১১. পরোসতৰগ্গো

[১০১] ১. পরোসতজাতকৰণ্ণনা

১০১. ‘‘পরোসতঞ্চেপি সমাগতানং, ঝাযেয্যুং তে ৰস্সসতং অপঞ্ঞা;

একোৰ সেয্যো পুরিসো সপঞ্ঞো, যো ভাসিতস্স ৰিজানাতি অত্থ’’ন্তি. –

ইদং জাতকং ৰত্থুতো চ ৰেয্যাকরণতো চ সমোধানতো চ পরোসহস্সজাতকসদিসমেৰ. কেৰলঞ্হেত্থ ‘‘ঝাযেয্যু’’ন্তি পদমত্তমেৰ ৰিসেসো. তস্সত্থো – ৰস্সসতম্পি অপঞ্ঞা ঝাযেয্যুং ওলোকেয্যুং উপধারেয্যুং, এৰং ওলোকেন্তাপি পন অত্থং ৰা কারণং ৰা ন পস্সন্তি, তস্মা যো ভাসিতস্স অত্থং জানাতি, সো একোৰ সপঞ্ঞো সেয্যোতি.

পরোসতজাতকৰণ্ণনা পঠমা.

[১০২] ২. পণ্ণিকজাতকৰণ্ণনা

যো দুক্খফুট্ঠায ভৰেয্য তাণন্তি ইদং সত্থা জেতৰনে ৰিহরন্তো একং পণ্ণিকং উপাসকং আরব্ভ কথেসি. সো কির সাৰত্থিৰাসী উপাসকো নানপ্পকারানি মূলপণ্ণাদীনি চেৰ লাবুকুম্ভণ্ডাদীনি চ ৰিক্কিণিত্ৰা জীৰিকং কপ্পেতি. তস্সেকা ধীতা অভিরূপা পাসাদিকা আচারসীলসম্পন্না হিরোত্তপ্পসমন্নাগতা কেৰলং নিচ্চপ্পহসিতমুখা. তস্সা সমানকুলেসু ৰারেয্যত্থায আগতেসু সো চিন্তেসি ‘‘ইমিস্সা ৰারেয্যং ৰত্ততি, অযঞ্চ নিচ্চপ্পহসিতমুখা. কুমারিকাধম্মে পন অসতি কুমারিকায পরকুলং গতায মাতাপিতূনং গরহা হোতি, ‘অত্থি নু খো ইমিস্সা কুমারিকাধম্মো, নত্থী’তি ৰীমংসিস্সামি ন’’ন্তি. সো একদিৰসং ধীতরং পচ্ছিং গাহাপেত্ৰা পণ্ণত্থায অরঞ্ঞং গন্ত্ৰা ৰীমংসনৰসেন কিলেসসন্নিস্সিতো ৰিয হুত্ৰা রহস্সকথং কথেত্ৰা তং হত্থে গণ্হি. সা গহিতমত্তাৰ রোদন্তী কন্দন্তী ‘‘অযুত্তমেতং, তাত, উদকতো অগ্গিপাতুভাৰসদিসং, মা এৰরূপং করোথা’’তি আহ. ‘‘অম্ম, মযা ৰীমংসনত্থায ত্ৰং হত্থে গহিতা, ন চ কিলেসৰসেন. ৰদেহি, অত্থি দানি তে কুমারিকাধম্মো’’তি. ‘‘আম, তাত, অত্থি. মযা হি লোভৰসেন ন কোচি পুরিসো ওলোকিতপুব্বো’’তি. সো ধীতরং অস্সাসেত্ৰা ঘরং নেত্ৰা মঙ্গলং কত্ৰা পরকুলং পেসেত্ৰা ‘‘সত্থারং ৰন্দিস্সামী’’তি গন্ধমালাদিহত্থো জেতৰনং গন্ত্ৰা সত্থারং ৰন্দিত্ৰা পূজেত্ৰা একমন্তং নিসীদি, ‘‘চিরস্সমাগতোসী’’তি চ ৰুত্তে তমত্থং ভগৰতো আরোচেসি. সত্থা ‘‘উপাসক, কুমারিকা চিরং পট্ঠায আচারসীলসম্পন্নাৰ, ত্ৰং পন ন ইদানেৰ এৰং ৰীমংসসি, পুব্বেপি ৰীমংসিযেৰা’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো অরঞ্ঞে রুক্খদেৰতা হুত্ৰা নিব্বত্তি. অথেকো বারাণসিযং পণ্ণিকউপাসকোতি অতীতৰত্থু পচ্চুপ্পন্নসদিসমেৰ. তেন পন সা ৰীমংসনত্থায হত্থে গহিতমত্তা পরিদেৰমানা ইমং গাথমাহ –

১০২. ‘‘যো দুক্খফুট্ঠায ভৰেয্য তাণং, সো মে পিতা দুব্ভি ৰনে করোতি;

সা কস্স কন্দামি ৰনস্স মজ্ঝে, যো তাযিতা সো সহসং করোতী’’তি.

তত্থ যো দুক্খফুট্ঠায ভৰেয্য তাণন্তি কাযিকচেতসিকেহি দুক্খেহি ফুট্ঠায তাযিতা পরিতাযিতা পতিট্ঠা ভৰেয্য. সো মে পিতা দুব্ভি ৰনে করোতীতি সো ময্হং দুক্খপরিতাযকো পিতাৰ ইমস্মিং ৰনে এৰরূপং মিত্তদুব্ভি কম্মং করোতি, অত্তনো জাতায ধীতরি ৰীতিক্কমং কাতুং মঞ্ঞতীতি অত্থো. সা কস্স কন্দামীতি কস্স রোদামি, কো মে পতিট্ঠা ভৰিস্সতীতি দীপেতি. যো তাযিতা সো সহসং করোতীতি যো ময্হং তাযিতা রক্খিতা অৰস্সযো ভৰিতুং অরহতি, সো পিতাযেৰ সাহসিককম্মং করোতীতি অত্থো.

অথ নং পিতা অস্সাসেত্ৰা ‘‘অম্ম, রক্খিতত্তাসী’’তি পুচ্ছি. ‘‘আম, তাত রক্খিতো মে অত্তা’’তি. সো তং ঘরং নেত্ৰা মণ্ডেত্ৰা মঙ্গলং কত্ৰা পরকুলং পেসেসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে উপাসকো সোতাপত্তিফলে পতিট্ঠহি.

তদা পিতা এতরহি পিতাৰ, ধীতা চ এতরহি ধীতাৰ, তং কারণং পচ্চক্খতো দিট্ঠরুক্খদেৰতা পন অহমেৰ অহোসিন্তি.

পণ্ণিকজাতকৰণ্ণনা দুতিযা.

[১০৩] ৩. ৰেরিজাতকৰণ্ণনা

যত্থ ৰেরী নিৰিসতীতি ইদং সত্থা জেতৰনে ৰিহরন্তো অনাথপিণ্ডিকং আরব্ভ কথেসি. অনাথপিণ্ডিকো কির ভোগগামং গন্ত্ৰা আগচ্ছন্তো অন্তরামগ্গে চোরে দিস্ৰা ‘‘অন্তরামগ্গে ৰসিতুং ন যুত্তং, সাৰত্থিমেৰ গমিস্সামী’’তি ৰেগেন গোণে পাজেত্ৰা সাৰত্থিমেৰ আগন্ত্ৰা পুনদিৰসে ৰিহারং গতো সত্থু এতমত্থং আরোচেসি. সত্থা ‘‘পুব্বেপি গহপতি পণ্ডিতা অন্তরামগ্গে চোরে দিস্ৰা অন্তরা অৰিলম্বমানা অত্তনো ৰসনট্ঠানমেৰ গমিংসূ’’তি ৰত্ৰা তেন যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো মহাৰিভৰো সেট্ঠি হুত্ৰা একং গামকং নিমন্তনং ভুঞ্জনত্থায গন্ত্ৰা পচ্চাগচ্ছন্তো অন্তরামগ্গে চোরে দিস্ৰা অন্তরামগ্গে অৰসিত্ৰাৰ ৰেগেন গোণে পাজেন্তো অত্তনো গেহমেৰ আগন্ত্ৰা নানগ্গরসেহি ভুঞ্জিত্ৰা মহাসযনে নিসিন্নো ‘‘চোরানং হত্থতো মুচ্চিত্ৰা নিব্ভযট্ঠানং অত্তনো গেহং আগতোম্হী’’তি উদানৰসেন ইমং গাথমাহ –

১০৩. ‘‘যত্থ ৰেরী নিৰিসতি, ন ৰসে তত্থ পণ্ডিতো;

একরত্তং দিরত্তং ৰা, দুক্খং ৰসতি ৰেরিসূ’’তি.

তত্থ ৰেরীতি ৰেরচেতনাসমঙ্গিপুগ্গলো. নিৰিসতীতি পতিট্ঠাতি. ন ৰসে তত্থ পণ্ডিতোতি সো ৰেরীপুগ্গলো যস্মিং ঠানে পতিট্ঠিতো হুত্ৰা ৰসতি, তত্থ পণ্ডিতো পণ্ডিচ্চেন সমন্নাগতো ন ৰসেয্য. কিংকারণা? একরত্তং দিরত্তং ৰা, দুক্খং ৰসতি ৰেরিসূতি, ৰেরীনঞ্হি অন্তরে ৰসন্তো একাহম্পি দ্ৰীহম্পি দুক্খমেৰ ৰসতীতি অত্থো.

এৰং মহাসত্তো উদানং উদানেত্ৰা দানাদীনি পুঞ্ঞানি কত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা অহমেৰ বারাণসিসেট্ঠি অহোসি’’ন্তি.

ৰেরিজাতকৰণ্ণনা ততিযা.

[১০৪] ৪. মিত্তৰিন্দকজাতকৰণ্ণনা

চতুব্ভি অট্ঠজ্ঝগমাতি ইদং সত্থা জেতৰনে ৰিহরন্তো একং দুব্বচভিক্খুং আরব্ভ কথেসি. ৰত্থু হেট্ঠা মিত্তৰিন্দকজাতকে ৰুত্তনযেন ৰিত্থারেতব্বং. ইদং পন জাতকং কস্সপবুদ্ধকালিকং. তস্মিঞ্হি কালে উরচক্কং উক্খিপিত্ৰা নিরযে পচ্চমানো একো নেরযিকসত্তো ‘‘ভন্তে, কিং নু খো পাপকম্মং অকাসি’’ন্তি বোধিসত্তং পুচ্ছি. বোধিসত্তো ‘‘তযা ইদঞ্চিদঞ্চ পাপকম্মং কত’’ন্তি ৰত্ৰা ইমং গাথমাহ –

১০৪. ‘‘চতুব্ভি অট্ঠজ্ঝগমা, অট্ঠাহিপি চ সোল়স;

সোল়সাহি চ বাত্তিংস, অত্রিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে’’তি.

তত্থ চতুব্ভি অট্ঠজ্ঝগমাতি সমুদ্দন্তরে চতস্সো ৰিমানপেতিযো লভিত্ৰা তাহি অসন্তুট্ঠো অত্রিচ্ছতায পরতো গন্ত্ৰা অপরা অট্ঠ অধিগতোসীতি অত্থো. সেসপদদ্ৰযেপি এসেৰ নযো. অত্রিচ্ছং চক্কমাসদোতি এৰং সকলাভেন অসন্তুট্ঠো অত্র অত্র ইচ্ছন্তো পরতো পরতো লাভং পত্থেন্তো ইদানি চক্কমাসদো ইদং উরচক্কং পত্তোসি. তস্স তে এৰং ইচ্ছাহতস্স পোসস্স তণ্হায হতস্স উপহতস্স তৰ চক্কং ভমতি মত্থকে. পাসাণচক্কং, অযচক্কন্তি ইমেসু দ্ৰীসু খুরধারং অযচক্কং তস্স মত্থকে পুনপ্পুনং পতনৰসেন ভমন্তং দিস্ৰা এৰমাহ. ৰত্ৰা চ পন অত্তনো দেৰলোকমেৰ গতো. সোপি নেরযিকসত্তো অত্তনো পাপে খীণে যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা মিত্তৰিন্দকো দুব্বচভিক্খু অহোসি, দেৰপুত্তো পন অহমেৰ অহোসি’’ন্তি.

মিত্তৰিন্দকজাতকৰণ্ণনা চতুত্থা.

[১০৫] ৫. দুব্বলকট্ঠজাতকৰণ্ণনা

বহুম্পেতং ৰনে কট্ঠন্তি ইদং সত্থা জেতৰনে ৰিহরন্তো একং উত্তসিতভিক্খুং আরব্ভ কথেসি. সো কির সাৰত্থিৰাসী একো কুলপুত্তো সত্থু ধম্মদেসনং সুত্ৰা পব্বজিত্ৰা মরণভীরুকো অহোসি, রত্তিট্ঠানদিৰাট্ঠানেসু ৰাতস্স ৰা ৰীজন্তস্স সুক্খদণ্ডকস্স ৰা পতন্তস্স পক্খিচতুপ্পদানং ৰা সদ্দং সুত্ৰা মরণভযতজ্জিতো মহারৰং রৰন্তো পলাযতি. তস্স হি ‘‘মরিতব্বং মযা’’তি সতিমত্তম্পি নত্থি. সচে হি সো ‘‘অহং মরিস্সামী’’তি জানেয্য, ন মরণং ভাযেয্য. মরণস্সতিকম্মট্ঠানস্স পন তস্স অভাৰিতত্তাৰ ভাযতি. তস্স সো মরণভীরুকভাৰো ভিক্খুসঙ্ঘে পাকটো জাতো.

অথেকদিৰসং ধম্মসভাযং ভিক্খূ কথং সমুট্ঠাপেসুং ‘‘আৰুসো, অসুকো নাম ভিক্খু মরণভীরুকো মরণং ভাযতি, ভিক্খুনা নাম ‘অৰস্সং মযা মরিতব্ব’ন্তি মরণস্সতিকম্মট্ঠানং ভাৰেতুং ৰট্টতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে তং ভিক্খুং পক্কোসাপেত্ৰা ‘‘সচ্চং কির ত্ৰং মরণভীরুকো’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খৰে, মা এতস্স ভিক্খুনো অনত্তমনা হোথ, নাযং ইদানেৰ মরণভীরুকো, পুব্বেপি মরণভীরুকোযেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তে রুক্খদেৰতা হুত্ৰা নিব্বত্তি. তস্মিং কালে বারাণসিরাজা অত্তনো মঙ্গলহত্থিং আনেঞ্জকারণং সিক্খাপেতুং হত্থাচরিযানং অদাসি. তং আল়ানে নিচ্চলং বন্ধিত্ৰা তোমরহত্থা মনুস্সা পরিৰারেত্ৰা আনেঞ্জকারণং কারেন্তি. সো তং কারণং কারিযমানো ৰেদনং অধিৰাসেতুং অসক্কোন্তো আল়ানং ভিন্দিত্ৰা মনুস্সে পলাপেত্ৰা হিমৰন্তং পাৰিসি. মনুস্সা তং গহেতুং অসক্কোন্তা নিৰত্তিংসু. সো তত্থ মরণভীরুকো অহোসি, ৰাতসদ্দানি সুত্ৰা কম্পমানো মরণভযতজ্জিতো সোণ্ডং ৰিধুনিত্ৰা ৰেগেন পলাযতি, আল়ানে বন্ধিত্ৰা আনেঞ্জকারণং করণকালো ৰিযস্স হোতি, কাযস্সাদং ৰা চিত্তস্সাদং ৰা অলভন্তো কম্পমানো ৰিচরতি.

রুক্খদেৰতা তং দিস্ৰা খন্ধৰিটপে ঠত্ৰা ইমং গাথমাহ –

১০৫. ‘‘বহুম্পেতং ৰনে কট্ঠং, ৰাতো ভঞ্জতি দুব্বলং;

তস্স চে ভাযসি নাগ, কিসো নূন ভৰিস্সসী’’তি.

তত্থাযং পিণ্ডত্থো – যং এতং দুব্বলং কট্ঠং পুরত্থিমাদিভেদো ৰাতো ভঞ্জতি, তং ইমস্মিং ৰনে বহুং সুলভং, তত্থ তত্থ সংৰিজ্জতি. সচে ত্ৰং তস্স ভাযসি, এৰং সন্তে নিচ্চং ভীতো মংসলোহিতক্খযং পত্ৰা কিসো নূন ভৰিস্সসি, ইমস্মিং পন ৰনে তৰ ভযং নাম নত্থি, তস্মা ইতো পট্ঠায মা ভাযীতি.

এৰং দেৰতা তস্স ওৰাদং অদাসি, সোপি ততো পট্ঠায নিব্ভযো অহোসি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো ভিক্খু সোতাপত্তিফলে পতিট্ঠহি. ‘‘তদা নাগো অযং ভিক্খু অহোসি, রুক্খদেৰতা পন অহমেৰ অহোসি’’ন্তি.

দুব্বলকট্ঠজাতকৰণ্ণনা পঞ্চমা.

[১০৬] ৬. উদঞ্চনীজাতকৰণ্ণনা

সুখং ৰত মং জীৰন্তন্তি ইদং সত্থা জেতৰনে ৰিহরন্তো থুল্লকুমারিকাপলোভনং আরব্ভ কথেসি. ৰত্থু তেরসকনিপাতে চূল়নারদকস্সপজাতকে (জা. ১.১৩.৪০ আদযো) আৰি ভৰিস্সতি. তং পন ভিক্খুং সত্থা ‘‘সচ্চং কির ত্ৰং ভিক্খু উক্কণ্ঠিতোসী’’তি পুচ্ছিত্ৰা ‘‘সচ্চং, ভগৰা’’তি ৰুত্তে ‘‘কত্থ তে চিত্তং পটিবদ্ধ’’ন্তি পুচ্ছি. সো ‘‘একিস্সা থুল্লকুমারিকাযা’’তি আহ. অথ নং সত্থা ‘‘অযং তে ভিক্খু অনত্থকারিকা, পুব্বেপি ত্ৰং এতং নিস্সায সীলব্যসনং পত্ৰা কম্পন্তো ৰিচরমানো পণ্ডিতে নিস্সায সুখং লভী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তেতি অতীতৰত্থুপি চূল়নারদকস্সপজাতকেযেৰ আৰি ভৰিস্সতি. তদা পন বোধিসত্তো সাযং ফলাফলে আদায আগন্ত্ৰা পণ্ণসালাদ্ৰারং ৰিৰরিত্ৰা পৰিসিত্ৰা পুত্তং চূল়তাপসং এতদৰোচ ‘‘তাত, ত্ৰং অঞ্ঞেসু দিৰসেসু দারূনি আহরসি, পানীযং পরিভোজনীযং আহরসি, অগ্গিং করোসি, অজ্জ পন একম্পি অকত্ৰা কস্মা দুম্মুখো পজ্ঝাযন্তো নিপন্নোসী’’তি? ‘‘তাত, তুম্হেসু ফলাফলত্থায গতেসু একা ইত্থী আগন্ত্ৰা মং পলোভেত্ৰা আদায গন্তুং আরভি, অহং পন ‘তুম্হেহি ৰিস্সজ্জিতো গমিস্সামী’তি ন গচ্ছিং, অসুকট্ঠানে পন নং নিসীদাপেত্ৰা আগতোম্হি, ইদানি গচ্ছামহং তাতা’’তি. বোধিসত্তো ‘‘ন সক্কা এতং নিৰত্তেতু’’ন্তি ঞত্ৰা ‘‘তেন হি, তাত, গচ্ছ, এসা পন তং নেত্ৰা যদা মচ্ছমংসাদীনি ৰা খাদিতুকামা ভৰিস্সতি, সপ্পিলোণতণ্ডুলাদীহি ৰা পনস্সা অত্থো ভৰিস্সতি, তদা ‘ইদঞ্চিদঞ্চাহরা’তি তং কিলমেস্সতি. তদা ময্হং গুণং সরিত্ৰা পলাযিত্ৰা ইধেৰ আগচ্ছেয্যাসী’’তি ৰিস্সজ্জেসি. সো তায সদ্ধিং মনুস্সপথং অগমাসি. অথ নং সা অত্তনো ৰসং গমেত্ৰা ‘‘মংসং আহর, মচ্ছং আহরা’’তি যেন যেন অত্থিকা হোতি, তং তং আহরাপেতি. তদা সো ‘‘অযং মং অত্তনো দাসং ৰিয কম্মকারং ৰিয চ কত্ৰা পীল়েতী’’তি পলাযিত্ৰা পিতু সন্তিকং আগন্ত্ৰা পিতরং ৰন্দিত্ৰা ঠিতকোৰ ইমং গাথমাহ –

১০৬. ‘‘সুখং ৰত মং জীৰন্তং, পচমানা উদঞ্চনী;

চোরী জাযপ্পৰাদেন, তেলং লোণঞ্চ যাচতী’’তি.

তত্থ সুখং ৰত মং জীৰন্তন্তি তাত, তুম্হাকং সন্তিকে মং সুখং জীৰন্তং. পচমানাতি তাপযমানা পীল়যমানা, যং যং ৰা খাদিতুকামা হোতি, তং তং পচমানা. উদকং অঞ্চন্তি এতাযাতি উদঞ্চনী, চাটিতো ৰা কূপতো ৰা উদকউস্সিঞ্চনঘটিকাযেতং নামং. সা পন উদঞ্চনী ৰিয, উদকং ৰিয ঘটিকা, যেন যেনত্থিকা হোতি, তং তং আকড্ঢতিযেৰাতি অত্থো. চোরী জাযপ্পৰাদেনাতি ‘‘ভরিযা’’তি নামেন একা চোরী মং মধুরৰচনেন উপলাপেত্ৰা তত্থ নেত্ৰা তেলং লোণঞ্চ যঞ্চ অঞ্ঞং ইচ্ছতি, তং সব্বং যাচতি, দাসং ৰিয কম্মকারং ৰিয চ কত্ৰা আহরাপেতীতি তস্সা অগুণং কথেসি.

অথ নং বোধিসত্তো অস্সাসেত্ৰা ‘‘হোতু, তাত, এহি ত্ৰং মেত্তং ভাৰেহি, করুণং ভাৰেহী’’তি চত্তারো ব্রহ্মৰিহারে আচিক্খি, আচিক্খিত্ৰা কসিণপরিকম্মং আচিক্খি. সো ন চিরস্সেৰ অভিঞ্ঞা চ সমাপত্তিযো চ উপ্পাদেত্ৰা ব্রহ্মৰিহারে ভাৰেত্ৰা সদ্ধিং পিতরা ব্রহ্মলোকে নিব্বত্তি.

সত্থা ইমং ধম্মদেসনং আহরিত্ৰা সচ্চানি পকাসেত্ৰা জাতকং সমোধানেসি, সচ্চপরিযোসানে সো ভিক্খু সোতাপত্তিফলে পতিট্ঠহি.

‘‘তদা থুল্লকুমারিকাৰ এতরহি থুল্লকুমারিকা. চূল়তাপসো উক্কণ্ঠিতভিক্খু অহোসি, পিতা পন অহমেৰ অহোসি’’ন্তি.

উদঞ্চনীজাতকৰণ্ণনা ছট্ঠা.

[১০৭] ৭. সালিত্তকজাতকৰণ্ণনা

সাধূ খো সিপ্পকং নামাতি ইদং সত্থা জেতৰনে ৰিহরন্তো একং হংসপহরনকং ভিক্খুং আরব্ভ কথেসি. সো কিরেকো সাৰত্থিৰাসী কুলপুত্তো সালিত্তকসিপ্পে নিপ্ফত্তিং পত্তো. ‘‘সালিত্তকসিপ্প’’ন্তি সক্খরাখিপনসিপ্পং ৰুচ্চতি. সো একদিৰসং ধম্মং সুত্ৰা সাসনে উরং দত্ৰা পব্বজিত্ৰা উপসম্পদং লভি, ন পন সিক্খাকামো, ন পটিপত্তিসাধকো অহোসি. সো একদিৰসং একং দহরভিক্খুং আদায অচিরৰতিং গন্ত্ৰা ন্হাযিত্ৰা নদীতীরে অট্ঠাসি. তস্মিং সমযে দ্ৰে সেতহংসা আকাসেন গচ্ছন্তি. সো তং দহরং আহ ‘‘ইমং পচ্ছিমহংসং সক্খরায অক্খিম্হি পহরিত্ৰা পাদমূলে পাতেমী’’তি. ইতরো ‘‘কথং পাতেস্সসি, ন সক্খিস্সসি পহরিতু’’ন্তি আহ. ইতরো ‘‘তিট্ঠতু তাৰস্স ওরতো অক্খি, পরতো অক্খিম্হি তং পহরামী’’তি. ইদানি পন ত্ৰং অসন্তং কথেসীতি. ‘‘তেন হি উপধারেহী’’তি একং তিখিণসক্খরং গহেত্ৰা অঙ্গুলিযা পরিযন্তে কত্ৰা তস্স হংসস্স পচ্ছতো খিপি. সা ‘‘রু’’ন্তি সদ্দং অকাসি, হংসো ‘‘পরিস্সযেন ভৰিতব্ব’’ন্তি নিৰত্তিত্ৰা সদ্দং সোতুং আরভি. ইতরো তস্মিং খণে একং ৰট্টসক্খরং গহেত্ৰা তস্স নিৰত্তিত্ৰা ওলোকেন্তস্স পরভাগে অক্খিং পহরি. সক্খরা ইতরম্পি অক্খিং ৰিনিৰিজ্ঝিত্ৰা গতা. হংসো মহারৰং রৰন্তো পাদমূলেযেৰ পতি. ততো ততো ভিক্খূ আগন্ত্ৰা গরহিত্ৰা ‘‘অননুচ্ছৰিকং তে কত’’ন্তি সত্থু সন্তিকং নেত্ৰা ‘‘ভন্তে, ইমিনা ইদং নাম কত’’ন্তি তমত্থং আরোচেসুং. সত্থা তং ভিক্খুং গরহিত্ৰা ‘‘ন, ভিক্খৰে, ইদানেৰেস এতস্মিং সিপ্পে কুসলো, পুব্বেপি কুসলোযেৰ অহোসী’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অমচ্চো অহোসি. তস্মিং কালে রঞ্ঞো পুরোহিতো অতিমুখরো হোতি বহুভাণী, তস্মিং কথেতুং আরদ্ধে অঞ্ঞে ওকাসমেৰ ন লভন্তি. রাজা চিন্তেসি ‘‘কদা নু খো এতস্স ৰচনুপচ্ছেদকং কঞ্চি লভিস্সামী’’তি. সো ততো পট্ঠায তথারূপং একং উপধারেন্তো ৰিচরতি. তস্মিং কালে বারাণসিযং একো পীঠসপ্পী সক্খরাখিপনসিপ্পে নিপ্ফত্তিং পত্তো হোতি. গামদারকা তং রথকং আরোপেত্ৰা আকড্ঢমানা বারাণসিনগরদ্ৰারমূলে একো ৰিটপসম্পন্নো মহানিগ্রোধো অত্থি, তত্থ আনেত্ৰা সম্পরিৰারেত্ৰা কাকণিকাদীনি দত্ৰা ‘‘হত্থিরূপকং কর, অস্সরূপকং করা’’তি ৰদন্তি. সো সক্খরা খিপিত্ৰা খিপিত্ৰা নিগ্রোধপণ্ণেসু নানারূপানি দস্সেতি, সব্বানি পণ্ণানি ছিদ্দাৰছিদ্দানেৰ অহেসুং.

অথ বারাণসিরাজা উয্যানং গচ্ছন্তো তং ঠানং পাপুণি. উস্সারণাভযেন সব্বে দারকা পলাযিংসু, পীঠসপ্পী তত্থেৰ নিপজ্জি. রাজা নিগ্রোধমূলং পত্ৰা রথে নিসিন্নো পত্তানং ছিদ্দতায ছাযং কবরকবরং দিস্ৰা ওলোকেন্তো সব্বেসং পত্তানং ছিদ্দভাৰং দিস্ৰা ‘‘কেনেতানি এৰং কতানী’’তি পুচ্ছি. ‘‘পীঠসপ্পিনা, দেৰা’’তি. রাজা ‘‘ইমং নিস্সায ব্রাহ্মণস্স ৰচনুপচ্ছেদং কাতুং সক্কা ভৰিস্সতী’’তি চিন্তেত্ৰা ‘‘কহং, ভণে, পীঠসপ্পী’’তি পুচ্ছি. ৰিচিনন্তা মূলন্তরে নিপন্নং দিস্ৰা ‘‘অযং, দেৰা’’তি আহংসু. রাজা নং পক্কোসাপেত্ৰা পরিসং উস্সারেত্ৰা পুচ্ছি ‘‘অম্হাকং সন্তিকে একো মুখরব্রাহ্মণো অত্থি, সক্খিস্সসি তং নিস্সদ্দং কাতু’’ন্তি. নাল়িমত্তা অজলণ্ডিকা লভন্তো সক্খিস্সামি, দেৰাতি. রাজা পীঠসপ্পিং ঘরং নেত্ৰা অন্তোসাণিযং নিসীদাপেত্ৰা সাণিযং ছিদ্দং কারেত্ৰা ব্রাহ্মণস্স ছিদ্দাভিমুখং আসনং পঞ্ঞপেত্ৰা নাল়িমত্তা সুক্খা অজলণ্ডিকা পীঠসপ্পিস্স সন্তিকে ঠপাপেত্ৰা ব্রাহ্মণং উপট্ঠানকালে আগতং তস্মিং আসনে নিসীদাপেত্ৰা কথং সমুট্ঠাপেসি. ব্রাহ্মণো অঞ্ঞেসং ওকাসং অদত্ৰা রঞ্ঞা সদ্ধিং কথেতুং আরভি. অথস্স সো পীঠসপ্পী সাণিচ্ছিদ্দেন একেকং অজলণ্ডিকং পচ্ছিযং পৰেসেন্তো ৰিয তালুতলম্হিযেৰ পাতেতি, ব্রাহ্মণো আগতাগতং নাল়িযং তেলং পৰেসেন্তো ৰিয গিলতি, সব্বা পরিক্খযং গমিংসু. তস্সেতা নাল়িমত্তা অজলণ্ডিকা কুচ্ছিং পৰিট্ঠা অড্ঢাল়্হকমত্তা অহেসুং.

রাজা তাসং পরিক্খীণভাৰং ঞত্ৰা আহ – ‘‘আচরিয, তুম্হে অতিমুখরতায নাল়িমত্তা অজলণ্ডিকা গিলন্তা কিঞ্চি ন জানিত্থ, ইতো দানি উত্তরি জীরাপেতুং ন সক্খিস্সথ. গচ্ছথ, পিযঙ্গুদকং পিৰিত্ৰা ছড্ডেত্ৰা অত্তানং অরোগং করোথা’’তি ব্রাহ্মণো ততো পট্ঠায পিহিতমুখো ৰিয হুত্ৰা কথেন্তেনাপি সদ্ধিং অকথনসীলো অহোসি. রাজা ‘‘ইমিনা মে কণ্ণসুখং কত’’ন্তি পীঠসপ্পিস্স সতসহস্সুট্ঠানকে চতূসু দিসাসু চত্তারো গামে অদাসি. বোধিসত্তো রাজানং উপসঙ্কমিত্ৰা ‘‘দেৰ, সিপ্পং নাম লোকে পণ্ডিতেহি উগ্গহিতব্বং, পীঠসপ্পিনা সালিত্তকমত্তেনাপি অযং সম্পত্তি লদ্ধা’’তি ৰত্ৰা ইমং গাথমাহ –

১০৭. ‘‘সাধুং খো সিপ্পকং নাম, অপি যাদিস কীদিসং;

পস্স খঞ্জপ্পহারেন, লদ্ধা গামা চতুদ্দিসা’’তি.

তত্থ পস্স খঞ্জপ্পহারেনাতি পস্স, মহারাজ, ইমিনা খঞ্জপীঠসপ্পিনা অজলণ্ডিকাপহারেন চতুদ্দিসা চত্তারো গামা লদ্ধা, অঞ্ঞেসং সিপ্পানং কো আনিসংসপরিচ্ছেদোতি সিপ্পগুণং কথেসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা পীঠসপ্পী অযং ভিক্খু অহোসি, রাজা আনন্দো, পণ্ডিতামচ্চো পন অহমেৰ অহোসি’’ন্তি.

সালিত্তকজাতকৰণ্ণনা সত্তমা.

[১০৮] ৮. বাহিযজাতকৰণ্ণনা

সিক্খেয্য সিক্খিতব্বানীতি ইদং সত্থা ৰেসালিং উপনিস্সায মহাৰনে কূটাগারসালাযং ৰিহরন্তো একং লিচ্ছৰিং আরব্ভ কথেসি. সো কির লিচ্ছৰিরাজা সদ্ধো পসন্নো বুদ্ধপ্পমুখং ভিক্খুসঙ্ঘং নিমন্তেত্ৰা অত্তনো নিৰেসনে মহাদানং পৰত্তেসি. ভরিযা পনস্স থূলঙ্গপচ্চঙ্গা উদ্ধুমাতকনিমিত্তসদিসা অনাকপ্পসম্পন্না অহোসি. সত্থা ভত্তকিচ্চাৰসানে অনুমোদনং কত্ৰা ৰিহারং গন্ত্ৰা ভিক্খূনং ওৰাদং দত্ৰা গন্ধকুটিং পাৰিসি. ভিক্খূ ধম্মসভাযং কথং সমুট্ঠাপেসুং ‘‘আৰুসো, তস্স নাম লিচ্ছৰিরঞ্ঞো তাৰ অভিরূপস্স তাদিসা ভরিযা থূলঙ্গপচ্চঙ্গা অনাকপ্পসম্পন্না, কথং সো তায সদ্ধিং অভিরমতী’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, এস ইদানেৰ, পুব্বেপি থূলসরীরায এৰ ইত্থিযা সদ্ধিং অভিরমী’’তি ৰত্ৰা তেহি যাচিতো অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো তস্স অমচ্চো অহোসি. অথেকা জনপদিত্থী থূলসরীরা অনাকপ্পসম্পন্না ভতিং কুরুমানা রাজঙ্গণস্স অৰিদূরেন গচ্ছমানা সরীরৰল়ঞ্জপীল়িতা হুত্ৰা নিৰত্থসাটকেন সরীরং পটিচ্ছাদেত্ৰা নিসীদিত্ৰা সরীরৰল়ঞ্জং মুঞ্চিত্ৰা খিপ্পমেৰ উট্ঠাসি. তস্মিং খণে বারাণসিরাজা ৰাতপানেন রাজঙ্গণং ওলোকেন্তো তং দিস্ৰা চিন্তেসি ‘‘অযং এৰরূপে অঙ্গণট্ঠানে সরীরৰল়ঞ্জং মুঞ্চমানা হিরোত্তপ্পং অপ্পহায নিৰাসনেনেৰ পটিচ্ছন্না হুত্ৰা সরীরৰল়ঞ্জং মোচেত্ৰা খিপ্পং উট্ঠিতা, ইমায নিরোগায ভৰিতব্বং, এতিস্সা ৰত্থু ৰিসদং ভৰিস্সতি, ৰিসদে পন ৰত্থুস্মিং একো পুত্তো লব্ভমানো ৰিসদো পুঞ্ঞৰা ভৰিস্সতি, ইমং মযা অগ্গমহেসিং কাতুং ৰট্টতী’’তি. সো তস্সা অপরিগ্গহিতভাৰং ঞত্ৰা আহরাপেত্ৰা অগ্গমহেসিট্ঠানং অদাসি. সা তস্স পিযা অহোসি মনাপা, ন চিরস্সেৰ একং পুত্তং ৰিজাযি. সো পনস্সা পুত্তো চক্কৰত্তী রাজা অহোসি.

বোধিসত্তো তস্সা সম্পত্তিং দিস্ৰা তথারূপং ৰচনোকাসং লভিত্ৰা ‘‘দেৰ, সিক্খিতব্বযুত্তকং নাম সিপ্পং কস্মা ন সিক্খিতব্বং, যত্র হি নামাযং মহাপুঞ্ঞা হিরোত্তপ্পং অপ্পহায পটিচ্ছন্নাকারেন সরীরৰল়ঞ্জং কুরুমানা তুম্হে আরাধেত্ৰা এৰরূপং সম্পত্তিং পত্তা’’তি ৰত্ৰা সিক্খিতব্বযুত্তকানং সিপ্পানং ৰণ্ণং কথেন্তো ইমং গাথমাহ –

১০৮. ‘‘সিক্খেয্য সিক্খিতব্বানি, সন্তি সচ্ছন্দিনো জনা;

বাহিযা হি সুহন্নেন, রাজানমভিরাধযী’’তি.

তত্থ সন্তি সচ্ছন্দিনো জনাতি তেসু তেসু সিপ্পেসু সচ্ছন্দা জনা অত্থিযেৰ. বাহিযাতি বহিজনপদে জাতা সংৰড্ঢা ইত্থী. সুহন্নেনাতি হিরোত্তপ্পং অপ্পহায পটিচ্ছন্নেনাকারেন হন্নং সুহন্নং নাম, তেন সুহন্নেন. রাজানমভিরাধযীতি দেৰং অভিরাধযিত্ৰা ইমং সম্পত্তিং পত্তাতি. এৰং মহাসত্তো সিক্খিতব্বযুত্তকানং সিপ্পানং গুণং কথেসি.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা জযম্পতিকা এতরহিপি জযম্পতিকাৰ, পণ্ডিতামচ্চো পন অহমেৰ অহোসি’’ন্তি.

বাহিযজাতকৰণ্ণনা অট্ঠমা.

[১০৯] ৯. কুণ্ডকপূৰজাতকৰণ্ণনা

যথন্নো পুরিসো হোতীতি ইদং সত্থা সাৰত্থিযং ৰিহরন্তো মহাদুগ্গতং আরব্ভ কথেসি. সাৰত্থিযঞ্হি কদাচি একমেৰ কুলং বুদ্ধপ্পমুখস্স ভিক্খুসঙ্ঘস্স দানং দেতি, কদাচি তীণি চত্তারি একতো হুত্ৰা, কদাচি গণবন্ধনেন, কদাচি ৰীথিসভাগেন, কদাচি সকলনগরং ছন্দকং সংহরিত্ৰা. তদা পন ৰীথিভত্তং নাম অহোসি. অথ মনুস্সা বুদ্ধপ্পমুখস্স ভিক্খুসঙ্ঘস্স যাগুং দত্ৰা ‘‘খজ্জকং আহরথা’’তি আহংসু. তদা পনেকো পরেসং ভতিকারকো দুগ্গতমনুস্সো তস্সং ৰীথিযং ৰসমানো চিন্তেসি ‘‘অহং যাগুং দাতুং ন সক্খিস্সামি, খজ্জকং পন দস্সামী’’তি সণ্হসণ্হং কুণ্ডকং ৰড্ঢাপেত্ৰা উদকেন তেমেত্ৰা অক্কপণ্ণেন ৰেঠেত্ৰা কুক্কুল়ে পচিত্ৰা ‘‘ইদং বুদ্ধস্স দস্সামী’’তি তং আদায গন্ত্ৰা সত্থু সন্তিকে ঠিতো ‘‘খজ্জকং আহরথা’’তি একস্মিং ৰচনে ৰুত্তমত্তে সব্বপঠমং গন্ত্ৰা তং পূৰং সত্থু পত্তে পতিট্ঠাপেসি, সত্থা অঞ্ঞেহি দীযমানং খজ্জকং অগ্গহেত্ৰা তমেৰ পূৰখজ্জকং পরিভুঞ্জি.

তস্মিংযেৰ পন খণে ‘‘সম্মাসম্বুদ্ধেন কির মহাদুগ্গতস্স কুণ্ডকখজ্জকং অজিগুচ্ছিত্ৰা অমতং ৰিয পরিভুত্ত’’ন্তি সকলনগরং এককোলাহলং অহোসি. রাজরাজমহামত্তাদযো অন্তমসো দোৰারিকে উপাদায সব্বেৰ সন্নিপতিত্ৰা সত্থারং ৰন্দিত্ৰা মহাদুগ্গতং উপসঙ্কমিত্ৰা ‘‘হন্দ ভো, সতং গহেত্ৰা, দ্ৰে সতানি গহেত্ৰা, পঞ্চ সতানি গহেত্ৰা অম্হাকং পত্তিং দেহী’’তি ৰদিংসু. সো ‘‘সত্থারং পটিপুচ্ছিত্ৰা জানিস্সামী’’তি সত্থু সন্তিকং গন্ত্ৰা তমত্থং আরোচেসি. সত্থা ‘‘ধনং গহেত্ৰা ৰা অগ্গহেত্ৰা ৰা সব্বসত্তানং পত্তিং দেহী’’তি আহ. সো ধনং গহেতুং আরভি. মনুস্সা দিগুণচতুগ্গুণঅট্ঠগুণাদিৰসেন দদন্তা নৰ হিরঞ্ঞকোটিযো অদংসু. সত্থা অনুমোদনং কত্ৰা ৰিহারং গন্ত্ৰা ভিক্খূহি ৰত্তে দস্সিতে সুগতোৰাদং দত্ৰা গন্ধকুটিং পাৰিসি. রাজা সাযন্হসমযে মহাদুগ্গতং পক্কোসাপেত্ৰা সেট্ঠিট্ঠানেন পূজেসি.

ভিক্খূ ধম্মসভাযং কথং সমুট্ঠাপেসুং ‘‘আৰুসো, সত্থা মহাদুগ্গতেন দিন্নং কুণ্ডকপূৰং অজিগুচ্ছন্তো অমতং ৰিয পরিভুঞ্জি, মহাদুগ্গতোপি বহুধনঞ্চ সেট্ঠিট্ঠানঞ্চ লভিত্ৰা মহাসম্পত্তিং পত্তো’’তি. সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ মযা অজিগুচ্ছন্তেন তস্স কুণ্ডকপূৰো পরিভুত্তো, পুব্বেপি রুক্খদেৰতায হুত্ৰা পরিভুত্তোযেৰ, তদাপি চেস মং নিস্সায সেট্ঠিট্ঠানং অলত্থেৰা’’তি ৰত্ৰা অতীতং আহরি.

অতীতে বারাণসিযং ব্রহ্মদত্তে রজ্জং কারেন্তে বোধিসত্তো একস্মিং ঠানে এরণ্ডরুক্খে রুক্খদেৰতা হুত্ৰা নিব্বত্তি. তদা তস্মিং গামকে মনুস্সা দেৰতামঙ্গলিকা হোন্তি. অথেকস্মিং ছণে সম্পত্তে মনুস্সা অত্তনো অত্তনো রুক্খদেৰতানং বলিকম্মং অকংসু. অথেকো দুগ্গতমনুস্সো তে মনুস্সে রুক্খদেৰতা পটিজগ্গন্তে দিস্ৰা একং এরণ্ডরুক্খং পটিজগ্গি. তে মনুস্সা অত্তনো অত্তনো দেৰতানং নানপ্পকারানি মালাগন্ধৰিলেপনাদীনি চেৰ খজ্জভোজ্জানি চ আদায গচ্ছিংসু. সো পন কুণ্ডকপূৰঞ্চেৰ উল়ুঙ্কেন চ উদকং আদায গন্ত্ৰা এরণ্ডরুক্খস্স অৰিদূরে ঠত্ৰা চিন্তেসি ‘‘দেৰতা নাম দিব্বখজ্জকানি খাদন্তি, ময্হং দেৰতা ইমং কুণ্ডকপূৰং ন খাদিস্সতি, কিং ইমং অকারণেন নাসেমি, অহমেৰ নং খাদিস্সামী’’তি ততোৰ নিৰত্তি. বোধিসত্তো খন্ধৰিটপে ঠত্ৰা ‘‘ভো পুরিস, সচে ত্ৰং ইস্সরো ভৰেয্যাসি, ময্হং মধুরখজ্জকং দদেয্যাসি. ত্ৰং পন দুগ্গতো, অহং তৰ পূৰং ন খাদিত্ৰা অঞ্ঞং কিং খাদিস্সামি, মা মে কোট্ঠাসং নাসেহী’’তি ৰত্ৰা ইমং গাথমাহ –

১০৯. ‘‘যথন্নো পুরিসো হোতি, তথন্না তস্স দেৰতা;

আহরেতং কুণ্ডপূৰং, মা মে ভাগং ৰিনাসযা’’তি.

তত্থ যথন্নোতি যথারূপভোজনো হোতি. তথন্নাতি তস্স পুরিসস্স দেৰতাপি তথারূপভোজনাৰ হোতি. আহরেতং কুণ্ডপূৰন্তি এতং কুণ্ডকেন পক্কপূৰং আনেহি, ময্হং ভাগং মা ৰিনাসেহীতি.

সো নিৰত্তিত্ৰা বোধিসত্তং ওলোকেত্ৰা বলিকম্মমকাসি. বোধিসত্তো ততো ওজং পরিভুঞ্জিত্ৰা ‘‘পুরিস, ত্ৰং কিমত্থং মং পটিজগ্গসী’’তি আহ. ‘‘দুগ্গতোম্হি, সামি, তং নিস্সায দুগ্গতভাৰতো মুচ্চিতুকামতায পটিজগ্গামী’’তি. ‘‘ভো পুরিস, মা চিন্তযি, তযা কতঞ্ঞুস্স কতৰেদিনো পূজা কতা, ইমং এরণ্ডং পরিক্খিপিত্ৰা নিধিকুম্ভিযো গীৰায গীৰং আহচ্চঠিতা. ত্ৰং রঞ্ঞো আচিক্খিত্ৰা সকটেহি ধনং আহরাপেত্ৰা রাজঙ্গণে রাসিং কারেহি, রাজা তে তুস্সিত্ৰা সেট্ঠিট্ঠানং দস্সতী’’তি ৰত্ৰা বোধিসত্তো অন্তরধাযি. সো তথা অকাসি. রাজাপি তস্স সেট্ঠিট্ঠানং অদাসি. ইতি সো বোধিসত্তং নিস্সায মহাসম্পত্তিং পত্ৰা যথাকম্মং গতো.

সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা দুগ্গতো এতরহি দুগ্গতোৰ, এরণ্ডরুক্খদেৰতা পন অহমেৰ অহোসি’’ন্তি.

কুণ্ডকপূৰজাতকৰণ্ণনা নৰমা.

[১১০] ১০. সব্বসংহারকপঞ্হজাতকৰণ্ণনা

সব্বসংহারকো নত্থীতি অযং সব্বসংহারকপঞ্হো সব্বাকারেন উমঙ্গজাতকে আৰি ভৰিস্সতীতি.

সব্বসংহারকপঞ্হজাতকৰণ্ণনা দসমা.

পরোসতৰগ্গো একাদসমো.

তস্সুদ্দানং –

পরোসতম্পি পণ্ণিকং, ৰেরী চ মিত্তৰিন্দকং;

দুব্বলঞ্চ উদঞ্চনী, সালিত্তম্পি চ বাহিযং;

কুণ্ডকপূৰসব্বসংহারকন্তি.