১১. চরসুত্তৰণ্ণনা

১১০. একাদসমে চরতোতি গচ্ছন্তস্স, চঙ্কমন্তস্স ৰা. উপ্পজ্জতি কামৰিতক্কো ৰাতি ৰত্থুকামেসু অৰীতরাগতায তাদিসে পচ্চযে কামপটিসংযুত্তো ৰা ৰিতক্কো উপ্পজ্জতি চে, যদি উপ্পজ্জতি. ব্যাপাদৰিতক্কো ৰা ৰিহিংসাৰিতক্কো ৰাতি আঘাতনিমিত্তব্যাপাদপটিসংযুত্তো ৰা ৰিতক্কো, লেড্ডুদণ্ডাদীহি পরৰিহেঠনৰসেন ৰিহিংসাপটিসংযুত্তো ৰা ৰিতক্কো উপ্পজ্জতি চেতি সম্বন্ধো. অধিৰাসেতীতি তং যথাৰুত্তং কামৰিতক্কাদিং যথাপচ্চযং অত্তনো চিত্তে উপ্পন্নং ‘‘ইতিপাযং ৰিতক্কো পাপকো, ইতিপি অকুসলো, ইতিপি সাৰজ্জো, সো চ খো অত্তব্যাবাধাযপি সংৰত্ততী’’তিআদিনা নযেন পচ্চৰেক্খণায অভাৰতো অধিৰাসেতি অত্তনো চিত্তং আরোপেত্ৰা ৰাসেতি চে. অধিৰাসেন্তোযেৰ চ নপ্পজহতি তদঙ্গাদিপ্পহানৰসেন ন পটিনিস্সজ্জতি, ততো এৰ ন ৰিনোদেতি অত্তনো চিত্তসন্তানতো ন নুদতি ন নীহরতি, তথা অৰিনোদনতো ন ব্যন্তীকরোতি ন ৰিগতন্তং করোতি. আতাপী পহিতত্তো যথা তেসং অন্তোপি নাৰসিস্সতি অন্তমসো ভঙ্গমত্তম্পি এৰং করোতি, অযং পন তথা ন করোতীতি অত্থো. তথাভূতোৰ ন অনভাৰং গমেতি অনু অনু অভাৰং ন গমেতি. ন পজহতি চে, ন ৰিনোদেতি চেতিআদিনা চে-সদ্দং যোজেত্ৰা অত্থো ৰেদিতব্বো.

চরন্তি চরন্তো. এৰংভূতোতি এৰং কামৰিতক্কাদিপাপৰিতক্কেহি সমঙ্গীভূতো. অনাতাপী অনোত্তাপীতি কিলেসানং আতাপনস্স ৰীরিযস্স অভাৰেন অনাতাপী, পাপুত্রাসআতাপনপরিতাপনলক্খণস্স ওত্তপ্পস্স অভাৰেন অনোত্তাপী. সততং সমিতন্তি সব্বকালং নিরন্তরং. কুসীতো হীনৰীরিযোতি কুসলেহি ধম্মেহি পরিহাযিত্ৰা অকুসলপক্খে কুচ্ছিতং সীদনতো কোসজ্জসমন্নাগমেন চ কুসীতো, সম্মপ্পধানৰীরিযাভাৰেন হীনৰীরিযো ৰীরিযৰিরহিতোতি ৰুচ্চতি কথীযতি. ঠিতস্সাতি গমনং উপচ্ছিন্দিত্ৰা তিট্ঠতো. সযনইরিযাপথস্স ৰিসেসতো কোসজ্জপক্খিকত্তা যথা তংসমঙ্গিনো ৰিতক্কা সম্ভৰন্তি, তং দস্সেতুং ‘‘জাগরস্সা’’তি ৰুত্তং.

সুক্কপক্খে তঞ্চে, ভিক্খৰে, ভিক্খু নাধিৰাসেতীতি আরদ্ধৰীরিযস্সাপি ৰিহরতো অনাদিমতি সংসারে চিরকালভাৰিতেন তথারূপপ্পচ্চযসমাযোগেন সতিসম্মোসেন ৰা কামৰিতক্কাদি উপ্পজ্জতি চে, তং ভিক্খু অত্তনো চিত্তং আরোপেত্ৰা ন ৰাসেতি চে, অব্ভন্তরে ন ৰাসেতি চেতি অত্থো. অনধিৰাসেন্তো কিং করোতীতি? পজহতি ছড্ডেতি. কিং কচৰরং ৰিয পিটকেন? ন হি, অপিচ খো তং ৰিনোদেতি নুদতি নীহরতি. কিং বলীবদ্দং ৰিয পতোদেন? ন হি, অথ খো নং ব্যন্তীকরোতি ৰিগতন্তং করোতি. যথা তেসং অন্তোপি নাৰসিস্সতি অন্তমসো ভঙ্গমত্তম্পি, তথা তে করোতি. কথং পন তে তথা করোতি? অনভাৰং গমেতি অনু অনু অভাৰং গমেতি, ৰিক্খম্ভনপ্পহানেন যথা সুৰিক্খম্ভিতা হোন্তি তথা নে করোতীতি ৰুত্তং হোতি.

এৰংভূতোতিআদীসু এৰং কামৰিতক্কাদীনং অনধিৰাসনেন সুৰিসুদ্ধাসযো সমানো তায চ আসযসম্পত্তিযা তন্নিমিত্তায চ পযোগসম্পত্তিযা পরিসুদ্ধসীলো ইন্দ্রিযেসু গুত্তদ্ৰারো ভোজনে মত্তঞ্ঞূ সতিসম্পজঞ্ঞেন সমন্নাগতো জাগরিযং অনুযুত্তো তদঙ্গাদিৰসেন কিলেসানং আতাপনলক্খণেন ৰীরিযেন সমন্নাগতত্তা আতাপী, সব্বসো পাপুত্রাসেন সমন্নাগতত্তা. ওত্তাপী সততং রত্তিন্দিৰং, সমিতং নিরন্তরং সমথৰিপস্সনাভাৰনানুযোগৰসেন চতুব্বিধসম্মপ্পধানসিদ্ধিযা, আরদ্ধৰীরিযো পহিতত্তো নিব্বানং পটিপেসিতচিত্তোতি ৰুচ্চতি কথীযতীতি অত্থো. সেসং ৰুত্তনযমেৰ.

গাথাসু গেহনিস্সিতন্তি এত্থ গেহৰাসীহি অপরিচ্চত্তত্তা গেহৰাসীনং সভাৰত্তা গেহধম্মত্তা ৰা গেহং ৰুচ্চতি ৰত্থুকামো. অথ ৰা গেহপটিবদ্ধভাৰতো কিলেসকামানং নিৰাসট্ঠানভাৰতো তংৰত্থুকত্তা ৰা কামৰিতক্কাদি গেহনিস্সিতং নাম. কুম্মগ্গং পটিপন্নোতি যস্মা অরিযমগ্গস্স উপ্পথভাৰতো অভিজ্ঝাদযো তদেকট্ঠধম্মা চ কুম্মগ্গো, তস্মা কামৰিতক্কাদিবহুলো পুগ্গলো কুম্মগ্গং পটিপন্নো নাম. মোহনেয্যেসু মুচ্ছিতোতি মোহসংৰত্তনিযেসু রূপাদীসু মুচ্ছিতো সম্মত্তো অজ্ঝোপন্নো. সম্বোধিন্তি অরিযমগ্গঞাণং. ফুট্ঠুন্তি ফুসিতুং পত্তুং, সো তাদিসো মিচ্ছাসঙ্কপ্পগোচরো অভব্বো, ন কদাচি তং পাপুণাতীতি অত্থো.

ৰিতক্কং সমযিত্ৰানাতি যথাৰুত্তং মিচ্ছাৰিতক্কং পটিসঙ্খানভাৰনাবলেহি ৰূপসমেত্ৰা. ৰিতক্কূপসমে রতোতি নৰন্নম্পি মহাৰিতক্কানং অচ্চন্তৰূপসমভূতে অরহত্তে নিব্বানে এৰ ৰা অজ্ঝাসযেন রতো অভিরতো. ভব্বো সো তাদিসোতি সো যথাৰুত্তো সম্মা পটিপজ্জমানো পুগ্গলো পুব্বভাগে সমথৰিপস্সনাবলেন সব্বৰিতক্কে যথারহং তদঙ্গাদিৰসেন ৰূপসমেত্ৰা ঠিতো, ৰিপস্সনং উস্সুক্কাপেত্ৰা মগ্গপটিপাটিযা অরহত্তমগ্গঞাণসঙ্খাতং নিব্বানসঙ্খাতঞ্চ অনুত্তরং সম্বোধিং ফুট্ঠুং অধিগন্তুং ভব্বো সমত্থোতি.

একাদসমসুত্তৰণ্ণনা নিট্ঠিতা.