৫. তিরোকুট্টপেতৰত্থুৰণ্ণনা

তিরোকুট্টেসু তিট্ঠন্তীতি ইদং সত্থা রাজগহে ৰিহরন্তো সম্বহুলে পেতে আরব্ভ কথেসি.

তত্রাযং ৰিত্থারকথা – ইতো দ্ৰানৰুতিকপ্পে কাসি নাম নগরং অহোসি. তত্থ জযসেনো নাম রাজা রজ্জং কারেসি. তস্স সিরিমা নাম দেৰী. তস্সা কুচ্ছিযং ফুস্সো নাম বোধিসত্তো নিব্বত্তিত্ৰা অনুপুব্বেন সম্মাসম্বোধিং অভিসম্বুজ্ঝি. জযসেনো রাজা ‘‘মম পুত্তো মহাভিনিক্খমনং নিক্খমিত্ৰা বুদ্ধো জাতো, ময্হমেৰ বুদ্ধো, ময্হং ধম্মো, ময্হং সঙ্ঘো’’তি মমত্তং উপ্পাদেত্ৰা সব্বকালং সযমেৰ উপট্ঠহতি, ন অঞ্ঞেসং ওকাসং দেতি.

ভগৰতো কনিট্ঠভাতরো ৰেমাতিকা তযো ভাতরো চিন্তেসুং – ‘‘বুদ্ধা নাম সব্বলোক হিতত্থায উপ্পজ্জন্তি, ন একস্সেৰ অত্থায. অম্হাকঞ্চ পিতা অঞ্ঞেসং ওকাসং ন দেতি. কথং নু খো মযং লভেয্যাম ভগৰন্তং উপট্ঠাতুং ভিক্খুসঙ্ঘঞ্চা’’তি? তেসং এতদহোসি – ‘‘হন্দ মযং কিঞ্চি উপাযং করোমা’’তি. তে পচ্চন্তং কুপিতং ৰিয কারাপেসুং. ততো রাজা ‘‘পচ্চন্তো কুপিতো’’তি সুত্ৰা তযোপি পুত্তে পচ্চন্তং ৰূপসমেতুং পেসেসি. তে গন্ত্ৰা ৰূপসমেত্ৰা আগতা. রাজা তুট্ঠো ৰরং অদাসি ‘‘যং ইচ্ছথ, তং গণ্হথা’’তি. তে ‘‘মযং ভগৰন্তং উপট্ঠাতুং ইচ্ছামা’’তি আহংসু. রাজা ‘‘এতং ঠপেত্ৰা অঞ্ঞং গণ্হথা’’তি আহ. তে ‘‘মযং অঞ্ঞেন অনত্থিকা’’তি আহংসু. তেন হি পরিচ্ছেদং কত্ৰা গণ্হথাতি. তে সত্ত ৰস্সানি যাচিংসু. রাজা ন অদাসি. এৰং ‘‘ছ, পঞ্চ, চত্তারি, তীণি, দ্ৰে, একং, সত্ত মাসে, ছ, পঞ্চ, চত্তারো’’তি ৰত্ৰা যাৰ তেমাসং যাচিংসু. তদা রাজা ‘‘গণ্হথা’’তি অদাসি.

তে ভগৰন্তং উপসঙ্কমিত্ৰা আহংসু – ‘‘ইচ্ছাম মযং, ভন্তে, ভগৰন্তং তেমাসং উপট্ঠাতুং, অধিৰাসেতু নো, ভন্তে, ভগৰা ইমং তেমাসং ৰস্সাৰাস’’ন্তি. অধিৰাসেসি ভগৰা তুণ্হীভাৰেন. তে তযো অত্তনো জনপদে নিযুত্তকপুরিসস্স লেখং পেসেসুং ‘‘ইমং তেমাসং অম্হেহি ভগৰা উপট্ঠাতব্বো, ৰিহারং আদিং কত্ৰা সব্বং ভগৰতো উপট্ঠানসম্ভারং সম্পাদেহী’’তি. সো সব্বং সম্পাদেত্ৰা পটিপেসেসি. তে কাসাযৰত্থনিৰত্থা হুত্ৰা পুরিসসহস্সেহি ৰেয্যাৰচ্চকরেহি ভগৰন্তং ভিক্খুসঙ্ঘঞ্চ সক্কচ্চং উপট্ঠহমানা জনপদং নেত্ৰা ৰিহারং নিয্যাতেত্ৰা ৰস্সং ৰসাপেসুং.

তেসং ভণ্ডাগারিকো একো গহপতিপুত্তো সপজাপতিকো সদ্ধো অহোসি পসন্নো. সো বুদ্ধপ্পমুখস্স ভিক্খুসঙ্ঘস্স দানৰত্তং সক্কচ্চং অদাসি. জনপদে নিযুত্তকপুরিসো তং গহেত্ৰা জানপদেহি একাদসমত্তেহি পুরিসসহস্সেহি সদ্ধিং সক্কচ্চমেৰ দানং পৰত্তাপেসি. তত্থ কেচি জানপদা পটিহতচিত্তা অহেসুং. তে দানস্স অন্তরাযং কত্ৰা দেয্যধম্মং অত্তনা খাদিংসু, ভত্তসালঞ্চ অগ্গিনা দহিংসু. পৰারিতা রাজপুত্তা ভগৰতো সক্কারং কত্ৰা ভগৰন্তং পুরক্খত্ৰা পিতু সন্তিকমেৰ পচ্চাগমিংসু. তত্থ গন্ত্ৰা ভগৰা পরিনিব্বাযি. রাজপুত্তা চ জনপদে নিযুত্তকপুরিসো চ ভণ্ডাগারিকো চ অনুপুব্বেন কালং কত্ৰা সদ্ধিং পরিসায সগ্গে উপ্পজ্জিংসু, পটিহতচিত্তা জনা নিরযে উপ্পজ্জিংসু. এৰং তেসং উভযেসং জনানং সগ্গতো সগ্গং নিরযতো নিরযং উপপজ্জন্তানং দ্ৰানৰুতিকপ্পা ৰীতিৰত্তা.

অথ ইমস্মিং ভদ্দকপ্পে কস্সপস্স ভগৰতো কালে তে পটিহতচিত্তা জনা পেতেসু উপ্পন্না. তদা মনুস্সা অত্তনো অত্তনো ঞাতকানং পেতানং অত্থায দানং দত্ৰা উদ্দিসন্তি ‘‘ইদং নো ঞাতীনং হোতূ’’তি, তে সম্পত্তিং লভন্তি. অথ ইমেপি পেতা তং দিস্ৰা কস্সপং সম্মাসম্বুদ্ধং উপসঙ্কমিত্ৰা পুচ্ছিংসু – ‘‘কিং নু খো, ভন্তে, মযম্পি এৰরূপং সম্পত্তিং লভেয্যামা’’তি? ভগৰা আহ – ‘‘ইদানি ন লভথ, অনাগতে পন গোতমো নাম সম্মাসম্বুদ্ধো ভৰিস্সতি, তস্স ভগৰতো কালে বিম্বিসারো নাম রাজা ভৰিস্সতি, সো তুম্হাকং ইতো দ্ৰানৰুতিকপ্পে ঞাতি অহোসি, সো বুদ্ধস্স দানং দত্ৰা তুম্হাকং উদ্দিসিস্সতি, তদা লভিস্সথা’’তি. এৰং ৰুত্তে কির তেসং পেতানং তং ৰচনং ‘‘স্ৰে লভিস্সথা’’তি ৰুত্তং ৰিয অহোসি.

ততো একস্মিং বুদ্ধন্তরে ৰীতিৰত্তে অম্হাকং ভগৰা উপ্পজ্জি. তেপি তযো রাজপুত্তা পুরিসসহস্সেন সদ্ধিং দেৰলোকতো চৰিত্ৰা মগধরট্ঠে ব্রাহ্মণকুলে উপ্পজ্জিত্ৰা অনুপুব্বেন তাপসপব্বজ্জং পব্বজিত্ৰা গযাসীসে তযো জটিলা অহেসুং, জনপদে নিযুত্তকপুরিসো রাজা বিম্বিসারো অহোসি, ভণ্ডাগারিকো গহপতিপুত্তো ৰিসাখো নাম সেট্ঠি অহোসি, তস্স পজাপতি ধম্মদিন্না নাম সেট্ঠিধীতা অহোসি, অৰসেসা পন পরিসা রঞ্ঞো এৰ পরিৰারা হুত্ৰা নিব্বত্তিংসু.

অম্হাকম্পি ভগৰা লোকে উপ্পজ্জিত্ৰা সত্তসত্তাহং অতিক্কমিত্ৰা অনুপুব্বেন বারাণসিং আগম্ম ধম্মচক্কং পৰত্তেত্ৰা পঞ্চৰগ্গিযে আদিং কত্ৰা যাৰ সহস্সপরিৰারে তযো জটিলে ৰিনেত্ৰা রাজগহং অগমাসি. তত্থ চ তদহুপসঙ্কমন্তংযেৰ রাজানং বিম্বিসারং সোতাপত্তিফলে পতিট্ঠাপেসি সদ্ধিং একাদসনহুতেহি অঙ্গমগধৰাসীহি ব্রাহ্মণগহপতিকেহি. অথ রঞ্ঞা স্ৰাতনায ভত্তেন নিমন্তিতো অধিৰাসেত্ৰা দুতিযদিৰসে মাণৰকৰণ্ণেন সক্কেন দেৰানমিন্দেন পুরতো গচ্ছন্তেন –

‘‘দন্তো দন্তেহি সহ পুরাণজটিলেহি, ৰিপ্পমুত্তো ৰিপ্পমুত্তেহি;

সিঙ্গীনিক্খসৰণ্ণো, রাজগহং পাৰিসি ভগৰা’’তি. (মহাৰ. ৫৮) –

এৰমাদীহি গাথাহি অভিত্থৰিযমানো রাজগহং পৰিসিত্ৰা রঞ্ঞো নিৰেসনে মহাদানং সম্পটিচ্ছি. তে পন পেতা ‘‘ইদানি রাজা দানং অম্হাকং উদ্দিসিস্সতি, ইদানি উদ্দিসিস্সতী’’তি আসায সম্পরিৰারেত্ৰা অট্ঠংসু.

রাজা দানং দত্ৰা ‘‘কত্থ নু খো ভগৰা ৰিহরেয্যা’’তি ভগৰতো ৰিহারট্ঠানমেৰ চিন্তেসি, ন তং দানং কস্সচি উদ্দিসি. তথা তং দানং অলভন্তা পেতা ছিন্নাসা হুত্ৰা রত্তিযং রঞ্ঞো নিৰেসনে অতিৰিয ভিংসনকং ৰিস্সরমকংসু. রাজা ভযসন্তাসসংৰেগং আপজ্জিত্ৰা ৰিভাতায রত্তিযা ভগৰতো আরোচেহি – ‘‘এৰরূপং সদ্দং অস্সোসিং, কিং নু খো মে, ভন্তে, ভৰিস্সতী’’তি? ভগৰা ‘‘মা ভাযি, মহারাজ, ন তে কিঞ্চি পাপকং ভৰিস্সতি, অপিচ খো সন্তি তে পুরাণঞাতকা পেতেসু উপ্পন্না. তে একং বুদ্ধন্তরং তমেৰ পচ্চাসীসন্তা ‘বুদ্ধস্স দানং দত্ৰা অম্হাকং উদ্দিসিস্সতী’তি ৰিচরন্তা তযা হিয্যো দানং দত্ৰা ন উদ্দিসিতত্তা ছিন্নাসা হুত্ৰা তথারূপং ৰিস্সরমকংসূ’’তি আহ. ‘‘কিং ইদানিপি, ভন্তে, দিন্নে তে লভেয্যু’’ন্তি? ‘‘আম, মহারাজা’’তি. ‘‘তেন হি, ভন্তে, অধিৰাসেতু মে ভগৰা অজ্জতনায দানং, তেসং উদ্দিসিস্সামী’’তি. অধিৰাসেসি ভগৰা তুণ্হীভাৰেন.

রাজা নিৰেসনং গন্ত্ৰা মহাদানং পটিযাদাপেত্ৰা ভগৰতো কালং আরোচাপেসি. ভগৰা রাজন্তেপুরং গন্ত্ৰা পঞ্ঞত্তে আসনে নিসীদি সদ্ধিং ভিক্খুসঙ্ঘেন. তে পেতা ‘‘অপি নাম অজ্জ লভেয্যামা’’তি গন্ত্ৰা তিরোকুট্টাদীসু অট্ঠংসু. ভগৰা তথা অকাসি, যথা তে সব্বেৰ রঞ্ঞো আপাথং গতা অহেসুং. রাজা দক্খিণোদকং দেন্তো ‘‘ইদং মে ঞাতীনং হোতূ’’তি উদ্দিসি. তাৰদেৰ পেতানং কমলকুৰলযসঞ্ছন্না পোক্খরণিযো নিব্বত্তিংসু. তে তত্থ ন্হত্ৰা চ পিৰিত্ৰা চ পটিপ্পস্সদ্ধদরথকিলমথপিপাসা সুৰণ্ণৰণ্ণা অহেসুং. রাজা যাগুখজ্জভোজ্জানি দত্ৰা উদ্দিসি. তেসং তঙ্খণঞ্ঞেৰ দিব্বযাগুখজ্জভোজ্জানি নিব্বত্তিংসু. তে তানি পরিভুঞ্জিত্ৰা পীণিন্দ্রিযা অহেসুং. অথ ৰত্থসেনাসনানি দত্ৰা উদ্দিসি. তেসং দিব্বৰত্থপাসাদপচ্চত্থরণসেয্যাদিঅলঙ্কারৰিধযো নিব্বত্তিংসু. সা চ তেসং সম্পত্তি সব্বাপি যথা রঞ্ঞো পাকটা হোতি, তথা ভগৰা অধিট্ঠাসি. রাজা তং দিস্ৰা অতিৰিয অত্তমনো অহোসি. ততো ভগৰা ভুত্তাৰী পৰারিতো রঞ্ঞো বিম্বিসারস্স অনুমোদনত্থং তিরোকুট্টপেতৰত্থুং অভাসি –

১৪. ‘‘তিরোকুট্টেসু তিট্ঠন্তি, সন্ধিসিঙ্ঘাটকেসু চ;

দ্ৰারবাহাসু তিট্ঠন্তি, আগন্ত্ৰান সকং ঘরং.

১৫. ‘‘পহূতে অন্নপানম্হি, খজ্জভোজ্জে উপট্ঠিতে;

ন তেসং কোচি সরতি, সত্তানং কম্মপচ্চযা.

১৬. ‘‘এৰং দদন্তি ঞাতীনং, যে হোন্তি অনুকম্পকা;

সুচিং পণীতং কালেন, কপ্পিযং পানভোজনং.

১৭. ‘‘ইদং ৰো ঞাতীনং হোতু, সুখিতা হোন্তু ঞাতযো;

তে চ তত্থ সমাগন্ত্ৰা, ঞাতিপেতা সমাগতা;

পহূতে অন্নপানম্হি, সক্কচ্চং অনুমোদরে.

১৮. ‘‘চিরং জীৰন্তু নো ঞাতী, যেসং হেতু লভামসে;

অম্হাকঞ্চ কতা পূজা, দাযকা চ অনিপ্ফলা.

১৯. ‘‘ন হি তত্থ কসি অত্থি, গোরক্খেত্থ ন ৰিজ্জতি;

ৰণিজ্জা তাদিসী নত্থি, হিরঞ্ঞেন কযাকযং;

ইতো দিন্নেন যাপেন্তি, পেতা কালগতা তহিং.

২০. ‘‘উন্নমে উদকং ৰুট্ঠং, যথা নিন্নং পৰত্ততি;

এৰমেৰ ইতো দিন্নং, পেতানং উপকপ্পতি.

২১. ‘‘যথা ৰারিৰহা পূরা, পরিপূরেন্তি সাগরং;

এৰমেৰ ইতো দিন্নং, পেতানং উপকপ্পতি.

২২. ‘‘অদাসি মে অকাসি মে, ঞাতিমিত্তা সখা চ মে;

পেতানং দক্খিণং দজ্জা, পুব্বে কতমনুস্সরং.

২৩. ‘‘ন হি রুণ্ণং ৰা সোকো ৰা, যা চঞ্ঞা পরিদেৰনা;

ন তং পেতানমত্থায, এৰং তিট্ঠন্তি ঞাতযো.

২৪. ‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘরত্তং হিতাযস্স, ঠানসো উপকপ্পতি.

২৫. ‘‘সো ঞাতিধম্মো চ অযং নিদস্সিতো, পেতান পূজা চ কতা উল়ারা;

বলঞ্চ ভিক্খূনমনুপ্পদিন্নং, তুম্হেহি পুঞ্ঞং পহুতং অনপ্পক’’ন্তি.

১৪. তত্থ তিরোকুট্টেসূতি কুট্টানং পরভাগেসু. তিট্ঠন্তীতি নিসজ্জাদিপটিক্খেপতো ঠানকপ্পনৰচনমেতং, গেহপাকারকুট্টানং দ্ৰারতো বহি এৰ তিট্ঠন্তীতি অত্থো. সন্ধিসিঙ্ঘাটকেসু চাতি সন্ধীসু চ সিঙ্ঘাটকেসু চ. সন্ধীতি চতুক্কোণরচ্ছা, ঘরসন্ধিভিত্তিসন্ধিআলোকসন্ধিযোপি ৰুচ্চন্তি. সিঙ্ঘাটকাতি তিকোণরচ্ছা. দ্ৰারবাহাসু তিট্ঠন্তীতি নগরদ্ৰারঘরদ্ৰারানং বাহা নিস্সায তিট্ঠন্তি. আগন্ত্ৰান সকং ঘরন্তি সকঘরং নাম পুব্বঞাতিঘরম্পি অত্তনা সামিভাৰেন অজ্ঝাৰুত্থঘরম্পি, তদুভযম্পি তে যস্মা সকঘরসঞ্ঞায আগচ্ছন্তি, তস্মা ‘‘আগন্ত্ৰান সকং ঘর’’ন্তি আহ.

১৫. এৰং ভগৰা পুব্বে অনজ্ঝাৰুত্থপুব্বম্পি পুব্বঞাতিঘরত্তা বিম্বিসারনিৰেসনং সকঘরসঞ্ঞায আগন্ত্ৰা তিরোকুট্টাদীসু ঠিতে ইস্সামচ্ছরিযফলং অনুভৰন্তে অতিৰিয দুদ্দসিকৰিরূপভযানকদস্সনে বহূ পেতে রঞ্ঞো দস্সেন্তো ‘‘তিরোকুট্টেসু তিট্ঠন্তী’’তি গাথং ৰত্ৰা পুন তেহি কতস্স কম্মস্স দারুণভাৰং দস্সেন্তো ‘‘পহূতে অন্নপানম্হী’’তি দুতিযগাথমাহ.

তত্থ পহূতেতি অনপ্পকে বহুম্হি, যাৰদত্থেতি অত্থো. ব-কারস্স হি প-কারো লব্ভতি ‘‘পহু সন্তো ন ভরতী’’তিআদীসু (সু. নি. ৯৮) ৰিয. কেচি পন ‘‘বহুকে’’তি পঠন্তি, সো পন পমাদপাঠো. অন্নপানম্হীতি অন্নে চ পানে চ. খজ্জভোজ্জেতি খজ্জে চ ভোজ্জে চ. এতেন অসিতপীতখাযিতসাযিতৰসেন চতুব্বিধম্পি আহারং দস্সেতি. উপট্ঠিতেতি উপগম্ম ঠিতে সজ্জিতে, পটিযত্তেতি অত্থো. ন তেসং কোচি সরতি সত্তানন্তি তেসং পেত্তিৰিসযে উপ্পন্নানং সত্তানং কোচি মাতা ৰা পিতা ৰা পুত্তো ৰা নত্তা ৰা ন সরতি. কিং কারণা? কম্মপচ্চযাতি, অত্তনা কতস্স অদানদানপটিসেধনাদিভেদস্স কদরিযকম্মস্স কারণভাৰতো. তঞ্হি কম্মং তেসং ঞাতীনং সরিতুং ন দেতি.

১৬. এৰং ভগৰা অনপ্পকেপি অন্নপানাদিম্হি ৰিজ্জমানে ঞাতীনং পচ্চাসীসন্তানং পেতানং কম্মফলেন ঞাতকানং অনুস্সরণমত্তস্সাপি অভাৰং দস্সেত্ৰা ইদানি পেত্তিৰিসযুপপন্নে ঞাতকে উদ্দিস্স রঞ্ঞা দিন্নদানং পসংসন্তো ‘‘এৰং দদন্তি ঞাতীন’’ন্তি ততিযগাথমাহ.

তত্থ এৰন্তি উপমাৰচনং. তস্স দ্ৰিধা সম্বন্ধো – তেসং সত্তানং কম্মপচ্চযা অসরন্তেসুপি কেসুচি কেচি দদন্তি ঞাতীনং, যে এৰং অনুকম্পকা হোন্তীতি চ, মহারাজ, যথা তযা দিন্নং, এৰং সুচিং পণীতং কালেন কপ্পিযং পানভোজনং দদন্তি ঞাতীনং, যে হোন্তি অনুকম্পকাতি চ. তত্থ দদন্তীতি দেন্তি উদ্দিসন্তি নিয্যাতেন্তি. ঞাতীনন্তি মাতিতো চ পিতিতো চ সম্বন্ধানং. যেতি যে কেচি পুত্তাদযো. হোন্তীতি ভৰন্তি. অনুকম্পকাতি অত্থকামা হিতেসিনো. সুচিন্তি সুদ্ধং মনোহরং ধম্মিকঞ্চ. পণীতন্তি উল়ারং. কালেনাতি দক্খিণেয্যানং পরিভোগযোগ্গকালেন, ঞাতিপেতানং ৰা তিরোকুট্টাদীসু আগন্ত্ৰা ঠিতকালেন. কপ্পিযন্তি অনুচ্ছৰিকং পতিরূপং অরিযানং পরিভোগারহং. পানভোজনন্তি পানঞ্চ ভোজনঞ্চ, তদুপদেসেন চেত্থ সব্বং দেয্যধম্মং ৰদতি.

১৭. ইদানি যেন পকারেন তেসং পেতানং দিন্নং নাম হোতি, তং দস্সেন্তো ‘‘ইদং ৰো ঞাতীনং হোতু, সুখিতা হোন্তু ঞাতযো’’তি চতুত্থগাথায পুব্বড্ঢং আহ. তং ততিযগাথায পুব্বড্ঢেন সম্বন্ধিতব্বং –

‘‘এৰং দদন্তি ঞাতীনং, যে হোন্তি অনুকম্পকা;

ইদং ৰো ঞাতীনং হোতু, সুখিতা হোন্তু ঞাতযো’’তি.

তেন ‘‘ইদং ৰো ঞাতীনং হোতূতি এৰং পকারেন দদন্তি, নো অঞ্ঞথা’’তি আকারত্থেন এৰংসদ্দেন দাতব্বাকারনিদস্সনং কতং হোতি.

তত্থ ইদন্তি দেয্যধম্মনিদস্সনং. ৰোতি নিপাতমত্তং ‘‘যেহি ৰো অরিযা’’তিআদীসু (ম. নি. ১.৩৬) ৰিয. ঞাতীনং হোতূতি পেত্তিৰিসযে উপ্পন্নানং ঞাতকানং হোতু. ‘‘নো ঞাতীন’’ন্তি চ পঠন্তি, অম্হাকং ঞাতীনন্তি অত্থো. সুখিতা হোন্তু ঞাতযোতি তে পেত্তিৰিসযূপপন্না ঞাতযো ইদং ফলং পচ্চনুভৰন্তা সুখিতা সুখপ্পত্তা হোন্তু.

যস্মা ‘‘ইদং ৰো ঞাতীনং হোতূ’’তি ৰুত্তেপি অঞ্ঞেন কতকম্মং ন অঞ্ঞস্স ফলদং হোতি, কেৰলং পন তথা উদ্দিস্স দীযমানং তং ৰত্থু ঞাতিপেতানং কুসলকম্মস্স পচ্চযো হোতি, তস্মা যথা তেসং তস্মিং ৰত্থুস্মিং তস্মিংযেৰ খণে ফলনিব্বত্তকং কুসলকম্মং হোতি, তং দস্সেন্তো ‘‘তে চ তত্থো’’তিআদিমাহ.

তত্থ তেতি ঞাতিপেতা. তত্থাতি যত্থ দানং দীযতি, তত্থ. সমাগন্ত্ৰাতি ‘‘ইমে নো ঞাতযো অম্হাকং অত্থায দানং উদ্দিসন্তী’’তি অনুমোদনত্থং তত্থ সমাগতা হুত্ৰা. পহূতে অন্নপানম্হীতি অত্তনো উদ্দিস্স দীযমানে তস্মিং ৰত্থুস্মিং. সক্কচ্চং অনুমোদরেতি কম্মফলং অভিসদ্দহন্তা চিত্তীকারং অৰিজহন্তা অৰিক্খিত্তচিত্তা হুত্ৰা ‘‘ইদং নো দানং হিতায সুখায হোতূ’’তি মোদন্তি অনুমোদন্তি পীতিসোমনস্সজাতা হোন্তি.

১৮. চিরং জীৰন্তূতি চিরং জীৰিনো দীঘাযুকা হোন্তু. নো ঞাতীতি অম্হাকং ঞাতকা. যেসং হেতূতি যেসং কারণা যে নিস্সায. লভামসেতি ঈদিসং সম্পত্তিং পটিলভাম. ইদঞ্হি উদ্দিসনেন লদ্ধসম্পত্তিং অনুভৰন্তানং পেতানং অত্তনো ঞাতীনং থোমনাকারদস্সনং. পেতানঞ্হি অত্তনো অনুমোদনেন, দাযকানং উদ্দিসনেন, উক্খিণেয্যসম্পত্তিযা চাতি তীহি অঙ্গেহি দক্খিণা তঙ্খণঞ্ঞেৰ ফলনিব্বত্তিকা হোতি. তত্থ দাযকা ৰিসেসহেতু. তেনাহ ‘‘যেসং হেতু লভামসে’’তি. অম্হাকঞ্চ কতা পূজাতি ‘‘ইদং ৰো ঞাতীনং হোতূ’’তি এৰং উদ্দিসন্তেহি দাযকেহি অম্হাকঞ্চ পূজা কতা, তে দাযকা চ অনিপ্ফলা যস্মিং সন্তানে পরিচ্চাগমযং কম্মং নিব্বত্তং তস্স তত্থেৰ ফলদানতো.

এত্থাহ – ‘‘কিং পন পেত্তিৰিসযূপপন্না এৰ ঞাতী হেতুসম্পত্তিযো লভন্তি, উদাহু অঞ্ঞেপী’’তি? ন চেত্থ অম্হেহি ৰত্তব্বং, অত্থি ভগৰতা এৰং ব্যাকতত্তা. ৰুত্তঞ্হেতং –-

‘‘মযমস্সু, ভো গোতম, ব্রাহ্মণা নাম দানানি দেম, পুঞ্ঞানি করোম ‘ইদং দানং পেতানং ঞাতিসালোহিতানং উপকপ্পতু, ইদং দানং পেতা ঞাতিসালোহিতা পরিভুঞ্জন্তূ’তি. কচ্চি তং, ভো গোতম, দানং পেতানং ঞাতিসালোহিতানং উপকপ্পতি, কচ্চি তে পেতা ঞাতিসালোহিতা তং দানং পরিভুঞ্জন্তীতি? ঠানে খো, ব্রাহ্মণ, উপকপ্পতি, নো অট্ঠানেতি.

‘‘কতমং পন, ভো গোতম, ঠানং, কতমং অট্ঠানন্তি? ইধ, ব্রাহ্মণ, একচ্চো পাণাতিপাতী হোতি…পে… মিচ্ছাদিট্ঠিকো হোতি, সো কাযস্স ভেদা পরং মরণা নিরযং উপপজ্জতি. যো নেরযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি. ইদং খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতী হোতি…পে… মিচ্ছাদিট্ঠিকো হোতি, সো কাযস্স ভেদা পরং মরণা তিরচ্ছানযোনিং উপপজ্জতি. যো তিরচ্ছানযোনিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি…পে… সম্মাদিট্ঠিকো হোতি, সো কাযস্স ভেদা পরং মরণা মনুস্সানং সহব্যতং উপপজ্জতি…পে… দেৰানং সহব্যতং উপপজ্জতি. যো দেৰানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি খো, ব্রাহ্মণ, অট্ঠানং, যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতী হোতি…পে… মিচ্ছাদিট্ঠিকো হোতি, সো কাযস্স ভেদা পরং মরণা পেত্তিৰিসযং উপপজ্জতি. যো পেত্তিৰিসযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি. যং ৰা পনস্স ইতো অনুপৰেচ্ছেন্তি মিত্তামচ্চা ৰা ঞাতিসালোহিতা ৰা, তেন সো তত্থ যাপেতি, তেন সো তত্থ তিট্ঠতি. ইদং খো, ব্রাহ্মণ, ঠানং, যত্থ ঠিতস্স তং দানং উপকপ্পতী’’তি.

‘‘সচে পন, ভো গোতম, সো পেতো ঞাতিসালোহিতো তং ঠানং অনুপপন্নো হোতি, কো তং দানং পরিভুঞ্জতী’’তি? ‘‘অঞ্ঞেপিস্স, ব্রাহ্মণ, পেতা ঞাতিসালোহিতা তং ঠানং উপপন্না হোন্তি, তে তং দানং পরিভুঞ্জন্তী’’তি.

‘‘সচে পন, ভো গোতম, সো চেৰ পেতো ঞাতিসালোহিতো তং ঠানং অনুপপন্নো হোতি, অঞ্ঞেপিস্স পেতা ঞাতিসালোহিতা তং ঠানং অনুপপন্না হোন্তি, কো তং দানং পরিভুঞ্জতী’’তি? ‘‘অট্ঠানং খো এতং, ব্রাহ্মণ, অনৰকাসো, যং তং ঠানং ৰিৰিত্তং অস্স ইমিনা দীঘেন অদ্ধুনা যদিদং পেতেহি ঞাতিসালোহিতেহি, অপিচ, ব্রাহ্মণ, দাযকোপি অনিপ্ফলো’’তি (অ. নি. ১০.১৭৭).

১৯. ইদানি পেত্তিৰিসযূপপন্নানং তত্থ অঞ্ঞস্স কসিগোরক্খাদিনো সম্পত্তিপটিলাভকারণস্স অভাৰং ইতো দিন্নেন যাপনঞ্চ দস্সেতুং ‘‘ন হী’’তিআদি ৰুত্তং.

তত্থ ন হি তত্থ কসি অত্থীতি তস্মিং পেত্তিৰিসযে কসি ন হি অত্থি, যং নিস্সায পেতা সুখেন জীৰেয্যুং. গোরক্খেত্থ ন ৰিজ্জতীতি এত্থ পেত্তিৰিসযে ন কেৰলং কসিযেৰ নত্থি, অথ খো গোরক্খাপি ন ৰিজ্জতি, যং নিস্সায তে সুখেন জীৰেয্যুং. ৰণিজ্জা তাদিসী নত্থীতি ৰণিজ্জাপি তাদিসী নত্থি, যা তেসং সম্পত্তিপটিলাভহেতু ভৰেয্য. হিরঞ্ঞেন কযাকযন্তি হিরঞ্ঞেন কযৰিক্কযম্পি তত্থ তাদিসং নত্থি, যং তেসং সম্পত্তিপটিলাভহেতু ভৰেয্য. ইতে দিন্নেন যাপেন্তি, পেতা কালগতা তহিন্তি কেৰলং পন ইতো ঞাতীহি ৰা মিত্তামচ্চেহি ৰা দিন্নেন যাপেন্তি, অত্তভাৰং পৰত্তেন্তি. পেতাতি পেত্তিৰিসযূপপন্না সত্তা. কালগতাতি অত্তনো মরণকালেন গতা. ‘‘কালকতা’’তি ৰা পাঠো, কতকালা কতমরণা মরণং সম্পত্তা. তহিন্তি তস্মিং পেত্তিৰিসযে.

২০-২১. ইদানি যথাৰুত্তমত্থং উপমাহি পকাসেতুং ‘‘উন্নমে উদকং ৰুট্ঠ’’ন্তি গাথাদ্ৰযমাহ. তস্সত্থো – যথা উন্নমে থলে উন্নতপ্পদেসে মেঘেহি অভিৰুট্ঠং উদকং যথা নিন্নং পৰত্ততি, যো ভূমিভাগো নিন্নো ওণতো, তং উপগচ্ছতি; এৰমেৰ ইতো দিন্নং দানং পেতানং উপকপ্পতি, ফলুপ্পত্তিযা ৰিনিযুজ্জতি. নিন্নমিৰ হি উদকপ্পৰত্তিযা ঠানং পেতলোকো দানূপকপ্পনায. যথাহ – ‘‘ইদং খো, ব্রাহ্মণ, ঠানং, যত্থ ঠিতস্স তং দানং উপকপ্পতী’’তি (অ. নি. ১০.১৭৭). যথা চ কন্দরপদরসাখপসাখকুসোব্ভমহাসোব্ভে হি ওগলিতেন উদকেন ৰারিৰহা মহানজ্জো পূরা হুত্ৰা সাগরং পরিপূরেন্তি, এৰং ইতো দিন্নদানং পুব্বে ৰুত্তনযেন পেতানং উপকপ্পতীতি.

২২. যস্মা পেতা ‘‘ইতো কিঞ্চি লভামা’’তি আসাভিভূতা ঞাতিঘরং আগন্ত্ৰাপি ‘‘ইদং নাম নো দেথা’’তি যাচিতুং ন সক্কোন্তি, তস্মা তেসং ইমানি অনুস্সরণৰত্থূনি অনুস্সরন্তো কুলপুত্তো দক্খিণং দজ্জাতি দস্সেন্তো ‘‘অদাসি মে’’তি গাথমাহ.

তস্সত্থো – ইদং নাম মে ধনং ৰা ধঞ্ঞং ৰা অদাসি, ইদং নাম মে কিচ্চং অত্তনাযেৰ যোগং আপজ্জন্তো অকাসি, ‘‘অসুকো মে মাতিতো ৰা পিতিতো ৰা সম্বন্ধত্তা ঞাতি, সিনেহৰসেন তাণসমত্থতায মিত্তো, অসুকো মে সহপংসুকীল়কসহাযো সখা’’তি চ এতং সব্বমনুস্সরন্তো পেতানং দক্খিণং দজ্জা দানং নিয্যাতেয্য. ‘‘দক্খিণা দজ্জা’’তি ৰা পাঠো, পেতানং দক্খিণা দাতব্বা, তেন ‘‘অদাসি মে’’তিআদিনা নযেন পুব্বে কতমনুস্সরং অনুস্সরতাতি ৰুত্তং হোতি. করণত্থে হি ইদং পচ্চত্তৰচনং.

২৩-২৪. যে পন সত্তা ঞাতিমরণেন রুণ্ণসোকাদিপরা এৰ হুত্ৰা তিট্ঠন্তি, ন তেসং অত্থায কিঞ্চি দেন্তি, তেসং তং রুণ্ণসোকাদি কেৰলং অত্তপরিতাপনমত্তমেৰ হোতি, তং ন পেতানং কঞ্চি অত্থং সাধেতীতি দস্সেন্তো ‘‘ন হি রুণ্ণং ৰা’’তি গাথং ৰত্ৰা পুন মগধরাজেন দিন্নদক্খিণায সাত্থকভাৰং দস্সেতুং ‘‘অযঞ্চ খো’’তি গাথমাহ. তেসং অত্থো হেট্ঠা ৰুত্তোযেৰ.

২৫. ইদানি যস্মা ইমং দক্খিণং দেন্তেন রঞ্ঞা ঞাতীনং ঞাতীহি কত্তব্বকিচ্চকরণেন ঞাতিধম্মো নিদস্সিতো, বহুজনস্স পাকটো কতো, নিদস্সনং পাকটং কতং ‘‘তুম্হেহিপি এৰমেৰ ঞাতীসু ঞাতিধম্মো পরিপূরেতব্বো’’তি. তে চ পেতে দিব্বসম্পত্তিং অধিগমেন্তেন পেতানং পূজা কতা উল়ারা, বুদ্ধপ্পমুখং ভিক্খুসঙ্ঘং অন্নপানাদীহি সন্তপ্পেন্তেন ভিক্খূনং বলং অনুপ্পদিন্নং, অনুকম্পাদিগুণপরিৰারঞ্চ চাগচেতনং নিব্বত্তেন্তেন অনপ্পকং পুঞ্ঞং পসুতং, তস্মা ভগৰা ইমেহি যথাভুচ্চগুণেহি রাজানং সম্পহংসেন্তো ‘‘সো ঞাতিধম্মো’’তি ওসানগাথমাহ.

তত্থ ঞাতিধম্মোতি ঞাতীহি ঞাতীনং কত্তব্বকরণং. উল়ারাতি ফীতা সমিদ্ধা. বলন্তি কাযবলং. পসুতন্তি উপচিতং. এত্থ চ ‘‘সো ঞাতিধম্মো চ অযং নিদস্সিতো’’তি এতেন ভগৰা রাজানং ধম্মিযা কথায সন্দস্সেসি. ঞাতিধম্মদস্সনঞ্হেত্থ সন্দস্সনং. ‘‘পেতান পূজা চ কতা উল়ারা’’তি ইমিনা সমাদপেসি. ‘‘উল়ারা’’তি পসংসনঞ্হেত্থ পুনপ্পুনং পূজাকরণে সমাদপনং. ‘‘বলঞ্চ ভিক্খূনমনুপ্পদিন্ন’’ন্তি ইমিনা সমুত্তেজেসি. ভিক্খূনং বলানুপ্পদানঞ্হেত্থ এৰংৰিধানং বলানুপ্পদানে উস্সাহৰড্ঢনেন সমুত্তেজনং. ‘‘তুম্হেহি পুঞ্ঞং পসুতং অনপ্পক’’ন্তি ইমিনা সম্পহংসেসি. পুঞ্ঞপসৰনকিত্তনঞ্হেত্থ তস্স যথাভুচ্চগুণসংৰণ্ণনভাৰেন সম্পহংসনন্তি এৰমেত্থ যোজনা ৰেদিতব্বা.

দেসনাপরিযোসানে চ পেত্তিৰিসযূপপত্তিআদীনৰসংৰণ্ণনেন সংৰিগ্গহদযানং যোনিসো পদহতং চতুরাসীতিযা পাণসহস্সানং ধম্মাভিসমযো অহোসি. দুতিযদিৰসেপি দেৰমনুস্সানং ইদমেৰ তিরোকুট্টদেসনং দেসেসি. এৰং যাৰ সত্ত দিৰসা তাদিসোৰ ধম্মাভিসমযো অহোসীতি.

তিরোকুট্টপেতৰত্থুৰণ্ণনা নিট্ঠিতা.