৯. মহাপেসকারপেতিৰত্থুৰণ্ণনা

গূথঞ্চ মুত্তং রুহিরঞ্চ পুব্বন্তি ইদং সত্থরি সাৰত্থিযং ৰিহরন্তে অঞ্ঞতরং পেসকারপেতিং আরব্ভ ৰুত্তং. দ্ৰাদসমত্তা কির ভিক্খূ সত্থু সন্তিকে কম্মট্ঠানং গহেত্ৰা ৰসনযোগ্গট্ঠানং ৰীমংসন্তা উপকট্ঠায ৰস্সূপনাযিকায অঞ্ঞতরং ছাযূদকসম্পন্নং রমণীযং অরঞ্ঞাযতনং তস্স চ নাতিদূরে নাচ্চাসন্নে গোচরগামং দিস্ৰা তত্থ একরত্তিং ৰসিত্ৰা দুতিযদিৰসে গামং পিণ্ডায পৰিসিংসু. তত্থ একাদস পেসকারা পটিৰসন্তি, তে তে ভিক্খূ দিস্ৰা সঞ্জাতসোমনস্সা হুত্ৰা অত্তনো অত্তনো গেহং নেত্ৰা পণীতেন আহারেন পরিৰিসিত্ৰা আহংসু ‘‘কুহিং, ভন্তে, গচ্ছথা’’তি? ‘‘যত্থ অম্হাকং ফাসুকং, তত্থ গমিস্সামা’’তি. ‘‘যদি এৰং, ভন্তে, ইধেৰ ৰসিতব্ব’’ন্তি ৰস্সূপগমনং যাচিংসু. ভিক্খূ সম্পটিচ্ছিংসু. উপাসকা তেসং তত্থ অরঞ্ঞকুটিকাযো কারেত্ৰা অদংসু. ভিক্খূ তত্থ ৰস্সং উপগচ্ছিংসু.

তত্থ জেট্ঠকপেসকারো দ্ৰে ভিক্খূ চতূহি পচ্চযেহি সক্কচ্চং উপট্ঠহি, ইতরে একেকং ভিক্খুং উপট্ঠহিংসু. জেট্ঠকপেসকারস্স ভরিযা অস্সদ্ধা অপ্পসন্না মিচ্ছাদিট্ঠিকা মচ্ছরিনী ভিক্খূ ন সক্কচ্চং উপট্ঠাতি. সো তং দিস্ৰা তস্সাযেৰ কনিট্ঠভগিনিং আনেত্ৰা অত্তনো গেহে ইস্সরিযং নিয্যাদেসি. সা সদ্ধা পসন্না হুত্ৰা সক্কচ্চং ভিক্খূ পটিজগ্গি. তে সব্বে পেসকারো ৰস্সং ৰুত্থানং ভিক্খূনং একেকস্স একেকং সাটকমদংসু. তত্থ মচ্ছরিনী জেট্ঠপেসকারস্স ভরিযা পদুট্ঠচিত্তা অত্তনো সামিকং পরিভাসি – ‘‘যং তযা সমণানং সক্যপুত্তিযানং দানং দিন্নং অন্নপানং, তং তে পরলোকে গূথমুত্তং পুব্বলোহিতঞ্চ হুত্ৰা নিব্বত্ততু, সাটকা চ জলিতা অযোমযপট্টা হোন্তূ’’তি.

তত্থ জেট্ঠপেসকারো অপরেন সমযেন কালং কত্ৰা ৰিঞ্ঝাটৰিযং আনুভাৰসম্পন্না রুক্খদেৰতা হুত্ৰা নিব্বত্তি. তস্স পন কদরিযা ভরিযা কালং কত্ৰা তস্সেৰ ৰসনট্ঠানস্স অৰিদূরে পেতী হুত্ৰা নিব্বত্তি. সা নগ্গা দুব্বণ্ণরূপা জিঘচ্ছাপিপাসাভিভূতা তস্স ভূমদেৰস্স সন্তিকং গন্ত্ৰা আহ – ‘‘অহং, সামি, নিচ্চোল়া অতিৰিয জিঘচ্ছাপিপাসাভিভূতা ৰিচরামি, দেহি মে ৰত্থং অন্নপানঞ্চা’’তি. সো তস্সা দিব্বং উল়ারং অন্নপানং উপনেসি. তং তায গহিতমত্তমেৰ গূথমুত্তং পুব্বলোহিতঞ্চ সম্পজ্জতি, সাটকঞ্চ দিন্নং তায পরিদহিতং পজ্জলিতং অযোমযপট্টং হোতি. সা মহাদুক্খং অনুভৰন্তী তং ছড্ডেত্ৰা কন্দন্তী ৰিচরতি.

তেন চ সমযেন অঞ্ঞতরো ভিক্খু ৰুত্থৰস্সো সত্থারং ৰন্দিতুং গচ্ছন্তো মহতা সত্থেন সদ্ধিং ৰিঞ্ঝাটৰিং পটিপজ্জি. সত্থিকা রত্তিং মগ্গং গন্ত্ৰা দিৰা ৰনে সন্দচ্ছাযূদকসম্পন্নং পদেসং দিস্ৰা যানানি মুঞ্চিত্ৰা মুহুত্তং ৰিস্সমিংসু. ভিক্খু পন ৰিৰেককামতায থোকং অপক্কমিত্ৰা অঞ্ঞতরস্স সন্দচ্ছাযস্স ৰনগহনপটিচ্ছন্নস্স রুক্খস্স মূলে সঙ্ঘাটিং পঞ্ঞপেত্ৰা নিপন্নো রত্তিযং মগ্গগমনপরিস্সমেন কিলন্তকাযো নিদ্দং উপগঞ্ছি. সত্থিকা ৰিস্সমিত্ৰা মগ্গং পটিপজ্জিংসু, সো ভিক্খু ন পটিবুজ্ঝি. অথ সাযন্হসমযে উট্ঠহিত্ৰা তে অপস্সন্তো অঞ্ঞতরং কুম্মগ্গং পটিপজ্জিত্ৰা অনুক্কমেন তস্সা দেৰতায ৰসনট্ঠানং সম্পাপুণি. অথ নং সো দেৰপুত্তো দিস্ৰা মনুস্সরূপেন উপগন্ত্ৰা পটিসন্থারং কত্ৰা অত্তনো ৰিমানং পৰেসেত্ৰা পাদব্ভঞ্জনাদীনি দত্ৰা পযিরুপাসন্তো নিসীদি. তস্মিঞ্চ সমযে সা পেতী আগন্ত্ৰা ‘‘দেহি মে, সামি, অন্নপানং সাটকঞ্চা’’তি আহ. সো তস্সা তানি অদাসি. তানি চ তায গহিতমত্তানি গূথমুত্তপুব্বলোহিতপজ্জলিতঅযোপট্টাযেৰ অহেসুং. সো ভিক্খু তং দিস্ৰা সঞ্জাতসংৰেগো তং দেৰপুত্তং –

৫৪. ‘‘গূথঞ্চ মুত্তং রুহিরঞ্চ পুব্বং, পরিভুঞ্জতি কিস্স অযং ৰিপাকো;

অযং নু কিং কম্মমকাসি নারী, যা সব্বদা লোহিতপুব্বভক্খা.

৫৫. ‘‘নৰানি ৰত্থানি সুভানি চেৰ, মুদূনি সুদ্ধানি চ লোমসানি;

দিন্নানি মিস্সা কিতকা ভৰন্তি, অযং নু কিং কম্মমকাসি নারী’’তি. –

দ্ৰীহি গাথাহি পটিপুচ্ছি. তত্থ কিস্স অযং ৰিপাকোতি কীদিসস্স কম্মস্স অযং ৰিপাকো, যং এসা ইদানি পচ্চনুভৰতীতি. অযং নু কিং কম্মমকাসি নারীতি অযং ইত্থী কিং নু খো কম্মং পুব্বে অকাসি. যা সব্বদা লোহিতপুব্বভক্খাতি যা সব্বকালং রুহিরপুব্বমেৰ ভক্খতি পরিভুঞ্জতি. নৰানীতি পচ্চগ্ঘানি তাৰদেৰ পাতুভূতানি. সুভানীতি সুন্দরানি দস্সনীযানি. মুদূনীতি সুখসম্ফস্সানি. সুদ্ধানীতি পরিসুদ্ধৰণ্ণানি. লোমসানীতি সলোমকানি সুখসম্ফস্সানি, সুন্দরানীতি অত্থো. দিন্নানি মিস্সা কিতকা ভৰন্তীতি কিতককণ্টকসদিসানি লোহপট্টসদিসানি ভৰন্তি. ‘‘কীটকা ভৰন্তী’’তি ৰা পাঠো, খাদকপাণকৰণ্ণানি ভৰন্তীতি অত্থো.

এৰং সো দেৰপুত্তো তেন ভিক্খুনা পুট্ঠো তায পুরিমজাতিযা কতকম্মং পকাসেন্তো –

৫৬. ‘‘ভরিযা মমেসা অহু ভদন্তে, অদাযিকা মচ্ছরিনী কদরিযা;

সা মং দদন্তং সমণব্রাহ্মণানং, অক্কোসতি চ পরিভাসতি চ.

৫৭. ‘‘গূথঞ্চ মুত্তং রুহিরঞ্চ পুব্বং, পরিভুঞ্জ ত্ৰং অসুচিং সব্বকালং;

এতং তে পরলোকস্মিং হোতু, ৰত্থা চ তে কিতকসমা ভৰন্তু;

এতাদিসং দুচ্চরিতং চরিত্ৰা, ইধাগতা চিররত্তায খাদতী’’তি. –

দ্ৰে গাথা অভাসি. তত্থ অদাযিকাতি কস্সচি কিঞ্চিপি অদানসীলা. মচ্ছরিনী কদরিযাতি পঠমং মচ্ছেরমলস্স সভাৰেন মচ্ছরিনী, তায চ পুনপ্পুনং আসেৰনতায থদ্ধমচ্ছরিনী, তায কদরিযা অহূতি যোজনা. ইদানি তস্সা তমেৰ কদরিযতং দস্সেন্তো ‘‘সা মং দদন্ত’’ন্তিআদিমাহ. তত্থ এতাদিসন্তি এৰরূপং যথাৰুত্তৰচীদুচ্চরিতাদিং চরিত্ৰা. ইধাগতাতি ইমং পেতলোকং আগতা, পেতত্তভাৰং উপগতা. চিররত্তায খাদতীতি চিরকালং গূথাদিমেৰ খাদতি. তস্সা হি যেনাকারেন অক্কুট্ঠং, তেনেৰাকারেন পৰত্তমানম্পি ফলং. যং উদ্দিস্স অক্কুট্ঠং, ততো অঞ্ঞত্থ পথৰিযং কমন্তকসঙ্খাতে মত্থকে অসনিপাতো ৰিয অত্তনো উপরি পততি.

এৰং সো দেৰপুত্তো তায পুব্বে কতকম্মং কথেত্ৰা পুন তং ভিক্খুং আহ – ‘‘অত্থি পন, ভন্তে, কোচি উপাযো ইমং পেতলোকতো মোচেতু’’ন্তি? ‘‘অত্থী’’তি চ ৰুত্তে ‘‘কথেথ, ভন্তে’’তি. যদি ভগৰতো অরিযসঙ্ঘস্স চ একস্সেৰ ৰা ভিক্খুনো দানং দত্ৰা ইমিস্সা উদ্দিসিযতি, অযঞ্চ তং অনুমোদতি, এৰমেতিস্সা ইতো দুক্খতো মুত্তি ভৰিস্সতীতি. তং সুত্ৰা দেৰপুত্তো তস্স ভিক্খুনো পণীতং অন্নপানং দত্ৰা তং দক্খিণং তস্সা পেতিযা আদিসি. তাৰদেৰ সা পেতী সুহিতা পীণিন্দ্রিযা দিব্বাহারস্স তিত্তা অহোসি. পুন তস্সেৰ ভিক্খুনো হত্থে দিব্বসাটকযুগং ভগৰন্তং উদ্দিস্স দত্ৰা তঞ্চ দক্খিণং পেতিযা আদিসি. তাৰদেৰ চ সা দিব্বৰত্থনিৰত্থা দিব্বালঙ্কারৰিভূসিতা সব্বকামসমিদ্ধা দেৰচ্ছরাপটিভাগা অহোসি. সো চ ভিক্খু তস্স দেৰপুত্তস্স ইদ্ধিযা তদহেৰ সাৰত্থিং পত্ৰা জেতৰনং পৰিসিত্ৰা ভগৰতো সন্তিকং উপগন্ত্ৰা ৰন্দিত্ৰা তং সাটকযুগং দত্ৰা তং পৰত্তিং আরোচেসি. ভগৰাপি তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি. সা দেসনা মহাজনস্স সাত্থিকা অহোসীতি.

মহাপেসকারপেতিৰত্থুৰণ্ণনা নিট্ঠিতা.