১৩. ঢুব্বরিপেতৰত্থুৰণ্ণনা

অহু রাজা ব্রহ্মদত্তোতি ইদং উব্বরিপেতৰত্থুং সত্থা জেতৰনে ৰিহরন্তো অঞ্ঞতরং উপাসিকং আরব্ভ কথেসি. সাৰত্থিযং কির অঞ্ঞতরায উপাসিকায সামিকো কালমকাসি. সা পতিৰিযোগদুক্খাতুরা সোচন্তী আল়াহনং গন্ত্ৰা রোদতি. ভগৰা তস্সা সোতাপত্তিফলস্স উপনিস্সযসম্পত্তিং দিস্ৰা করুণায সঞ্চোদিতমানসো হুত্ৰা তস্সা গেহং গন্ত্ৰা পঞ্ঞত্তে আসনে নিসীদি. উপাসিকা সত্থারং উপসঙ্কমিত্ৰা ৰন্দিত্ৰা একমন্তং নিসীদি. অথ নং সত্থা ‘‘কিং, উপাসিকে, সোচসী’’তি ৰত্ৰা ‘‘আম, ভগৰা, পিযৰিপ্পযোগেন সোচামী’’তি ৰুত্তে তস্সা সোকং অপনেতুকামো অতীতং আহরি.

অতীতে পঞ্চালরট্ঠে কপিলনগরে চূল়নীব্রহ্মদত্তো নাম রাজা অহোসি. সো অগতিগমনং পহায অত্তনো ৰিজিতে পজায হিতকরণনিরতো দস রাজধম্মে অকোপেত্ৰা রজ্জং অনুসাসমানো কদাচি ‘‘অত্তনো রজ্জে কিং ৰদন্তী’’তি সোতুকামো তুন্নৰাযৰেসং গহেত্ৰা একো অদুতিযো নগরতো নিক্খমিত্ৰা গামতো গামং জনপদতো জনপদং ৰিচরিত্ৰা সব্বরজ্জং অকণ্টকং অনুপপীল়ং মনুস্সে সম্মোদমানে অপারুতঘরে মঞ্ঞে ৰিহরন্তে দিস্ৰা সোমনস্সজাতো নিৰত্তিত্ৰা নগরাভিমুখো আগচ্ছন্তো অঞ্ঞতরস্মিং গামে একিস্সা ৰিধৰায দুগ্গতিত্থিযা গেহং পাৰিসি. সা তং দিস্ৰা আহ – ‘‘কো নু ত্ৰং, অয্যো, কুতো ৰা আগতোসী’’তি? ‘‘অহং তুন্নৰাযো, ভদ্দে, ভতিযা তুন্নৰাযকম্মং করোন্তো ৰিচরামি. যদি তুম্হাকং তুন্নৰাযকম্মং অত্থি, ভত্তঞ্চ ৰেতনঞ্চ দেথ, তুম্হাকম্পি কম্মং করোমী’’তি. ‘‘নত্থম্হাকং কম্মং ভত্তৰেতনং ৰা, অঞ্ঞেসং করোহি, অয্যা’’তি. সো তত্থ কতিপাহং ৰসন্তো ধঞ্ঞপুঞ্ঞলক্খণসম্পন্নং তস্সা ধীতরং দিস্ৰা মাতরং আহ – ‘‘অযং দারিকা কিং কেনচি কতপরিগ্গহা, উদাহু অকতপরিগ্গহা. সচে পন কেনচি অকতপরিগ্গহা, ইমং ময্হং দেথ, অহং তুম্হাকং সুখেন জীৰনূপাযং কাতুং সমত্থো’’তি. ‘‘সাধু, অয্যা’’তি সা তস্স তং অদাসি.

সো তায সদ্ধিং কতিপাহং ৰসিত্ৰা তস্সা কহাপণসহস্সং দত্ৰা ‘‘অহং কতিপাহেনেৰ নিৰত্তিস্সামি. ভদ্দে, ত্ৰং মা উক্কণ্ঠসী’’তি ৰত্ৰা অত্তনো নগরং গন্ত্ৰা, নগরস্স চ তস্স গামস্স চ অন্তরে মগ্গং সমং কারাপেত্ৰা অলঙ্কারাপেত্ৰা মহতা রাজানুভাৰেন তত্থ গন্ত্ৰা তং দারিকং কহাপণরাসিম্হি ঠপেত্ৰা সুৰণ্ণরজতকলসেহি ন্হাপেত্ৰা ‘‘উব্বরী’’তি নামং কারাপেত্ৰা অগ্গমহেসিট্ঠানে ঠপেত্ৰা তঞ্চ গামং তস্সা ঞাতীনং দত্ৰা মহতা রাজানুভাৰেন তং নগরং আনেত্ৰা তায সদ্ধিং অভিরমমানো যাৰজীৰং রজ্জসুখং অনুভৰিত্ৰা আযুপরিযোসানে কালমকাসি. কালকতে চ তস্মিং, কতে চ সরীরকিচ্চে উব্বরী পতিৰিযোগেন সোকসল্লসমপ্পিতহদযা আল়াহনং গন্ত্ৰা বহূ দিৰসে গন্ধপুপ্ফাদীহি পূজেত্ৰা রঞ্ঞো গুণে কিত্তেত্ৰা উম্মাদপ্পত্তা ৰিয কন্দন্তী পরিদেৰন্তী আল়াহনং পদক্খিণং করোতি.

তেন চ সমযেন অম্হাকং ভগৰা বোধিসত্তভূতো ইসিপব্বজ্জং পব্বজিত্ৰা অধিগতজ্ঝানাভিঞ্ঞো হিমৰন্তস্স সামন্তা অঞ্ঞতরস্মিং অরঞ্ঞাযতনে ৰিহরন্তো সোকসল্লসমপ্পিতং উব্বরিং দিব্বেন চক্খুনা দিস্ৰা আকাসেন আগন্ত্ৰা দিস্সমানরূপো আকাসে ঠত্ৰা তত্থ ঠিতে মনুস্সে পুচ্ছি – ‘‘কস্সিদং আল়াহনং, কস্সত্থায চাযং ইত্থী ‘ব্রহ্মদত্ত, ব্রহ্মদত্তা’তি কন্দন্তী পরিদেৰতী’’তি. তং সুত্ৰা মনুস্সা ‘‘ব্রহ্মদত্তো নাম পঞ্চালানং রাজা, সো আযুপরিযোসানে কালমকাসি, তস্সিদং আল়াহনং, তস্স অযং অগ্গমহেসী উব্বরী নাম ‘ব্রহ্মদত্ত, ব্রহ্মদত্তা’তি তস্স নামং গহেত্ৰা কন্দন্তী পরিদেৰতী’’তি আহংসু. তমত্থং দীপেন্তা সঙ্গীতিকারা –

৩৬৮. ‘‘অহু রাজা ব্রহ্মদত্তো, পঞ্চালানং রথেসভো;

অহোরত্তানমচ্চযা, রাজা কালমক্রুব্বথ.

৩৬৯. ‘‘তস্স আল়াহনং গন্ত্ৰা, ভরিযা কন্দতি উব্বরি;

ব্রহ্মদত্তং অপস্সন্তী, ব্রহ্মদত্তাতি কন্দতি.

৩৭০. ‘‘ইসি চ তত্থ আগচ্ছি, সম্পন্নচরণো মুনি;

সো চ তত্থ অপুচ্ছিত্থ, যে তত্থ সু সমাগতা.

৩৭১. ‘‘‘কস্স ইদং আল়াহনং, নানাগন্ধসমেরিতং;

কস্সাযং কন্দতি ভরিযা, ইতো দূরগতং পতিং;

ব্রহ্মদত্তং অপস্সন্তী, ব্রহ্মদত্তাতি কন্দতি’.

৩৭২. ‘‘তে চ তত্থ ৰিযাকংসু, যে তত্থ সু সমাগতা;

ব্রহ্মদত্তস্স ভদ্দন্তে, ব্রহ্মদত্তস্স মারিস.

৩৭৩. ‘‘তস্স ইদং আল়াহনং, নানাগন্ধসমেরিতং;

তস্সাযং কন্দতি ভরিযা, ইতো দূরগতং পতিং;

ব্রহ্মদত্তং অপস্সন্তী, ব্রহ্মদত্তাতি কন্দতী’’তি. – ছ গাথা ঠপেসুং;

৩৬৮-৯. তত্থ অহূতি অহোসি. পঞ্চালানন্তি পঞ্চালরট্ঠৰাসীনং, পঞ্চালরট্ঠস্সেৰ ৰা. একোপি হি জনপদো জনপদিকানং রাজকুমারানং ৰসেন রুল়্হিযা ‘‘পঞ্চালান’’ন্তি বহুৰচনেন নিদ্দিসীযতি. রথেসভোতি রথেসু উসভসদিসো, মহারথোতি অত্থো. তস্স আল়াহনন্তি তস্স রঞ্ঞো সরীরস্স দড্ঢট্ঠানং.

৩৭০. ইসীতি ঝানাদীনং গুণানং এসনট্ঠেন ইসি. তত্থাতি তস্মিং উব্বরিযা ঠিতট্ঠানে, সুসানেতি অত্থো. আগচ্ছীতি অগমাসি. সম্পন্নচরণোতি সীলসম্পদা, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, জাগরিযানুযোগো, সদ্ধাদযো সত্ত সদ্ধম্মা, চত্তারি রূপাৰচরঝানানীতি ইমেহি পন্নরসহি চরণসঙ্খাতেহি গুণেহি সম্পন্নো সমন্নাগতো, চরণসম্পন্নোতি অত্থো. মুনীতি অত্তহিতঞ্চ পরহিতঞ্চ মুনাতি জানাতীতি মুনি. সো চ তত্থ অপুচ্ছিত্থাতি সো তস্মিং ঠানে ঠিতে জনে পটিপুচ্ছি. যে তত্থ সু সমাগতাতি যে মনুস্সা তত্থ সুসানে সমাগতা. সূতি নিপাতমত্তং. ‘‘যে তত্থাসুং সমাগতা’’তি ৰা পাঠো. আসুন্তি অহেসুন্তি অত্থো.

৩৭১. নানাগন্ধসমেরিতন্তি নানাৰিধেহি গন্ধেহি সমন্ততো এরিতং উপৰাসিতং. ইতোতি মনুস্সলোকতো. দূরগতন্তি পরলোকং গতত্তা ৰদতি. ব্রহ্মদত্তাতি কন্দতীতি ব্রহ্মদত্তাতি এৰং নামসংকিত্তনং কত্ৰা পরিদেৰনৰসেন অৰ্হাযতি.

৩৭২-৩. ব্রহ্মদত্তস্স ভদ্দন্তে, ব্রহ্মদত্তস্স মারিসাতি মারিস, নিরামযকাযচিত্ত মহামুনি ব্রহ্মদত্তস্স রঞ্ঞো ইদং আল়াহনং, তস্সেৰ ব্রহ্মদত্তস্স রঞ্ঞো অযং ভরিযা, ভদ্দং তে তস্স চ ব্রহ্মদত্তস্স ভদ্দং হোতু, তাদিসানং মহেসীনং হিতানুচিন্তনেন পরলোকে ঠিতানম্পি হিতসুখং হোতিযেৰাতি অধিপ্পাযো.

অথ সো তাপসো তেসং ৰচনং সুত্ৰা অনুকম্পং উপাদায উব্বরিযা সন্তিকং গন্ত্ৰা তস্সা সোকৰিনোদনত্থং –

৩৭৪. ‘‘ছল়াসীতিসহস্সানি, ব্রহ্মদত্তস্সনামকা;

ইমস্মিং আল়াহনে দড্ঢা, তেসং কমনুসোচসী’’তি. –

গাথমাহ. তত্থ ছল়াসীতিসহস্সানীতি ছসহস্সাধিকঅসীতিসহস্সসঙ্খা. ব্রহ্মদত্তস্সনামকাতি ব্রহ্মদত্তোতি এৰংনামকা. তেসং কমনুসোচসীতি তেসং ছল়াসীতিসহস্সসঙ্খাতানং ব্রহ্মদত্তানং কতমং ব্রহ্মদত্তং ত্ৰং অনুসোচসি, কতমং পটিচ্চ তে সোকো উপ্পন্নোতি পুচ্ছি.

এৰং পন তেন ইসিনা পুচ্ছিতা উব্বরী অত্তনা অধিপ্পেতং ব্রহ্মদত্তং আচিক্খন্তী –

৩৭৫. ‘‘যো রাজা চূল়নীপুত্তো, পঞ্চালানং রথেসভো;

তং ভন্তে অনুসোচামি, ভত্তারং সব্বকামদ’’ন্তি. –

গাথমাহ. তত্থ চূল়নীপুত্তোতি এৰংনামস্স রঞ্ঞো পুত্তো. সব্বকামদন্তি ময্হং সব্বস্স ইচ্ছিতিচ্ছিতস্স দাতারং, সব্বেসং ৰা সত্তানং ইচ্ছিতদাযকং.

এৰং উব্বরিযা ৰুত্তে পুন তাপসো –

৩৭৬. ‘‘সব্বেৰাহেসুং রাজানো, ব্রহ্মদত্তস্সনামকা;

সব্বেৰ চূল়নীপুত্তা, পঞ্চালানং রথেসভা.

৩৭৭. ‘‘সব্বেসং অনুপুব্বেন, মহেসিত্তমকারযি;

কস্মা পুরিমকে হিত্ৰা, পচ্ছিমং অনুসোচসী’’তি. – গাথাদ্ৰযমাহ;

৩৭৬. তত্থ সব্বেৰাহেসুন্তি সব্বেৰ তে ছল়াসীতিসহস্সসঙ্খা রাজানো ব্রহ্মদত্তস্স নামকা চূল়নীপুত্তা পঞ্চালানং রথেসভাৰ অহেসুং. ইমে রাজভাৰাদযো ৰিসেসা তেসু একস্সাপি নাহেসুং.

৩৭৭. মহেসিত্তমকারযীতি ত্ৰঞ্চ তেসং সব্বেসম্পি অনুপুব্বেন অগ্গমহেসিভাৰং অকাসি, অনুপ্পত্তাতি অত্থো. কস্মাতি গুণতো চ সামিকভাৰতো চ অৰিসিট্ঠেসু এত্তকেসু জনেসু পুরিমকে রাজানো পহায পচ্ছিমং একংমেৰ কস্মা কেন কারণেন অনুসোচসীতি পুচ্ছি.

তং সুত্ৰা উব্বরী সংৰেগজাতা পুন তাপসং –

৩৭৮. ‘‘আতুমে ইত্থিভূতায, দীঘরত্তায মারিস;

যস্সা মে ইত্থিভূতায, সংসারে বহুভাসসী’’তি. –

গাথমাহ. তত্থ আতুমেতি অত্তনি. ইত্থিভূতাযাতি ইত্থিভাৰং উপগতায. দীঘরত্তাযাতি দীঘরত্তং. অযঞ্হেত্থ অধিপ্পাযো – ইত্থিভূতায অত্তনি সব্বকালং ইত্থীযেৰ হোতি, উদাহু পুরিসভাৰম্পি উপগচ্ছতীতি. যস্সা মে ইত্থিভূতাযাতি যস্সা ময্হং ইত্থিভূতায এৰং তাৰ বহুসংসারে মহেসিভাৰং মহামুনি ত্ৰং ভাসসি কথেসীতি অত্থো. ‘‘আহু মে ইত্থিভূতাযা’’তি ৰা পাঠো. তত্থ আতি অনুস্সরণত্থে নিপাতো. আহু মেতি সযং অনুস্সরিতং অঞ্ঞাতমিদং মযা, ইত্থিভূতায ইত্থিভাৰং উপগতায এৰং ময্হং এত্তকং কালং অপরাপরুপ্পত্তি অহোসি. কস্মা? যস্মা যস্সা মে ইত্থিভূতায সব্বেসং অনুপুব্বেন মহেসিত্তমকারযি, কিং ত্ৰং, মহামুনি, সংসারে বহুং ভাসসীতি যোজনা.

তং সুত্ৰা তাপসো অযং নিযমো সংসারে নত্থি ‘‘ইত্থী ইত্থীযেৰ হোতি, পুরিসো পুরিসো এৰা’’তি দস্সেন্তো –

৩৭৯. ‘‘অহু ইত্থী অহু পুরিসো, পসুযোনিম্পি আগমা;

এৰমেতং অতীতানং, পরিযন্তো ন দিস্সতী’’তি. –

গাথমাহ. তত্থ অহু ইত্থী অহু পুরিসোতি ত্ৰং কদাচি ইত্থীপি অহোসি, কদাচি পুরিসোপি অহোসি. ন কেৰলং ইত্থিপুরিসভাৰমেৰ, অথ খো পসু যোনিম্পি অগমাসি, কদাচি পসুভাৰম্পি অগমাসি, তিরচ্ছানযোনিম্পি উপগতা অহোসি. এৰমেতং অতীতানং, পরিযন্তো ন দিস্সতীতি এৰং যথাৰুত্তং এতং ইত্থিভাৰং পুরিসভাৰং তিরচ্ছানাদিভাৰঞ্চ উপগতানং অতীতানং অত্তভাৰানং পরিযন্তো ঞাণচক্খুনা মহতা উস্সাহেন পস্সন্তানম্পি ন দিস্সতি. ন কেৰলং তৰেৰ, অথ খো সব্বেসম্পি সংসারে পরিব্ভমন্তানং সত্তানং অত্তভাৰস্স পরিযন্তো ন দিস্সতেৰ ন পঞ্ঞাযতেৰ. তেনাহ ভগৰা –

‘‘অনমতগ্গোযং, ভিক্খৰে, সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং. নি. ২.১২৪).

এৰং তেন তাপসেন সংসারস্স অপরিযন্ততং কম্মস্সকতঞ্চ ৰিভাৰেন্তেন দেসিতং ধম্মং সুত্ৰা সংসারে সংৰিগ্গহদযা ধম্মে চ পসন্নমানসা ৰিগতসোকসল্লা হুত্ৰা অত্তনো পসাদং সোকৰিগমনঞ্চ পকাসেন্তী –

৩৮০. ‘‘আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

৩৮১. ‘‘অব্বহী ৰত মে সল্লং, সোকং হদযনিস্সিতং;

যো মে সোকপরেতায, পতিসোকং অপানুদি.

৩৮২. ‘‘সাহং অব্বূল়্হসল্লাস্মি, সীতিভূতাস্মি নিব্বুতা;

ন সোচামি ন রোদামি, তৰ সুত্ৰা মহামুনী’’তি. –

তিস্সো গাথা অভাসি. তাসং অত্থো হেট্ঠা ৰুত্তোযেৰ.

ইদানি সংৰিগ্গহদযায উব্বরিযা পটিপত্তিং দস্সেন্তো সত্থা –

৩৮৩. ‘‘তস্স তং ৰচনং সুত্ৰা, সমণস্স সুভাসিতং;

পত্তচীৰরমাদায, পব্বজি অনগারিযং.

৩৮৪. ‘‘সা চ পব্বজিতা সন্তা, অগারস্মা অনগারিযং;

মেত্তচিত্তং আভাৰেসি, ব্রহ্মলোকূপপত্তিযা.

৩৮৫. ‘‘গামা গামং ৰিচরন্তী, নিগমে রাজধানিযো;

উরুৰেল়া নাম সো গামো, যত্থ কালমক্রুব্বথ.

৩৮৬. ‘‘মেত্তচিত্তং আভাৰেত্ৰা, ব্রহ্মলোকূপপত্তিযা;

ইত্থিচিত্তং ৰিরাজেত্ৰা, ব্রহ্মলোকূপগা অহূ’’তি. – চতস্সো গাথা অভাসি;

৩৮৩-৪. তত্থ তস্সাতি তস্স তাপসস্স. সুভাসিতন্তি সুট্ঠু ভাসিতং, ধম্মন্তি অত্থো. পব্বজিতা সন্তাতি পব্বজ্জং উপগতা সমানা, পব্বজিত্ৰা ৰা হুত্ৰা সন্তকাযৰাচা. মেত্তচিত্তন্তি মেত্তাসহগতং চিত্তং. চিত্তসীসেন মেত্তজ্ঝানং ৰদতি. ব্রহ্মলোকূপপত্তিযাতি তঞ্চ সা মেত্তচিত্তং ভাৰেন্তী ব্রহ্মলোকূপপত্তিযা অভাৰেসি, ন ৰিপস্সনাপাদকাদিঅত্থং. অনুপ্পন্নে হি বুদ্ধে ব্রহ্মৰিহারাদিকে ভাৰেন্তা তাপসপরিব্বাজকা যাৰদেৰ ভৰসম্পত্তিঅত্থমেৰ ভাৰেসুং.

৩৮৫-৬. গামা গামন্তি গামতো অঞ্ঞং গামং. আভাৰেত্ৰাতি ৰড্ঢেত্ৰা ব্রূহেত্ৰা. ‘‘অভাৰেত্ৰা’’তি কেচি পঠন্তি, তেসং অ-কারো নিপাতমত্তং. ইত্থিচিত্তং ৰিরাজেত্ৰাতি ইত্থিভাৰে চিত্তং অজ্ঝাসযং অভিরুচিং ৰিরাজেত্ৰা ইত্থিভাৰে ৰিরত্তচিত্তা হুত্ৰা. ব্রহ্মলোকূপগাতি পটিসন্ধিগ্গহণৰসেন ব্রহ্মলোকং উপগমনকা অহোসি. সেসং হেট্ঠা ৰুত্তনযত্তা উত্তানমেৰ.

সত্থা ইমং ধম্মদেসনং আহরিত্ৰা তস্সা উপাসিকায সোকং ৰিনোদেত্ৰা উপরি চতুসচ্চদেসনং অকাসি. সচ্চপরিযোসানে সা উপাসিকা সোতাপত্তিফলে পতিট্ঠহি. সম্পত্তপরিসায চ দেসনা সাত্থিকা অহোসীতি.

উব্বরিপেতৰত্থুৰণ্ণনা নিট্ঠিতা.

ইতি খুদ্দক-অট্ঠকথায পেতৰত্থুস্মিং

তেরসৰত্থুপটিমণ্ডিতস্স

দুতিযস্স উব্বরিৰগ্গস্স অত্থসংৰণ্ণনা নিট্ঠিতা.