১৭. পারাযনত্থুতিগাথানিদ্দেসৰণ্ণনা

৯৩. ইতো পরং সঙ্গীতিকারা দেসনং থোমেন্তা ‘‘ইদমৰোচ ভগৰা’’তিআদিমাহংসু. তত্থ ইদমৰোচাতি ইদং পারাযনং অৰোচ. পরিচারকসোল়সানন্তি বাৰরিস্স পরিচারকেন পিঙ্গিযেন সহ সোল়সানং, বুদ্ধস্স ৰা ভগৰতো পরিচারকানং সোল়সানন্তি পরিচারকসোল়সানং. তে এৰ চ ব্রাহ্মণা তত্থ সোল়সসু দিসাসু পুরতো চ পচ্ছতো চ ৰামপস্সতো চ দক্খিণপস্সতো চ ছ ছ যোজনা নিসিন্না উজুকেন দ্ৰাদসযোজনিকা অহোসি. অজ্ঝিট্ঠোতি যাচিতো.

৯৪-৯৭. অত্থমঞ্ঞাযাতি পাল়িঅত্থমঞ্ঞায. ধম্মমঞ্ঞাযাতি পাল়িমঞ্ঞায. পারাযনন্তি এৰং ইমস্স ধম্মপরিযাযস্স অধিৰচনং আরোপেত্ৰা তেসং ব্রাহ্মণানং নামানি কিত্তযন্তো ‘‘অজিতো…পে… বুদ্ধসেট্ঠমুপাগমু’’ন্তি আহংসু. তত্থ সম্পন্নচরণন্তি নিব্বানপদট্ঠানভূতেন পাতিমোক্খসীলাদিনা সম্পন্নং. ইসিন্তি মহেসিং.

নিদ্দেসে উপাগমিংসূতি সমীপং গমিংসু. উপসঙ্কমিংসূতি অৰিদূরট্ঠানং গমিংসু. পযিরুপাসিংসূতি সমীপে নিসীদিংসু. পরিপুচ্ছিংসূতি পরিপুচ্ছং আহরিংসু. পরিগণ্হিংসূতি তুলযিংসু. ‘‘চোদযিংসূ’’তি কেচি.

সীলাচারনিব্বত্তীতি উত্তমসীলাচারনিব্বত্তি, মগ্গেন নিপ্ফন্নসীলন্তি অত্থো.

গম্ভীরেতি উত্তানভাৰপটিক্খেপৰচনং. দুদ্দসেতি গম্ভীরত্তা দুদ্দসে, দুক্খেন দট্ঠব্বে, ন সক্কা সুখেন দট্ঠুং. দুদ্দসত্তাৰ দুরনুবোধে, দুক্খেন অৰবুজ্ঝিতব্বে, ন সক্কা সুখেন অৰবুজ্ঝিতুং. সন্তেতি নিব্বুতে. পণীতেতি অতপ্পকে. ইদং দ্ৰযং লোকুত্তরমেৰ সন্ধায ৰুত্তং. অতক্কাৰচরেতি তক্কেন ন অৰচরিতব্বে ন ওগাহিতব্বে ঞাণেনেৰ অৰচরিতব্বে. নিপুণেতি সণ্হে. পণ্ডিতৰেদনীযেতি সম্মা পটিপন্নেহি পণ্ডিতেহি ৰেদিতব্বে.

৯৮. তোসেসীতি তুট্ঠিং আপাদেসি. ৰিতোসেসীতি ৰিৰিধা তেসং সোমনস্সং উপ্পাদেসি. পসাদেসীতি তেসং চিত্তপ্পসাদং অকাসি. আরাধেসীতি আরাধযি সিদ্ধিং পাপেসি. অত্তমনে অকাসীতি সোমনস্সৰসেন সকমনে অকাসি.

৯৯. ততো পরং ব্রহ্মচরিযমচরিংসূতি মগ্গব্রহ্মচরিযং অচরিংসু.

১০১. তস্মা পারাযনন্তি তস্স পারভূতস্স নিব্বানস্স আযতনন্তি ৰুত্তং হোতি.

সদ্ধম্মপ্পজ্জোতিকায চূল়নিদ্দেস-অট্ঠকথায

পারাযনত্থুতিগাথানিদ্দেসৰণ্ণনা নিট্ঠিতা.