৪. পিট্ঠধীতলিকপেতৰত্থুৰণ্ণনা

যং কিঞ্চারম্মণং কত্ৰাতি ইদং সত্থা সাৰত্থিযং জেতৰনে ৰিহরন্তো অনাথপিণ্ডিকস্স গহপতিনো দানং আরব্ভ কথেসি. অনাথপিণ্ডিকস্স কির গহপতিনো ধীতু ধীতায দারিকায ধাতি পিট্ঠধীতলিকং অদাসি ‘‘অযং তে ধীতা, ইমং গহেত্ৰা কীল়স্সূ’’তি. সা তত্থ ধীতুসঞ্ঞং উপ্পাদেসি. অথস্সা একদিৰসং তং গহেত্ৰা কীল়ন্তিযা পমাদেন পতিত্ৰা ভিজ্জি. ততো দারিকা ‘‘মম ধীতা মতা’’তি পরোদি. তং রোদন্তিং কোচিপি গেহজনো সঞ্ঞাপেতুং নাসক্খি. তস্মিঞ্চ সমযে সত্থা অনাথপিণ্ডিকস্স গহপতিনো গেহে পঞ্ঞত্তে আসনে নিসিন্নো হোতি, মহাসেট্ঠি চ ভগৰতো সমীপে নিসিন্নো অহোসি. ধাতি তং দারিকং গহেত্ৰা সেট্ঠিস্স সন্তিকং অগমাসি. সেট্ঠি তং দিস্ৰা ‘‘কিস্সাযং দারিকা রোদতী’’তি আহ. ধাতি তং পৰত্তিং সেট্ঠিস্স আরোচেসি. সেট্ঠি তং দারিকং অঙ্কে নিসীদাপেত্ৰা ‘‘তৰ ধীতুদানং দস্সামী’’তি সঞ্ঞাপেত্ৰা সত্থু আরোচেসি – ‘‘ভন্তে, মম নত্তুধীতরং পিট্ঠধীতলিকং উদ্দিস্স দানং দাতুকামো, তং মে পঞ্চহি ভিক্খুসতেহি সদ্ধিং স্ৰাতনায অধিৰাসেথা’’তি. অধিৰাসেসি ভগৰা তুণ্হীভাৰেন.

অথ ভগৰা দুতিযদিৰসে পঞ্চহি ভিক্খুসতেহি সদ্ধিং সেট্ঠিস্স ঘরং গন্ত্ৰা ভত্তকিচ্চং কত্ৰা অনুমোদনং করোন্তো –

১০. ‘‘যং কিঞ্চারম্মণং কত্ৰা, দজ্জা দানং অমচ্ছরী;

পুব্বপেতে চ আরব্ভ, অথ ৰা ৰত্থুদেৰতা.

১১. ‘‘চত্তারো চ মহারাজে, লোকপালে যসস্সিনে;

কুৰেরং ধতরট্ঠঞ্চ, ৰিরূপক্খং ৰিরূল়্হকং;

তে চেৰ পূজিতা হোন্তি, দাযকা চ অনিপ্ফলা.

১২. ‘‘ন হি রুণ্ণং ৰা সোকো ৰা, যা চঞ্ঞা পরিদেৰনা;

ন তং পেতস্স অত্থায, এৰং তিট্ঠন্তি ঞাতযো.

১৩. ‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘরত্তং হিতাযস্স, ঠানসো উপকপ্পতী’’তি. – ইমা গাথা অভাসি;

১০. তত্থ যং কিঞ্চারম্মণং কত্ৰাতি মঙ্গলাদীসু অঞ্ঞতরং যং কিঞ্চি আরব্ভ উদ্দিস্স. দজ্জাতি দদেয্য. অমচ্ছরীতি অত্তনো সম্পত্তিযা পরেহি সাধারণভাৰাসহনলক্খণস্স মচ্ছেরস্স অভাৰতো অমচ্ছরী, পরিচ্চাগসীলো মচ্ছরিযলোভাদিচিত্তমলং দূরতো কত্ৰা দানং দদেয্যাতি অধিপ্পাযো. পুব্বপেতে চ আরব্ভাতি পুব্বকেপি পেতে উদ্দিস্স. ৰত্থুদেৰতাতি ঘরৰত্থুআদীসু অধিৰত্থা দেৰতা আরব্ভাতি যোজনা. অথ ৰাতি ইমিনা অঞ্ঞেপি দেৰমনুস্সাদিকে যে কেচি আরব্ভ দানং দদেয্যাতি দস্সেতি.

১১. তত্থ দেৰেসু তাৰ একচ্চে পাকটে দেৰে দস্সেন্তো ‘‘চত্তারো চ মহারাজে’’তি ৰত্ৰা পুন তে নামতো গণ্হন্তো ‘‘কুৰের’’ন্তিআদিমাহ. তত্থ কুৰেরন্তি ৰেস্সৰণং. ধতরট্ঠন্তিআদীনি সেসানং তিণ্ণং লোকপালানং নামানি. তে চেৰ পূজিতা হোন্তীতি তে চ মহারাজানো পুব্বপেতৰত্থুদেৰতাযো চ উদ্দিসনকিরিযায পটিমানিকা হোন্তি. দাযকা চ অনিপ্ফলাতি যে দানং দেন্তি, তে দাযকা চ পরেসং উদ্দিসনমত্তেন ন নিপ্ফলা, অত্তনো দানফলস্স ভাগিনো এৰ হোন্তি.

১২. ইদানি ‘‘যে অত্তনো ঞাতীনং মরণেন রোদন্তি পরিদেৰন্তি সোচন্তি, তেসং তং নিরত্থকং, অত্তপরিতাপনমত্তমেৰা’’তি দস্সেতুং ‘‘ন হি রুণ্ণং ৰা’’তি গাথমাহ. তত্থ রুণ্ণন্তি রুদিতং অস্সুমোচনং ন হি কাতব্বন্তি ৰচনসেসো. সোকোতি সোচনং চিত্তসন্তাপো, অন্তোনিজ্ঝানন্তি অত্থো. যা চঞ্ঞা পরিদেৰনাতি যা চ রুণ্ণসোকতো অঞ্ঞা পরিদেৰনা, ‘‘কহং একপুত্তকা’’তিআদিৰাচাৰিপ্পলাপো, সোপি ন কাতব্বোতি অত্থো. সব্বত্থ ৰা-সদ্দো ৰিকপ্পনত্থো. ন তং পেতস্স অত্থাযাতি যস্মা রুণ্ণং ৰা সোকো ৰা পরিদেৰনা ৰাতি সব্বম্পি তং পেতস্স কালকতস্স অত্থায উপকারায ন হোতি, তস্মা ন হি তং কাতব্বং, তথাপি এৰং তিট্ঠন্তি ঞাতযো অৰিদ্দসুনোতি অধিপ্পাযো.

১৩. এৰং রুণ্ণাদীনং নিরত্থকভাৰং দস্সেত্ৰা ইদানি যা পুব্বপেতাদিকে আরব্ভ দাযকেন সঙ্ঘস্স দক্খিণা দিন্না, তস্সা সাত্থকভাৰং দস্সেন্তো ‘‘অযঞ্চ খো দক্খিণা’’তি গাথমাহ. তত্থ অযন্তি দাযকেন তং দিন্নং দানং পচ্চক্খতো দস্সেন্তো ৰদতি. চ-সদ্দো ব্যতিরেকত্থো, তেন যথা রুণ্ণাদি পেতস্স ন কস্সচি অত্থায হোতি, ন এৰমযং, অযং পন দক্খিণা দীঘরত্তং হিতাযস্স হোতীতি ৰক্খমানমেৰ ৰিসেসং জোতেতি. খোতি অৰধারণে. দক্খিণাতি দানং. সঙ্ঘম্হি সুপ্পতিট্ঠিতাতি অনুত্তরে পুঞ্ঞক্খেত্তে সঙ্ঘে সুট্ঠু পতিট্ঠিতা. দীঘরত্তং হিতাযস্সাতি অস্স পেতস্স চিরকালং হিতায অত্থায. ঠানসো উপকপ্পতীতি তঙ্খণঞ্ঞেৰ নিপ্ফজ্জতি, ন কালন্তরেতি অত্থো. অযঞ্হি তত্থ ধম্মতা – যং পেতে উদ্দিস্স দানে দিন্নে পেতা চে অনুমোদন্তি, তাৰদেৰ তস্স ফলেন পেতা পরিমুচ্চন্তীতি.

এৰং ভগৰা ধম্মং দেসেত্ৰা মহাজনং পেতে উদ্দিস্স দানাভিরতমানসং কত্ৰা উট্ঠাযাসনা পক্কামি. পুনদিৰসে সেট্ঠিভরিযা অৰসেসা চ ঞাতকা সেট্ঠিং অনুৰত্তন্তা এৰং তেমাসমত্তং মহাদানং পৰত্তেসুং. অথ রাজা পসেনদি কোসলো ভগৰন্তং উপসঙ্কমিত্ৰা ‘‘কস্মা, ভন্তে, ভিক্খূ মাসমত্তং মম ঘরং নাগমিংসূ’’তি পুচ্ছি. সত্থারা তস্মিং কারণে কথিতে রাজাপি সেট্ঠিং অনুৰত্তন্তো বুদ্ধপ্পমুখস্স ভিক্খুসঙ্ঘস্স মহাদানং পৰত্তেসি, তং দিস্ৰা নাগরা রাজানং অনুৰত্তন্তা মাসমত্তং মহাদানং পৰত্তেসুং. এৰং মাসদ্ৰযং পিট্ঠধীতলিকমূলকং মহাদানং পৰত্তেসুন্তি.

পিট্ঠধীতলিকপেতৰত্থুৰণ্ণনা নিট্ঠিতা.