২. সূকরমুখপেতৰত্থুৰণ্ণনা

কাযো তে সব্বসোৰণ্ণোতি ইদং সত্থরি রাজগহং উপনিস্সায ৰেল়ুৰনে কলন্দকনিৰাপে ৰিহরন্তে অঞ্ঞতরং সূকরমুখপেতং আরব্ভ ৰুত্তং. অতীতে কির কস্সপস্স ভগৰতো সাসনে একো ভিক্খু কাযেন সঞ্ঞতো অহোসি, ৰাচায অসঞ্ঞতো, ভিক্খূ অক্কোসতি পরিভাসতি. সো কালং কত্ৰা নিরযে নিব্বত্তো, একং বুদ্ধন্তরং তত্থ পচ্চিত্ৰা ততো চৰিত্ৰা ইমস্মিং বুদ্ধুপ্পাদে রাজগহসমীপে গিজ্ঝকূটপব্বতপাদে তস্সেৰ কম্মস্স ৰিপাকাৰসেসেন খুপ্পিপাসাভিভূতো পেতো হুত্ৰা নিব্বত্তি. তস্স কাযো সুৰণ্ণৰণ্ণো অহোসি, মুখং সূকরমুখসদিসং. অথাযস্মা নারদো গিজ্ঝকূটে পব্বতে ৰসন্তো পাতোৰ সরীরপটিজগ্গনং কত্ৰা পত্তচীৰরমাদায রাজগহং পিণ্ডায গচ্ছন্তো অন্তরামগ্গে তং পেতং দিস্ৰা তেন কতকম্মং পুচ্ছন্তো –

৪. ‘‘কাযো তে সব্বসোৰণ্ণো, সব্বা ওভাসতে দিসা;

মুখং তে সূকরস্সেৰ, কিং কম্মমকরী পুরে’’তি. –

গাথমাহ. তত্থ কাযো তে সব্বসোৰণ্ণোতি তৰ কাযো দেহো সব্বো সুৰণ্ণৰণ্ণো উত্তত্তকনকসন্নিভো. সব্বা ওভাসতে দিসাতি তস্স পভায সব্বাপি দিসা সমন্তন্তো ওভাসতি ৰিজ্জোততি. ওভাসতেতি ৰা অন্তোগধহোতুঅত্থমিদং পদন্তি ‘‘তে কাযো সব্বসোৰণ্ণো সব্বা দিসা ওভাসেতি ৰিজ্জোতেতী’’তি অত্থো দট্ঠব্বো. মুখং তে সূকরস্সেৰাতি মুখং পন তে সূকরস্স ৰিয, সূকরমুখসদিসং তৰ মুখন্তি অত্থো. কিং কম্মমকরী পুরেতি ‘‘ত্ৰং পুব্বে অতীতজাতিযং কীদিসং কম্মং অকাসী’’তি পুচ্ছতি.

এৰং থেরেন সো পেতো কতকম্মং পুট্ঠো গাথায ৰিস্সজ্জেন্তো –

৫. ‘‘কাযেন সঞ্ঞতো আসিং, ৰাচাযাসিমসঞ্ঞতো;

তেন মেতাদিসো ৰণ্ণো, যথা পস্সসি নারদা’’তি. –

আহ. তত্থ কাযেন সঞ্ঞতো আসিন্তি কাযিকেন সংযমেন সংযতো কাযদ্ৰারিকেন সংৰরেন সংৰুতো অহোসিং. ৰাচাযাসিমসঞ্ঞতোতি ৰাচায অসঞ্ঞতো ৰাচসিকেন অসংৰরেন সমন্নাগতো অহোসিং. তেনাতি তেন উভযেন সংযমেন অসংযমেন চ. মেতি ময্হং. এতাদিসো ৰণ্ণোতি এদিসো. যথা ত্ৰং, নারদ, পচ্চক্খতো পস্সসি, এৰরূপো, কাযেন মনুস্সসণ্ঠানো সুৰণ্ণৰণ্ণো, মুখেন সূকরসদিসো আসিন্তি যোজনা. ৰণ্ণসদ্দো হি ইধ ছৰিযং সণ্ঠানে চ দট্ঠব্বো.

এৰং পেতো থেরেন পুচ্ছিতো তমত্থং ৰিস্সজ্জেত্ৰা তমেৰ কারণং কত্ৰা থেরস্স ওৰাদং দেন্তো –

৬. ‘‘তং ত্যাহং নারদ ব্রূমি, সামং দিট্ঠমিদং তযা;

মাকাসি মুখসা পাপং, মা খো সূকরমুখো অহূ’’তি. –

গাথমাহ. তত্থ তন্তি তস্মা. ত্যাহন্তি তে অহং. নারদাতি থেরং আলপতি. ব্রূমীতি কথেমি. সামন্তি সযমেৰ. ইদন্তি অত্তনো সরীরং সন্ধায ৰদতি. অযঞ্হেত্থ অত্থো – যস্মা, ভন্তে নারদ, ইদং মম সরীরং গলতো পট্ঠায হেট্ঠা মনুস্সসণ্ঠানং, উপরি সূকরসণ্ঠানং, তযা পচ্চক্খতোৰ দিট্ঠং, তস্মা তে অহং ওৰাদৰসেন ৰদামীতি. কিন্তি চেতি আহ ‘‘মাকাসি মুখসা পাপং, মা খো সূকরমুখো অহূ’’তি. তত্থ মাতি পটিসেধে নিপাতো. মুখসাতি মুখেন. খোতি অৰধারণে, ৰাচায পাপকম্মং মাকাসি মা করোহি. মা খো সূকরমুখো অহূতি অহং ৰিয সূকরমুখো মা অহোসিযেৰ. সচে পন ত্ৰং মুখরো হুত্ৰা ৰাচায পাপং করেয্যাসি, একংসেন সূকরমুখো ভৰেয্যাসি, তস্মা মাকাসি মুখসা পাপন্তি ফলপটিসেধনমুখেনপি হেতুমেৰ পটিসেধেতি.

অথাযস্মা নারদো রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো চতুপরিসমজ্ঝে নিসিন্নস্স সত্থুনো তমত্থং আরোচেসি. সত্থা, ‘‘নারদ, পুব্বেৰ মযা সো সত্থো দিট্ঠো’’তি ৰত্ৰা অনেকাকারৰোকারং ৰচীদুচ্চরিতসন্নিস্সিতং আদীনৰং, ৰচীসুচরিতপটিসংযুত্তঞ্চ আনিসংসং পকাসেন্তো ধম্মং দেসেসি. সা দেসনা সম্পত্তপরিসায সাত্থিকা অহোসীতি.

সূকরমুখপেতৰত্থুৰণ্ণনা নিট্ঠিতা.