হানভাগিযচতুক্কনিদ্দেসৰণ্ণনা
৩০. ইদানি যস্মা হানভাগিযাদিতা একেকস্সেৰ সমাধিস্স অৰত্থাভেদেন হোতি, তস্মা হানভাগিযচতুক্কং একতোযেৰ নিদ্দিট্ঠং. তত্থ পঠমস্স ঝানস্স লাভিন্তি পঠমস্স ঝানস্স লাভিনো. সামিঅত্থে উপযোগৰচনং. লাভো সচ্ছিকিরিযা অস্স অত্থীতি লাভীতি ৰুচ্চতি. কামসহগতাতি এত্থ সহগতসদ্দস্স আরম্মণত্থো অধিপ্পেতো, ৰত্থুকামকিলেসকামারম্মণাতি অত্থো. সঞ্ঞামনসিকারাতি জৰনসঞ্ঞা চ তদাৰজ্জনমনসিকারো চ, সঞ্ঞাসম্পযুত্তমনসিকারোপি ৰট্টতি. সমুদাচরন্তীতি পৰত্তন্তি. ধম্মোতি পঠমজ্ঝানধম্মো. ঝানা পরিহাযন্তো তীহি কারণেহি পরিহাযতি কিলেসসমুদাচারেন ৰা অসপ্পাযকিরিযায ৰা অননুযোগেন ৰা. কিলেসসমুদাচারেন পরিহাযন্তো সীঘং পরিহাযতি, কম্মারামতাভস্সারামতানিদ্দারামতাসঙ্গণিকারামতানুযোগৰসেন অসপ্পাযকিরিযায পরিহাযন্তো দন্ধং পরিহাযতি, গেলঞ্ঞপচ্চযৰেকল্লাদিনা পলিবোধেন অভিক্খণং অসমাপজ্জন্তো অননুযোগেন পরিহাযন্তোপি দন্ধং পরিহাযতি. ইধ পন বলৰকারণমেৰ দস্সেন্তো কিলেসসমুদাচারমেৰাহ. দুতিযজ্ঝানাদীহি পন পরিহাযন্তো হেট্ঠিমহেট্ঠিমজ্ঝাননিকন্তিসমুদাচারেনপি পরিহাযতি. কিত্তাৰতা পরিহীনো হোতীতি? যদা ন সক্কোতি সমাপজ্জিতুং, এত্তাৰতা পরিহীনো হোতীতি. তদনুধম্মতাতি অনুপৰত্তো ধম্মো অনুধম্মো, ঝানং অধিকং কত্ৰা পৰত্তস্স নিকন্তিধম্মস্সেতং অধিৰচনং. অনুধম্মো এৰ অনুধম্মতা, তস্স ঝানস্স অনুধম্মতা তদনুধম্মতা. সতীতি নিকন্তি. সন্তিট্ঠতীতি পতিট্ঠাতি. তং পঠমজ্ঝানং অনুৰত্তমানা নিকন্তি পৰত্ততীতি ৰুত্তং হোতি. অৰিতক্কসহগতাতি দুতিযজ্ঝানারম্মণা. তঞ্হি নত্থেত্থ ৰিতক্কোতি অৰিতক্কন্তি ৰুচ্চতি. নিব্বিদাসহগতাতি ৰিপস্সনারম্মণা. সা হি সঙ্খারেসু নিব্বিন্দনতো নিব্বিদাতি ৰুচ্চতি. ‘‘নিব্বিন্দং ৰিরজ্জতী’’তি (মহাৰ. ২৩; সং. নি. ৩.৬১) হি ৰুত্তং. ৰিরাগূপসংহিতাতি অরিযমগ্গপটিসঞ্ঞুত্তা ৰিপস্সনা. ৰিপস্সনা হি সিখাপ্পত্তা মগ্গৰুট্ঠানং পাপেতি. তস্মা ৰিপস্সনারম্মণা সঞ্ঞামনসিকারা ‘‘ৰিরাগূপসংহিতা’’তি ৰুচ্চন্তি, ‘‘ৰিরাগা ৰিমুচ্চতী’’তি হি ৰুত্তং.
ৰিতক্কসহগতাতি ৰিতক্কৰসেন পঠমজ্ঝানারম্মণা. উপেক্খাসুখসহগতাতি তত্রমজ্ঝত্তুপেক্খায চ সুখৰেদনায চ ৰসেন ততিযজ্ঝানারম্মণা. পীতিসুখসহগতাতি পীতিযা চ সুখৰেদনায চ ৰসেন দুতিযজ্ঝানারম্মণা. অদুক্খমসুখসহগতাতি উপেক্খাৰেদনাৰসেন চতুত্থজ্ঝানারম্মণা. সা হি ৰেদনা ন দুক্খা ন সুখাতি অদুক্খমসুখাতি ৰুচ্চতি, ম-কারো পনেত্থ পদসন্ধিৰসেন ৰুত্তো. রূপসহগতাতি রূপজ্ঝানারম্মণা. নেৰসঞ্ঞানাসঞ্ঞাযতনে ঠিতস্স হানভাগিযঠিতিভাগিযনিব্বেধভাগিযত্তেসু ৰিজ্জমানেসুপি ৰিসেসভাগিযত্তাভাৰা নেৰসঞ্ঞানাসঞ্ঞাযতনং ন নিদ্দিট্ঠং. সব্বোপি চেস লোকিযো সমাধি পমাদৰিহারিস্স মুদিন্দ্রিযস্স হানভাগিযো হোতি, অপ্পমাদৰিহারিস্স মুদিন্দ্রিযস্স ঠিতিভাগিযো হোতি, তণ্হাচরিতস্স তিক্খিন্দ্রিযস্স ৰিসেসভাগিযো হোতি, দিট্ঠিচরিতস্স তিক্খিন্দ্রিযস্স নিব্বেধভাগিযো হোতীতি ৰুচ্চতি.
হানভাগিযচতুক্কনিদ্দেসৰণ্ণনা নিট্ঠিতা.