১৩. ৰিমুত্তিঞাণনিদ্দেসৰণ্ণনা

৬৪. ৰিমুত্তিঞাণনিদ্দেসে সক্কাযদিট্ঠীতি ৰিজ্জমানট্ঠেন সতি খন্ধপঞ্চকসঙ্খাতে কাযে, সযং ৰা সতী তস্মিং কাযে দিট্ঠীতি সক্কাযদিট্ঠি. ৰিচিকিচ্ছাতি ৰিগতা চিকিচ্ছা, সভাৰং ৰা ৰিচিনন্তো এতায কিচ্ছতি কিলমতীতি ৰিচিকিচ্ছা. সীলব্বতপরামাসোতি সীলেন সুদ্ধি ৰতেন সুদ্ধি সীলব্বতেন সুদ্ধীতি গহিতঅভিনিৰেসো. সো হি সভাৰং অতিক্কমিত্ৰা পরতো আমসতীতি সীলব্বতপরামাসো. উভিন্নং সমানেপি দিট্ঠিভাৰে তক্কঞ্চ পরূপদেসঞ্চ ৰিনা পকতিযা এৰ সক্কাযদিট্ঠিগহণতো পকতিভূতায ৰীসতিৰত্থুকায সক্কাযদিট্ঠিযা পহানেনেৰ সব্বদিট্ঠিপ্পহানদস্সনত্থং সক্কাযদিট্ঠি ৰুত্তা. সীলব্বতপরামাসো পন ‘‘সুদ্ধিপটিপদং পটিপজ্জামা’’তি পটিপন্নানং পটিপদায মিচ্ছাভাৰদস্সনত্থং ৰিসুং ৰুত্তোতি ৰেদিতব্বো. তিণ্ণম্পি অনুসযপ্পহানেনেৰ পহানং দস্সেতুং দিট্ঠানুসযো ৰিচিকিচ্ছানুসযোতি ৰুত্তং, ন ৰিসুং কিলেসত্তা. উপক্কিলেসাতি কিলেসেন্তি উপতাপেন্তি ৰিবাধেন্তীতি কিলেসা, থামগতট্ঠেন ভুসা কিলেসাতি উপক্কিলেসা. সম্মা সমুচ্ছিন্না হোন্তীতি সমুচ্ছেদপ্পহানেন অনুপ্পাদনিরোধেন সম্মা সমুচ্ছিন্না হোন্তি. সপরিযুট্ঠানেহীতি চিত্তং পরিযোনন্ধন্তানি উট্ঠেন্তি উপ্পজ্জন্তীতি পরিযুট্ঠানানি, সমুদাচারপ্পত্তানং কিলেসানমেতং অধিৰচনং. সহ পরিযুট্ঠানেহীতি সপরিযুট্ঠানানি. তেহি সপরিযুট্ঠানেহি অনুসযিতউপক্কিলেসেহি. চিত্তং ৰিমুত্তং হোতীতি তেসং অভব্বুপ্পত্তিকভূতত্তা সন্ততিৰসেন পৰত্তমানং চিত্তং ততো ৰিমুত্তং নাম হোতি. তদেৰ সুট্ঠু ৰিমুত্তত্তা সুৰিমুত্তং. তংৰিমুত্তিঞাতট্ঠেনাতি তস্সা ৰিমুত্তিযা জাননট্ঠেন.

ৰিমুত্তিঞাণনিদ্দেসৰণ্ণনা নিট্ঠিতা.