৬. পঠমসেখসুত্তৰণ্ণনা

১৬. ছট্ঠে সেখস্সাতি এত্থ কেনট্ঠেন সেখো? সেক্খধম্মপটিলাভতো সেখো. ৰুত্তঞ্হেতং –

‘‘কিত্তাৰতা নু খো, ভন্তে, সেখো হোতীতি? ইধ, ভিক্খু, সেখায সম্মাদিট্ঠিযা সমন্নাগতো হোতি…পে… সেখেন সম্মাসমাধিনা সমন্নাগতো হোতি. এত্তাৰতা খো, ভিক্খু, সেখো হোতী’’তি (সং. নি. ৫.১৩).

অপিচ সিক্খতীতি সেখো. ৰুত্তম্পি চেতং –

‘‘সিক্খতীতি খো, ভিক্খু, তস্মা সেখোতি ৰুচ্চতি. কিঞ্চ সিক্খতি? অধিসীলম্পি সিক্খতি, অধিচিত্তম্পি সিক্খতি, অধিপঞ্ঞম্পি সিক্খতি. সিক্খতীতি খো, ভিক্খু, তস্মা সেখোতি ৰুচ্চতী’’তি (অ. নি. ৩.৮৬).

যোপি কল্যাণপুথুজ্জনো অনুলোমপ্পটিপদায পরিপূরকারী সীলসম্পন্নো ইন্দ্রিযেসু গুত্তদ্ৰারো ভোজনে মত্তঞ্ঞূ জাগরিযানুযোগমনুযুত্তো পুব্বরত্তাপররত্তং বোধিপক্খিযানং ধম্মানং ভাৰনানুযোগমনুযুত্তো ৰিহরতি – ‘‘অজ্জ ৰা স্ৰে ৰা অঞ্ঞতরং সামঞ্ঞফলং অধিগমিস্সামী’’তি, সোপি ৰুচ্চতি সিক্খতীতি সেখোতি. ইমস্মিং অত্থে ন পটিৰিজ্ঝন্তোৰ সেখো অধিপ্পেতো, অথ খো কল্যাণপুথুজ্জনোপি. অপ্পত্তং মানসং এতেনাতি অপ্পত্তমানসো. মানসন্তি ‘‘অন্তলিক্খচরো পাসো, য্ৰাযং চরতি মানসো’’তি (সং. নি. ১.১৫১; মহাৰ. ৩৩) এত্থ রাগো মানসন্তি ৰুত্তো. ‘‘চিত্তং মনো মানস’’ন্তি (ধ. স. ৬৩, ৬৫) এত্থ চিত্তং. ‘‘অপ্পত্তমানসো সেখো, কালং কযিরা জনে সুতা’’তি (সং. নি. ১.১৫৯) এত্থ অরহত্তং. ইধাপি অরহত্তমেৰ অধিপ্পেতং. তেন অপ্পত্তঅরহত্তস্সাতি ৰুত্তং হোতি.

অনুত্তরন্তি সেট্ঠং, অসদিসন্তি অত্থো. চতূহি যোগেহি খেমং অনুপদ্দুতন্তি যোগক্খেমং, অরহত্তমেৰ অধিপ্পেতং. পত্থযমানস্সাতি দ্ৰে পত্থনা তণ্হাপত্থনা, কুসলচ্ছন্দপত্থনা চ. ‘‘পত্থযমানস্স হি জপ্পিতানি, পৰেধিতং ৰাপি পকপ্পিতেসূ’’তি (সু. নি. ৯০৮; মহানি. ১৩৭) এত্থ তণ্হাপত্থনা.

‘‘ছিন্নং পাপিমতো সোতং, ৰিদ্ধস্তং ৰিনল়ীকতং;

পামোজ্জবহুলা হোথ, খেমং পত্থেথ ভিক্খৰো’’তি. (ম. নি. ১.৩৫২);

এত্থ কত্তুকম্যতাকুসলচ্ছন্দপত্থনা, অযমেৰ ইধাধিপ্পেতা. তেন পত্থযমানস্সাতি তং যোগক্খেমং গন্তুকামস্স তন্নিন্নস্স তপ্পোণস্স তপ্পব্ভারস্সাতি অত্থো. ৰিহরতোতি একং ইরিযাপথদুক্খং অঞ্ঞেন ইরিযাপথেন ৰিচ্ছিন্দিত্ৰা অপরিপতন্তং অত্তভাৰং হরতো. অথ ৰা ‘‘সব্বে সঙ্খারা অনিচ্চাতি অধিমুচ্চন্তো সদ্ধায ৰিহরতী’’তিআদিনা নিদ্দেসনযেন চেত্থ অত্থো দট্ঠব্বো. অজ্ঝত্তিকন্তি নিযকজ্ঝত্তসঙ্খাতে অজ্ঝত্তে ভৰং অজ্ঝত্তিকং. অঙ্গন্তি কারণং. ইতি করিত্ৰাতি এৰং কত্ৰা. ন অঞ্ঞং একঙ্গম্পি সমনুপস্সামীতি এত্থ অযং সঙ্খেপত্থো – ভিক্খৰে, অজ্ঝত্তং অত্তনো সন্তানে সমুট্ঠিতং কারণন্তি কত্ৰা অঞ্ঞং এককারণম্পি ন সমনুপস্সামি যং এৰং বহূপকারং, যথযিদং যোনিসো মনসিকারোতি উপাযমনসিকারো, পথমনসিকারো, অনিচ্চাদীসু অনিচ্চাদিনযেনেৰ মনসিকারো, অনিচ্চানুলোমিকেন ৰা চিত্তস্স আৰট্টনা অন্ৰাৰট্টনা আভোগো সমন্নাহারো মনসিকারো. অযং যোনিসো মনসিকারো.

ইদানি যোনিসো মনসিকারস্স আনুভাৰং দস্সেতুং ‘‘যোনিসো, ভিক্খৰে, ভিক্খু মনসি করোন্তো অকুসলং পজহতি, কুসলং ভাৰেতী’’তি ৰুত্তং. তত্থ যোনিসো মনসি করোন্তোতি ‘‘ইদং দুক্খং অরিযসচ্চং, অযং দুক্খসমুদযো অরিযসচ্চং, অযং দুক্খনিরোধো অরিযসচ্চং, অযং দুক্খনিরোধগামিনী পটিপদা অরিযসচ্চ’’ন্তি চতূসু অরিযসচ্চেসু যোনিসো মনসিকারং পৰত্তেন্তো.

তত্রাযং অত্থৰিভাৰনা – যদিপি ইদং সুত্তং অৰিসেসেন সেক্খপুগ্গলৰসেন আগতং, চতুমগ্গসাধারণৰসেন পন সঙ্খেপেনেৰ কম্মট্ঠানং কথযিস্সাম. যো চতুসচ্চকম্মট্ঠানিকো যোগাৰচরো ‘‘তণ্হাৰজ্জা তেভূমকা খন্ধা দুক্খং, তণ্হা সমুদযো, উভিন্নং অপ্পৰত্তি নিরোধো, নিরোধসম্পাপকো মগ্গো’’তি এৰং পুব্বে এৰ আচরিযসন্তিকে উগ্গহিতচতুসচ্চকম্মট্ঠানো. সো অপরেন সমযেন ৰিপস্সনামগ্গং সমারুল়্হো সমানো তেভূমকে খন্ধে ‘‘ইদং দুক্খ’’ন্তি যোনিসো মনসি করোতি, উপাযেন পথেন সমন্নাহরতি চেৰ ৰিপস্সতি চ. ৰিপস্সনা হি ইধ মনসিকারসীসেন ৰুত্তা. যা পনাযং তস্স দুক্খস্স সমুট্ঠাপিকা পুরিমভৰিকা তণ্হা, অযং দুক্খসমুদযোতি যোনিসো মনসি করোতি. যস্মা পন ইদং দুক্খং, অযঞ্চ সমুদযো ইদং ঠানং পত্ৰা নিরুজ্ঝন্তি ন পৰত্তন্তি, তস্মা যদিদং নিব্বানং নাম, অযং দুক্খনিরোধোতি যোনিসো মনসি করোতি. নিরোধসম্পাপকং অট্ঠঙ্গিকং মগ্গং, ‘‘অযং দুক্খনিরোধগামিনী পটিপদা’’তি যোনিসো মনসি করোতি, উপাযেন পথেন সমন্নাহরতি চেৰ ৰিপস্সতি চ.

তত্রাযং উপাযো – অভিনিৰেসো নাম খন্ধে হোতি, ন ৰিৰট্টে, তস্মা অযমত্থো – ‘‘ইমস্মিং কাযে পথৰীধাতু, আপোধাতূ’’তিআদিনা (দী. নি. ২.৩৭৮) নযেন চত্তারি মহাভূতানি তদনুসারেন উপাদারূপানি চ পরিগ্গহেত্ৰা ‘‘অযং রূপক্খন্ধো’’তি ৰৰত্থপেতি. তং ৰৰত্থাপযতো উপ্পন্নে তদারম্মণে চিত্তচেতসিকধম্মে ‘‘ইমে চত্তারো অরূপক্খন্ধা’’তি ৰৰত্থপেতি. ততো ‘‘ইমে পঞ্চক্খন্ধা দুক্খ’’ন্তি ৰৰত্থপেতি. তে পন সঙ্খেপতো নামঞ্চ রূপঞ্চাতি দ্ৰে ভাগা হোন্তি. ইদঞ্চ নামরূপং সহেতু সপ্পচ্চযং উপ্পজ্জতি, তস্স অযং অৰিজ্জাভৰতণ্হাদিকো হেতু, অযং আহারাদিকো পচ্চযোতি হেতুপ্পচ্চযে ৰৰত্থপেতি. সো তেসং পচ্চযানঞ্চ পচ্চযুপ্পন্নানঞ্চ যাথাৰসরসলক্খণং ৰৰত্থপেত্ৰা ‘‘ইমে ধম্মা অহুত্ৰা ভৰন্তি, হুত্ৰা নিরুজ্ঝন্তি, তস্মা অনিচ্চা’’তি অনিচ্চলক্খণং আরোপেতি, ‘‘উদযব্বযপটিপীল়িতত্তা দুক্খা’’তি দুক্খলক্খণং আরোপেতি, ‘‘অৰসৰত্তনতো অনত্তা’’তি অনত্তলক্খণং আরোপেতি.

এৰং তিলক্খণানি আরোপেত্ৰা ৰিপস্সন্তো উদযব্বযঞাণুপ্পত্তিযা উপ্পন্নে ওভাসাদিকে ৰিপস্সনুপক্কিলেসে ‘অমগ্গো’তি উদযব্বযঞাণমেৰ ‘‘অরিযমগ্গস্স উপাযভূতো পুব্বভাগমগ্গো’’তি মগ্গামগ্গং ৰৰত্থপেত্ৰা পুন উদযব্বযঞাণং পটিপাটিযা ভঙ্গঞাণাদীনি চ উপ্পাদেন্তো সোতাপত্তিমগ্গাদযো পাপুণাতি. তস্মিং খণে চত্তারি সচ্চানি একপ্পটিৰেধেনেৰ পটিৰিজ্ঝতি, একাভিসমযেন অভিসমেতি. তত্থ দুক্খং পরিঞ্ঞাপটিৰেধেন পটিৰিজ্ঝন্তো, সমুদযং পহানপ্পটিৰেধেন পটিৰিজ্ঝন্তো সব্বং অকুসলং পজহতি, নিরোধং সচ্ছিকিরিযাপটিৰেধেন পটিৰিজ্ঝন্তো মগ্গং ভাৰনাপটিৰেধেন পটিৰিজ্ঝন্তো সব্বং কুসলং ভাৰেতি. অরিযমগ্গো হি নিপ্পরিযাযতো কুচ্ছিতসলনাদিঅত্থেন কুসলো, তস্মিঞ্চ ভাৰিতে সব্বেপি কুসলা অনৰজ্জবোধিপক্খিযধম্মা ভাৰনাপারিপূরিং গচ্ছন্তীতি. এৰং যোনিসো মনসি করোন্তো অকুসলং পজহতি, কুসলং ভাৰেতি. তথা হি ৰুত্তং – ‘‘ইদং দুক্খন্তি যোনিসো মনসি করোতি, অযং দুক্খসমুদযোতি যোনিসো মনসি করোতী’’তিআদি (ম. নি. ১.২১). অপরম্পি ৰুত্তং ‘‘যোনিসো মনসিকারসম্পন্নস্সেতং, ভিক্খৰে, ভিক্খুনো পাটিকঙ্খং – অরিযং অট্ঠঙ্গিকং মগ্গং ভাৰেস্সতি, অরিযং অট্ঠঙ্গিকং মগ্গং বহুলীকরিস্সতী’’তি (সং. নি. ৫.৫৫).

যোনিসো মনসিকারোতি গাথায অযং সঙ্খেপত্থো – সিক্খতি, সিক্খাপদানি তস্স অত্থি, সিক্খনসীলোতি ৰা সেখো. সংসারে ভযং ইক্খতীতি ভিক্খু. তস্স সেখস্স ভিক্খুনো উত্তমত্থস্স অরহত্তস্স পত্তিযা অধিগমায যথা যোনিসো মনসিকারো, এৰং বহুকারো বহূপকারো অঞ্ঞো কোচি ধম্মো নত্থি. কস্মা? যস্মা যোনিসো উপাযেন মনসিকারং পুরক্খত্ৰা পদহং চতুব্বিধসম্মপ্পধানৰসেন পদহন্তো, খযং দুক্খস্স পাপুণে সংকিলেসৰট্টদুক্খস্স পরিক্খযং পরিযোসানং নিব্বানং পাপুণে অধিগচ্ছেয্য, তস্মা যোনিসো মনসিকারো বহুকারোতি.

ছট্ঠসুত্তৰণ্ণনা নিট্ঠিতা.