৪. ৰিৰেককথা

ৰিৰেককথাৰণ্ণনা

২২. ইদানি পহানাৰসানায অভিসমযকথায অনন্তরং পহানাকারং দস্সেন্তেন কথিতায সুত্তন্তপুব্বঙ্গমায ৰিৰেককথায অপুব্বত্থানুৰণ্ণনা. তত্থ সুত্তন্তে তাৰ যে কেচীতি অনৰসেসপরিযাদানং. বলকরণীযাতি ঊরুবলেন বাহুবলেন কত্তব্বা. কম্মন্তাতি ধাৰনলঙ্ঘনকসনৰপনাদীনি কম্মানি. করীযন্তীতি বলৰন্তেহি করীযন্তি. সীলং নিস্সাযাতি চতুপারিসুদ্ধিসীলং নিস্সযং কত্ৰা. ভাৰেতীতি ভিন্নসীলস্স ভাৰনাভাৰতো ইধ পন লোকিযলোকুত্তরা মগ্গভাৰনা অধিপ্পেতাতি. ৰিৰেকনিস্সিতন্তি তদঙ্গৰিৰেকং সমুচ্ছেদৰিৰেকং নিস্সরণৰিৰেকং নিস্সিতং. ৰিৰেকোতি ৰিৰিত্ততা. অযঞ্হি অরিযমগ্গভাৰনানুযুত্তো যোগী ৰিপস্সনাক্খণে কিচ্চতো তদঙ্গৰিৰেকনিস্সিতং, অজ্ঝাসযতো নিস্সরণৰিৰেকনিস্সিতং, মগ্গক্খণে কিচ্চতো সমুচ্ছেদৰিৰেকনিস্সিতং, আরম্মণতো নিস্সরণৰিৰেকনিস্সিতং ভাৰেতি. এস নযো ৰিরাগনিস্সিতাদীসু. ৰিৰেকোযেৰ হি ৰিরজ্জনট্ঠেন ৰিরাগো, নিরোধট্ঠেন নিরোধো, ৰোসজ্জনট্ঠেন ৰোসগ্গো. অথ ৰা কিলেসেহি ৰিৰিত্তত্তা ৰিৰেকো, কিলেসেহি ৰিরত্তত্তা ৰিরাগো, কিলেসানং নিরুদ্ধত্তা নিরোধো, কিলেসানঞ্চ পরিচ্চত্তত্তা ৰিস্সট্ঠত্তা, নিব্বানেচত্তস্স চ ৰিস্সট্ঠত্তা ৰোসগ্গো. ৰোসগ্গো পন দুৰিধো পরিচ্চাগৰোসগ্গো চ পক্খন্দনৰোসগ্গো চ. তত্থ পরিচ্চাগৰোসগ্গোতি ৰিপস্সনাক্খণে তদঙ্গৰসেন, মগ্গক্খণে সমুচ্ছেদৰসেন কিলেসপ্পহানং. পক্খন্দনৰোসগ্গোতি ৰিপস্সনাক্খণে তন্নিন্নভাৰেন, মগ্গক্খণে আরম্মণকরণেন নিব্বানপক্খন্দনং. তদুভযম্পি ইমস্মিং লোকিযলোকুত্তরমিস্সকে অত্থৰণ্ণনানযে ৰট্টতি. তথা হি অযং সম্মাদিট্ঠিআদীসু একেকো ধম্মো যথাৰুত্তেন পকারেন কিলেসে চ পরিচ্চজতি, নিব্বানঞ্চ পক্খন্দতি. ৰোসগ্গপরিণামিন্তি ইমিনা পন সকলেন ৰচনেন ৰোসগ্গত্থং পরিণামিতং পরিণতং, পরিপচ্চিতং পরিপক্কঞ্চাতি ৰুত্তং হোতি. অযম্পি অরিযমগ্গভাৰনানুযুত্তো ভিক্খু যথা সম্মাদিট্ঠিআদীসু একেকো ধম্মো কিলেসপরিচ্চাগৰোসগ্গত্থঞ্চ নিব্বানপক্খন্দনৰোসগ্গত্থঞ্চ পরিপচ্চতি, যথা চ পরিপক্কো হোতি, তথা নং ভাৰেতি.

২৩. বীজগামভূতগামাতি এত্থ মূলবীজং খন্ধবীজং অগ্গবীজং ফল়ুবীজং বীজবীজন্তি (পাচি. ৯১) পঞ্চৰিধং বীজং, বীজগামো নাম বীজসমূহোতি অত্থো. তদেৰ পন সম্পন্ননীলঙ্কুরপাতুভাৰতো পট্ঠায ভূতগামো নাম, ভূতানং জাতানং নিব্বত্তমূলনীলঙ্কুরানং সমূহোতি অত্থো. দেৰতাপরিগ্গহে সতি নীলঙ্কুরকালতো পভুতি হোতীতি তেসং দেৰতাসঙ্খাতানং ভূতানং গামোতিপি ভূতগামোতি ৰদন্তি. ৰুদ্ধিন্তি অঙ্কুরাদিৰসেন. ৰিরুল়্হিন্তি খন্ধাদিৰসেন. ৰেপুল্লন্তি পুপ্ফাদিৰসেন. ধম্মেসু পন ৰুদ্ধিন্তি অপুব্বধম্মপ্পৰত্তিৰসেন. ৰিরুল়িন্তি সকিচ্চকরণসাধনৰসেন. ৰেপুল্লন্তি কিচ্চনিপ্ফত্তিৰসেন ৰিপুলভাৰন্তি অত্থো. ৰিপুলত্তন্তিপি পাঠো. অথ ৰা এতানি তীণি পদানি সীলসমাধিপঞ্ঞাহিপি যোজেন্তি.

মগ্গঙ্গনিদ্দেসৰণ্ণনা

২৪. সুত্তন্তনিদ্দেসে সম্মাদিট্ঠিযাতি সামিৰচনং. ঝানৰিপস্সনামগ্গফলনিব্বানেসু লোকিযৰিরতিসম্পযুত্তচিত্তে চ যথাযোগং সম্পযোগতো চ আরম্মণতো চ ৰত্তমানায সম্মাদিট্ঠিযা সামঞ্ঞলক্খণতো একীভূতায সম্মাদিট্ঠিযা. ৰিক্খম্ভনৰিৰেকোতি ৰিক্খম্ভনৰসেন দূরীকরণৰসেন ৰিৰেকো. কেসং? নীৰরণানং. তস্স পঠমং ঝানং ভাৰযতোতিআদি ৰিক্খম্ভনৰসেন পঠমজ্ঝানমেৰ ৰুত্তং. তস্মিং ৰুত্তে সেসজ্ঝানানিপি ৰুত্তানেৰ হোন্তি. ঝানেসুপি সম্মাদিট্ঠিযা ৰিজ্জমানত্তা সম্মাদিট্ঠিযা ৰিৰেকো নাম হোতি. তদঙ্গৰিৰেকোতি তেন তেন ৰিপস্সনাঞাণঙ্গেন ৰিৰেকো. দিট্ঠিগতানন্তি দিট্ঠিৰিৰেকস্স দুক্করত্তা পধানত্তা চ দিট্ঠিৰিৰেকোৰ ৰুত্তো. তস্মিং ৰুত্তে নিচ্চসঞ্ঞাদিৰিৰেকোপি ৰুত্তোৰ হোতি. নিব্বেধভাগিযং সমাধিন্তি ৰিপস্সনাসম্পযুত্তসমাধিং. সমুচ্ছেদৰিৰেকোতি কিলেসানং সমুচ্ছেদেন ৰিৰেকো. লোকুত্তরং খযগামিমগ্গন্তি খযসঙ্খাতনিব্বানগামিলোকুত্তরমগ্গং. পটিপ্পস্সদ্ধিৰিৰেকোতি কিলেসানং পটিপ্পস্সদ্ধিযা ৰিৰেকো. নিস্সরণৰিৰেকোতি সব্বসঙ্খতনিস্সরণভূতো সঙ্খারৰিৰেকো. ছন্দজাতো হোতীতি পুব্বভাগে জাতধম্মছন্দো হোতি. সদ্ধাধিমুত্তোতি পুব্বভাগেযেৰ সদ্ধায অধিমুত্তো হোতি. চিত্তঞ্চস্স স্ৰাধিট্ঠিতন্তি পুব্বভাগেযেৰ চিত্তঞ্চ অস্স যোগিস্স সুঅধিট্ঠিতং সুট্ঠু পতিট্ঠিতং হোতি. ইতি ছন্দো সদ্ধা চিত্তন্তি ইমে তযো ধম্মা পুব্বভাগে উপ্পন্নৰিৰেকানং উপনিস্সযত্তা নিস্সযা নাম. কেচি পন ‘‘চিত্তঞ্চস্স স্ৰাধিট্ঠিতন্তি সমাধি ৰুত্তো’’তি ৰদন্তি. ৰিরাগাদীসুপি এসেৰ নযো.

নিরোধৰারে পন নিরোধসদ্দতো অঞ্ঞং পরিযাযৰচনং দস্সেন্তেন অমতা ধাতূতি ৰুত্তং, সেসেসু নিরোধো নিব্বানন্তি উভযত্থাপি নিব্বানমেৰ. দ্ৰাদস নিস্সযাতি ছন্দসদ্ধাচিত্তানিযেৰ ৰিৰেকাদীসু চতূসু একেকস্মিং তযো তযো কত্ৰা দ্ৰাদস নিস্সযা হোন্তি.

২৫. সম্মাসঙ্কপ্পৰাযামসতিসমাধীনম্পি ইমিনাৰ নযেন অত্থযোজনা ৰেদিতব্বা. সম্মাৰাচাকম্মন্তা জীৰানং পন ঝানক্খণে ৰিপস্সনাক্খণে চ অভাৰা ঝানৰিপস্সনানং পুব্বভাগপরভাগৰসেন ৰত্তমানা ৰিরতিযো ঝানৰিপস্সনা সন্নিস্সিতা কত্ৰা ৰুত্তাতি ৰেদিতব্বং. নীৰরণানং দিট্ঠিগতানঞ্চ ৰিৰেকৰিরাগনিরোধপটিনিস্সগ্গা তথা পৰত্তমানানং ৰিরতীনং ৰিৰেকাদযো নামাতি ৰেদিতব্বং. যথা অট্ঠকনিপাতে ‘‘ততো, ত্ৰং ভিক্খু, ইমং সমাধিং সৰিতক্কং সৰিচারম্পি ভাৰেয্যাসি, অৰিতক্কৰিচারমত্তম্পি ভাৰেয্যাসি, অৰিতক্কং অৰিচারম্পি ভাৰেয্যাসি, সপ্পীতিকম্পি ভাৰেয্যাসি, নিপ্পীতিকম্পি ভাৰেয্যাসি, সাতসহগতম্পি ভাৰেয্যাসি, উপেক্খাসহগতম্পি ভাৰেয্যাসী’’তি (অ. নি. ৮.৬৩) মেত্তাদযো কাযানুপস্সনাদযো চ নিযকজ্ঝত্তমূলসমাধিৰসেন চতুক্কপঞ্চকজ্ঝানিকা ৰিয ৰুত্তা, এৰমিধাপি পুব্বভাগপরভাগৰসেন ৰিরতিযো ৰুত্তাতি ৰেদিতব্বং. ব্যঞ্জনচ্ছাযমত্তং গহেত্ৰা ন ভগৰা অব্ভাচিক্খিতব্বো. গম্ভীরঞ্হি বুদ্ধৰচনং, আচরিযে পযিরুপাসিত্ৰা অধিপ্পাযতো গহেতব্বং.

২৬-২৭. বোজ্ঝঙ্গবলইন্দ্রিযৰারেসুপি ইমিনাৰ নযেন অত্থো ৰেদিতব্বোতি.

ৰিৰেককথাৰণ্ণনা নিট্ঠিতা.