৩. যুত্তিহারসম্পাতৰণ্ণনা

৬৫. এৰং নানানযেহি ৰিচযহারসম্পাতং ৰিত্থারেত্ৰা ইদানি যুত্তিহারসম্পাতাদীনি দস্সেতুং ‘‘তত্থ কতমো যুত্তিহারসম্পাতো’’তিআদি আরদ্ধং. তত্থ ‘‘তস্মা রক্খিতচিত্তস্সা’’তি গাথায পদত্থো ৰিত্থারিতোযেৰ. রক্খিতচিত্তস্স সম্মাসঙ্কপ্পগোচরো ভৰিস্সতীতি যুজ্জতীতি মনচ্ছট্ঠানি দ্ৰারানি সতিকৰাটেন পিদহিত্ৰা ৰিহরন্তস্স কামৰিতক্কাদীনং মিচ্ছাসঙ্কপ্পানং অৰসরো এৰ নত্থীতি নেক্খম্মৰিতক্কাদিকো সম্মাসঙ্কপ্পো এৰ তস্স গোচরো পৰত্তিট্ঠানং ভৰিস্সতীতি অযমত্থো যুজ্জতি. যুত্তিযা ঘটেতি সংসন্দতি সমেতীতি অত্থো. সম্মাসঙ্কপ্পগোচরো সম্মাদিট্ঠি ভৰিস্সতীতি ৰুত্তনযেন সম্মাসঙ্কপ্পগোচরো পুগ্গলো অৰিপরীতমেৰ ৰিতক্কতো সম্মাদিট্ঠি ভৰিস্সতি. সম্মাদিট্ঠিসঙ্খাতং ৰিপস্সনাঞাণং পুরক্খত্ৰা ৰিহরন্তো মগ্গঞাণেন পঞ্চন্নং খন্ধানং উদযব্বযং অসম্মোহতো পটিৰিজ্ঝিস্সতি. তথা পটিৰিজ্ঝন্তো চ দুক্খসভাৰত্তা দুগ্গতিসঙ্খাতা সব্বা ভৰগতিযো জহিস্সতি, ততো এৰ সব্বং ৰিনিপাতভযং সংসারভযঞ্চ সমতিক্কমিস্সতীতি সব্বোপি চাযমত্থো যুত্তো এৰাতি.

যুত্তিহারসম্পাতৰণ্ণনা নিট্ঠিতা.