১৬. পিঙ্গিযমাণৰসুত্তনিদ্দেসৰণ্ণনা

৮৯. সোল়সমে পিঙ্গিযসুত্তনিদ্দেসে – জিণ্ণোহমস্মি অবলো ৰীতৰণ্ণোতি সো কির ব্রাহ্মণো জরাভিভূতো ৰীসৰস্সসতিকো জাতিযা, দুব্বলো চ ‘‘ইধ পাদং করিস্সামী’’তি অঞ্ঞত্রেৰ করোতি, ৰিনট্ঠপুরিমছৰিৰণ্ণো চ. তেনাহ – ‘‘জিণ্ণোহমস্মি অবলো ৰীতৰণ্ণো’’তি. মাহং নস্সং মোমুহো অন্তরাৰাতি মাহং তুয্হং ধম্মং অসচ্ছিকত্ৰা অন্তরা এৰ অৰিদ্ৰা হুত্ৰা অনস্সিং. জাতিজরায ইধ ৰিপ্পহানন্তি ইধেৰ তৰ পাদমূলে পাসাণকে চেতিযে ৰা জাতিজরায ৰিপ্পহানং নিব্বানং ধম্মরসং অহং ৰিজঞ্ঞং, তং মে আচিক্খ.

অবলোতি বলৰিরহিতো. দুব্বলোতি দুব্বলবলো. অপ্পবলোতি পরিত্তবলো. অপ্পথামোতি পরিত্তৰীরিযো. ৰীতৰণ্ণোতি পরিৰত্তিতছৰিৰণ্ণো. ৰিগতৰণ্ণোতি অপগতছৰিৰণ্ণো. ৰিগচ্ছিতৰণ্ণোতি দূরীভূতছৰিৰণ্ণো. যা সা পুরিমা সুভা ৰণ্ণনিভাতি যা সা সুভা সুন্দরা পুরিমকালে সতি, সা ৰণ্ণনিভা এতরহি অন্তরহিতা ৰিগতা. আদীনৰো পাতুভূতোতি উপদ্দৰো পাতুরহোসি. ‘‘যা সা পুরিমা সুভা ৰণ্ণনিভা’’তি পাঠং ঠপেত্ৰা ‘‘যা সুভা অস্সা’’তি একে ৰণ্ণযন্তি.

অসুদ্ধাতি পটলাদীহি অসুদ্ধা. অৰিসুদ্ধাতি তিমিরাদীহি অৰিসুদ্ধা. অপরিসুদ্ধাতি সমন্ততো ফোটপটলাদীহি পরিযোনদ্ধত্তা অপরিসুদ্ধা. অৰোদাতাতি নপ্পসন্না পসন্নসদিসা. নো তথা চক্খুনা রূপে পস্সামীতি যথা পোরাণচক্খুনা রূপারম্মণং পস্সামি ওলোকেমি, তথা তেন পকারেন ইদানি ন পস্সামি. সোতং অসুদ্ধন্তিআদীসুপি এসেৰ নযো. মাহং নস্সন্তি অহং মা ৰিনস্সং.

৯০. ইদানি যস্মা পিঙ্গিযো কাযে সাপেক্খতায ‘‘জিণ্ণোহমস্মী’’তিআদিমাহ. তেনস্স ভগৰা কাযে সিনেহপ্পহানত্থং ‘‘দিস্ৰান রূপেসু ৰিহঞ্ঞমানে’’তি গাথমাহ. তত্থ রূপেসূতি রূপহেতু রূপপচ্চযা. ৰিহঞ্ঞমানেতি কম্মকারণাদীহি উপহঞ্ঞমানে. রুপ্পন্তি রূপেসূতি চক্খুরোগাদীহি চ রূপহেতুযেৰ জনা রুপ্পন্তি বাধিযন্তি.

হঞ্ঞন্তীতি ঘটীযন্তি. ৰিহঞ্ঞন্তীতি ৰিহেসিযন্তি. উপৰিহঞ্ঞন্তীতি হত্থপাদচ্ছেদাদিং লভন্তি. উপঘাতিযন্তীতি মরণং লভন্তি. কুপ্পন্তীতি পরিৰত্তন্তি. পীল়যন্তীতি ৰিঘাতং আপজ্জন্তি. ঘট্টযন্তীতি ঘট্টনং পাপুণন্তি. ব্যাধিতাতি ভীতা. দোমনস্সিতাতি চিত্তৰিঘাতং পত্তা. ৰেমানেতি নস্সমানে.

৯১. এৰং ভগৰতা যাৰ অরহত্তং, তাৰ কথিতং পটিপত্তিং সুত্ৰা পিঙ্গিযো জরাদুব্বলতায ৰিসেসং অনধিগন্ত্ৰা চ পুন ‘‘দিসা চতস্সো’’তি ইমায গাথায ভগৰন্তং থোমেন্তো দেসনং যাচতি.

৯২. অথস্স ভগৰা পুনপি যাৰ অরহত্তং, তাৰ পটিপদং দস্সেন্তো ‘‘তণ্হাধিপন্নে’’তি গাথমাহ.

তণ্হাধিপন্নেতি তণ্হায ৰিমুচ্চিত্ৰা ঠিতে. তণ্হানুগেতি তণ্হায সহ গচ্ছন্তে. তণ্হানুগতেতি তণ্হায অনুবন্ধন্তে. তণ্হানুসটেতি তণ্হায সহ ধাৰন্তে. তণ্হায পন্নেতি তণ্হায নিমুগ্গে. পটিপন্নেতি তণ্হায অৰত্থটে. অভিভূতেতি মদ্দিতে. পরিযাদিন্নচিত্তেতি পরিযাদিযিত্ৰা গহিতকুসলচিত্তে.

সন্তাপজাতেতি সঞ্জাতচিত্তসন্তাপে. ঈতিজাতেতি রোগুপ্পন্নে. উপদ্দৰজাতেতি আদীনৰজাতে. উপসগ্গজাতেতি উপ্পন্নদুক্খজাতে.

ৰিরজং ৰীতমলন্তি এত্থ ৰিরজন্তি ৰিগতরাগাদিরজং. ৰীতমলন্তি ৰীতরাগাদিমলং. রাগাদযো হি অজ্ঝোত্থরণট্ঠেন রজো নাম, দূসট্ঠেন মলং নাম. ধম্মচক্খুন্তি কত্থচি পঠমমগ্গঞাণং, কত্থচি আদীনি তীণি মগ্গঞাণানি, কত্থচি চতুত্থমগ্গঞাণম্পি. ইধ পন জটিলসহস্সস্স চতুত্থমগ্গঞাণং. পিঙ্গিযস্স ততিযমগ্গঞাণমেৰ. যং কিঞ্চি সমুদযধম্মং, সব্বং তং নিরোধধম্মন্তি ৰিপস্সনাৰসেন এৰং পৰত্তস্স ধম্মচক্খুং উদপাদীতি অত্থো. সেসং সব্বত্থ পাকটমেৰ.

এৰং ইদম্পি সুত্তং ভগৰা অরহত্তনিকূটেনেৰ দেসেসি, দেসনাপরিযোসানে চ পিঙ্গিযো অনাগামিফলে পতিট্ঠাসি. সো কির অন্তরন্তরা চিন্তেসি – ‘‘এৰং ৰিচিত্রপটিভানং নাম দেসনং ন লভতি ময্হং মাতুলো বাৰরী সৰনাযা’’তি. তেন সিনেহৰিক্খেপেন অরহত্তং পাপুণিতুং নাসক্খি. অন্তেৰাসিকা পনস্স সহস্সজটিলা অরহত্তং পাপুণিংসু. সব্বেৰ ইদ্ধিমযপত্তচীৰরধরা এহিভিক্খুনো অহেসুন্তি.

সদ্ধম্মপ্পজ্জোতিকায চূল়নিদ্দেস-অট্ঠকথায

পিঙ্গিযমাণৰসুত্তনিদ্দেসৰণ্ণনা নিট্ঠিতা.