৮. ৰিপল্লাসকথা

ৰিপল্লাসকথাৰণ্ণনা

২৩৬. ইদানি তস্স কম্মস্স পচ্চযভূতে ৰিপল্লাসে দস্সেন্তেন কথিতায সুত্তন্তপুব্বঙ্গমায ৰিপল্লাসকথায অপুব্বত্থানুৰণ্ণনা. সুত্তন্তে তাৰ সঞ্ঞাৰিপল্লাসাতি সঞ্ঞায ৰিপল্লত্থভাৰা ৰিপরীতভাৰা, ৰিপরীতসঞ্ঞাতি অত্থো. সেসদ্ৰযেসুপি এসেৰ নযো. চিত্তকিচ্চস্স দুব্বলট্ঠানে দিট্ঠিৰিরহিতায অকুসলসঞ্ঞায সককিচ্চস্স বলৰকালে সঞ্ঞাৰিপল্লাসো. দিট্ঠিৰিরহিতস্সেৰ অকুসলচিত্তস্স সককিচ্চস্স বলৰকালে চিত্তৰিপল্লাসো. দিট্ঠিসম্পযুত্তে চিত্তে দিট্ঠিৰিপল্লাসো. তস্মা সব্বদুব্বলো সঞ্ঞাৰিপল্লাসো, ততো বলৰতরো চিত্তৰিপল্লাসো, সব্ববলৰতরো দিট্ঠিৰিপল্লাসো. অজাতবুদ্ধিদারকস্স কহাপণদস্সনং ৰিয হি সঞ্ঞা আরম্মণস্স উপট্ঠানাকারমত্তগ্গহণতো. গামিকপুরিসস্স কহাপণদস্সনং ৰিয চিত্তং লক্খণপটিৰেধস্সাপি সম্পাপনতো. কম্মারস্স মহাসণ্ডাসেন অযোগহণং ৰিয দিট্ঠি অভিনিৰিস্স পরামসনতো. অনিচ্চে নিচ্চন্তি সঞ্ঞাৰিপল্লাসোতি অনিচ্চে ৰত্থুস্মিং ‘‘নিচ্চং ইদ’’ন্তি এৰং গহেত্ৰা উপ্পজ্জনকসঞ্ঞা সঞ্ঞাৰিপল্লাসো. ইমিনা নযেন সব্বপদেসু অত্থো ৰেদিতব্বো. ন সঞ্ঞাৰিপল্লাসো ন চিত্তৰিপল্লাসো ন দিট্ঠিৰিপল্লাসোতি চতূসু ৰত্থূসু দ্ৰাদসন্নং ৰিপল্লাসগ্গাহানং অভাৰা যাথাৰগ্গহণং ৰুত্তং.

গাথাসু অনত্তনি চ অত্তাতি অনত্তনি অত্তাতি এৰংসঞ্ঞিনোতি অত্থো. মিচ্ছাদিট্ঠিহতাতি ন কেৰলং সঞ্ঞিনোৰ, সঞ্ঞায ৰিয উপ্পজ্জমানায মিচ্ছাদিট্ঠিযাপি হতা. খিত্তচিত্তাতি সঞ্ঞাদিট্ঠীহি ৰিয উপ্পজ্জমানেন খিত্তেন ৰিব্ভন্তেন চিত্তেন সমন্নাগতা. ৰিসঞ্ঞিনোতি দেসনামত্তমেতং, ৰিপরীতসঞ্ঞাচিত্তদিট্ঠিনোতি অত্থো. অথ ৰা সঞ্ঞাপুব্বঙ্গমত্তা দিট্ঠিযা পঠমং চতূহি পদেহি সঞ্ঞাৰিপল্লাসো ৰুত্তো, ততো মিচ্ছাদিট্ঠিহতাতি দিট্ঠিৰিপল্লাসো, খিত্তচিত্তাতি চিত্তৰিপল্লাসো. ৰিসঞ্ঞিনোতি তীহি ৰিপল্লাসগ্গাহেহি পকতিসঞ্ঞাৰিরহিতা মোহং গতা ‘‘মুচ্ছিতো ৰিসৰেগেন, ৰিসঞ্ঞী সমপজ্জথা’’তিএত্থ (জা. ২.২২.৩২৮) ৰিয. তে যোগযুত্তা মারস্সাতি তে জনা সত্তা মারস্স যোগে যুত্তা নাম হোন্তি. অযোগক্খেমিনোতি চতূহি যোগেহি ঈতীহি খেমং নিব্বানং অপ্পত্তা. সত্তা গচ্ছন্তি সংসারন্তি তেযেৰ পুগ্গলা সংসারং সংসরন্তি. কস্মা? জাতিমরণগামিনো হি তে, তস্মা সংসরন্তীতি অত্থো. বুদ্ধাতি চতুসচ্চবুদ্ধা সব্বঞ্ঞুনো. কালত্তযসাধারণৰসেন বহুৰচনং. লোকস্মিন্তি ওকাসলোকে. পভঙ্করাতি লোকস্স পঞ্ঞালোকং করা. ইমং ধম্মং পকাসেন্তীতি ৰিপল্লাসপ্পহানং ধম্মং জোতেন্তি. দুক্খূপসমগামিনন্তি দুক্খৰূপসমং নিব্বানং গচ্ছন্তং. তেসং সুত্ৰানাতি তেসং বুদ্ধানং ধম্মং সুত্ৰান. সপ্পঞ্ঞাতি ভব্বভূতা পঞ্ঞৰন্তো. সচিত্তং পচ্চলদ্ধূতি ৰিপল্লাসৰজ্জিতং সকচিত্তং পটিলভিত্ৰা. পটিঅলদ্ধূতি পদচ্ছেদো. অথ ৰা পটিলভিংসু পটিঅলদ্ধুন্তি পদচ্ছেদো. অনিচ্চতো দক্খুন্তি অনিচ্চৰসেনেৰ অদ্দসংসু. অনত্তনি অনত্তাতি অনত্তানং অনত্তাতি অদ্দক্খুং. অথ ৰা অনত্তনি ৰত্থুস্মিং অত্তা নত্থীতি অদ্দক্খুং. সম্মাদিট্ঠিসমাদানাতি গহিতসম্মাদস্সনা. সব্বং দুক্খং উপচ্চগুন্তি সকলং ৰট্টদুক্খং সমতিক্কন্তা.

পহীনাপহীনপুচ্ছায দিট্ঠিসম্পন্নস্সাতি সোতাপন্নস্স. দুক্খে সুখন্তি সঞ্ঞা উপ্পজ্জতি. চিত্তং উপ্পজ্জতীতি মোহকালুস্সিযস্স অপ্পহীনত্তা সঞ্ঞামত্তং ৰা চিত্তমত্তং ৰা উপ্পজ্জতি, অনাগামিস্সপি উপ্পজ্জতি, কিং পন সোতাপন্নস্স. ইমে দ্ৰে অরহতোযেৰ পহীনা. অসুভে সুভন্তি সঞ্ঞা উপ্পজ্জতি. চিত্তং উপ্পজ্জতীতি সকদাগামিস্সপি উপ্পজ্জতি, কিং পন সোতাপন্নস্স. ইমে দ্ৰে অনাগামিস্স পহীনাতি অট্ঠকথাযং ৰুত্তং. তস্মা ইদং দ্ৰযং সোতাপন্নসকদাগামিনো সন্ধায ৰুত্তন্তি ৰেদিতব্বং. অনাগামিনো কামরাগস্স পহীনত্তা ‘‘অসুভে সুভ’’ন্তি সঞ্ঞাচিত্তৰিপল্লাসানঞ্চ পহানং ৰুত্তন্তি ৰেদিতব্বং. দ্ৰীসু ৰত্থূসূতিআদীহি পদেহি পহীনাপহীনে নিগমেত্ৰা দস্সেতি. তত্থ ‘‘অনিচ্চে নিচ্চ’’ন্তি, ‘‘অনত্তনি অত্তা’’তি ইমেসু দ্ৰীসু ৰত্থূসু ছ ৰিপল্লাসা পহীনা. ‘‘দুক্খে সুখ’’ন্তি, ‘‘অসুভে সুভ’’ন্তি ইমেসু দ্ৰীসু ৰত্থূসু দ্ৰে দিট্ঠিৰিপল্লাসা পহীনা. কেসুচি পোত্থকেসু দ্ৰেতি পঠমং লিখিতং, পচ্ছা ছাতি. চতূসু ৰত্থূসূতি চত্তারি একতো কত্ৰা ৰুত্তং. অট্ঠাতি দ্ৰীসু ছ, দ্ৰীসু দ্ৰেতি অট্ঠ. চত্তারোতি দুক্খাসুভৰত্থূসু একেকস্মিং দ্ৰে দ্ৰে সঞ্ঞাচিত্তৰিপল্লাসাতি চত্তারো. কেসুচি পোত্থকেসু ‘‘ছ দ্ৰীসূ’’তি ৰুত্তট্ঠানেসুপি এৰমেৰ লিখিতন্তি.

ৰিপল্লাসকথাৰণ্ণনা নিট্ঠিতা.