস্সমে সো ব্রাহ্মণৰাণিজো অযোনিসো মনসিকরোন্তো এৰং চিন্তেসি – ‘‘ধনলাভায ইতো কম্বোজং গন্ত্ৰা মযং কিং করিস্সাম, ইমমেৰ পন যক্খং যেন কেনচি উপাযেন গহেত্ৰা যানং আরোপেত্ৰা অম্হাকং নগরমেৰ গমিস্সামা’’তি. এৰং চিন্তেত্ৰা তমত্থং অঙ্কুরস্স কথেন্তো –

২৫৭. ‘‘যস্স অত্থায গচ্ছাম, কম্বোজং ধনহারকা;

অযং কামদদো যক্খো, ইমং যক্খং নযামসে.

২৫৮. ‘‘ইমং যক্খং গহেত্ৰান, সাধুকেন পসয্হ ৰা;

যানং আরোপযিত্ৰান, খিপ্পং গচ্ছাম দ্ৰারক’’ন্তি. –

গাথাদ্ৰযমাহ. তত্থ যস্স অত্থাযাতি যস্স কারণা. কম্বোজন্তি কম্বোজরট্ঠং. ধনহারকাতি ভণ্ডৰিক্কযেন লদ্ধধনহারিনো. কামদদোতি ইচ্ছিতিচ্ছিতদাযকো. যক্খোতি দেৰপুত্তো. নযামসেতি নযিস্সাম. সাধুকেনাতি যাচনেন. পসয্হাতি অভিভৰিত্ৰা বলক্কারেন, যানন্তি সুখযানং. দ্ৰারকন্তি দ্ৰারৰতীনগরং. অযং হেত্থাধিপ্পাযো – যদত্থং মযং ইতো কম্বোজং গন্তুকামা, তেন গমনেন সাধেতব্বো অত্থো ইধেৰ সিজ্ঝতি. অযঞ্হি যক্খো কামদদো, তস্মা ইমং যক্খং যাচিত্ৰা তস্স অনুমতিযা ৰা, সচে সঞ্ঞত্তিং ন গচ্ছতি, বলক্কারেন ৰা যানং আরোপেত্ৰা যানে পচ্ছাবাহং বন্ধিত্ৰা তং গহেত্ৰা ইতোযেৰ খিপ্পং দ্ৰারৰতীনগরং গচ্ছামাতি.

এৰং পন ব্রাহ্মণেন ৰুত্তো অঙ্কুরো সপ্পুরিসধম্মে ঠত্ৰা তস্স ৰচনং পটিক্খিপন্তো –

২৫৯. ‘‘যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো’’তি. –

গাথমাহ. তত্থ ন ভঞ্জেয্যাতি ন ছিন্দেয্য. মিত্তদুব্ভোতি মিত্তেসু দুব্ভনং তেসং অনত্থুপ্পাদনং. পাপকোতি অভদ্দকো মিত্তদুব্ভো. যো হি সীতচ্ছাযো রুক্খো ঘম্মাভিতত্তস্স পুরিসস্স পরিস্সমৰিনোদকো, তস্সাপি নাম পাপকং ন চিন্তেতব্বং, কিমঙ্কং পন সত্তভূতেসু. অযং দেৰপুত্তো সপ্পুরিসো পুব্বকারী অম্হাকং দুক্খপনূদকো বহূপকারো, ন তস্স কিঞ্চি অনত্থং চিন্তেতব্বং, অঞ্ঞদত্থু সো পূজেতব্বো এৰাতি দস্সেতি.

তং সুত্ৰা ব্রাহ্মণা ‘‘অত্থস্স মূলং নিকতিৰিনযো’’তি নীতিমগ্গং নিস্সায অঙ্কুরস্স পটিলোমপক্খে ঠত্ৰা –

২৬০. ‘‘যস্স রুক্খস্স ছাযায, নিসীদেয্য সযেয্য ৰা;

খন্ধম্পি তস্স ছিন্দেয্য, অত্থো চে তাদিসো সিযা’’তি. –

গাথমাহ. তত্থ অত্থো চে তাদিসো সিযাতি তাদিসেন দব্বসম্ভারেন সচে অত্থো ভৰেয্য, তস্স রুক্খস্স খন্ধম্পি ছিন্দেয্য, কিমঙ্গং পন সাখাদযোতি অধিপ্পাযো.

এৰং ব্রাহ্মণেন ৰুত্তে অঙ্কুরো সপ্পুরিসধম্মংযেৰ পগ্গণ্হন্তো –

২৬১. ‘‘যস্স রুক্খস্স ছাযায, নিসীদেয্য সযেয্য ৰা;

ন তস্স পত্তং ভিন্দেয্য, মিত্তদুব্ভো হি পাপকো’’তি. –

ইমং গাথমাহ. তত্থ ন তস্স পত্তং ভিন্দেয্যাতি তস্স রুক্খস্স একপণ্ণমত্তম্পি ন পাতেয্য, পগেৰ সাখাদিকেতি অধিপ্পাযো.

পুনপি ব্রাহ্মণো অত্তনো ৰাদং পগ্গণ্হন্তো –

২৬২. ‘‘যস্স রুক্খস্স ছাযায, নিসীদেয্য সযেয্য ৰা;

সমূলম্পি তং অব্বুহে, অত্থো চে তাদিসো সিযা’’তি. –

গাথমাহ. তত্থ সমূলম্পি তং অব্বুহেতি তং তত্থ সমূলম্পি সহ মূলেনপি অব্বুহেয্য, উদ্ধরেয্যাতি অত্থো.

এৰং ব্রাহ্মণেন ৰুত্তে পুন অঙ্কুরো তং নীতিং নিরত্থকং কাতুকামো –

২৬৩. ‘‘যস্সেকরত্তিম্পি ঘরে ৰসেয্য, যত্থন্নপানং পুরিসো লভেথ;

ন তস্স পাপং মনসাপি চিন্তযে, কতঞ্ঞুতা সপ্পুরিসেহি ৰণ্ণিতা.

২৬৪. ‘‘যস্সেকরত্তিম্পি ঘরে ৰসেয্য, অন্নেন পানেন উপট্ঠিতো সিযা;

ন তস্স পাপং মনসাপি চিন্তযে, অদুব্ভপাণী দহতে মিত্তদুব্ভিং.

২৬৫. ‘‘যো পুব্বে কতকল্যাণো, পচ্ছা পাপেন হিংসতি;

অল্লপাণিহতো পোসো, ন সো ভদ্রানি পস্সতী’’তি. –

ইমা তিস্সো গাথা অভাসি.

২৬৩. তত্থ যস্সাতি যস্স পুগ্গলস্স. একরত্তিম্পীতি একরত্তিমত্তম্পি কেৰলং গেহে ৰসেয্য. যত্থন্নপানং পুরিসো লভেথাতি যস্স সন্তিকে কোচি পুরিসো অন্নপানং ৰা যংকিঞ্চি ভোজনং ৰা লভেয্য. ন তস্স পাপং মনসাপি চিন্তযেতি তস্স পুগ্গলস্স অভদ্দকং অনত্থং মনসাপি ন চিন্তেয্য ন পিহেয্য, পগেৰ কাযৰাচাহি. কস্মাতি চে? কতঞ্ঞুতা সপ্পুরিসেহি ৰণ্ণিতাতি কতঞ্ঞুতা নাম বুদ্ধাদীহি উত্তমপুরিসেহি পসংসিতা.

২৬৪. উপট্ঠিতোতি পযিরুপাসিতো ‘‘ইদং গণ্হ ইদং ভুঞ্জা’’তি অন্নপানাদিনা উপট্ঠিতো. অদুব্ভপাণীতি অহিংসকহত্থো হত্থসংযতো. দহতে মিত্তদুব্ভিন্তি তং মিত্তদুব্ভিং পুগ্গলং দহতি ৰিনাসেতি, অপ্পদুট্ঠে হিতজ্ঝাসযসম্পন্নে পুগ্গলে পরেন কতো অপরাধো অৰিসেসেন তস্সেৰ অনত্থাৰহো, অপ্পদুট্ঠো পুগ্গলো অত্থতো তং দহতি নাম. তেনাহ ভগৰা –

‘‘যো অপ্পদুট্ঠস্স নরস্স দুস্সতি, সুদ্ধস্স পোসস্স অনঙ্গণস্স;

তমেৰ বালং পচ্চেতি পাপং, সুখুমো রজো পটিৰাতংৰ খিত্তো’’তি. (ধ. প. ১২৫; জা. ১.৫.৯৪; সং. নি. ১.২২);

২৬৫. যো পুব্বে কতকল্যাণোতি যো পুগ্গলো কেনচি সাধুনা কতভদ্দকো কতূপকারো. পচ্ছা পাপেন হিংসতীতি তং পুব্বকারিনং অপরভাগে পাপেন অভদ্দকেন অনত্থকেন বাধতি. অল্লপাণিহতো পোসোতি অল্লপাণিনা উপকারকিরিযায অল্লপাণিনা ধোতহত্থেন পুব্বকারিনা হেট্ঠা ৰুত্তনযেন হতো বাধিতো, তস্স ৰা পুব্বকারিনো বাধনেন হতো অল্লপাণিহতো নাম, অকতঞ্ঞুপুগ্গলো. ন সো ভদ্রানি পস্সতীতি সো যথাৰুত্তপুগ্গলো ইধলোকে চ পরলোকে চ ইট্ঠানি ন পস্সতি, ন ৰিন্দতি, ন লভতীতি অত্থো.

এৰং সপ্পুরিসধম্মং পগ্গণ্হন্তেন অঙ্কুরেন অভিভৰিত্ৰা ৰুত্তো সো ব্রাহ্মণো নিরুত্তরো তুণ্হী অহোসি. যক্খো পন তেসং দ্ৰিন্নং ৰচনপটিৰচনানি সুত্ৰা ব্রাহ্মণস্স কুজ্ঝিত্ৰাপি ‘‘হোতু ইমস্স দুট্ঠব্রাহ্মণস্স কত্তব্বং পচ্ছা জানিস্সামী’’তি অত্তনো কেনচি অনভিভৰনীযতমেৰ তাৰ দস্সেন্তো –

২৬৬. ‘‘নাহং দেৰেন ৰা মনুস্সেন ৰা, ইস্সরিযেন ৰা হং সুপ্পসয্হো;

যক্খোহমস্মি পরমিদ্ধিপত্তো, দূরঙ্গমো ৰণ্ণবলূপপন্নো’’তি. –

গাথমাহ. তত্থ দেৰেন ৰাতি যেন কেনচি দেৰেন ৰা. মনুস্সেন ৰাতি এত্থাপি এসেৰ নযো. ইস্সরিযেন ৰাতি দেৰিস্সরিযেন ৰা মনুস্সিস্সরিযেন ৰা. তত্থ দেৰিস্সরিযং নাম চতুমহারাজিকসক্কসুযামাদীনং দেৰিদ্ধি, মনুস্সিস্সরিযং নাম চক্কৰত্তিআদীনং পুঞ্ঞিদ্ধি. তস্মা ইস্সরিযগ্গহণেন মহানুভাৰে দেৰমনুস্সে সঙ্গণ্হাতি. মহানুভাৰাপি হি দেৰা অত্তনো পুঞ্ঞফলূপত্থম্ভিতে মনুস্সেপি অসতি পযোগৰিপত্তিযং অভিভৰিতুং ন সক্কোন্তি, পগেৰ ইতরে. হন্তি অসহনে নিপাতো. ন সুপ্পসয্হোতি অপ্পধংসিযো. যক্খোহমস্মি পরমিদ্ধিপত্তোতি অত্তনো পুঞ্ঞফলেন অহং যক্খত্তং উপগতো অস্মি, যক্খোৰ সমানো ন যো ৰা সো ৰা, অথ খো পরমিদ্ধিপত্তো পরমায উত্তমায যক্খিদ্ধিযা সমন্নাগতো. দূরঙ্গমোতি খণেনেৰ দূরম্পি ঠানং গন্তুং সমত্থো. ৰণ্ণবলূপপন্নোতি রূপসম্পত্তিযা সরীরবলেন চ উপপন্নো সমন্নাগতোতি তীহিপি পদেহি মন্তপ্পযোগাদীহি অত্তনো অনভিভৰনীযতংযেৰ দস্সেতি. রূপসম্পন্নো হি পরেসং বহুমানিতো হোতি, রূপসম্পদং নিস্সায ৰিসভাগৰত্থুনাপি অনাকড্ঢনিযোৰাতি ৰণ্ণসম্পদা অনভিভৰনীযকারণন্তি ৰুত্তা.

ইতো পরং অঙ্কুরস্স চ দেৰপুত্তস্স চ ৰচনপটিৰচনকথা হোতি –

২৬৭. ‘‘পাণি তে সব্বসোৰণ্ণো, পঞ্চধারো মধুস্সৰো;

নানারসা পগ্ঘরন্তি, মঞ্ঞেহং তং পুরিন্দদং.

২৬৮. ‘‘নাম্হি দেৰো ন গন্ধব্বো, নাপি সক্কো পুরিন্দদো;

পেতং মং অঙ্কুর জানাহি, রোরুৰম্হা ইধাগতং.

২৬৯. ‘‘কিংসীলো কিংসমাচারো, রোরুৰস্মিং পুরে তুৰং;

কেন তে ব্রহ্মচরিযেন, পুঞ্ঞং পাণিম্হি ইজ্ঝতি.

২৭০. ‘‘তুন্নৰাযো পুরে আসিং, রোরুৰস্মিং তদা অহং;

সুকিচ্ছৰুত্তি কপণো, ন মে ৰিজ্জতি দাতৰে.

২৭১. ‘‘নিৰেসনঞ্চ মে আসি, অসয্হস্স উপন্তিকে;

সদ্ধস্স দানপতিনো, কতপুঞ্ঞস্স লজ্জিনো.

২৭২. ‘‘তত্থ যাচনকাযন্তি, নানাগোত্তা ৰনিব্বকা;

তে চ মং তত্থ পুচ্ছন্তি, অসয্হস্স নিৰেসনং.

২৭৩. ‘‘কত্থ গচ্ছাম ভদ্দং ৰো, কত্থ দানং পদীযতি;

তেসাহং পুট্ঠো অক্খামি, অসয্হস্স নিৰেসনং.

২৭৪. ‘‘পগ্গয্হ দক্খিণং বাহুং, এত্থ গচ্ছথ ভদ্দং ৰো;

এত্থ দানং পদীযতি, অসয্হস্স নিৰেসনে.

২৭৫. ‘‘তেন পাণি কামদদো, তেন পাণি মধুস্সৰো;

তেন মে ব্রহ্মচরিযেন, পুঞ্ঞং পাণিম্হি ইজ্ঝতি.

২৭৬. ‘‘ন কির ত্ৰং অদা দানং, সকপাণীহি কস্সচি;

পরস্স দানং অনুমোদমানো, পাণিং পগ্গয্হ পাৰদি.

২৭৭. ‘‘তেন পাণি কামদদো, তেন পাণি মধুস্সৰো;

তেন তে ব্রহ্মচরিযেন, পুঞ্ঞং পাণিম্হি ইজ্ঝতি.

২৭৮. ‘‘যো সো দানমদা ভন্তে, পসন্নো সকপাণিভি;

সো হিত্ৰা মানুসং দেহং, কিং নু সো দিসতং গতো.

২৭৯. ‘‘নাহং পজানামি অসয্হসাহিনো, অঙ্গীরসস্স গতিং আগতিং ৰা;

সুতঞ্চ মে ৰেস্সৰণস্স সন্তিকে, সক্কস্স সহব্যতং গতো অসয্হো.

২৮০. ‘‘অলমেৰ কাতুং কল্যাণং, দানং দাতুং যথারহং;

পাণিং কামদদং দিস্ৰা, কো পুঞ্ঞং ন করিস্সতি.

২৮১. ‘‘সো হি নূন ইতো গন্ত্ৰা, অনুপ্পত্ৰান দ্ৰারকং;

দানং পট্ঠপযিস্সামি, যং মমস্স সুখাৰহং.

২৮২. ‘‘দস্সামন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, দুগ্গে সঙ্কমনানি চা’’তি. –

পন্নরস ৰচনপটিৰচনগাথা হোন্তি.

২৬৭. তত্থ পাণি তেতি তৰ দক্খিণহত্থো. সব্বসোৰণ্ণোতি সব্বসো সুৰণ্ণৰণ্ণো. পঞ্চধারোতি পঞ্চহি অঙ্গুলীহি পরেহি কামিতৰত্থূনং ধারা এতস্স সন্তীতি পঞ্চধারো. মধুস্সৰোতি মধুররসৰিস্সন্দকো. তেনাহ ‘‘নানারসা পগ্ঘরন্তী’’তি, মধুরকটুককসাৰাদিভেদা নানাৰিধা রসা ৰিস্সন্দন্তীতি অত্থো. যক্খস্স হি কামদদে মধুরাদিরসসম্পন্নানি ৰিৰিধানি খাদনীযভোজনীযানি হত্থে ৰিস্সজ্জন্তে মধুরাদিরসা পগ্ঘরন্তীতি ৰুত্তং. মঞ্ঞেহং তং পুরিন্দদন্তি মঞ্ঞে অহং তং পুরিন্দদং সক্কং, ‘‘এৰংমহানুভাৰো সক্কো দেৰরাজা’’তি তং অহং মঞ্ঞামীতি অত্থো.

২৬৮. নাম্হি দেৰোতি ৰেস্সৰণাদিকো পাকটদেৰো ন হোমি. ন গন্ধব্বোতি গন্ধব্বকাযিকদেৰোপি ন হোমি. নাপি সক্কো পুরিন্দদোতি পুরিমত্তভাৰে পুরে দানস্স পট্ঠপিতত্তা ‘‘পুরিন্দদো’’তি লদ্ধনামো সক্কো দেৰরাজাপি ন হোমি. কতরো পন অহোসীতি আহ ‘‘পেতং মং অঙ্কুর জানাহী’’তিআদি. অঙ্কুরপেতূপপত্তিকং মং জানাহি, ‘‘অঞ্ঞতরো পেতমহিদ্ধিকো’’তি মং উপধারেহি. রোরুৰম্হা ইধাগতন্তি রোরুৰনগরতো চৰিত্ৰা মরুকন্তারে ইধ ইমস্মিং নিগ্রোধরুক্খে উপপজ্জনৰসেন আগতং, এত্থ নিব্বত্তন্তি অত্থো.

২৬৯. কিংসীলো কিংসমাচারো, রোরুৰস্মিং পুরে তুৰন্তি পুব্বে পুরিমত্তভাৰে রোরুৰনগরে ৰসন্তো ত্ৰং কিংসীলো কিংসমাচারো অহোসি, পাপতো নিৰত্তনলক্খণং কীদিসং সীলং সমাদায সংৰত্তিতপুঞ্ঞকিরিযালক্খণেন সমাচারেন কিংসমাচারো, দানাদীসু কুসলসমাচারেসু কীদিসো সমাচারো অহোসীতি অত্থো. কেন তে ব্রহ্মচরিযেন, পুঞ্ঞং পাণিম্হি ইজ্ঝতীতি কীদিসেন সেট্ঠচরিযেন ইদং এৰরূপং তৰ হত্থেসু পুঞ্ঞফলং ইদানি সমিজ্ঝতি নিপ্ফজ্জতি, তং কথেহীতি অত্থো. পুঞ্ঞফলঞ্হি ইধ উত্তরপদলোপেন ‘‘পুঞ্ঞ’’ন্তি অধিপ্পেতং. তত্থা হি তং ‘‘কুসলানং, ভিক্খৰে, ধম্মানং সমাদানহেতু এৰমিদং পুঞ্ঞং পৰড্ঢতী’’তিআদীসু (দী. নি. ৩.৮০) পুঞ্ঞন্তি ৰুত্তং.

২৭০. তুন্নৰাযোতি তুন্নকারো. সুকিচ্ছৰুত্তীতি সুট্ঠু কিচ্ছপুত্তিকো অতিৰিয দুক্খজীৰিকো. কপণোতি ৰরাকো, দীনোতি অত্থো. ন মে ৰিজ্জতি দাতৰেতি অদ্ধিকানং সমণব্রাহ্মণানং দাতুং কিঞ্চি দাতব্বযুত্তকং ময্হং নত্থি, চিত্তং পন মে দানং দিন্নন্তি অধিপ্পাযো.

২৭১. নিৰেসনন্তি ঘরং, কম্মকরণসালা ৰা. অসয্হস্স উপন্তিকেতি অসয্হস্স মহাসেট্ঠিনো গেহস্স সমীপে. সদ্ধস্সাতি কম্মফলসদ্ধায সমন্নাগতস্স. দানপতিনোতি দানে নিরন্তরপ্পৰত্তায পরিচ্চাগসম্পত্তিযা লোভস্স চ অভিভৰেন পতিভূতস্স. কতপুঞ্ঞস্সাতি পুব্বে কতসুচরিতকম্মস্স. লজ্জিনোতি পাপজিগুচ্ছনসভাৰস্স.

২৭২. তত্থাতি তস্মিং মম নিৰেসনে. যাচনকাযন্তীতি যাচনকা জনা অসয্হসেট্ঠিং কিঞ্চি যাচিতুকামা আগচ্ছন্তি. নানাগোত্তাতি নানাৰিধগোত্তাপদেসা. ৰনিব্বকাতি ৰণ্ণদীপকা, যে দাযকস্স পুঞ্ঞফলাদিঞ্চ গুণকিত্তনাদিমুখেন অত্তনো অত্থিকভাৰং পৰেদেন্তা ৰিচরন্তি. তে চ মং তত্থ পুচ্ছন্তীতি তত্থাতি নিপাতমত্তং, তে যাচকাদযো মং অসয্হসেট্ঠিনো নিৰেসনং পুচ্ছন্তি. অক্খরচিন্তকা হি ঈদিসেসু ঠানেসু কম্মদ্ৰযং ইচ্ছন্তি.

২৭৩. কত্থ গচ্ছাম ভদ্দং ৰো, কত্থ দানং পদীযতীতি তেসং পুচ্ছনাকারদস্সনং. অযং পেত্থ অত্থো – ভদ্দং তুম্হাকং হোতু, মযং ‘‘অসয্হমহাসেট্ঠিনা দানং পদীযতী’’তি সুত্ৰা আগতা, কত্থ দানং পদীযতি, কত্থ ৰা মযং গচ্ছাম, কত্থ গতেন দানং সক্কা লদ্ধুন্তি. তেসাহং পুট্ঠো অক্খামীতি এৰং তেহি অদ্ধিকজনেহি লভনট্ঠানং পুট্ঠো ‘‘অহং পুব্বে অকতপুঞ্ঞতায ইদানি ঈদিসানং কিঞ্চি দাতুং অসমত্থো জাতো, দানগ্গং পন ইমেসং দস্সেন্তো লাভস্স উপাযাচিক্খণেন পীতিং উপ্পাদেন্তো এত্তকেনপি বহুং পুঞ্ঞং পসৰামী’’তি গারৰং উপ্পাদেত্ৰা দক্খিণং বাহুং পসারেত্ৰা তেসং অসয্হসেট্ঠিস্স নিৰেসনং অক্খামি. তেনাহ ‘‘পগ্গয্হ দক্খিণং বাহু’’ন্তিআদি.

২৭৪. তেন পাণি কামদদোতি তেন পরদানপকাসনেন পরেন কতস্স দানস্স সক্কচ্চং অনুমোদনমত্তেন হেতুনা ইদানি ময্হং হত্থো কপ্পরুক্খো ৰিয সন্তানকলতা ৰিয চ কামদুহো ইচ্ছিতিচ্ছিতদাযী কামদদো হোতি. কামদদো চ হোন্তো তেন পাণি মধুস্সৰো ইট্ঠৰত্থুৰিস্সজ্জনকো জাতো.

২৭৬. ন কির ত্ৰং অদা দানন্তি কিরাতি অনুস্সৰনত্থে নিপাতো, ত্ৰং কির অত্তনো সন্তকং ন পরিচ্চজি, সকপাণীহি সহত্থেহি যস্স কস্সচি সমণস্স ৰা ব্রাহ্মণস্স ৰা কিঞ্চি দানং ন অদাসি. পরস্স দানং অনুমোদমানোতি কেৰলং পন পরেন কতং পরস্স দানং ‘‘অহো দানং পৰত্তেসী’’তি অনুমোদমানোযেৰ ৰিহাসি.

২৭৭. তেন পাণি কামদদোতি তেন তুয্হং পাণি এৰং কামদদো, অহো অচ্ছরিযা ৰত পুঞ্ঞানং গতীতি অধিপ্পাযো.

২৭৮. যো সো দানমদা, ভন্তে, পসন্নো সকপাণিভীতি দেৰপুত্তং গারৰেন আলপতি. ভন্তে, পরেন কতস্স দানানুমোদকস্স তাৰ তুয্হং ঈদিসং ফলং এৰরূপো আনুভাৰো, যো পন সো অসয্হমহাসেট্ঠি মহাদানং অদাসি, পসন্নচিত্তো হুত্ৰা সহত্থেহি তদা মহাদানং পৰত্তেসি. সো হিত্ৰা মানুসং দেহন্তি সো ইধ মনুস্সত্তভাৰং পহায. কিন্তি কতরং. নু সোতি নূতি নিপাতমত্তং. দিসতং গতোতি দিসং ঠানং গতো, কীদিসী তস্স গতো নিপ্ফত্তীতি অসয্হসেট্ঠিনো অভিসম্পরাযং পুচ্ছি.

২৭৯. অসয্হসাহিনোতি অঞ্ঞেহি মচ্ছরীহি লোভাভিভূতেহি সহিতুং ৰহিতুং অসক্কুণেয্যস্স পরিচ্চাগাদিৰিভাগস্স সপ্পুরিসধুরস্স সহনতো অসয্হসাহিনো. অঙ্গীরসস্সাতি অঙ্গতো নিক্খমনকজুতিস্স. রসোতি হি জুতিযা অধিৰচনং. তস্স কির যাচকে আগচ্ছন্তে দিস্ৰা উল়ারং পীতিসোমনস্সং উপ্পজ্জতি, মুখৰণ্ণো ৰিপ্পসীদতি, তং অত্তনো পচ্চক্খং কত্ৰা এৰমাহ. গতিং আগতিং ৰাতি তস্স ‘‘অসুকং নাম গতিং, ইতো গতো’’তি গতিং ৰা ‘‘ততো ৰা পন অসুকস্মিং কালে ইধাগমিস্সতী’’তি আগতিং ৰা নাহং জানামি, অৰিসযো এস ময্হং. সুতঞ্চ মে ৰেস্সৰণস্স সন্তিকেতি অপিচ খো উপট্ঠানং গতেন ৰেস্সৰণস্স মহারাজস্স সন্তিকে সুতমেতং মযা. সক্কস্স সহব্যতং গতো অসয্হোতি অসয্হসেট্ঠি সক্কস্স দেৰানমিন্দস্স সহব্যতং গতো অহোসি, তাৰতিংসভৰনে নিব্বত্তোতি অত্থো.

২৮০. অলমেৰ কাতুং কল্যাণন্তি যংকিঞ্চি কল্যাণং কুসলং পুঞ্ঞং কাতুং যুত্তমেৰ পতিরূপমেৰ. তত্থ পন যং সব্বসাধারণং সুকততরং, তং দস্সেতুং ‘‘দানং দাতুং যথারহ’’ন্তি ৰুত্তং, অত্তনো ৰিভৰবলানুরূপং দানং দাতুং অলমেৰ. তত্থ কারণমাহ ‘‘পাণিং কামদদং দিস্ৰা’’তি. যত্র হি নাম পরকতপুঞ্ঞানুমোদনপুব্বকেন দানপতিনিৰেসনমগ্গাচিক্খণমত্তেন অযং হত্থো কামদদো দিট্ঠো, ইমং দিস্ৰা. কো পুঞ্ঞং ন করিস্সতীতি মাদিসো কো নাম অত্তনো পতিট্ঠানভূতং পুঞ্ঞং ন করিস্সতীতি.

২৮১. এৰং অনিযমৰসেন পুঞ্ঞকিরিযায আদরং দস্সেত্ৰা ইদানি অত্তনি তং নিযমেত্ৰা দস্সেন্তো ‘‘সো হি নূনা’’তিআদিগাথাদ্ৰযমাহ. তত্থ সোতি সো অহং. হীতি অৰধারণে নিপাতো, নূনাতি পরিৰিতক্কে. ইতো গন্ত্ৰাতি ইতো মরুভূমিতো অপগন্ত্ৰা. অনুপ্পত্ৰান দ্ৰারকন্তি দ্ৰারৰতীনগরং অনুপাপুণিত্ৰা. পট্ঠপযিস্সামীতি পৰত্তযিস্সামি.

এৰং অঙ্কুরেন ‘‘দানং দস্সামী’’তি পটিঞ্ঞায কতায যক্খো তুট্ঠমানসো ‘‘মারিস, ত্ৰং ৰিস্সত্থো দানং দেহি, অহং পন তে সহাযকিচ্চং করিস্সামি, যেন তে দেয্যধম্মো ন পরিক্খযং গমিস্সতি, তেন পকারেন করিস্সামী’’তি তং দানকিরিযায সমুত্তেজেত্ৰা ‘‘ব্রাহ্মণ ৰাণিজ, ত্ৰং কির মাদিসে বলক্কারেন নেতুকামো অত্তনো পমাণং ন জানাসী’’তি তস্স ভণ্ডমন্তরধাপেত্ৰা তং যক্খৰিভিংসকায ভিংসাপেন্তো সন্তজ্জেসি. অথ নং অঙ্কুরো নানপ্পকারং যাচিত্ৰা ব্রাহ্মণেন খমাপেন্তো পসাদেত্ৰা সব্বভণ্ডং পাকতিকং কারাপেত্ৰা রত্তিযা উপগতায যক্খং ৰিস্সজ্জেত্ৰা গচ্ছন্তো তস্স অৰিদূরে অঞ্ঞতরং অতিৰিয বীভচ্ছদস্সনং পেতং দিস্ৰা তেন কতকম্মং পুচ্ছন্তো –

২৮৩. ‘‘কেন তে অঙ্গুলী কুণা, মুখঞ্চ কুণলীকতং;

অক্খীনি চ পগ্ঘরন্তি, কিং পাপং পকতং তযা’’তি. –

গাথমাহ. তত্থ কুণাতি কুণিকা পটিকুণিকা অনুজুভূতা. কুণলীকতন্তি মুখৰিকারেন ৰিকুণিতং সংকুণিতং. পগ্ঘরন্তীতি অসুচিং ৰিস্সন্দন্তি.

অথস্স পেতো –

২৮৪. ‘‘অঙ্গীরসস্স গহপতিনো, সদ্ধস্স ঘরমেসিনো;

তস্সাহং দানৰিস্সগ্গে, দানে অধিকতো অহুং.

২৮৫. ‘‘তত্থ যাচনকে দিস্ৰা, আগতে ভোজনত্থিকে;

একমন্তং অপক্কম্ম, অকাসিং কুণলিং মুখং.

২৮৬. ‘‘তেন মে অঙ্গুলী কুণা, মুখঞ্চ কুণলীকতং;

অক্খীনি মে পগ্ঘরন্তি, তং পাপং পকতং মযা’’তি. –

তিস্সো গাথা অভাসি.

২৮৪. তত্থ ‘‘অঙ্গীরসস্সা’’তিআদিনা অসয্হসেট্ঠিং কিত্তেতি. ঘরমেসিনোতি ঘরমাৰসন্তস্স গহট্ঠস্স. দানৰিস্সগ্গেতি দানগ্গে পরিচ্চাগট্ঠানে. দানে অধিকতো অহুন্তি দেয্যধম্মস্স পরিচ্চজনে দানাধিকারে অধিকতো ঠপিতো অহোসিং.

২৮৫. একমন্তং অপক্কম্মাতি যাচনকে ভোজনত্থিকে আগতে দিস্ৰা দানব্যাৰটেন দানগ্গতো অনপক্কম্ম যথাঠানেযেৰ ঠত্ৰা সঞ্জাতপীতিসোমনস্সেন ৰিপ্পসন্নমুখৰণ্ণেন সহত্থেন দানং দাতব্বং, পরেহি ৰা পতিরূপেহি দাপেতব্বং, অহং পন তথা অকত্ৰা যাচনকে আগচ্ছন্তে দূরতোৰ দিস্ৰা অত্তানং অদস্সেন্তো একমন্তং অপক্কম্ম অপক্কমিত্ৰা. অকাসিং কুণলিং মুখন্তি ৰিকুণিতং সঙ্কুচিতং মুখং অকাসিং.

২৮৬. তেনাতি যস্মা তদাহং সামিনা দানাধিকারে নিযুত্তো সমানো দানকালে উপট্ঠিতে মচ্ছরিযাপকতো দানগ্গতো অপক্কমন্তো পাদেহি সঙ্কোচং আপজ্জিং, সহত্থেহি দাতব্বে তথা অকত্ৰা হত্থসঙ্কোচং আপজ্জিং, পসন্নমুখেন ভৰিতব্বে মুখসঙ্কোচং আপজ্জিং, পিযচক্খূহি ওলোকেতব্বে চক্খুকালুসিযং উপ্পাদেসিং, তস্মা হত্থঙ্গুলিযো চ পাদঙ্গুলিযো চ কুণিতা জাতা, মুখঞ্চ কুণলীকতং ৰিরূপরূপং সঙ্কুচিতং, অক্খীনি অসুচীদুগ্গন্ধজেগুচ্ছানি অস্সূনি পগ্ঘরন্তীতি অত্থো. তেন ৰুত্তং –

‘‘তেন মে অঙ্গুলী কুণা, মুখঞ্চ কুণলীকতং;

অক্খীনি মে পগ্ঘরন্তি, তং পাপং পকতং মযা’’তি.

তং সুত্ৰা অঙ্কুরো পেতং গরহন্তো –

২৮৭. ‘‘ধম্মেন তে কাপুরিস, মুখঞ্চ কুণলীকতং;

অক্খীনি চ পগ্ঘরন্তি, যং তং পরস্স দানস্স;

অকাসি কুণলিং মুখ’’ন্তি. –

গাথমাহ. তত্থ ধম্মেনাতি যুত্তেনেৰ কারণেন. তেতি তৰ. কাপুরিসাতি লামকপুরিস. যন্তি যস্মা. পরস্স দানস্সাতি পরস্স দানস্মিং. অযমেৰ ৰা পাঠো.

পুন অঙ্কুরো তং দানপতিং সেট্ঠিং গরহন্তো –

২৮৮. ‘‘কথঞ্হি দানং দদমানো, করেয্য পরপত্তিযং;

অন্নপানং খাদনীযং, ৰত্থসেনাসনানি চা’’তি. –

গাথমাহ. তস্সত্থো – দানং দদন্তো পুরিসো কথঞ্হি নাম তং পরপত্তিযং পরেন পাপেতব্বং সাধেতব্বং করেয্য, অত্তপচ্চক্খমেৰ কত্ৰা সহত্থেনেৰ দদেয্য, সযং ৰা তত্থ ব্যাৰটো ভৰেয্য, অঞ্ঞথা অত্তনো দেয্যধম্মো অট্ঠানে ৰিদ্ধংসিযেথ, দক্খিণেয্যা চ দানেন পরিহাযেয্যুন্তি.

এৰং তং গরহিত্ৰা ইদানি অত্তনা পটিপজ্জিতব্বৰিধিং দস্সেন্তো –

২৮৯. ‘‘সো হি নূন ইতো গন্ত্ৰা, অনুপ্পত্ৰান দ্ৰারকং;

দানং পট্ঠপযিস্সামি, যং মমস্স সুখাৰহং.

২৯০. ‘‘দস্সামন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, দুগ্গে সঙ্কমনানি চা’’তি. –

গাথাদ্ৰযমাহ, তং ৰুত্তত্থমেৰ.

২৯১. ‘‘ততো হি সো নিৰত্তিত্ৰা, অনুপ্পত্ৰান দ্ৰারকং;

দানং পট্ঠপযি অঙ্কুরো, যংতুমস্স সুখাৰহং.

২৯২. ‘‘অদা অন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, ৰিপ্পসন্নেন চেতসা.

২৯৩. ‘‘কো ছাতো কো চ তসিতো, কো ৰত্থং পরিদহিস্সতি;

কস্স সন্তানি যোগ্গানি, ইতো যোজেন্তু ৰাহনং.

২৯৪. ‘‘কো ছত্তিচ্ছতি গন্ধঞ্চ, কো মালং কো উপাহনং;

ইতিস্সু তত্থ ঘোসেন্তি, কপ্পকা সূদমাগধা;

সদা সাযঞ্চ পাতো চ, অঙ্গুরস্স নিৰেসনে’’তি. –

চতস্সো গাথা অঙ্গুরস্স পটিপত্তিং দস্সেতুং সঙ্গীতিকারেহি ঠপিতা.

২৯১. তত্থ ততোতি মরুকন্তারতো. নিৰত্তিত্ৰাতি পটিনিৰত্তিত্ৰা. অনুপ্পত্ৰান দ্ৰারকন্তি দ্ৰারৰতীনগরং অনুপাপুণিত্ৰা. দানং পট্ঠপযি অঙ্গুরোতি যক্খেন পরিপূরিতসকলকোট্ঠাগারো সব্বপাথেয্যকং মহাদানং সো অঙ্গুরো পট্ঠপেসি. যংতুমস্স সুখাৰহন্তি যং অত্তনো সম্পতি আযতিঞ্চ সুখনিব্বত্তকং.

২৯৩. কো ছাতোতি কো জিঘচ্ছিতো, সো আগন্ত্ৰা যথারুচি ভুঞ্জতূতি অধিপ্পাযো. এসেৰ নযো সেসেসুপি. তসিতোতি পিপাসিতো. পরিদহিস্সতীতি নিৰাসেস্সতি পারুপিস্সতি চাতি অত্থো. সন্তানীতি পরিস্সমপ্পত্তানি. যোগ্গানীতি রথৰাহনানি. ইতো যোজেন্তু ৰাহনন্তি ইতো যোগ্গসমূহতো যথারুচিতং গহেত্ৰা ৰাহনং যোজেন্তু.

২৯৪. কো ছত্তিচ্ছতীতি কো কিলঞ্জছত্তাদিভেদং ছত্তং ইচ্ছতি, সো গণ্হাতূতি অধিপ্পাযো. সেসেসুপি এসেৰ নযো. গন্ধন্তি চতুজ্জাতিযগন্ধাদিকং গন্ধং. মালন্তি গন্থিতাগন্থিতভেদং পুপ্ফং. উপাহনন্তি খল্লবদ্ধাদিভেদং উপাহনং. ইতিস্সূতি এত্থ সূতি নিপাতমত্তং, ইতি এৰং ‘‘কো ছাতো, কো তসিতো’’তিআদিনাতি অত্থো. কপ্পকাতি ন্হাপিতকা. সূদাতি ভত্তকারকা. মাগধাতি গন্ধিনো. সদাতি সব্বকালং দিৰসে দিৰসে সাযঞ্চ পাতো চ তত্থ অঙ্গুরস্স নিৰেসনে ঘোসেন্তি উগ্ঘোসেন্তীতি যোজনা.

এৰং মহাদানং পৰত্তেন্তস্স গচ্ছন্তে কালে তিত্তিভাৰতো অত্থিকজনেহি পৰিৰিত্তং ৰিরল়ং দানগ্গং অহোসি. তং দিস্ৰা অঙ্কুরো দানে উল়ারজ্ঝাসযতায অতুট্ঠমানসো হুত্ৰা অত্তনো দানে নিযুত্তং সিন্ধকং নাম মাণৰং আমন্তেত্ৰা –

২৯৫. ‘‘সুখং সুপতি অঙ্কুরো, ইতি জানাতি মং জনো;

দুক্খং সুপামি সিন্ধক, যং ন পস্সামি যাচকে.

২৯৬. ‘‘সুখং সুপতি অঙ্কুরো, ইতি জানাতি মং জনো;

দুক্খং সুপামি সিন্ধক, অপ্পকে সু ৰনিব্বকে’’তি. –

গাথাদ্ৰযমাহ. তত্থ সুখং সুপতি অঙ্কুরো, ইতি জানাতি মং জনোতি ‘‘অঙ্কুরো রাজা যসভোগসমপ্পিতো দানপতি অত্তনো ভোগসম্পত্তিযা দানসম্পত্তিযা চ সুখং সুপতি, সুখেনেৰ নিদ্দং উপগচ্ছতি, সুখং পটিবুজ্ঝতী’’তি এৰং মং জনো সম্ভাৰেতি. দুক্খং সুপামি সিন্ধকাতি অহং পন সিন্ধক দুক্খমেৰ সুপামি. কস্মা? যং ন পস্সামি যাচকেতি, যস্মা মম অজ্ঝাসযানুরূপং দেয্যধম্মপটিগ্গাহকে বহূ যাচকে ন পস্সামি, তস্মাতি অত্থো. অপ্পকে সু ৰনিব্বকেতি ৰনিব্বকজনে অপ্পকে কতিপযে জাতে দুক্খং সুপামীতি যোজনা. সূতি চ নিপাতমত্তং, অপ্পকে ৰনিব্বকজনে সতীতি অত্থো.

তং সুত্ৰা সিন্ধকো তস্স উল়ারং দানাধিমুত্তিং পাকটতরং কাতুকামো –

২৯৭. ‘‘সক্কো চে তে ৰরং দজ্জা, তাৰতিংসানমিস্সরো;

কিস্স সব্বস্স লোকস্স, ৰরমানো ৰরং ৰরে’’তি. –

গাথমাহ. তস্সত্থো – তাৰতিংসানং দেৰানং সব্বস্স চ লোকস্স ইস্সরো সক্কো ‘‘ৰরং ৰরস্সু, অঙ্কুর, যংকিঞ্চি মনসিচ্ছিত’’ন্তি তুয্হং ৰরং দজ্জা দদেয্য চে, ৰরমানো পত্থযমানো কিস্স কীদিসং ৰরং ৰরেয্যাসীতি অত্থো.

অথ অঙ্কুরো অত্তনো অজ্ঝাসযং যাথাৰতো পৰেদেন্তো –