৭. সত্তপুত্তখাদকপেতিৰত্থুৰণ্ণনা

নগ্গা দুব্বণ্ণরূপাসীতি ইদং সত্থরি সাৰত্থিযং ৰিহরন্তে সত্তপুত্তখাদকপেতিং আরব্ভ ৰুত্তং. সাৰত্থিযা কির অৰিদূরে অঞ্ঞতরস্মিং গামকে অঞ্ঞতরস্স উপাসকস্স দ্ৰে পুত্তা অহেসুং – পঠমৰযে ঠিতা রূপসম্পন্না সীলাচারেন সমন্নাগতা. তেসং মাতা ‘‘পুত্তৰতী অহ’’ন্তি পুত্তবলেন ভত্তারং অতিমঞ্ঞতি. সো ভরিযায অৰমানিতো নিব্বিন্নমানসো অঞ্ঞং কঞ্ঞং আনেসি. সা নচিরস্সেৰ গব্ভিনী অহোসি. অথস্স জেট্ঠভরিযা ইস্সাপকতা অঞ্ঞতরং ৰেজ্জং আমিসেন উপলাপেত্ৰা তেন তস্সা তেমাসিকং গব্ভং পাতেসি. অথ সা ঞাতীহি চ ভত্তারা চ ‘‘তযা ইমিস্সা গব্ভো পাতিতো’’তি পুট্ঠা ‘‘নাহং পাতেমী’’তি মুসা ৰত্ৰা তেহি অসদ্দহন্তেহি ‘‘সপথং করোহী’’তি ৰুত্তা ‘‘সাযং পাতং সত্ত সত্ত পুত্তে ৰিজাযিত্ৰা পুত্তমংসানি খাদামি, নিচ্চং দুগ্গন্ধা চ মক্খিকাপরিকিণ্ণা চ ভৰেয্য’’ন্তি সপথং অকাসি.

সা অপরেন সমযেন কালং কত্ৰা তস্স গব্ভপাতনস্স মুসাৰাদস্স চ ফলেনেৰ পেতযোনিযং নিব্বত্তিত্ৰা পুত্তনযেন পুত্তমংসানি খাদন্তী তস্সেৰ গামস্স অৰিদূরে ৰিচরতি. তেন চ সমযেন সম্বহুলা থেরা গামকাৰাসে ৰুত্থৰস্সা ভগৰন্তং দস্সনায সাৰত্থিং আগচ্ছন্তা তস্স গামস্স অৰিদূরে একস্মিং পদেসে রত্তিযং ৰাসং কপ্পেসুং. অথ সা পেতী তেসং থেরানং অত্তানং দস্সেসি. তং মহাথেরো গাথায পুচ্ছি –

৩৫. ‘‘নগ্গা দুব্বণ্ণরূপাসি, দুগ্গন্ধা পূতি ৰাযসি;

মক্খিকাহি পরিকিণ্ণা, কা নু ত্ৰং ইধ তিট্ঠসী’’তি.

সা থেরেন পুট্ঠা তীহি গাথাহি পটিৰচনং অদাসি –

৩৬. ‘‘অহং ভদন্তে পেতীম্হি, দুগ্গতা যমলোকিকা;

পাপকম্মং করিত্ৰান, পেতলোকং ইতো গতা.

৩৭. ‘‘কালেন সত্ত পুত্তানি, সাযং সত্ত পুনাপরে;

ৰিজাযিত্ৰান খাদামি, তেপি না হোন্তি মে অলং.

৩৮. ‘‘পরিডয্হতি ধূমাযতি, খুদায হদযং মম;

নিব্বুতিং নাধিগচ্ছামি, অগ্গিদড্ঢাৰ আতপে’’তি.

৩৮. তত্থ নিব্বুতিন্তি খুপ্পিপাসাদুক্খস্স ৰূপসমং. নাধিগচ্ছামীতি ন লভামি. অগ্গিদড্ঢাৰ আতপেতি অতিউণ্হআতপে অগ্গিনা ডয্হমানা ৰিয নিব্বুতিং নাধিগচ্ছামীতি যোজনা.

তং সুত্ৰা মহাথেরো তায কতকম্মং পুচ্ছন্তো –

৩৯. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, পুত্তমংসানি খাদসী’’তি. – গাথমাহ;

অথ সা পেতী অত্তনো পেতলোকূপপত্তিঞ্চ পুত্তমংসখাদনকারণঞ্চ কথেন্তী –

৪০. ‘‘অহূ ময্হং দুৰে পুত্তা, উভো সম্পত্তযোব্বনা;

সাহং পুত্তবলূপেতা, সামিকং অতিমঞ্ঞিসং.

৪১. ‘‘ততো মে সামিকো কুদ্ধো, সপতিং ময্হমানযি;

সা চ গব্ভং অলভিত্থ, তস্সা পাপং অচেতযিং.

৪২. ‘‘সাহং পদুট্ঠমনসা, অকরিং গব্ভপাতনং;

তস্স তেমাসিকো গব্ভো, পূতিলোহিতকো পতি.

৪৩. ‘‘তদস্সা মাতা কুপিতা, ময্হং ঞাতী সমানযি;

সপথঞ্চ মং কারেসি, পরিভাসাপযী চ মং.

৪৪. ‘‘সাহং ঘোরঞ্চ সপথং, মুসাৰাদং অভাসিসং;

‘পুত্তমংসানি খাদামি, সচে তং পকতং মযা’.

৪৫. ‘‘তস্স কম্মস্স ৰিপাকেন, মুসাৰাদস্স চূভযং;

পুত্তমংসানি খাদামি, পুব্বলোহিতমক্খিতা’’তি. – ইমা গাথা অভাসি;

৪০-৪৫. তত্থ পুত্তবলূপেতাতি পুত্তবলেন উপেতা, পুত্তানং ৰসেন লদ্ধবলা. অতিমঞ্ঞিসন্তি অতিক্কমিত্ৰা মঞ্ঞিং অৰমঞ্ঞিং. পূতিলোহিতকো পতীতি কুণপলোহিতং হুত্ৰা গব্ভো পরিপতি. সেসং সব্বং অনন্তরসদিসমেৰ. তত্থ অট্ঠ থেরা, ইধ সম্বহুলা. তত্থ পঞ্চ পুত্তা, ইধ সত্তাতি অযমেৰ ৰিসেসোতি.

সত্তপুত্তখাদকপেতিৰত্থুৰণ্ণানা নিট্ঠিতা.