১০. উত্তরমাতুপেতিৰত্থুৰণ্ণনা

দিৰাৰিহারগতং ভিক্খুন্তি ইদং উত্তরমাতুপেতিৰত্থু. তত্রাযং অত্থৰিভাৰনা – সত্থরি পরিনিব্বুতে পঠমমহাসঙ্গীতিযা পৰত্তিতায আযস্মা মহাকচ্চাযনো দ্ৰাদসহি ভিক্খূহি সদ্ধিং কোসম্বিযা অৰিদূরে অঞ্ঞতরস্মিং অরঞ্ঞাযতনে ৰিহাসি. তেন চ সমযেন রঞ্ঞো উদেনস্স অঞ্ঞতরো অমচ্চো কালমকাসি, তেন চ পুব্বে নগরে কম্মন্তা অধিট্ঠিতা অহেসুং. অথ রাজা তস্স পুত্তং উত্তরং নাম মাণৰং পক্কোসাপেত্ৰা ‘‘ত্ৰঞ্চ পিতরা অধিট্ঠিতে কম্মন্তে সমনুসাসা’’তি তেন ঠিতট্ঠানে ঠপেসি.

সো চ সাধূতি সম্পটিচ্ছিত্ৰা একদিৰসং নগরপটিসঙ্খরণিযানং দারূনং অত্থায ৰড্ঢকিযো গহেত্ৰা অরঞ্ঞং গতো. তত্থ আযস্মতো মহাকচ্চাযনত্থেরস্স ৰসনট্ঠানং উপগন্ত্ৰা থেরং তত্থ পংসুকূলচীৰরধরং ৰিৰিত্তং নিসিন্নং দিস্ৰা ইরিযাপথেযেৰ পসীদিত্ৰা কতপটিসন্থারো ৰন্দিত্ৰা একমন্তং নিসীদি. থেরো তস্স ধম্মং কথেসি. সো ধম্মং সুত্ৰা রতনত্তযে সঞ্জাতপ্পসাদো সরণেসু পতিট্ঠায থেরং নিমন্তেসি – ‘‘অধিৰাসেথ মে, ভন্তে, স্ৰাতনায ভত্তং সদ্ধিং ভিক্খূহি অনুকম্পং উপাদাযা’’তি. অধিৰাসেসি থেরো তুণ্হীভাৰেন. সো ততো নিক্খমিত্ৰা নগরং গন্ত্ৰা অঞ্ঞেসং উপাসকানং আচিক্খি – ‘‘থেরো মযা স্ৰাতনায নিমন্তিতো, তুম্হেহিপি মম দানগ্গং আগন্তব্ব’’ন্তি.

সো দুতিযদিৰসে কালস্সেৰ পণীতং খাদনীযং ভোজনীযং পটিযাদাপেত্ৰা কালং আরোচাপেত্ৰা সদ্ধিং ভিক্খূহি আগচ্ছন্তস্স থেরস্স পচ্চুগ্গমনং কত্ৰা ৰন্দিত্ৰা পুরক্খত্ৰা গেহং পৰেসেসি. অথ মহারহকপ্পিযপচ্চত্থরণঅত্থতেসু আসনেসু থেরে চ ভিক্খূসু চ নিসিন্নেসু গন্ধপুপ্ফধূপেহি পূজং কত্ৰা পণীতেন অন্নপানেন তে সন্তপ্পেত্ৰা সঞ্জাতপ্পসাদো কতঞ্জলী অনুমোদনং সুণিত্ৰা কতভত্তানুমোদনে থেরে গচ্ছন্তে পত্তং গহেত্ৰা অনুগচ্ছন্তো নগরতো নিক্খমিত্ৰা পটিনিৰত্তন্তো ‘‘ভন্তে, তুম্হেহি নিচ্চং মম গেহং পৰিসিতব্ব’’ন্তি যাচিত্ৰা থেরস্স অধিৰাসনং ঞত্ৰা নিৰত্তি. এৰং সো থেরং উপট্ঠহন্তো তস্স ওৰাদে পতিট্ঠায সোতাপত্তিফলং পাপুণি, ৰিহারঞ্চ কারেসি, সব্বে চ অত্তনো ঞাতকে সাসনে অভিপ্পসন্নে অকাসি.

মাতা পনস্স মচ্ছেরমলপরিযুট্ঠিতচিত্তা হুত্ৰা এৰং পরিভাসি – ‘‘যং ত্ৰং মম অনিচ্ছন্তিযা এৰ সমণানং অন্নপানং দেসি, তং তে পরলোকে লোহিতং সম্পজ্জতূ’’তি. একং পন মোরপিঞ্ছকলাপং ৰিহারমহদিৰসে দিয্যমানং অনুজানি. সা কালং কত্ৰা পেতযোনিযং উপ্পজ্জি, মোরপিঞ্ছকলাপদানানুমোদনেন পনস্সা কেসা নীলা সিনিদ্ধা ৰেল্লিতগ্গা সুখুমা দীঘা চ অহেসুং. সা যদা গঙ্গানদিং ‘‘পানীযং পিৰিস্সামী’’তি ওতরতি, তদা নদী লোহিতপূরা হোতি. সা পঞ্চপণ্ণাস ৰস্সানি খুপ্পিপাসাভিভূতা ৰিচরিত্ৰা একদিৰসং কঙ্খারেৰতত্থেরং গঙ্গায তীরে দিৰাৰিহারং নিসিন্নং দিস্ৰা অত্তানং অত্তনো কেসেহি পটিচ্ছাদেত্ৰা উপসঙ্কমিত্ৰা পানীযং যাচি. তং সন্ধায ৰুত্তং –

৩৩১. ‘‘দিৰাৰিহারগতং ভিক্খুং, গঙ্গাতীরে নিসিন্নকং;

তং পেতী উপসঙ্কম্ম, দুব্বণ্ণা ভীরুদস্সনা.

৩৩২. ‘‘কেসা চস্সা অতিদীঘা, যাৰভূমাৰলম্বরে;

কেসেহি সা পটিচ্ছন্না, সমণং এতদব্রৰী’’তি. –

ইমা দ্ৰে গাথা সঙ্গীতিকারকেহি ইধ আদিতো ঠপিতা.

তত্থ ভীরুদস্সনাতি ভযানকদস্সনা. ‘‘রুদ্দদস্সনা’’তি ৰা পাঠো, বীভচ্ছভারিযদস্সনাতি অত্থো. যাৰভূমাৰলম্বরেতি যাৰ ভূমি, তাৰ ওলম্বন্তি. পুব্বে ‘‘ভিক্খু’’ন্তি চ পচ্ছা ‘‘সমণ’’ন্তি চ কঙ্খারেৰতত্থেরমেৰ সন্ধায ৰুত্তং.

সা পন পেতী থেরং উপসঙ্কমিত্ৰা পানীযং যাচন্তী –

৩৩৩. ‘‘পঞ্চপণ্ণাস ৰস্সানি, যতো কালকতা অহং;

নাভিজানামি ভুত্তং ৰা, পীতং ৰা পন পানিযং;

দেহি ত্ৰং পানিযং ভন্তে, তসিতা পানিযায মে’’তি. – ইমং গাথমাহ;

৩৩৩. তত্থ নাভিজানামি ভুত্তং ৰাতি এৰং দীঘমন্তরে কালে ভোজনং ভুত্তং ৰা পানীযং পীতং ৰা নাভিজানামি, ন ভুত্তং ন পীতন্তি অত্থো. তসিতাতি পিপাসিতা. পানিযাযাতি পানীযত্থায আহিণ্ডন্তিযা মে পানীযং দেহি, ভন্তেতি যোজনা.

ইতো পরং –

৩৩৪. ‘‘অযং সীতোদিকা গঙ্গা, হিমৰন্ততো সন্দতি;

পিৰ এত্তো গহেত্ৰান, কিং মং যাচসি পানিযং.

৩৩৫. ‘‘সচাহং ভন্তে গঙ্গায, সযং গণ্হামি পানিযং;

লোহিতং মে পরিৰত্ততি, তস্মা যাচামি পানিযং.

৩৩৬. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, গঙ্গা তে হোতি লোহিতং.

৩৩৭. ‘‘পুত্তো মে উত্তরো নাম, সদ্ধো আসি উপাসকো;

সো চ ময্হং অকামায, সমণানং পৰেচ্ছতি.

৩৩৮. ‘‘চীৰরং পিণ্ডপাতঞ্চ, পচ্চযং সযনাসনং;

তমহং পরিভাসামি, মচ্ছেরেন উপদ্দুতা.

৩৩৯. ‘‘যং ত্ৰং ময্হং অকামায, সমণানং পৰেচ্ছসি;

চীৰরং পিণ্ডপাতঞ্চ, পচ্চযং সযনাসনং.

৩৪০. ‘‘এতং তে পরলোকস্মিং, লোহিতং হোতু উত্তর;

তস্সকম্মৰিপাকেন, গঙ্গা মে হোতি লোহিত’’ন্তি. –

ইমা থেরস্স চ পেতিযা চ ৰচনপটিৰচনগাথা.

৩৩৪. তত্থ হিমৰন্ততোতি মহতো হিমস্স অত্থিতায ‘‘হিমৰা’’তি লদ্ধনামতো পব্বতরাজতো. সন্দতীতি পৰত্ততি. এত্তোতি ইতো মহাগঙ্গাতো. কিন্তি কস্মা মং যাচসি পানীযং, গঙ্গানদিং ওতরিত্ৰা যথারুচি পিৰাতি দস্সেতি.

৩৩৫. লোহিতং মে পরিৰত্ততীতি উদকং সন্দমানং ময্হং পাপকম্মফলেন লোহিতং হুত্ৰা পরিৰত্ততি পরিণমতি, তায গহিতমত্তং উদকং লোহিতং জাযতি.

৩৩৭-৪০. ময্হং অকামাযাতি মম অনিচ্ছন্তিযা. পৰেচ্ছতীতি দেতি. পচ্চযন্তি গিলানপচ্চযং. এতন্তি যং এতং চীৰরাদিকং পচ্চযজাতং সমণানং পৰেচ্ছসি দেসি, এতং তে পরলোকস্মিং লোহিতং হোতু উত্তরাতি অভিসপনৰসেন কতং পাপকম্মং, তস্স ৰিপাকেনাতি যোজনা.

অথাযস্মা রেৰতো তং পেতিং উদ্দিস্স ভিক্খুসঙ্ঘস্স পানীযং অদাসি, পিণ্ডায চরিত্ৰা ভত্তং গহেত্ৰা ভিক্খূনমদাসি, সঙ্কারকূটাদিতো পংসুকূলং গহেত্ৰা ধোৰিত্ৰা ভিসিঞ্চ চিমিলিকঞ্চ কত্ৰা ভিক্খূনং অদাসি, তেন চস্সা পেতিযা দিব্বসম্পত্তিযো অহেসুং. সা থেরস্স সন্তিকং গন্ত্ৰা অত্তনা লদ্ধদিব্বসম্পত্তিং থেরস্স দস্সেসি. থেরো তং পৰত্তিং অত্তনো সন্তিকং উপগতানং চতুন্নং পরিসানং পকাসেত্ৰা ধম্মকথং কথেসি. তেন মহাজনো সঞ্জাতসংৰেগো ৰিগতমলমচ্ছেরো হুত্ৰা দানসীলাদিকুসলধম্মাভিরতো অহোসীতি. ইদং পন পেতৰত্থু দুতিযসঙ্গীতিযং সঙ্গহং আরুল়্হন্তি দট্ঠব্বং.

উত্তরমাতুপেতিৰত্থুৰণ্ণনা নিট্ঠিতা.