৮. সারিপুত্তত্থেরৰত্থু

অসারে সারমতিনোতি ইমং ধম্মদেসনং সত্থা ৰেল়ুৰনে ৰিহরন্তো অগ্গসাৰকেহি নিৰেদিতং সঞ্চযস্স অনাগমনং আরব্ভ কথেসি.

তত্রাযং অনুপুব্বিকথা – অম্হাকঞ্হি সত্থা ইতো কপ্পসতসহস্সাধিকানং চতুন্নং অসঙ্খ্যেয্যানং মত্থকে অমরৰতিযা নাম নগরে সুমেধো নাম ব্রাহ্মণকুমারো হুত্ৰা সব্বসিপ্পেসু নিপ্ফত্তিং পত্ৰা মাতাপিতূনং অচ্চযেন অনেককোটিসঙ্খ্যং ধনং পরিচ্চজিত্ৰা ইসিপব্বজ্জং পব্বজিত্ৰা হিমৰন্তে ৰসন্তো ঝানাভিঞ্ঞা নিব্বত্তেত্ৰা আকাসেন গচ্ছন্তো দীপঙ্করদসবলস্স সুদস্সনৰিহারতো রম্মৰতীনগরং পৰিসনত্থায মগ্গং সোধযমানং জনং দিস্ৰা সযম্পি একং পদেসং গহেত্ৰা মগ্গং সোধেতি. তস্মিং অসোধিতেযেৰ আগতস্স সত্থুনো অত্তানং সেতুং কত্ৰা কললে অজিনচম্মং অত্থরিত্ৰা ‘‘সত্থা সসাৰকসঙ্ঘো কললং অনক্কমিত্ৰা মং অক্কমন্তো গচ্ছতূ’’তি নিপন্নো. সত্থারা তং দিস্ৰাৰ ‘‘বুদ্ধঙ্কুরো এস, অনাগতে কপ্পসতসহস্সাধিকানং চতুন্নং অসঙ্খ্যেয্যানং পরিযোসানে গোতমো নাম বুদ্ধো ভৰিস্সতী’’তি ব্যাকতো. তস্স সত্থুনো অপরভাগে ‘‘কোণ্ডঞ্ঞো মঙ্গলো সুমনো রেৰতো সোভিতো অনোমদস্সী পদুমো নারদো পদুমুত্তরো সুমেধো সুজাতো পিযদস্সী অত্থদস্সী ধম্মদস্সী সিদ্ধত্থো তিস্সো ফুস্সো ৰিপস্সী সিখী ৰেস্সভূ ককুসন্ধো কোণাগমনো কস্সপো’’তি লোকং ওভাসেত্ৰা উপ্পন্নানং ইমেসম্পি তেৰীসতিযা বুদ্ধানং সন্তিকে লদ্ধব্যাকরণো, ‘‘দস পারমিযো, দস উপপারমিযো, দস পরমত্থপারমিযো’’তি সমত্তিংস পারমিযো পূরেত্ৰা ৰেস্সন্তরত্তভাৰে ঠিতো পথৰিকম্পনানি মহাদানানি দত্ৰা পুত্তদারং পরিচ্চজিত্ৰা আযুপরিযোসানে তুসিতপুরে নিব্বত্তিত্ৰা তত্থ যাৰতাযুকং ঠত্ৰা দস সহস্সচক্কৰাল়দেৰতাহি সন্নিপতিত্ৰা –

‘‘কালো দেৰ মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি. (বু. ৰং. ১.৬৭) –

ৰুত্তে –

‘‘কালং দেসঞ্চ দীপঞ্চ, কুলং মাতরমেৰ চ;

ইমে পঞ্চ ৰিলোকেত্ৰা, উপ্পজ্জতি মহাযসো’’তি. –

পঞ্চ মহাৰিলোকনানি ৰিলোকেত্ৰা ততো চুতো সক্যরাজকুলে পটিসন্ধিং গহেত্ৰা দসমাসচ্চযেন মাতুকুচ্ছিতো ৰিজাযি. সোল়সৰস্সকালে তত্থ মহাসম্পত্তিযা পরিহরিযমানো অনুক্কমেন ভদ্রযোব্বনং পত্ৰা তিণ্ণং উতূনং অনুচ্ছৰিকেসু তীসু পাসাদেসু দেৰলোকসিরিং ৰিয রজ্জসিরিং অনুভৰন্তো উয্যানকীল়ায গমনসমযে অনুক্কমেন জিণ্ণব্যাধিমতসঙ্খাতে তযো দেৰদূতে দিস্ৰা সঞ্জাতসংৰেগো নিৰত্তিত্ৰা চতুত্থৰারে পব্বজিতং দিস্ৰা, ‘‘সাধু পব্বজ্জা’’তি পব্বজ্জায রুচিং উপ্পাদেত্ৰা উয্যানং গন্ত্ৰা তত্থ দিৰসং খেপেত্ৰা মঙ্গলপোক্খরণীতীরে নিসিন্নো কপ্পকৰেসং গহেত্ৰা আগতেন ৰিস্সকম্মেন দেৰপুত্তেন অলঙ্কতপটিযত্তো রাহুলকুমারস্স জাতসাসনং সুত্ৰা পুত্তসিনেহস্স বলৰভাৰং ঞত্ৰা, ‘‘যাৰ ইদং বন্ধনং ন ৰড্ঢতি, তাৰদেৰ নং ছিন্দিস্সামী’’তি চিন্তেত্ৰা সাযং নগরং পৰিসন্তো –

‘‘নিব্বুতা নূন সা মাতা, নিব্বুতো নূন সো পিতা;

নিব্বুতা নূন সা নারী, যস্সাযং ঈদিসো পতী’’তি. –

কিসাগোতমিযা নাম পিতুচ্ছাধীতায ভাসিতং ইমং গাথং সুত্ৰা, ‘‘অহং ইমায নিব্বুতপদং সাৰিতো’’তি মুত্তাহারং ওমুঞ্চিত্ৰা তস্সা পেসেত্ৰা অত্তনো ভৰনং পৰিসিত্ৰা সিরিসযনে নিসিন্নো নিদ্দোপগতানং নাটকিত্থীনং ৰিপ্পকারং দিস্ৰা নিব্বিন্নহদযো ছন্নং উট্ঠাপেত্ৰা কণ্ডকং আহরাপেত্ৰা তং আরুয্হ ছন্নসহাযো দসসহস্সচক্কৰাল়দেৰতাহি পরিৰুতো মহাভিনিক্খমনং নিক্খমিত্ৰা অনোমানদীতীরে পব্বজিত্ৰা অনুক্কমেন রাজগহং গন্ত্ৰা তত্থ পিণ্ডায চরিত্ৰা পণ্ডৰপব্বতপব্ভারে নিসিন্নো মগধরঞ্ঞা রজ্জেন নিমন্তিযমানো তং পটিক্খিপিত্ৰা সব্বঞ্ঞুতং পত্ৰা অত্তনো ৰিজিতং আগমনত্থায তেন গহিতপটিঞ্ঞো আল়ারঞ্চ উদকঞ্চ উপসঙ্কমিত্ৰা তেসং সন্তিকে অধিগতৰিসেসং অনলঙ্করিত্ৰা ছব্বস্সানি মহাপধানং পদহিত্ৰা ৰিসাখপুণ্ণমদিৰসে পাতোৰ সুজাতায দিন্নপাযসং পরিভুঞ্জিত্ৰা নেরঞ্জরায নদিযা সুৰণ্ণপাতিং পৰাহেত্ৰা নেরঞ্জরায নদিযা তীরে মহাৰনসণ্ডে নানাসমাপত্তীহি দিৰসভাগং ৰীতিনামেত্ৰা সাযন্হসমযে সোত্তিযেন দিন্নং তিণং গহেত্ৰা কাল়েন নাগরাজেন অভিত্থুতগুণো বোধিমণ্ডং আরুয্হ তিণানি সন্থরিত্ৰা ‘‘ন তাৰিমং পল্লঙ্কং ভিন্দিস্সামি, যাৰ মে অনুপাদায আসৰেহি চিত্তং ন মুচ্চিস্সতী’’তি পটিঞ্ঞং কত্ৰা পুরত্থাভিমুখো নিসীদিত্ৰা সূরিযে অনত্থঙ্গমিতেযেৰ মারবলং ৰিধমিত্ৰা পঠমযামে পুব্বেনিৰাসঞাণং, মজ্ঝিমযামে চুতূপপাতঞাণং পত্ৰা পচ্ছিমযামাৰসানে পচ্চযাকারে ঞাণং ওতারেত্ৰা অরুণুগ্গমনে দসবলচতুৰেসারজ্জাদিসব্বগুণপটিমণ্ডিতং সব্বঞ্ঞুতঞ্ঞাণং পটিৰিজ্ঝিত্ৰা সত্তসত্তাহং বোধিমণ্ডে ৰীতিনামেত্ৰা অট্ঠমে সত্তাহে অজপালনিগ্রোধমূলে নিসিন্নো ধম্মগম্ভীরতাপচ্চৰেক্খণেন অপ্পোস্সুক্কতং আপজ্জমানো দসসহস্সচক্কৰাল়মহাব্রহ্মপরিৰারেন সহম্পতিব্রহ্মুনা আযাচিতধম্মদেসনো বুদ্ধচক্খুনা লোকং ৰোলোকেত্ৰা ব্রহ্মুনো অজ্ঝেসনং অধিৰাসেত্ৰা, ‘‘কস্স নু খো অহং পঠমং ধম্মং দেসেয্য’’ন্তি ওলোকেন্তো আল়ারুদকানং কালকতভাৰং ঞত্ৰা পঞ্চৰগ্গিযানং ভিক্খূনং বহূপকারতং অনুস্সরিত্ৰা উট্ঠাযাসনা কাসিপুরং গচ্ছন্তো অন্তরামগ্গে উপকেন সদ্ধিং মন্তেত্ৰা আসাল়্হিপুণ্ণমদিৰসে ইসিপতনে মিগদাযে পঞ্চৰগ্গিযানং ৰসনট্ঠানং পত্ৰা তে অননুচ্ছৰিকেন সমুদাচারেন সমুদাচরন্তে সঞ্ঞাপেত্ৰা অঞ্ঞাতকোণ্ডঞ্ঞপ্পমুখে অট্ঠারস ব্রহ্মকোটিযো অমতপানং পাযেন্তো ধম্মচক্কং পৰত্তেত্ৰা পৰত্তিতৰরধম্মচক্কো পঞ্চমিযং পক্খস্স সব্বেপি তে ভিক্খূ অরহত্তে পতিট্ঠাপেত্ৰা তং দিৰসমেৰ যসকুলপুত্তস্স উপনিস্সযসম্পত্তিং দিস্ৰা তং রত্তিভাগে নিব্বিন্দিত্ৰা গেহং পহায নিক্খন্তং দিস্ৰা, ‘‘এহি যসা’’তি পক্কোসিত্ৰা তস্মিংযেৰ রত্তিভাগে সোতাপত্তিফলং পাপেত্ৰা পুনদিৰসে অরহত্তং পাপেত্ৰা অপরেপি তস্স সহাযকে চতুপণ্ণাস জনে এহিভিক্খুপব্বজ্জায পব্বাজেত্ৰা অরহত্তং পাপেসি.

এৰং লোকে একসট্ঠিযা অরহন্তেসু জাতেসু ৰুট্ঠৰস্সো পৰারেত্ৰা, ‘‘চরথ, ভিক্খৰে, চারিক’’ন্তি সট্ঠি ভিক্খূ দিসাসু পেসেত্ৰা সযং উরুৰেলং গচ্ছন্তো অন্তরামগ্গে কপ্পাসিকৰনসণ্ডে তিংস জনে ভদ্দৰগ্গিযকুমারে ৰিনেসি. তেসু সব্বপচ্ছিমকো সোতাপন্নো সব্বুত্তমো অনাগামী অহোসি. তে সব্বেপি এহিভিক্খুভাৰেনেৰ পব্বাজেত্ৰা দিসাসু পেসেত্ৰা সযং উরুৰেলং গন্ত্ৰা অড্ঢুড্ঢানি পাটিহারিযসহস্সানি দস্সেত্ৰা উরুৰেলকস্সপাদযো সহস্সজটিলপরিৰারে তেভাতিকজটিলে ৰিনেত্ৰা এহিভিক্খুভাৰেনেৰ পব্বাজেত্ৰা গযাসীসে নিসীদাপেত্ৰা আদিত্তপরিযাযদেসনায (মহাৰ. ৫৪; সং. নি. ৪.২৮) অরহত্তে পতিট্ঠাপেত্ৰা তেন অরহন্তসহস্সেন পরিৰুতো ‘‘বিম্বিসাররঞ্ঞো দিন্নং পটিঞ্ঞং মোচেস্সামী’’তি রাজগহনগরূপচারে লট্ঠিৰনুয্যানং গন্ত্ৰা, ‘‘সত্থা কির আগতো’’তি সুত্ৰা দ্ৰাদসনহুতেহি ব্রাহ্মণগহপতিকেহি সদ্ধিং আগতস্স রঞ্ঞো মধুরধম্মকথং কথেন্তো রাজানং একাদসহি নহুতেহি সদ্ধিং সোতাপত্তিফলে পতিট্ঠাপেত্ৰা একনহুতং সরণেসু পতিট্ঠাপেত্ৰা পুনদিৰসে সক্কেন দেৰরাজেন মাণৰকৰণ্ণং গহেত্ৰা অভিত্থুতগুণো রাজগহনগরং পৰিসিত্ৰা রাজনিৰেসনে কতভত্তকিচ্চো ৰেল়ুৰনারামং পটিগ্গহেত্ৰা তত্থেৰ ৰাসং কপ্পেসি. তত্থ নং সারিপুত্তমোগ্গল্লানা উপসঙ্কমিংসু.

তত্রাযং অনুপুব্বিকথা – অনুপ্পন্নেযেৰ হি বুদ্ধে রাজগহতো অৰিদূরে উপতিস্সগামো কোলিতগামোতি দ্ৰে ব্রাহ্মণগামা অহেসুং. তেসু উপতিস্সগামে সারিযা নাম ব্রাহ্মণিযা গব্ভস্স পতিট্ঠিতদিৰসেযেৰ কোলিতগামে মোগ্গলিযা নাম ব্রাহ্মণিযাপি গব্ভো পতিট্ঠাসি. তানি কির দ্ৰেপি কুলানি যাৰ সত্তমা কুলপরিৰট্টা আবদ্ধপটিবদ্ধসহাযকানেৰ অহেসুং, তাসং দ্ৰিন্নম্পি একদিৰসমেৰ গব্ভপরিহারং অদংসু. তা উভোপি দসমাসচ্চেযেন পুত্তে ৰিজাযিংসু. নামগ্গহণদিৰসে সারিযা ব্রাহ্মণিযা পুত্তস্স উপতিস্সগামকে জেট্ঠকুলস্স পুত্তত্তা উপতিস্সোতি নামং করিংসু, ইতরস্স কোলিতগামে জেট্ঠকুলস্স পুত্তত্তা কোলিতোতি নামং করিংসু. তে উভোপি ৰুড্ঢিমন্ৰায সব্বসিপ্পানং পারং অগমংসু. উপতিস্সমাণৰস্স কীল়নত্থায নদিং ৰা উয্যানং ৰা গমনকালে পঞ্চ সুৰণ্ণসিৰিকসতানি পরিৰারানি হোন্তি, কোলিতমাণৰস্স পঞ্চ আজঞ্ঞযুত্তরথসতানি. দ্ৰেপি জনা পঞ্চপঞ্চমাণৰকসতপরিৰারা হোন্তি. রাজগহে চ অনুসংৰচ্ছরং গিরগ্গসমজ্জো নাম অহোসি. তেসং দ্ৰিন্নম্পি একট্ঠানেযেৰ মঞ্চং বন্ধন্তি. দ্ৰেপি একতো নিসীদিত্ৰা সমজ্জং পস্সন্তা হসিতব্বট্ঠানে হসন্তি, সংৰেগট্ঠানে সংৰেজেন্তি, দাযং দাতুং যুত্তট্ঠানে দাযং দেন্তি. তেসং ইমিনাৰ নিযামেন একদিৰসং সমজ্জং পস্সন্তানং পরিপাকগতত্তা ঞাণস্স পুরিমদিৰসেসু ৰিয হসিতব্বট্ঠানে হাসো ৰা সংৰেগট্ঠানে সংৰেগো ৰা দাতুং যুত্তট্ঠানে দানং ৰা নাহোসি. দ্ৰেপি পন জনা এৰং চিন্তযিংসু – ‘‘কিমেত্থ ওলোকেতব্বং অত্থি, সব্বেপিমে অপ্পত্তে ৰস্সসতে অপ্পণ্ণত্তিকভাৰং গমিস্সন্তি, অম্হেহি পন একং মোক্খধম্মং পরিযেসিতুং ৰট্টতী’’তি আরম্মণং গহেত্ৰা নিসীদিংসু. ততো কোলিতো উপতিস্সং আহ – ‘‘সম্ম উপতিস্স, ন ত্ৰং অঞ্ঞেসু দিৰসেসু ৰিয হট্ঠপহট্ঠো, ইদানি অনত্তমনধাতুকোসি, কিং তে সল্লক্খিত’’ন্তি? ‘‘সম্ম কোলিত, এতেসং ৰোলোকনে সারো নত্থি, নিরত্থকমেতং, অত্তনো মোক্খধম্মং গৰেসিতুং ৰট্টতী’’তি ইদং চিন্তযন্তো নিসিন্নোম্হি. ত্ৰং পন কস্মা অনত্তমনোসীতি? সোপি তথেৰ আহ. অথস্স অত্তনা সদ্ধিং একজ্ঝাসযতং ঞত্ৰা উপতিস্সো আহ – ‘‘অম্হাকং উভিন্নম্পি সুচিন্তিকং, মোক্খধম্মং পন গৰেসন্তেহি একা পব্বজ্জা লদ্ধুং ৰট্টতি. কস্স সন্তিকে পব্বজামা’’তি?

তেন খো পন সমযেন সঞ্চযো নাম পরিব্বাজকো রাজগহে পটিৰসতি মহতিযা পরিব্বাজকপরিসায সদ্ধিং. তে ‘‘তস্স সন্তিকে পব্বজিস্সামা’’তি পঞ্চমাণৰকসতানি ‘‘সিৰিকাযো চ রথে চ গহেত্ৰা গচ্ছথা’’তি উয্যোজেত্ৰা একায সিৰিকায একেন রথেন গন্ত্ৰা সঞ্চযস্স সন্তিকে পব্বজিংসু. তেসং পব্বজিতকালতো পট্ঠায সঞ্চযো অতিরেকলাভগ্গযসগ্গপ্পত্তো অহোসি. তে কতিপাহেনেৰ সব্বং সঞ্চযস্স সমযং পরিমদ্দিত্ৰা, ‘‘আচরিয, তুম্হাকং জাননসমযো এত্তকোৰ, উদাহু উত্তরিম্পি অত্থী’’তি পুচ্ছিংসু. ‘‘এত্তকোৰ সব্বং তুম্হেহি ঞাত’’ন্তি ৰুত্তে চিন্তযিংসু – ‘‘এৰং সতি ইমস্স সন্তিকে ব্রহ্মচরিযৰাসো নিরত্থকো, মযং যং মোক্খধম্মং গৰেসিতুং নিক্খন্তা, সো ইমস্স সন্তিকে উপ্পাদেতুং ন সক্কা, মহা খো পন জম্বুদীপো, গামনিগমরাজধানিযো চরন্তা অদ্ধা মোক্খধম্মদেসকং কঞ্চি আচরিযং লভিস্সামা’’তি. ততো পট্ঠায, ‘‘যত্থ যত্থ পণ্ডিতা সমণব্রাহ্মণা অত্থী’’তি ৰদন্তি, তত্থ তত্থ গন্ত্ৰা সাকচ্ছং করোন্তি. তেহি পুট্ঠং পঞ্হং অঞ্ঞে কথেতুং ন সক্কোন্তি, তে পন তেসং পঞ্হং ৰিস্সজ্জেন্তি. এৰং সকলজম্বুদীপং পরিগ্গণ্হিত্ৰা নিৰত্তিত্ৰা সকট্ঠানমেৰ আগন্ত্ৰা, ‘‘সম্ম কোলিত, অম্হেসু যো পঠমং অমতং অধিগচ্ছতি, সো ইতরস্স আরোচেতূ’’তি কতিকং অকংসুং.

এৰং তেসু কতিকং কত্ৰা ৰিহরন্তেসু সত্থা ৰুত্তানুক্কমেন রাজগহং পত্ৰা ৰেল়ুৰনং পটিগ্গহেত্ৰা ৰেল়ুৰনে ৰিহরতি. তদা ‘‘চরথ, ভিক্খৰে, চারিকং বহুজনহিতাযা’’তি রতনত্তযগুণপকাসনত্থং উয্যোজিতানং একসট্ঠিযা অরহন্তানং অন্তরে পঞ্চৰগ্গিযানং অব্ভন্তরো অস্সজিত্থেরো পটিনিৰত্তিত্ৰা রাজগহং আগতো, পুনদিৰসে পাতোৰ পত্তচীৰরমাদায রাজগহং পিণ্ডায পাৰিসি. তস্মিং সমযে উপতিস্সপরিব্বাজকোপি পাতোৰ ভত্তকিচ্চং কত্ৰা পরিব্বাজকারামং গচ্ছন্তো থেরং দিস্ৰা চিন্তেসি – ‘‘মযা এৰরূপো পব্বজিতো নাম ন দিট্ঠপুব্বোযেৰ, যে লোকে অরহন্তো ৰা অরহত্তমগ্গং ৰা সমাপন্না, অযং তেসং ভিক্খূনং অঞ্ঞতরো, যংনূনাহং ইমং ভিক্খুং উপসঙ্কমিত্ৰা পুচ্ছেয্যং – ‘কংসি ত্ৰং, আৰুসো, উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’’তি? অথস্স এতদহোসি – ‘‘অকালো খো ইমং ভিক্খুং পঞ্হং পুচ্ছিতুং, অন্তরঘরং পৰিট্ঠো পিণ্ডায চরতি, যংনূনাহং ইমং ভিক্খুং পিট্ঠিতো পিট্ঠিতো অনুবন্ধেয্যং, অত্থিকেহি উপঞ্ঞাতং মগ্গ’’ন্তি. সো থেরং লদ্ধপিণ্ডপাতং অঞ্ঞতরং ওকাসং গচ্ছন্তং দিস্ৰা নিসীদিতুকামতঞ্চস্স ঞত্ৰা অত্তনো পরিব্বাজকপীঠকং পঞ্ঞাপেত্ৰা অদাসি, সো ভত্তকিচ্চপরিযোসানেপিস্স অত্তনো কুণ্ডিকায উদকং অদাসি.

এৰং আচরিযৰত্তং কত্ৰা কতভত্তকিচ্চেন থেরেন সদ্ধিং মধুরপটিসন্থারং কত্ৰা এৰমাহ – ‘‘ৰিপ্পসন্নানি খো পন তে, আৰুসো, ইন্দ্রিযানি, পরিসুদ্ধো ছৰিৰণ্ণো পরিযোদাতো, কংসি ত্ৰং, আৰুসো, উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’তি পুচ্ছি. থেরো চিন্তেসি – ‘‘ইমে পরিব্বাজকা নাম সাসনস্স পটিপক্খভূতা, ইমস্স সাসনস্স গম্ভীরতং দস্সেস্সামী’’তি. অত্তনো নৰকভাৰং দস্সেন্তো আহ – ‘‘অহং খো, আৰুসো, নৰো অচিরপব্বজিতো, অধুনাগতো ইমং ধম্মৰিনযং, ন তাৰাহং সক্খিস্সামি ৰিত্থারেন ধম্মং দেসেতু’’ন্তি. পরিব্বাজকো – ‘‘অহং উপতিস্সো নাম, ত্ৰং যথাসত্তিযা অপ্পং ৰা বহুং ৰা ৰদ, এতং নযসতেন নযসহস্সেন পটিৰিজ্ঝিতুং ময্হং ভারো’’তি চিন্তেত্ৰা আহ –

‘‘অপ্পং ৰা বহুং ৰা ভাসস্সু, অত্থংযেৰ মে ব্রূহি;

অত্থেনেৰ মে অত্থো, কিং কাহসি ব্যঞ্জনং বহু’’ন্তি. (মহাৰ. ৬০);

এৰং ৰুত্তে থেরো – ‘‘যে ধম্মা হেতুপ্পভৰা’’তি (মহাৰ. ৬০; অপ. থের ১.১.২৮৬) গাথমাহ. পরিব্বাজকো পঠমপদদ্ৰযমেৰ সুত্ৰা সহস্সনযপটিমণ্ডিতে সোতাপত্তিফলে পতিট্ঠহি, ইতরং পদদ্ৰযং সোতাপন্নকালে নিট্ঠাপেসি. সো সোতাপন্নো হুত্ৰা উপরিৰিসেসে অপ্পৰত্তন্তে ‘‘ভৰিস্সতি এত্থ কারণ’’ন্তি সল্লক্খেত্ৰা থেরং আহ – ‘‘ভন্তে, মা উপরি ধম্মদেসনং ৰড্ঢযিত্থ, এত্তকমেৰ হোতু, কুহিং অম্হাকং সত্থা ৰসতী’’তি? ‘‘ৰেল়ুৰনে, আৰুসো’’তি. ‘‘তেন হি, ভন্তে, তুম্হে পুরতো যাথ, ময্হং একো সহাযকো অত্থি, অম্হেহি চ অঞ্ঞমঞ্ঞং কতিকা কতা ‘অম্হেসু যো অমতং পঠমং অধিগচ্ছতি, সো ইতরস্স আরোচেতূ’তি. অহং তং পটিঞ্ঞং মোচেত্ৰা সহাযকং গহেত্ৰা তুম্হাকং গতমগ্গেনেৰ সত্থু সন্তিকং আগমিস্সামীতি পঞ্চপতিট্ঠিতেন থেরস্স পাদেসু নিপতিত্ৰা তিক্খত্তুং পদক্খিণং কত্ৰা থেরং উয্যোজেত্ৰা পরিব্বাজকারামাভিমুখো অগমাসি’’.

অথ খো কোলিতপরিব্বাজকো তং দূরতোৰ আগচ্ছন্তং দিস্ৰা, ‘‘অজ্জ ময্হং সহাযকস্স মুখৰণ্ণো ন অঞ্ঞদিৰসেসু ৰিয, অদ্ধা তেন অমতং অধিগতং ভৰিস্সতী’’তি অমতাধিগমং পুচ্ছি. সোপিস্স ‘‘আমাৰুসো, অমতং অধিগত’’ন্তি পটিজানিত্ৰা তমেৰ গাথং অভাসি. গাথাপরিযোসানে কোলিতো সোতাপত্তিফলে পতিট্ঠহিত্ৰা আহ – ‘‘কুহিং কির, সম্ম, অম্হাকং সত্থা ৰসতী’’তি? ‘‘ৰেল়ুৰনে কির, সম্ম, এৰং নো আচরিযেন অস্সজিত্থেরেন কথিত’’ন্তি. ‘‘তেন হি, সম্ম, আযাম, সত্থারং পস্সিস্সামা’’তি. সারিপুত্তত্থেরো চ নামেস সদাপি আচরিযপূজকোৰ, তস্মা সহাযং এৰমাহ – ‘‘সম্ম, অম্হেহি অধিগতং অমতং অম্হাকং আচরিযস্স সঞ্চযপরিব্বাজকস্সাপি কথেস্সাম, বুজ্ঝমানো পটিৰিজ্ঝিস্সতি, অপ্পটিৰিজ্ঝন্তো অম্হাকং সদ্দহিত্ৰা সত্থু, সন্তিকং গমিস্সতি, বুদ্ধানং দেসনং সুত্ৰা মগ্গফলপটিৰেধং করিস্সতী’’তি. ততো দ্ৰেপি জনা সঞ্চযস্স সন্তিকং অগমংসু.

সঞ্চযো তে দিস্ৰাৰ – ‘‘কিং, তাতা, কোচি ৰো অমতমগ্গদেসকো লদ্ধো’’তি পুচ্ছি. ‘‘আম, আচরিয, লদ্ধো, বুদ্ধো লোকে উপ্পন্নো, ধম্মো লোকে উপ্পন্নো, সঙ্ঘো লোকে উপ্পন্নো, তুম্হে তুচ্ছে অসারে ৰিচরথ, তস্মা এথ, সত্থু সন্তিকং গমিস্সামা’’তি. ‘‘গচ্ছথ তুম্হে, নাহং সক্খিস্সামী’’তি. ‘‘কিং কারণাহি’’? ‘‘অহং মহাজনস্স আচরিযো হুত্ৰা ৰিচরিং, ৰিচরন্তস্স মে অন্তেৰাসিকৰাসো চাটিযা উদঞ্চনভাৰপ্পত্তি ৰিয হোতি, ন সক্খিস্সামহং অন্তেৰাসিকৰাসং ৰসিতু’’ন্তি. ‘‘মা এৰং করিত্থ, আচরিযা’’তি. ‘‘হোতু, তাতা, গচ্ছথ তুম্হে, নাহং সক্খিস্সামী’’তি. আচরিয, লোকে বুদ্ধস্স উপ্পন্নকালতো পট্ঠায মহাজনো গন্ধমালাদিহত্থো গন্ত্ৰা তমেৰ পূজেস্সতি, মযম্পি তত্থেৰ গমিস্সাম. ‘‘তুম্হে কিং করিস্সথা’’তি? ‘‘তাতা, কিং নু খো ইমস্মিং লোকে দন্ধা বহূ, উদাহু পণ্ডিতা’’তি. ‘‘দন্ধা, আচরিয, বহূ, পণ্ডিতা চ নাম কতিপযা এৰ হোন্তী’’তি. ‘‘তেন হি, তাতা, পণ্ডিতা পণ্ডিতস্স সমণস্স গোতমস্স সন্তিকং গমিস্সন্তি, দন্ধা দন্ধস্স মম সন্তিকং আগমিস্সন্তি, গচ্ছথ তুম্হে, নাহং গমিস্সামী’’তি. তে ‘‘পঞ্ঞাযিস্সথ তুম্হে, আচরিযা’’তি পক্কমিংসু. তেসু গচ্ছন্তেসু সঞ্চযস্স পরিসা ভিজ্জি, তস্মিং খণে আরামো তুচ্ছো অহোসি. সো তুচ্ছং আরামং দিস্ৰা উণ্হং লোহিতং ছড্ডেসি. তেহিপি সদ্ধিং গচ্ছন্তেসু পঞ্চসু পরিব্বাজকসতেসু সঞ্চযস্স অড্ঢতেয্যসতানি নিৰত্তিংসু, অথ খো তে অত্তনো অন্তেৰাসিকেহি অড্ঢতেয্যেহি পরিব্বাজকসতেহি সদ্ধিং ৰেল়ুৰনং অগমংসু.

সত্থা চতুপরিসমজ্ঝে নিসিন্নো ধম্মং দেসেন্তো তে দূরতোৰ দিস্ৰা ভিক্খূ আমন্তেসি – ‘‘এতে, ভিক্খৰে, দ্ৰে সহাযকা আগচ্ছন্তি কোলিতো চ উপতিস্সো চ, এতং মে সাৰকযুগং ভৰিস্সতি অগ্গং ভদ্দযুগ’’ন্তি. তে সত্থারং ৰন্দিত্ৰা একমন্তং নিসীদিংসু, নিসীদিত্ৰা চ পন ভগৰন্তং এতদৰোচুং – ‘‘লভেয্যাম মযং, ভন্তে, ভগৰতো সন্তিকে পব্বজ্জং, লভেয্যাম উপসম্পদ’’ন্তি. ‘‘এথ, ভিক্খৰো’’তি ভগৰা অৰোচ – ‘‘স্ৰাক্খাতো ধম্মো, চরথ ব্রহ্মচরিযং সম্মা দুক্খস্স অন্তকিরিযাযা’’তি. সব্বেপি ইদ্ধিমযপত্তচীৰরধরা সট্ঠিৰস্সিকত্থেরা ৰিয অহেসুং.

অথ নেসং পরিসায চরিতৰসেন সত্থা ধম্মদেসনং ৰড্ঢেসি. ঠপেত্ৰা দ্ৰে অগ্গসাৰকে অৰসেসা অরহত্তং পাপুণিংসু, অগ্গসাৰকানং পন উপরিমগ্গত্তযকিচ্চং ন নিট্ঠাসি. কিং কারণা? সাৰকপারমিঞাণস্স মহন্ততায. অথাযস্মা মহামোগ্গল্লানো পব্বজিতদিৰসতো সত্তমে দিৰসে মগধরট্ঠে কল্লৰালগামকং উপনিস্সায ৰিহরন্তো থিনমিদ্ধে ওক্কমন্তে সত্থারা সংৰেজিতো থিনমিদ্ধং ৰিনোদেত্ৰা তথাগতেন দিন্নং ধাতুকম্মট্ঠানং সুণন্তোৰ উপরিমগ্গত্তযকিচ্চং নিট্ঠাপেত্ৰা সাৰকপারমিঞাণস্স মত্থকং পত্তো. সারিপুত্তত্থেরোপি পব্বজিতদিৰসতো অড্ঢমাসং অতিক্কমিত্ৰা সত্থারা সদ্ধিং তমেৰ রাজগহং উপনিস্সায সূকরখতলেণে ৰিহরন্তো অত্তনো ভাগিনেয্যস্স দীঘনখপরিব্বাজকস্স ৰেদনাপরিগ্গহসুত্তন্তে দেসিযমানে সুত্তানুসারেন ঞাণং পেসেত্ৰা পরস্স ৰড্ঢিতভত্তং পরিভুঞ্জন্তো ৰিয সাৰকপারমিঞাণস্স মত্থকং পত্তো. ননু চাযস্মা মহাপঞ্ঞো, অথ কস্মা মহামোগ্গল্লানতো চিরতরেন সাৰকপারমিঞাণং পাপুণীতি? পরিকম্মমহন্ততায. যথা হি দুগ্গতমনুস্সা যত্থ কত্থচি গন্তুকামা খিপ্পমেৰ নিক্খমন্তি, রাজূনং পন হত্থিৰাহনকপ্পনাদিং মহন্তং পরিকম্মং লদ্ধুং ৰট্টতি, এৰংসম্পদমিদং ৰেদিতব্বং.

তং দিৰসঞ্ঞেৰ পন সত্থা ৰড্ঢমানকচ্ছাযায ৰেল়ুৰনে সাৰকসন্নিপাতং কত্ৰা দ্ৰিন্নং থেরানং অগ্গসাৰকট্ঠানং দত্ৰা পাতিমোক্খং উদ্দিসি. ভিক্খূ উজ্ঝাযিংসু – ‘‘সত্থা মুখোলোকনেন ভিক্খং দেতি, অগ্গসাৰকট্ঠানং দদন্তেন নাম পঠমং পব্বজিতানং পঞ্চৰগ্গিযানং দাতুং ৰট্টতি, এতে অনোলোকেন্তেন যসথেরপ্পমুখানং পঞ্চপণ্ণাসভিক্খূনং দাতুং ৰট্টতি, এতে অনোলোকেন্তেন ভদ্দৰগ্গিযানং তিংসজনানং, এতে অনোলোকেন্তেন উরুৰেলকস্সপাদীনং তেভাতিকানং, এতে পন এত্তকে মহাথেরে পহায সব্বপচ্ছা পব্বজিতানং অগ্গসাৰকট্ঠানং দদন্তেন মুখং ওলোকেত্ৰা দিন্ন’’ন্তি. সত্থা, ‘‘কিং কথেথ, ভিক্খৰে’’তি পুচ্ছিত্ৰা, ‘‘ইদং নামা’’তি ৰুত্তে ‘‘নাহং, ভিক্খৰে, মুখং ওলোকেত্ৰা ভিক্খং দেমি, এতেসং পন অত্তনা অত্তনা পত্থিতপত্থিতমেৰ দেমি. অঞ্ঞাতকোণ্ডঞ্ঞো হি একস্মিং সস্সে নৰ ৰারে অগ্গসস্সদানং দদন্তো অগ্গসাৰকট্ঠানং পত্থেত্ৰা নাদাসি, অগ্গধম্মং পন অরহত্তং সব্বপঠমং পটিৰিজ্ঝিতুং পত্থেত্ৰা অদাসী’’তি. ‘‘কদা পন ভগৰা’’তি? ‘‘সুণিস্সথ, ভিক্খৰে’’তি. ‘‘আম, ভন্তে’’তি, ভগৰা অতীতং আহরি –

ভিক্খৰে, ইতো একনৰুতিকপ্পে ৰিপস্সী নাম ভগৰা লোকে উদপাদি. তদা মহাকাল়ো চূল়কাল়োতি দ্ৰেভাতিকা কুটুম্বিকা মহন্তং সালিক্খেত্তং ৰপাপেসুং. অথেকদিৰসং চূল়কাল়ো সালিক্খেত্তং গন্ত্ৰা একং সালিগব্ভং ফালেত্ৰা খাদি, তং অতিমধুরং অহোসি. সো বুদ্ধপ্পমুখস্স সঙ্ঘস্স সালিগব্ভদানং দাতুকামো হুত্ৰা জেট্ঠভাতিকং উপসঙ্কমিত্ৰা, ‘‘ভাতিক, সালিগব্ভং ফালেত্ৰা বুদ্ধানং অনুচ্ছৰিকং কত্ৰা পচাপেত্ৰা দানং দেমা’’তি আহ. ‘‘কিং ৰদেসি, তাত, সালিগব্ভং ফালেত্ৰা দানং নাম নেৰ অতীতে ভূতপুব্বং, ন অনাগতেপি ভৰিস্সতি, মা সস্সং নাসযী’’তি; ৰুত্তোপি সো পুনপ্পুনং যাচিযেৰ. অথ নং ভাতা, ‘‘তেন হি সালিক্খেত্তং দ্ৰে কোট্ঠাসে কত্ৰা মম কোট্ঠাসং অনামসিত্ৰা অত্তনো কোট্ঠাসে খেত্তে যং ইচ্ছসি, তং করোহী’’তি আহ. সো ‘‘সাধূ’’তি খেত্তং ৰিভজিত্ৰা বহূ মনুস্সে হত্থকম্মং যাচিত্ৰা সালিগব্ভং ফালেত্ৰা নিরুদকেন খীরেন পচাপেত্ৰা সপ্পিমধুসক্খরাদীহি যোজেত্ৰা বুদ্ধপ্পমুখস্স ভিক্খুসঙ্ঘস্স দানং দত্ৰা ভত্তকিচ্চপরিযোসানে – ‘‘ইদং, ভন্তে, মম অগ্গদানং অগ্গধম্মস্স সব্বপঠমং পটিৰেধায সংৰত্ততূ’’তি আহ. সত্থা ‘‘এৰং হোতূ’’তি অনুমোদনমকাসি.

সো খেত্তং গন্ত্ৰা ওলোকেন্তো সকলক্খেত্তং কণ্ণিকবদ্ধেহি ৰিয সালিসীসেহি সঞ্ছন্নং দিস্ৰা পঞ্চৰিধপীতিং পটিলভিত্ৰা, ‘‘লাভা ৰত মে’’তি চিন্তেত্ৰা পুথুককালে পুথুকগ্গং নাম অদাসি, গামৰাসীহি সদ্ধিং অগ্গসস্সদানং নাম অদাসি, লাযনে লাযনগ্গং, ৰেণিকরণে ৰেণগ্গং, কলাপাদীসু কলাপগ্গং, খলগ্গং, খলভণ্ডগ্গং, কোট্ঠগ্গন্তি. এৰং একসস্সে নৰ ৰারে অগ্গদানং অদাসি. তস্স সব্বৰারেসু গহিতগহিতট্ঠানং পরিপূরি, সস্সং অতিরেকং উট্ঠানসম্পন্নং অহোসি. ধম্মো হি নামেস অত্তানং রক্খন্তং রক্খতি. তেনাহ ভগৰা –

‘‘ধম্মো হৰে রক্খতি ধম্মচারিং,

ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে,

ন দুগ্গতিং গচ্ছতি ধম্মচারী’’তি. (থেরগা. ৩০৩; জা. ১.১০.১০২) –

‘‘এৰমেস ৰিপস্সীসম্মাসম্বুদ্ধকালে অগ্গধম্মং পঠমং পটিৰিজ্ঝিতুং পত্থেন্তো নৰ ৰারে অগ্গদানানি অদাসি. ইতো সতসহস্সকপ্পমত্থকে পন হংসৰতীনগরে পদুমুত্তরসম্বুদ্ধকালেপি সত্তাহং মহাদানং দত্ৰা তস্স ভগৰতো পাদমূলে নিপজ্জিত্ৰা অগ্গধম্মস্স পঠমং পটিৰিজ্ঝনত্থমেৰ পত্থনং ঠপেসি. ইতি ইমিনা পত্থিতমেৰ মযা দিন্নং, নাহং, ভিক্খৰে, মুখং ওলোকেত্ৰা দেমী’’তি.

‘‘যসকুলপুত্তপ্পমুখা পঞ্চপঞ্ঞাস জনা কিং কম্মং করিংসু, ভন্তে’’তি? ‘‘এতেপি একস্স বুদ্ধস্স সন্তিকে অরহত্তং পত্থেন্তা বহুং পুঞ্ঞকম্মং কত্ৰা অপরভাগে অনুপ্পন্নে বুদ্ধে সহাযকা হুত্ৰা ৰগ্গবন্ধনেন পুঞ্ঞানি করোন্তা অনাথমতসরীরানি পটিজগ্গন্তা ৰিচরিংসু. তে একদিৰসং সগব্ভং ইত্থিং কালকতং দিস্ৰা, ‘ঝাপেস্সামা’তি সুসানং হরিংসু. তেসু পঞ্চ জনে ‘তুম্হে ঝাপেথা’তি সুসানে ঠপেত্ৰা সেসা গামং পৰিট্ঠা. যসদারকো তং মতসরীরং সূলেহি ৰিজ্ঝিত্ৰা পরিৰত্তেত্ৰা পরিৰত্তেত্ৰা ঝাপেন্তো অসুভসঞ্ঞং পটিলভি, ইতরেসম্পি চতুন্নং জনানং – ‘পস্সথ, ভো, ইমং সরীরং তত্থ তত্থ ৰিদ্ধংসিতচম্মং, কবরগোরূপং ৰিয অসুচিং দুগ্গন্ধং পটিকূল’ন্তি দস্সেসি. তেপি তত্থ অসুভসঞ্ঞং পটিলভিংসু. তে পঞ্চপি জনা গামং গন্ত্ৰা সেসসহাযকানং কথযিংসু. যসো পন দারকো গেহং গন্ত্ৰা মাতাপিতূনঞ্চ ভরিযায চ কথেসি. তে সব্বেপি অসুভং ভাৰযিংসু. ইদমেতেসং পুব্বকম্মং. তেনেৰ যসস্স ইত্থাগারে সুসানসঞ্ঞা উপ্পজ্জি, তায চ উপনিস্সযসম্পত্তিযা সব্বেসম্পি ৰিসেসাধিগমো নিব্বত্তি. এৰং ইমেপি অত্তনা পত্থিতমেৰ লভিংসু. নাহং মুখং ওলোকেত্ৰা দম্মী’’তি.

‘‘ভদ্দৰগ্গিযসহাযকা পন কিং কম্মং করিংসু, ভন্তে’’তি? ‘‘এতেপি পুব্ববুদ্ধানং সন্তিকে অরহত্তং পত্থেত্ৰা পুঞ্ঞানি কত্ৰা অপরভাগে অনুপ্পন্নে বুদ্ধে তিংস ধুত্তা হুত্ৰা তুণ্ডিলোৰাদং সুত্ৰা সট্ঠিৰস্সসহস্সানি পঞ্চ সীলানি রক্খিংসু. এৰং ইমেপি অত্তনা পত্থিতমেৰ লভিংসু. নাহং মুখং ওলোকেত্ৰা দম্মী’’তি.

‘‘উরুৰেলকস্সপাদযো পন কিং কম্মং করিংসু, ভন্তে’’তি? ‘‘তেপি অরহত্তমেৰ পত্থেত্ৰা পুঞ্ঞানি করিংসু. ইতো হি দ্ৰেনৰুতিকপ্পে তিস্সো ফুস্সোতি দ্ৰে বুদ্ধা উপ্পজ্জিংসু. ফুস্সবুদ্ধস্স মহিন্দো নাম রাজা পিতা অহোসি. তস্মিং পন সম্বোধিং পত্তে রঞ্ঞো কনিট্ঠপুত্তো পঠমঅগ্গসাৰকো পুরোহিতপুত্তো দুতিযঅগ্গসাৰকো অহোসি. রাজা সত্থু সন্তিকং গন্ত্ৰা – ‘জেট্ঠপুত্তো মে বুদ্ধো, কনিট্ঠপুত্তো পঠমঅগ্গসাৰকো, পুরোহিতপুত্তো দুতিযঅগ্গসাৰকো’তি তে ওলোকেত্ৰা, ‘মমেৰ বুদ্ধো, মমেৰ ধম্মো, মমেৰ সঙ্ঘো, নমো তস্স ভগৰতো অরহতো সম্মাসম্বুদ্ধস্সা’তি তিক্খত্তুং উদানং উদানেত্ৰা সত্থু পাদমূলে নিপজ্জিত্ৰা, ‘ভন্তে, ইদানি মে নৰুতিৰস্সসহস্সপরিমাণস্স আযুনো কোটিযং নিসীদিত্ৰা নিদ্দাযনকালো ৰিয অঞ্ঞেসং গেহদ্ৰারং অগন্ত্ৰা যাৰাহং জীৰামি, তাৰ মে চত্তারো পচ্চযে অধিৰাসেথা’তি পটিঞ্ঞং গহেত্ৰা নিবদ্ধং বুদ্ধুপট্ঠানং করোতি. রঞ্ঞো পন অপরেপি ততো পুত্তা অহেসুং. তেসু জেট্ঠস্স পঞ্চ যোধসতানি পরিৰারানি, মজ্ঝিমস্স তীণি, কনিট্ঠস্স দ্ৰে. তে ‘মযম্পি ভাতিকং ভোজেস্সামা’তি পিতরং ওকাসং যাচিত্ৰা অলভমানা পুনপ্পুনং যাচন্তাপি অলভিত্ৰা পচ্চন্তে কুপিতে তস্স ৰূপসমনত্থায পেসিতা পচ্চন্তং ৰূপসমেত্ৰা পিতু সন্তিকং আগমিংসু. অথ নে পিতা আলিঙ্গিত্ৰা সীসে চুম্বিত্ৰা, ‘ৰরং ৰো, তাতা, দম্মী’তি আহ.

‘‘তে ‘সাধু দেৰা’তি ৰরং গহিতকং কত্ৰা পুন কতিপাহচ্চযেন পিতরা ‘গণ্হথ, তাতা, ৰর’ন্তি ৰুত্তা, ‘‘দেৰ, অম্হাকং অঞ্ঞেন কেনচি অত্থো নত্থি, ইতো পট্ঠায মযং ভাতিকং ভোজেস্সাম, ইমং নো ৰরং দেহী’’তি আহংসু. ‘ন দেমি, তাতা’তি. ‘নিচ্চকালং অদেন্তো সত্ত সংৰচ্ছরানি দেথ, দেৰা’তি. ‘ন দেমি, তাতা’তি. ‘তেন হি ছ পঞ্চ চত্তারি তীণি দ্ৰে একং সংৰচ্ছরং দেথ, দেৰা’তি. ‘ন দেমি, তাতা’তি. ‘তেন হি, দেৰ, সত্ত মাসে দেথা’তি. ‘ছ মাসে পঞ্চ মাসে চত্তারো মাসে তযো মাসে দেথ, দেৰা’তি. ‘ন দেমি, তাতা’তি. ‘হোতু, দেৰ, একেকস্স নো একেকং মাসং কত্ৰা তযো মাসে দেথা’তি. ‘সাধু, তাতা, তেন হি তযো মাসে ভোজেথা’তি আহ. তে তুট্ঠা রাজানং ৰন্দিত্ৰা সকট্ঠানমেৰ গতা. তেসং পন তিণ্ণম্পি একোৰ কোট্ঠাগারিকো, একোৰ আযুত্তকো, তস্স দ্ৰাদসনহুতা পুরিসপরিৰারা. তে তে পক্কোসাপেত্ৰা, ‘মযং ইমং তেমাসং দস সীলানি গহেত্ৰা দ্ৰে কাসাৰানি নিৰাসেত্ৰা সত্থারা সহৰাসং ৰসিস্সাম, তুম্হে এত্তকং নাম দানৰত্তং গহেত্ৰা দেৰসিকং নৰুতিসহস্সানং ভিক্খূনং যোধসহস্সস্স চ সব্বং খাদনীযভোজনীযং পৰত্তেয্যাথ. মযঞ্হি ইতো পট্ঠায ন কিঞ্চি ৰক্খামা’তি ৰদিংসু.

‘‘তে তযোপি জনা পরিৰারসহস্সং গহেত্ৰা দস সীলানি সমাদায কাসাযৰত্থানি নিৰাসেত্ৰা ৰিহারেযেৰ ৰসিংসু. কোট্ঠাগারিকো চ আযুত্তকো চ একতো হুত্ৰা তিণ্ণং ভাতিকানং কোট্ঠাগারেহি ৰারেন ৰারেন দানৰত্তং গহেত্ৰা দানং দেন্তি, কম্মকারানং পন পুত্তা যাগুভত্তাদীনং অত্থায রোদন্তি. তে তেসং ভিক্খুসঙ্ঘে অনাগতেযেৰ যাগুভত্তাদীনি দেন্তি. ভিক্খুসঙ্ঘস্স ভত্তকিচ্চাৰসানে কিঞ্চি অতিরেকং ন ভূতপুব্বং. তে ‘অপরভাগে দারকানং দেমা’তি অত্তনাপি গহেত্ৰা খাদিংসু. মনুঞ্ঞং আহারং দিস্ৰা অধিৰাসেতুং নাসক্খিংসু. তে পন চতুরাসীতিসহস্সা অহেসুং. তে সঙ্ঘস্স দিন্নদানৰত্তং খাদিত্ৰা কাযস্স ভেদা পরং মরণা পেত্তিৰিসযে নিব্বত্তিংসু. তেভাতিকা পন পুরিসসহস্সেন সদ্ধিং কালং কত্ৰা দেৰলোকে নিব্বত্তিত্ৰা দেৰলোকা মনুস্সলোকং, মনুস্সলোকা দেৰলোকং সংসরন্তা দ্ৰেনৰুতিকপ্পে খেপেসুং. ‘এৰং তে তযো ভাতরো অরহত্তং পত্থেন্তা তদা কল্যাণকম্মং করিংসু. তে অত্তনা পত্থিতমেৰ লভিংসু. নাহং মুখং ওলোকেত্ৰা দম্মী’’’তি.

তদা পন তেসং আযুত্তকো বিম্বিসারো রাজা অহোসি, কোট্ঠাগারিকো ৰিসাখো উপাসকো. তযো রাজকুমারা তযো জটিলা অহেসুং. তেসং কম্মকারা তদা পেতেসু নিব্বত্তিত্ৰা সুগতিদুগ্গতিৰসেন সংসরন্তা ইমস্মিং কপ্পে চত্তারি বুদ্ধন্তরানি পেতলোকেযেৰ নিব্বত্তিংসু. তে ইমস্মিং কপ্পে সব্বপঠমং উপ্পন্নং চত্তালীসৰস্সসহস্সাযুকং ককুসন্ধং ভগৰন্তং উপসঙ্কমিত্ৰা, ‘‘অম্হাকং আহারং লভনকালং আচিক্খথা’’তি পুচ্ছিংসু. সো ‘‘মম তাৰ কালে ন লভিস্সথ, মম পচ্ছতো মহাপথৰিযা যোজনমত্তং অভিরুল়্হায কোণাগমনো নাম বুদ্ধো উপ্পজ্জিস্সতি, তং পুচ্ছেয্যাথা’’তি আহ. তে তত্তকং কালং খেপেত্ৰা তস্মিং উপ্পন্নে তং পুচ্ছিংসু. সোপি ‘‘মম কালে ন লভিস্সথ, মম পচ্ছতো মহাপথৰিযা যোজনমত্তং অভিরুল়্হায কস্সপো নাম বুদ্ধো উপ্পজ্জিস্সতি, তং পুচ্ছেয্যাথা’’তি আহ. তে তত্তকং কালং খেপেত্ৰা তস্মিং উপ্পন্নে তং পুচ্ছিংসু. সোপি ‘‘মম কালে ন লভিস্সথ, মম পন পচ্ছতো মহাপথৰিযা যোজনমত্তং অভিরুল়্হায গোতমো নাম বুদ্ধো উপ্পজ্জিস্সতি, তদা তুম্হাকং ঞাতকো বিম্বিসারো নাম রাজা ভৰিস্সতি, সো সত্থু দানং দত্ৰা তুম্হাকং পত্তিং পাপেস্সতি, তদা লভিস্সথা’’তি আহ. তেসং একং বুদ্ধন্তরং স্ৰেদিৰসসদিসং অহোসি. তে তথাগতে উপ্পন্নে বিম্বিসাররঞ্ঞা পঠমদিৰসং দানে দিন্নে পত্তিং অলভিত্ৰা রত্তিভাগে ভেরৰসদ্দং কত্ৰা রঞ্ঞো অত্তানং দস্সযিংসু. সো পুনদিৰসে ৰেল়ুৰনং গন্ত্ৰা তথাগতস্স তং পৰত্তিং আরোচেসি.

সত্থা, ‘‘মহারাজ, ইতো দ্ৰেনৰুতিকপ্পমত্থকে ফুস্সবুদ্ধকালে এতে তৰ ঞাতকা, ভিক্খুসঙ্ঘস্স দিন্নদানৰত্তং খাদিত্ৰা পেতলোকে নিব্বত্তিত্ৰা সংসরন্তা ককুসন্ধাদযো বুদ্ধে পুচ্ছিত্ৰা তেহি ইদঞ্চিদঞ্চ ৰুত্তা এত্তকং কালং তৰ দানং পচ্চাসীসমানা হিয্যো তযা দানে দিন্নে পত্তিং অলভমানা এৰমকংসূ’’তি আহ. ‘‘কিং পন, ভন্তে, ইদানিপি দিন্নে লভিস্সন্তী’’তি? ‘‘আম, মহারাজা’’তি. রাজা বুদ্ধপ্পমুখং ভিক্খুসঙ্ঘং নিমন্তেত্ৰা পুনদিৰসে মহাদানং দত্ৰা, ‘‘ভন্তে, ইতো তেসং পেতানং দিব্বঅন্নপানং সম্পজ্জতূ’’তি পত্তিং অদাসি, তেসং তথেৰ নিব্বত্তি. পুনদিৰসে নগ্গা হুত্ৰা অত্তানং দস্সেসুং. রাজা ‘‘অজ্জ, ভন্তে, নগ্গা হুত্ৰা অত্তানং দস্সেসু’’ন্তি আরোচেসি. ‘‘ৰত্থানি তে ন দিন্নানি, মহারাজা’’তি. রাজাপি পুনদিৰসে বুদ্ধপ্পমুখস্স ভিক্খুসঙ্ঘস্স চীৰরদানং দত্ৰা, ‘‘ইতো তেসং পেতানং দিব্বৰত্থানি হোন্তূ’’তি পাপেসি. তঙ্খণঞ্ঞেৰ তেসং দিব্বৰত্থানি উপ্পজ্জিংসু. তে পেতত্তভাৰং ৰিজহিত্ৰা দিব্বত্তভাৰে সণ্ঠহিংসু. সত্থা অনুমোদনং করোন্তো ‘‘তিরোকুট্টেসু তিট্ঠন্তী’’তিআদিনা (খু. পা. ৭.১; পে. ৰ. ১৪) তিরোকুট্টানুমোদনং অকাসি. অনুমোদনাৰসানে চতুরাসীতিযা পাণসহস্সানং ধম্মাভিসমযো অহোসি. ইতি সত্থা তেভাতিকজটিলানং ৰত্থুং কথেত্ৰা ইমম্পি ধম্মদেসনং আহরি.

অগ্গসাৰকা পন, ‘‘ভন্তে, কিং করিংসূ’’তি? ‘‘অগ্গসাৰকভাৰায পত্থনং করিংসু’’. ইতো কপ্পসতসহস্সাধিকস্স হি কপ্পানং অসঙ্খ্যেয্যস্স মত্থকে সারিপুত্তো ব্রাহ্মণমহাসালকুলে নিব্বত্তি, নামেন সরদমাণৰো নাম অহোসি. মোগ্গল্লানো গহপতিমহাসালকুলে নিব্বত্তি, নামেন সিরিৰড্ঢনকুটুম্বিকো নাম অহোসি. তে উভোপি সহপংসুকীল়কা সহাযকা অহেসুং. তেসু সরদমাণৰো পিতু অচ্চযেন কুসলন্তকং মহাধনং পটিপজ্জিত্ৰা একদিৰসং রহোগতো চিন্তেসি – ‘‘অহং ইধলোকত্তভাৰমেৰ জানামি, নো পরলোকত্তভাৰং. জাতসত্তানঞ্চ মরণং নাম ধুৰং, মযা একং পব্বজ্জং পব্বজিত্ৰা মোক্খধম্মগৰেসনং কাতুং ৰট্টতী’’তি. সো সহাযকং উপসঙ্কমিত্ৰা আহ – ‘‘সম্ম সিরিৰড্ঢন, অহং পব্বজিত্ৰা মোক্খধম্মং গৰেসিস্সামি, ত্ৰং মযা সদ্ধিং পব্বজিতুং সক্খিস্সসি, ন সক্খিস্সসী’’তি? ‘‘ন সক্খিস্সামি, সম্ম, ত্ৰংযেৰ পব্বজাহী’’তি. সো চিন্তেসি – ‘‘পরলোকং গচ্ছন্তো সহাযে ৰা ঞাতিমিত্তে ৰা গহেত্ৰা গতো নাম নত্থি, অত্তনা কতং অত্তনোৰ হোতী’’তি. ততো রতনকোট্ঠাগারং ৰিৰরাপেত্ৰা কপণদ্ধিকৰণিব্বকযাচকানং মহাদানং দত্ৰা পব্বতপাদং পৰিসিত্ৰা ইসিপব্বজ্জং পব্বজি. তস্স একো দ্ৰে তযোতি এৰং অনুপব্বজ্জং পব্বজিতা চতুসত্ততিসহস্সমত্তা জটিলা অহেসুং. সো পঞ্চ অভিঞ্ঞা, অট্ঠ চ সমাপত্তিযো নিব্বত্তেত্ৰা তেসং জটিলানং কসিণপরিকম্মং আচিক্খি. তেপি সব্বে পঞ্চ অভিঞ্ঞা অট্ঠ চ সমাপত্তিযো নিব্বত্তেসুং.

তেন সমযেন অনোমদস্সী নাম সম্মাসম্বুদ্ধো লোকে উদপাদি. নগরং চন্দৰতী নাম অহোসি, পিতা যসৰা নাম খত্তিযো, মাতা যসোধরা নাম দেৰী, বোধি অজ্জুনরুক্খো, নিসভো চ অনোমো চ দ্ৰে অগ্গসাৰকা, ৰরুণো নাম উপট্ঠাকো, সুন্দরা চ সুমনা চ দ্ৰে অগ্গসাৰিকা অহেসুং. আযু ৰস্সসতসহস্সং অহোসি, সরীরং অট্ঠপঞ্ঞাসহত্থুব্বেধং, সরীরপ্পভা দ্ৰাদসযোজনং ফরি, ভিক্খুসতসহস্সপরিৰারো অহোসি. সো একদিৰসং পচ্চূসকালে মহাকরুণাসমাপত্তিতো ৰুট্ঠায লোকং ৰোলোকেন্তো সরদতাপসং দিস্ৰা, ‘‘অজ্জ ময্হং সরদতাপসস্সং সন্তিকং গতপচ্চযেন ধম্মদেসনা চ মহতী ভৰিস্সতি, সো চ অগ্গসাৰকট্ঠানং পত্থেস্সতি, তস্স সহাযকো সিরিৰড্ঢনকুটুম্বিকো দুতিযসাৰকট্ঠানং, দেসনাপরিযোসানে চস্স পরিৰারা চতুসত্ততিসহস্সমত্তা জটিলা অরহত্তং পাপুণিস্সন্তি, মযা তত্থ গন্তুং ৰট্টতী’’তি অত্তনো পত্তচীৰরমাদায অঞ্ঞং কঞ্চি অনামন্তেত্ৰা সীহো ৰিয একচরো হুত্ৰা সরদতাপসস্স অন্তেৰাসিকেসু ফলাফলত্থায গতেসু ‘‘বুদ্ধভাৰং মে জানাতূ’’তি অধিট্ঠহিত্ৰা পস্সন্তস্সেৰ সরদতাপসস্স আকাসতো ওতরিত্ৰা পথৰিযং পতিট্ঠাসি. সরদতাপসো বুদ্ধানুভাৰঞ্চেৰ সরীরনিপ্ফত্তিঞ্চস্স দিস্ৰা লক্খণমন্তে সম্মসিত্ৰা ‘‘ইমেহি লক্খণেহি সমন্নাগতো নাম অগারমজ্ঝে ৰসন্তো রাজা হোতি চক্কৰত্তী, পব্বজন্তো লোকে ৰিৰট্টচ্ছদো সব্বঞ্ঞুবুদ্ধো হোতি. অযং পুরিসো নিস্সংসযং বুদ্ধো’’তি জানিত্ৰা পচ্চুগ্গমনং কত্ৰা পঞ্চপতিট্ঠিতেন ৰন্দিত্ৰা অগ্গাসনং পঞ্ঞাপেত্ৰা অদাসি. নিসীদি ভগৰা পঞ্ঞত্তে অগ্গাসনে. সরদতাপসোপি অত্তনো অনুচ্ছৰিকং আসনং গহেত্ৰা একমন্তং নিসীদি.

তস্মিং সমযে চতুসত্ততিসহস্সজটিলা পণীতপণীতানি ওজৰন্তানি ফলাফলানি গহেত্ৰা আচরিযস্স সন্তিকং সম্পত্তা বুদ্ধানঞ্চেৰ আচরিযস্স চ নিসিন্নাসনং ওলোকেত্ৰা আহংসু – ‘‘আচরিয, মযং ‘ইমস্মিং লোকে তুম্হেহি মহন্ততরো নত্থী’তি ৰিচরাম, অযং পন পুরিসো তুম্হেহি মহন্ততরো মঞ্ঞে’’তি? ‘‘তাতা, কিং ৰদেথ, সাসপেন সদ্ধিং অট্ঠসট্ঠিযোজনসতসহস্সুব্বেধং সিনেরুং সমং কাতুং ইচ্ছথ, সব্বঞ্ঞুবুদ্ধেন সদ্ধিং মমং উপমং মা করিত্থ পুত্তকা’’তি. অথ তে তাপসা, ‘‘সচাযং ইত্তরসত্তো অভৰিস্স, অম্হাকং আচরিযো ন এৰরূপং উপমং আহরিস্স, যাৰ মহা ৰতাযং পুরিসো’’তি সব্বেৰ পাদেসু নিপতিত্ৰা সিরসা ৰন্দিংসু. অথ নে আচরিযো আহ – ‘‘তাতা, অম্হাকং বুদ্ধানং অনুচ্ছৰিকো দেয্যধম্মো নত্থি, সত্থা চ ভিক্খাচারৰেলাযং ইধাগতো, মযং যথাসত্তি যথাবলং দেয্যধম্মং দস্সাম, তুম্হে যং যং পণীতং ফলাফলং, তং তং আহরথা’’তি আহরাপেত্ৰা হত্থে ধোৰিত্ৰা সযং তথাগতস্স পত্তে পতিট্ঠাপেসি. সত্থারা ফলাফলে পটিগ্গহিতমত্তে দেৰতা দিব্বোজং পক্খিপিংসু. সো তাপসো উদকম্পি সযমেৰ পরিস্সাৰেত্ৰা অদাসি. ততো ভত্তকিচ্চং কত্ৰা নিসিন্নে সত্থরি সব্বে অন্তেৰাসিকে পক্কোসিত্ৰা সত্থু সন্তিকে সারণীযকথং কথেন্তো নিসীদি. সত্থা ‘‘দ্ৰে অগ্গসাৰকা ভিক্খুসঙ্ঘেন সদ্ধিং আগচ্ছন্তূ’’তি চিন্তেসি. তে সত্থু চিত্তং ঞত্ৰা সতসহস্সখীণাসৰপরিৰারা আগন্ত্ৰা সত্থারং ৰন্দিত্ৰা একমন্তং অট্ঠংসু.

ততো সরদতাপসো অন্তেৰাসিকে আমন্তেসি – ‘‘তাতা, বুদ্ধানং নিসিন্নাসনম্পি নীচং, সমণসতসহস্সানম্পি আসনং নত্থি, অজ্জ তুম্হেহি উল়ারং বুদ্ধসক্কারং কাতুং ৰট্টতি, পব্বতপাদতো ৰণ্ণগন্ধসম্পন্নানি পুপ্ফানি আহরথা’’তি. কথনকালো পপঞ্চো ৰিয হোতি, ইদ্ধিমতো পন ইদ্ধিৰিসযো অচিন্তেয্যোতি মুহুত্তমত্তেনেৰ তে তাপসা ৰণ্ণগন্ধসম্পন্নানি পুপ্ফানি আহরিত্ৰা বুদ্ধানং যোজনপ্পমাণং পুপ্ফাসনং পঞ্ঞাপেসুং. উভিন্নং অগ্গসাৰকানং তিগাৰুতং, সেসভিক্খূনং অড্ঢযোজনিকাদিভেদং, সঙ্ঘনৰকস্স উসভমত্তং অহোসি. ‘‘কথং একস্মিং অস্সমপদে তাৰ মহন্তানি আসনানি পঞ্ঞত্তানী’’তি ন চিন্তেতব্বং. ইদ্ধিৰিসযো হেস. এৰং পঞ্ঞত্তেসু আসনেসু সরদতাপসো তথাগতস্স পুরতো অঞ্জলিং পগ্গয্হ ঠিতো, ‘‘ভন্তে, ময্হং দীঘরত্তং হিতায সুখায ইমং পুপ্ফাসনং অভিরুহথা’’তি আহ. তেন ৰুত্তং –

‘‘নানাপুপ্ফঞ্চ গন্ধঞ্চ, সম্পাদেত্ৰান একতো;

পুপ্ফাসনং পঞ্ঞাপেত্ৰা, ইদং ৰচনমব্রৰি.

‘‘ইদং মে আসনং ৰীর, পঞ্ঞত্তং তৰনুচ্ছৰিং;

মম চিত্তং পসাদেন্তো, নিসীদ পুপ্ফমাসনে.

‘‘সত্তরত্তিন্দিৰং বুদ্ধো, নিসীদি পুপ্ফমাসনে;

মম চিত্তং পসাদেত্ৰা, হাসযিত্ৰা সদেৰকে’’তি.

এৰং নিসিন্নে সত্থরি দ্ৰে অগ্গসাৰকা সেসভিক্খূ চ অত্তনো অত্তনো পত্তাসনে নিসীদিংসু. সরদতাপসো মহন্তং পুপ্ফচ্ছত্তং গহেত্ৰা তথাগতস্স মত্থকে ধারেন্তো অট্ঠাসি. সত্থা ‘‘জটিলানং অযং সক্কারো মহপ্ফলো হোতূ’’তি নিরোধসমাপত্তিং সমাপজ্জি. সত্থু সমাপত্তিং সমাপন্নভাৰং ঞত্ৰা দ্ৰে অগ্গসাৰকাপি সেসভিক্খূপি সমাপত্তিং সমাপজ্জিংসু. তথাগতে সত্তাহং নিরোধসমাপত্তিং সমাপজ্জিত্ৰা নিসিন্নে অন্তেৰাসিকা ভিক্খাচারকালে সম্পত্তে ৰনমূলফলাফলং পরিভুঞ্জিত্ৰা সেসকালে বুদ্ধানং অঞ্জলিং পগ্গয্হ তিট্ঠন্তি. সরদতাপসো পন ভিক্খাচারম্পি অগন্ত্ৰা পুপ্ফচ্ছত্তং ধারযমানোৰ সত্তাহং পীতিসুখেন ৰীতিনামেসি. সত্থা নিরোধতো ৰুট্ঠায দক্খিণপস্সে নিসিন্নং পঠমঅগ্গসাৰকং নিসভত্থেরং আমন্তেসি – ‘‘নিসভ, সক্কারকারকানং তাপসানং পুপ্ফাসনানুমোদনং করোহী’’তি. থেরো চক্কৰত্তিরঞ্ঞো সন্তিকা পটিলদ্ধমহালাভো মহাযোধো ৰিয তুট্ঠমানসো সাৰকপারমিঞাণে ঠত্ৰা পুপ্ফাসনানুমোদনং আরভি. তস্স দেসনাৰসানে দুতিযসাৰকং আমন্তেসি – ‘‘ত্ৰম্পি ভিক্খু ধম্মং দেসেহী’’তি. অনোমত্থেরো তেপিটকং বুদ্ধৰচনং সম্মসিত্ৰা ধম্মং কথেসি. দ্ৰিন্নং অগ্গসাৰকানং দেসনায একস্সাপি অভিসমযো নাহোসি. অথ সত্থা অপরিমাণে বুদ্ধৰিসযে ঠত্ৰা ধম্মদেসনং আরভি. দেসনাপরিযোসানে ঠপেত্ৰা সরদতাপসং সব্বেপি চতুসত্ততিসহস্সজটিলা অরহত্তং পাপুণিংসু, সত্থা ‘‘এথ, ভিক্খৰো’’তি হত্থং পসারেসি. তেসং তাৰদেৰ কেসমস্সূনি অন্তরধাযিংসু, অট্ঠপরিক্খারা কাযে পটিমুক্কাৰ অহেসুং.

সরদতাপসো ‘‘কস্মা অরহত্তং ন পত্তো’’তি? ৰিক্খিত্তচিত্তত্তা. সো কির বুদ্ধানং দুতিযাসনে নিসীদিত্ৰা সাৰকপারমিঞাণে ঠত্ৰা ধম্মং দেসযতো অগ্গসাৰকস্স ধম্মদেসনং সোতুং আরদ্ধকালতো পট্ঠায, ‘‘অহো ৰতাহম্পি অনাগতে উপ্পজ্জনকবুদ্ধস্স সাসনে ইমিনা সাৰকেন পটিলদ্ধধুরং লভেয্য’’ন্তি চিত্তং উপ্পাদেসি. সো তেন পরিৰিতক্কেন মগ্গফলপটিৰেধং কাতুং নাসক্খি. তথাগতং পন ৰন্দিত্ৰা সম্মুখে ঠত্ৰা আহ – ‘‘ভন্তে, তুম্হাকং অনন্তরাসনে নিসিন্নো ভিক্খু তুম্হাকং সাসনে কো নাম হোতী’’তি? ‘‘মযা পৰত্তিতং ধম্মচক্কং অনুপৰত্তেন্তো সাৰকপারমিঞাণস্স কোটিপ্পত্তো সোল়স পঞ্ঞা পটিৰিজ্ঝিত্ৰা ঠিতো ময্হং সাসনে অগ্গসাৰকো নিসভো নাম এসো’’তি. ‘‘ভন্তে, য্ৰাযং মযা সত্তাহং পুপ্ফচ্ছত্তং ধারেন্তেন সক্কারো কতো, অহং ইমস্স ফলেন অঞ্ঞং সক্কত্তং ৰা ব্রহ্মত্তং ৰা ন পত্থেমি, অনাগতে পন অযং নিসভত্থেরো ৰিয একস্স বুদ্ধস্স অগ্গসাৰকো ভৰেয্য’’ন্তি পত্থনং অকাসিন্তি. সত্থা ‘‘সমজ্ঝিস্সতি নু খো ইমস্স পুরিসস্স পত্থনা’’তি অনাগতংসঞাণং পেসেত্ৰা ওলোকেন্তো কপ্পসতসহস্সাধিকং একং অসঙ্খ্যেয্যং অতিক্কমিত্ৰা সমিজ্ঝনভাৰং অদ্দস. দিস্ৰান সরদতাপসং আহ – ‘‘ন তে অযং পত্থনা মোঘা ভৰিস্সতি, অনাগতে পন কপ্পসতসহস্সাধিকং একং অসঙ্খ্যেয্যং অতিক্কমিত্ৰা গোতমো নাম বুদ্ধো উপ্পজ্জিস্সতি, তস্স মাতা মহামাযা নাম দেৰী ভৰিস্সতি, পিতা সুদ্ধোদনো নাম মহারাজা, পুত্তো রাহুলো নাম, উপট্ঠাকো আনন্দো নাম, দুতিযঅগ্গসাৰকো মোগ্গল্লানো নাম, ত্ৰং পনস্স পঠমঅগ্গসাৰকো ধম্মসেনাপতি সারিপুত্তো নাম ভৰিস্সসী’’তি. এৰং তাপসং ব্যাকরিত্ৰা ধম্মকথং কথেত্ৰা ভিক্খুসঙ্ঘপরিৰুতো আকাসং পক্খন্দি.

সরদতাপসোপি অন্তেৰাসিকত্থেরানং সন্তিকং গন্ত্ৰা সহাযকস্স সিরিৰড্ঢনকুটুম্বিকস্স সাসনং পেসেসি, ‘‘ভন্তে, মম সহাযকস্স ৰদেথ, সহাযকেন তে সরদতাপসেন অনোমদস্সীবুদ্ধস্স পাদমূলে অনাগতে উপ্পজ্জনকস্স গোতমবুদ্ধস্স সাসনে পঠমঅগ্গসাৰকট্ঠানং পত্থিতং, ত্ৰং দুতিযঅগ্গসাৰকট্ঠানং পত্থেহী’’তি. এৰঞ্চ পন ৰত্ৰা থেরেহি পুরেতরমেৰ একপস্সেন গন্ত্ৰা সিরিৰড্ঢনস্স নিৰেসনদ্ৰারে অট্ঠাসি. সিরিৰড্ঢনো ‘‘চিরস্সং ৰত মে অয্যো আগতো’’তি আসনে নিসীদাপেত্ৰা অত্তনা নীচাসনে নিসিন্নো, ‘‘অন্তেৰাসিকপরিসা পন ৰো, ভন্তে, ন পঞ্ঞাযতী’’তি পুচ্ছি. ‘‘আম, সম্ম, অম্হাকং অস্সমং অনোমদস্সী বুদ্ধো আগতো, মযং তস্স অত্তনো বলেন সক্কারং অকরিম্হা, সত্থা সব্বেসং ধম্মং দেসেসি, দেসনাপরিযোসানে ঠপেত্ৰা মং সেসা অরহত্তং পত্ৰা পব্বজিংসু. অহং সত্থু পঠমঅগ্গসাৰকং নিসভত্থেরং দিস্ৰা অনাগতে উপ্পজ্জনকস্স গোতমবুদ্ধস্স নাম সাসনে পঠমঅগ্গসাৰকট্ঠানং পত্থেসিং, ত্ৰম্পি তস্স সাসনে দুতিযঅগ্গসাৰকট্ঠানং পত্থেহী’’তি. ‘‘ময্হং বুদ্ধেহি সদ্ধিং পরিচযো নত্থি, ভন্তে’’তি. ‘‘বুদ্ধেহি সদ্ধিং কথনং ময্হং ভারো হোতু, ত্ৰং মহন্তং সক্কারং সজ্জেহী’’তি.

সিরিৰড্ঢনো তস্স ৰচনং সুত্ৰা অত্তনো নিৰেসনদ্ৰারে রাজমানেন অট্ঠকরীসমত্তং ঠানং সমতলং কারেত্ৰা ৰালুকং ওকিরাপেত্ৰা লাজপঞ্চমানিপুপ্ফানি ৰিকিরাপেত্ৰা নীলুপ্পলচ্ছদনং মণ্ডপং কারেত্ৰা বুদ্ধাসনং পঞ্ঞাপেত্ৰা সেসভিক্খূনম্পি আসনানি পটিযাদেত্ৰা মহন্তং সক্কারসম্মানং সজ্জেত্ৰা বুদ্ধানং নিমন্তনত্থায সরদতাপসস্স সঞ্ঞং অদাসি. তাপসো বুদ্ধপ্পমুখং ভিক্খুসঙ্ঘং গহেত্ৰা তস্স নিৰেসনং অগমাসি. সিরিৰড্ঢনোপি পচ্চুগ্গমনং কত্ৰা তথাগতস্স হত্থতো পত্তং গহেত্ৰা মণ্ডপং পৰেসেত্ৰা পঞ্ঞত্তাসনেসু নিসিন্নস্স বুদ্ধপ্পমুখস্স ভিক্খুসঙ্ঘস্স দক্খিণোদকং দত্ৰা পণীতেন ভোজনেন পরিৰিসিত্ৰা ভত্তকিচ্চপরিযোসানে বুদ্ধপ্পমুখং ভিক্খুসঙ্ঘং মহারহেহি ৰত্থেহি অচ্ছাদেত্ৰা, ‘‘ভন্তে, নাযং আরব্ভো অপ্পমত্তকট্ঠানত্থায, ইমিনাৰ নিযামেন সত্তাহং অনুকম্পং করোথা’’তি আহ. সত্থা অধিৰাসেসি. সো তেনেৰ নিযামেন সত্তাহং মহাদানং পৰত্তেত্ৰা ভগৰন্তং ৰন্দিত্ৰা অঞ্জলিং পগ্গয্হ ঠিতো আহ – ‘‘ভন্তে, মম সহাযো সরদতাপসো যস্স সত্থুস্স পঠমঅগ্গসাৰকো ভৰেয্য’’ন্তি পত্থেসি, অহম্পি ‘‘তস্সেৰ দুতিযঅগ্গসাৰকো ভৰেয্য’’ন্তি পত্থেমীতি.

সত্থা অনাগতং ওলোকেত্ৰা তস্স পত্থনায সমিজ্ঝনভাৰং দিস্ৰা ব্যাকাসি – ‘‘ত্ৰং ইতো কপ্পসতসহস্সাধিকং অসঙ্খ্যেয্যং অতিক্কমিত্ৰা গোতমবুদ্ধস্স দুতিযঅগ্গসাৰকো ভৰিস্সসী’’তি. বুদ্ধানং ব্যাকরণং সুত্ৰা সিরিৰড্ঢনো হট্ঠপহট্ঠো অহোসি. সত্থাপি ভত্তানুমোদনং কত্ৰা সপরিৰারো ৰিহারমেৰ গতো. ‘‘অযং, ভিক্খৰে, মম পুত্তেহি তদা পত্থিতপত্থনা. তে যথাপত্থিতমেৰ লভিংসু. নাহং মুখং ওলোকেত্ৰা দেমী’’তি.

এৰং ৰুত্তে দ্ৰে অগ্গসাৰকা ভগৰন্তং ৰন্দিত্ৰা, ‘‘ভন্তে, মযং অগারিযভূতা সমানা গিরগ্গসমজ্জং দস্সনায গতা’’তি যাৰ অস্সজিত্থেরস্স সন্তিকা সোতাপত্তিফলপটিৰেধা সব্বং পচ্চুপ্পন্নৰত্থুং কথেত্ৰা, ‘‘তে মযং, ভন্তে, আচরিযস্স সঞ্চযস্স সন্তিকং গন্ত্ৰা তং তুম্হাকং পাদমূলে আনেতুকামা তস্স লদ্ধিযা নিস্সারভাৰং কথেত্ৰা ইধাগমনে আনিসংসং কথযিম্হা. সো ইদানি ময্হং অন্তেৰাসিকৰাসো নাম চাটিযা উদঞ্চনভাৰপ্পত্তিসদিসো, ন সক্খিস্সামি অন্তেৰাসিৰাসং ৰসিতু’’ন্তি ৰত্ৰা, ‘‘আচরিয, ইদানি মহাজনো গন্ধমালাদিহত্থো গন্ত্ৰা সত্থারমেৰ পূজেস্সতি, তুম্হে কথং ভৰিস্সথা’’তি ৰুত্তে ‘‘কিং পন ইমস্মিং লোকে পণ্ডিতা বহূ, উদাহু দন্ধা’’তি? ‘‘দন্ধা’’তি কথিতে ‘‘তেন হি পণ্ডিতা পণ্ডিতস্স সমণস্স গোতমস্স সন্তিকং গমিস্সন্তি, দন্ধা দন্ধস্স মম সন্তিকং আগমিস্সন্তি, গচ্ছথ তুম্হে’’তি ৰত্ৰা ‘‘আগন্তুং ন ইচ্ছি, ভন্তে’’তি. তং সুত্ৰা সত্থা, ‘‘ভিক্খৰে, সঞ্চযো অত্তনো মিচ্ছাদিট্ঠিতায অসারং সারোতি, সারঞ্চ অসারোতি গণ্হি. তুম্হে পন অত্তনো পণ্ডিততায সারঞ্চ সারতো, অসারঞ্চ অসারতো ঞত্ৰা অসারং পহায সারমেৰ গণ্হিত্থা’’তি ৰত্ৰা ইমা গাথা অভাসি –

১১. ‘‘অসারে সারমতিনো, সারে চাসারদস্সিনো;

তে সারং নাধিগচ্ছন্তি, মিচ্ছাসঙ্কপ্পগোচরা.

১২. ‘‘সারঞ্চ সারতো ঞত্ৰা, অসারঞ্চ অসারতো;

তে সারং অধিগচ্ছন্তি, সম্মাসঙ্কপ্পগোচরা’’তি.

তত্থ অসারে সারমতিনোতি চত্তারো পচ্চযা, দসৰত্থুকা মিচ্ছাদিট্ঠি, তস্সা উপনিস্সযভূতা ধম্মদেসনাতি অযং অসারো নাম, তস্মিং সারদিট্ঠিনোতি অত্থো. সারে চাসারদস্সিনোতি দসৰত্থুকা সম্মাদিট্ঠি, তস্সা উপনিস্সযভূতা ধম্মদেসনাতি অযং সারো নাম, তস্মিং ‘‘নাযং সারো’’তি অসারদস্সিনো. তে সারন্তি তে পন তং মিচ্ছাদিট্ঠিগ্গহণং গহেত্ৰা ঠিতা কামৰিতক্কাদীনং ৰসেন মিচ্ছাসঙ্কপ্পগোচরা হুত্ৰা সীলসারং, সমাধিসারং, পঞ্ঞাসারং, ৰিমুত্তিসারং, ৰিমুত্তিঞাণদস্সনসারং, ‘‘পরমত্থসারং, নিব্বানঞ্চ নাধিগচ্ছ’’ন্তি. সারঞ্চাতি তমেৰ সীলসারাদিসারং ‘‘সারো নামায’’ন্তি, ৰুত্তপ্পকারঞ্চ অসারং ‘‘অসারো অয’’ন্তি ঞত্ৰা. তে সারন্তি তে পণ্ডিতা এৰং সম্মাদস্সনং গহেত্ৰা ঠিতা নেক্খম্মসঙ্কপ্পাদীনং ৰসেন সম্মাসঙ্কপ্পগোচরা হুত্ৰা তং ৰুত্তপ্পকারং সারং অধিগচ্ছন্তীতি.

গাথাপরিযোসানে বহূ সোতাপত্তিফলাদীনি পাপুণিংসু. সন্নিপতিতানং সাত্থিকা ধম্মদেসনা অহোসীতি.

সারিপুত্তত্থেরৰত্থু অট্ঠমং.