৩৫. পরিনিব্বানঞাণনিদ্দেসৰণ্ণনা

৮৬. পরিনিব্বানঞাণনিদ্দেসে ইধাতি ইমস্মিং সাসনে. সম্পজানোতি সাত্থকসম্পজঞ্ঞং, সপ্পাযসম্পজঞ্ঞং, গোচরসম্পজঞ্ঞং, অসম্মোহসম্পজঞ্ঞন্তি ইমেহি চতূহি সম্পজঞ্ঞেহি সম্পজানো. পৰত্তন্তি সব্বত্থ যথানুরূপং পরিযুট্ঠানপৰত্তঞ্চ অনুসযপ্পৰত্তঞ্চ. পরিযাদিযতীতি উপচারপ্পনাৰসেন ৰুত্তেসু ৰিক্খম্ভনৰসেন, ৰিপস্সনাৰসেন ৰুত্তেসু তদঙ্গৰসেন, মগ্গৰসেন ৰুত্তেসু সমুচ্ছেদৰসেন খেপেতি অপ্পৰত্তং করোতি. পেয্যালমুখেন হি দুতিযাদিঝানসমাপত্তিমহাৰিপস্সনামগ্গা সংখিত্তা. যস্মা এতং পচ্চৰেক্খন্তস্স পৰত্তং ঞাণং পরিনিব্বানে ঞাণং নাম হোতি, তস্মা ৰিক্খম্ভনপরিনিব্বানং তদঙ্গপরিনিব্বানং সমুচ্ছেদপরিনিব্বানন্তিপি ৰুত্তমেৰ হোতি. এতেহি কিলেসপরিনিব্বানপচ্চৰেক্খণঞাণং ৰুত্তং. অথ ৰা পনাতিআদীহি খন্ধপরিনিব্বানপচ্চৰেক্খণঞাণং নিদ্দিসতি. অনুপাদিসেসায নিব্বানধাতুযাতি দুৰিধা হি নিব্বানধাতু সউপাদিসেসা চ অনুপাদিসেসা চ. তত্থ উপাদীযতে ‘‘অহং মমা’’তি ভুসং গণ্হীযতীতি উপাদি, খন্ধপঞ্চকস্সেতং অধিৰচনং. উপাদিযেৰ সেসো অৰসিট্ঠোতি উপাদিসেসো, সহ উপাদিসেসেন ৰত্ততীতি সউপাদিসেসা. নত্থেত্থ উপাদিসেসোতি অনুপাদিসেসা. সউপাদিসেসা পঠমং ৰুত্তা. অযং পন অনুপাদিসেসা. তায অনুপাদিসেসায নিব্বানধাতুযা. চক্খুপৰত্তন্তি চক্খুপৰত্তি চক্খুসমুদাচারো. পরিযাদিযতীতি খেপীযতি মদ্দীযতীতি. এস নযো সেসেসু.

পরিনিব্বানঞাণনিদ্দেসৰণ্ণনা নিট্ঠিতা.