৭. ভঙ্গানুপস্সনাঞাণনিদ্দেসৰণ্ণনা

৫১. সো উদযব্বযানুপস্সনাযং ঠিতো যোগাৰচরো মগ্গামগ্গৰৰত্থাপনেন উপক্কিলেসৰিমুত্তং ৰীথিপটিপন্নং উদযব্বযানুপস্সনাঞাণং ‘‘মগ্গো’’তি ঞত্ৰা তিলক্খণসল্লক্খণেন তস্সেৰ মগ্গস্স সুৰিসদকরণত্থং পুন উদযব্বযানুপস্সনং আরভিত্ৰা উদযব্বযেন পরিচ্ছিন্নে সঙ্খারে অনিচ্চাদিতো ৰিপস্সতি. এৰং তস্স তং ঞাণং তিক্খং হুত্ৰা ৰহতি, সঙ্খারা লহুং উপট্ঠহন্তি, ঞাণে তিক্খে ৰহন্তে সঙ্খারেসু লহুং উপট্ঠহন্তেসু উপ্পাদং অতিক্কমিত্ৰা ভঙ্গে এৰ সতি সন্তিট্ঠতি. নিরোধাধিমুত্তত্তা ৰা উদযং পহায ভঙ্গেযেৰ সতিং উপট্ঠপেতি. এতস্মিং ঠানে ভঙ্গানুপস্সনাঞাণং উপ্পজ্জতি. ইদানি তস্স ঞাণস্স নিদ্দেসে রূপারম্মণতা চিত্তং উপ্পজ্জিত্ৰা ভিজ্জতীতি রূপারম্মণং চিত্তং উপ্পজ্জিত্ৰা ভিজ্জতি. অথ ৰা রূপারম্মণভাৰে চিত্তং উপ্পজ্জিত্ৰা ভিজ্জতীতি অত্থো. তং আরম্মণং পটিসঙ্খাতি তং রূপারম্মণং পটিসঙ্খায জানিত্ৰা, খযতো ৰযতো দিস্ৰাতি অত্থো. তস্স চিত্তস্স ভঙ্গং অনুপস্সতীতি যেন চিত্তেন তং রূপারম্মণং খযতো ৰযতো দিট্ঠং, তস্স চিত্তস্স অপরেন চিত্তেন ভঙ্গং অনুপস্সতীতি অত্থো. তেনাহু পোরাণা – ‘‘ঞাতঞ্চ ঞাণঞ্চ উভো ৰিপস্সতী’’তি. চিত্তন্তি চেত্থ সসম্পযুত্তচিত্তং অধিপ্পেতং.

অনুপস্সতীতি অনু অনু পস্সতি, অনেকেহি আকারেহি পুনপ্পুনং পস্সতীতি অত্থো. তেনাহ অনুপস্সতীতি কথং অনুপস্সতি, অনিচ্চতো অনুপস্সতীতিআদি. তত্থ যস্মা ভঙ্গো নাম অনিচ্চতায পরমা কোটি, তস্মা ভঙ্গানুপস্সকো যোগাৰচরো সব্বং রূপগতং অনিচ্চতো অনুপস্সতি, নো নিচ্চতো. ততো অনিচ্চস্স দুক্খত্তা, দুক্খস্স চ অনত্তত্তা, তদেৰ দুক্খতো অনুপস্সতি, নো সুখতো. অনত্ততো অনুপস্সতি, নো অত্ততো. যস্মা পন যং অনিচ্চং দুক্খমনত্তা, ন তং অভিনন্দিতব্বং. যঞ্চ ন অভিনন্দিতব্বং, ন তত্থ রজ্জিতব্বং. তস্মা এস তস্মিং ভঙ্গানুপস্সনানুসারেন ‘‘অনিচ্চং দুক্খমনত্তা’’তি দিট্ঠে রূপগতে নিব্বিন্দতি, নো নন্দতি. ৰিরজ্জতি, নো রজ্জতি. সো এৰং ৰিরজ্জন্তো লোকিকেনেৰ তাৰ ঞাণেন রাগং নিরোধেতি, নো সমুদেতি, সমুদযং ন করোতীতি অত্থো. অথ ৰা সো এৰং ৰিরত্তো যথা দিট্ঠং রূপগতং, তথা অদিট্ঠম্পি অন্ৰযঞাণৰসেন নিরোধেতি, নো সমুদেতি. নিরোধতোৰ মনসি করোতি, নিরোধমেৰস্স পস্সতি, নো সমুদযন্তি অত্থো. সো এৰং পটিপন্নো পটিনিস্সজ্জতি, নো আদিযতি. কিং ৰুত্তং হোতি? অযম্পি হি অনিচ্চাদিঅনুপস্সনা তদঙ্গৰসেন সদ্ধিং খন্ধাভিসঙ্খারেহি কিলেসানং পরিচ্চজনতো, সঙ্খতদোসদস্সনেন চ তব্বিপরীতে নিব্বানে তন্নিন্নতায পক্খন্দনতো পরিচ্চাগপটিনিস্সগ্গো চেৰ পক্খন্দনপটিনিস্সগ্গো চাতি ৰুচ্চতি. তস্মা তায সমন্নাগতো ভিক্খু যথাৰুত্তেন নযেন কিলেসে চ পরিচ্চজতি, নিব্বানে চ পক্খন্দতি. নাপি নিব্বত্তনৰসেন কিলেসে আদিযতি, ন অদোসদস্সিতাৰসেন সঙ্খতারম্মণং. তেন ৰুচ্চতি পটিনিস্সজ্জতি, নো আদিযতীতি.

৫২. ইদানিস্স তেহি ঞাণেহি যেসং ধম্মানং পহানং হোতি, তং দস্সেতুং অনিচ্চতো অনুপস্সন্তো নিচ্চসঞ্ঞং পজহতীতিআদি ৰুত্তং. তত্থ নন্দিন্তি সপ্পীতিকং তণ্হং. রাগন্তি সেসং তণ্হং. সমুদযন্তি রাগস্স উপ্পত্তিং. অথ ৰা রূপগতস্স উদযং. আদানন্তি নিব্বত্তনৰসেন কিলেসানং আদানং. ৰেদনারম্মণতাতিআদীনি ইধ চ হেট্ঠা চ ৰুত্তনযেনেৰ ৰেদিতব্বানি.

গাথাসু পন ৰত্থুসঙ্কমনাতি রূপাদীসু একেকস্স ভঙ্গং দিস্ৰা পুন যেন চিত্তেন ভঙ্গো দিট্ঠো, তস্সাপি ভঙ্গদস্সনৰসেন পুরিমৰত্থুতো অঞ্ঞৰত্থুসঙ্কমনা. পঞ্ঞায চ ৰিৰট্টনাতি উদযং পহায ৰযে সন্তিট্ঠনা. আৰজ্জনা বলঞ্চেৰাতি রূপাদীসু একেকস্স ভঙ্গং দিস্ৰা পুন ভঙ্গারম্মণস্স চিত্তস্স ভঙ্গদস্সনত্থং অনন্তরমেৰ আৰজ্জনসমত্থতা. পটিসঙ্খা ৰিপস্সনাতি এসা আরম্মণপটিসঙ্খা ভঙ্গানুপস্সনা নাম. আরম্মণঅন্ৰযেন উভো একৰৰত্থনাতি পচ্চক্খতো দিট্ঠস্স আরম্মণস্স অন্ৰযেন অনুগমনেন যথা ইদং, তথা অতীতেপি সঙ্খারগতং ভিজ্জি, অনাগতেপি ভিজ্জিস্সতীতি এৰং উভিন্নং একসভাৰেনেৰ ৰৰত্থাপনন্তি অত্থো. ৰুত্তম্পি চেতং পোরাণেহি –

‘‘সংৰিজ্জমানম্হি ৰিসুদ্ধদস্সনো, তদন্ৰযং নেতি অতীতনাগতে;

সব্বেপি সঙ্খারগতা পলোকিনো, উস্সাৰবিন্দূ সূরিযেৰ উগ্গতে’’তি.

নিরোধে অধিমুত্ততাতি এৰং উভিন্নং ভঙ্গৰসেন একৰৰত্থানং কত্ৰা তস্মিংযেৰ ভঙ্গসঙ্খাতে নিরোধে অধিমুত্ততা তগ্গরুতা তন্নিন্নতা তপ্পোণতা তপ্পব্ভারতাতি অত্থো. ৰযলক্খণৰিপস্সনাতি এসা ৰযলক্খণৰিপস্সনা নামাতি ৰুত্তং হোতি. আরম্মণঞ্চ পটিসঙ্খাতি পুরিমঞ্চ রূপাদিআরম্মণং জানিত্ৰা. ভঙ্গঞ্চ অনুপস্সতীতি তস্সারম্মণস্স ভঙ্গং দিস্ৰা তদারম্মণস্স চিত্তস্স চ ভঙ্গং অনুপস্সতি. সুঞ্ঞতো চ উপট্ঠানন্তি তস্সেৰং ভঙ্গমনুপস্সতো ‘‘সঙ্খারাৰ ভিজ্জন্তি, তেসং ভেদো মরণং, ন অঞ্ঞো কোচি অত্থী’’তি সুঞ্ঞতো উপট্ঠানং ইজ্ঝতি. তেনাহু পোরাণা –

‘‘খন্ধা নিরুজ্ঝন্তি ন চত্থি অঞ্ঞো, খন্ধান ভেদো মরণন্তি ৰুচ্চতি;

তেসং খযং পস্সতি অপ্পমত্তো, মণিংৰ ৰিজ্ঝং ৰজিরেন যোনিসো’’তি.

অধিপঞ্ঞা ৰিপস্সনাতি যা চ আরম্মণপটিসঙ্খা, যা চ ভঙ্গানুপস্সনা, যঞ্চ সুঞ্ঞতো উপট্ঠানং, অযং অধিপঞ্ঞা ৰিপস্সনা নামাতি ৰুত্তং হোতি. কুসলো তীসু অনুপস্সনাসূতি অনিচ্চানুপস্সনাদীসু তীসু ছেকো ভিক্খু. চতস্সো চ ৰিপস্সনাসূতি নিব্বিদাদীসু চ চতূসু ৰিপস্সনাসু. তযো উপট্ঠানে কুসলতাতি খযতো ৰযতো সুঞ্ঞতোতি ইমস্মিঞ্চ তিৰিধে উপট্ঠানে কুসলতায. নানাদিট্ঠীসু ন কম্পতীতি সস্সতদিট্ঠিআদীসু নানপ্পকারাসু দিট্ঠীসু ন ৰেধতি. সো এৰং অৰেধমানো ‘‘অনিরুদ্ধমেৰ নিরুজ্ঝতি, অভিন্নমেৰ ভিজ্জতী’’তি পৰত্তমনসিকারো দুব্বলভাজনস্স ৰিয ভিজ্জমানস্স, সুখুমরজস্সেৰ ৰিপ্পকিরিযমানস্স, তিলানং ৰিয ভজ্জিযমানানং সব্বসঙ্খারানং উপ্পাদট্ঠিতিপৰত্তনিমিত্তং ৰিস্সজ্জেত্ৰা ভেদমেৰ পস্সতি. সো যথা নাম চক্খুমা পুরিসো পোক্খরণীতীরে ৰা নদীতীরে ৰা ঠিতো থূলফুসিতকে দেৰে ৰস্সন্তে উদকপিট্ঠে মহন্তমহন্তানি উদকপুব্বুল়ানি উপ্পজ্জিত্ৰা উপ্পজ্জিত্ৰা সীঘং সীঘং ভিজ্জমানানি পস্সেয্য, এৰমেৰ সব্বে সঙ্খারা ভিজ্জন্তি ভিজ্জন্তীতি পস্সতি. এৰরূপঞ্হি যোগাৰচরং সন্ধায ৰুত্তং ভগৰতা –

‘‘যথা পুব্বুল়কং পস্সে, যথা পস্সে মরীচিকং;

এৰং লোকং অৰেক্খন্তং, মচ্চুরাজা ন পস্সতী’’তি. (ধ. প. ১৭০);

তস্সেৰং ‘‘সব্বে সঙ্খারা ভিজ্জন্তি ভিজ্জন্তী’’তি অভিণ্হং পস্সতো অট্ঠানিসংসপরিৰারং ভঙ্গানুপস্সনাঞাণং বলপ্পত্তং হোতি. তত্রিমে অট্ঠানিসংসা – ভৰদিট্ঠিপ্পহানং, জীৰিতনিকন্তিপরিচ্চাগো, সদাযুত্তপযুত্ততা, ৰিসুদ্ধাজীৰিতা, উস্সুক্কপ্পহানং, ৰিগতভযতা, খন্তিসোরচ্চপটিলাভো, অরতিরতিসহনতাতি. তেনাহু পোরাণা –

‘‘ইমানি অট্ঠগ্গুণমুত্তমানি, দিস্ৰা তহিং সম্মসতী পুনপ্পুনং;

আদিত্তচেলস্সিরসূপমো মুনি, ভঙ্গানুপস্সী অমতস্স পত্তিযা’’তি.

ভঙ্গানুপস্সনাঞাণনিদ্দেসৰণ্ণনা নিট্ঠিতা.