৬. মহাকাল়ত্থেরৰত্থু

সুভানুপস্সিন্তি ইমং ধম্মদেসনং সত্থা সেতব্যনগরং উপনিস্সায সিংসপাৰনে ৰিহরন্তো চূল়কাল়মহাকাল়ে আরব্ভ কথেসি.

সেতব্যনগরৰাসিনো হি চূল়কাল়ো, মজ্ঝিমকাল়ো, মহাকাল়োতি তযো ভাতরো কুটুম্বিকা. তেসু জেট্ঠকনিট্ঠা দিসাসু ৰিচরিত্ৰা পঞ্চহি সকটসতেহি ভণ্ডং আহরন্তি, মজ্ঝিমকাল়ো আভতং ৰিক্কিণাতি. অথেকস্মিং সমযে তে উভোপি ভাতরো পঞ্চহি সকটসতেহি নানাভণ্ডং গহেত্ৰা সাৰত্থিং গন্ত্ৰা সাৰত্থিযা চ জেতৰনস্স চ অন্তরে সকটানি মোচযিংসু. তেসু মহাকাল়ো সাযন্হসমযে মালাগন্ধাদিহত্থে সাৰত্থিৰাসিনো অরিযসাৰকে ধম্মস্সৰনায গচ্ছন্তে দিস্ৰা ‘‘কুহিং ইমে গচ্ছন্তী’’তি পুচ্ছিত্ৰা তমত্থং সুত্ৰা ‘‘অহম্পি গমিস্সামী’’তি চিন্তেত্ৰা কনিট্ঠং আমন্তেত্ৰা, ‘‘তাত, তেসু সকটেসু অপ্পমত্তো হোহি, অহং ধম্মং সোতুং গচ্ছামী’’তি ৰত্ৰা গন্ত্ৰা তথাগতং ৰন্দিত্ৰা পরিসপরিযন্তে নিসীদি. সত্থা তং দিস্ৰা তস্স অজ্ঝাসযৰসেন অনুপুব্বিং কথং কথেন্তো দুক্খক্খন্ধসুত্তাদিৰসেন (ম. নি. ১.১৬৩ আদযো) অনেকপরিযাযেন কামানং আদীনৰং ওকারং সংকিলেসঞ্চ কথেসি. তং সুত্ৰা মহাকাল়ো ‘‘সব্বং কির পহায গন্তব্বং, পরলোকং গচ্ছন্তং নেৰ ভোগা, ন ঞাতকা চ অনুগচ্ছন্তি, কিং মে ঘরাৰাসেন পব্বজিস্সামী’’তি চিন্তেত্ৰা মহাজনে সত্থারং ৰন্দিত্ৰা পক্কন্তে সত্থারং পব্বজ্জং যাচিত্ৰা সত্থারা ‘‘নত্থি তে কোচি অপলোকেতব্বো’’তি ৰুত্তে, ‘‘কনিট্ঠো মে, ভন্তে, অত্থী’’তি ৰত্ৰা তেন হি ‘‘অপলোকেহি ন’’ন্তি ৰুত্তে, ‘‘সাধু, ভন্তে’’তি ৰত্ৰা গন্ত্ৰা কনিট্ঠং পক্কোসাপেত্ৰা, ‘‘তাত, ইমং সব্বং সাপতেয্যং পটিপজ্জাহী’’তি আহ. ‘‘তুম্হে পন কিং করিস্সথ ভাতিকা’’তি? ‘‘অহং সত্থু সন্তিকে পব্বজিস্সামী’’তি. সো তং নানপ্পকারেহি যাচিত্ৰা নিৰত্তেতুং অসক্কোন্তো ‘‘সাধু, সামি, যথা অজ্ঝাসযং করোথা’’তি আহ. মহাকাল়ো গন্ত্ৰা সত্থু সন্তিকে পব্বজি. ‘‘অহং ভাতিকং গহেত্ৰাৰ উপ্পব্বজিস্সামী’’তি চূল়কাল়োপি পব্বজি. অপরভাগে মহাকাল়ো উপসম্পদং লভিত্ৰা সত্থারং উপসঙ্কমিত্ৰা সাসনে ধুরানি পুচ্ছিত্ৰা সত্থারা দ্ৰীসু ধুরেসু কথিতেসু ‘‘অহং, ভন্তে, মহল্লককালে পব্বজিতত্তা গন্থধুরং পূরেতুং ন সক্খিস্সামি, ৰিপস্সনাধুরং পন পূরেস্সামী’’তি যাৰ অরহত্তা কম্মট্ঠানং কথাপেত্ৰা সোসানিকধুতঙ্গং সমাদায পঠমযামাতিক্কন্তে সব্বেসু নিদ্দং ওক্কন্তেসু সুসানং গন্ত্ৰা পচ্চূসকালে সব্বেসু অনুট্ঠিতেসুযেৰ ৰিহারং আগচ্ছতি.

অথেকা সুসানগোপিকা কালী নাম ছৰডাহিকা থেরস্স ঠিতট্ঠানং নিসিন্নট্ঠানং চঙ্কমিতট্ঠানঞ্চ দিস্ৰা ‘‘কো নু খো ইধাগচ্ছতি, পরিগ্গণ্হিস্সামি ন’’ন্তি পরিগ্গণ্হিতুং অসক্কোন্তী একদিৰসং সুসানকুটিকাযমেৰ দীপং জালেত্ৰা পুত্তধীতরো আদায গন্ত্ৰা একমন্তে নিলীযমানা মজ্ঝিমযামে থেরং আগচ্ছন্তং দিস্ৰা গন্ত্ৰা ৰন্দিত্ৰা, ‘‘অয্যো, নো, ভন্তে, ইমস্মিং ঠানে ৰিহরতী’’তি আহ. ‘‘আম, উপাসিকে’’তি. ‘‘ভন্তে, সুসানে ৰিহরন্তেহি নাম ৰত্তং উগ্গণ্হিতুং ৰট্টতী’’তি. থেরো ‘‘কিং পন মযং তযা কথিতৰত্তে ৰত্তিস্সামা’’তি অৰত্ৰা ‘‘কিং কাতুং ৰট্টতি উপাসিকে’’তি আহ. ‘‘ভন্তে, সোসানিকেহি নাম সুসানে ৰসনভাৰো সুসানগোপকানঞ্চ ৰিহারে মহাথেরস্স চ গামভোজকস্স চ কথেতুং ৰট্টতী’’তি. ‘‘থেরো কিং কারণা’’তি? ‘‘কতকম্মা চোরা ধনসামিকেহি পদানুপদং অনুবদ্ধা সুসানে ভণ্ডকং ছড্ডেত্ৰা পলাযন্তি, অথ মনুস্সা সোসানিকানং পরিপন্থং করোন্তি, এতেসং পন কথিতে ‘মযং ইমস্স ভদ্দন্তস্স এত্তকং নাম কালং এত্থ ৰসনভাৰং জানাম, অচোরো এসো’তি উপদ্দৰং নিৰারেন্তি. তস্মা এতেসং কথেতুং ৰট্টতী’’তি.

‘‘থেরো অঞ্ঞং কিং কাতব্ব’’ন্তি? ‘‘ভন্তে, সুসানে ৰসন্তেন নাম অয্যেন মচ্ছমংসতিলপিট্ঠতেলগুল়াদীনি ৰজ্জেতব্বানি, দিৰা ন নিদ্দাযিতব্বং, কুসীতেন ন ভৰিতব্বং, আরদ্ধৰীরিযেন ভৰিতব্বং, অসঠেন অমাযাৰিনা হুত্ৰা কল্যাণজ্ঝাসযেন ভৰিতব্বং, সাযং সব্বেসু সুত্তেসু ৰিহারতো আগন্তব্বং, পচ্চূসকালে সব্বেসু অনুট্ঠিতেসুযেৰ ৰিহারং গন্তব্বং. সচে, ভন্তে, অয্যো ইমস্মিং ঠানে এৰং ৰিহরন্তো পব্বজিতকিচ্চং মত্থকং পাপেতুং সক্খিস্সতি, সচে মতসরীরং আনেত্ৰা ছড্ডেন্তি, অহং কম্বলকূটাগারং আরোপেত্ৰা গন্ধমালাদীহি সক্কারং কত্ৰা সরীরকিচ্চং করিস্সামি. নো চে সক্খিস্সতি, চিতকং আরোপেত্ৰা অগ্গিং জালেত্ৰা সঙ্কুনা আকড্ঢিত্ৰা বহি খিপিত্ৰা ফরসুনা কোট্টেত্ৰা খণ্ডাখণ্ডিকং ছিন্দিত্ৰা অগ্গিম্হি পক্খিপিত্ৰা ঝাপেস্সামী’’তি আহ. অথ নং থেরো ‘‘সাধু ভদ্দে, একং পন রূপারম্মণং দিস্ৰা ময্হং কথেয্যাসী’’তি আহ. সা ‘‘সাধূ’’তি পচ্চস্সোসি. থেরো যথাজ্ঝাসযেন সুসানে সমণধম্মং করোতি. চূল়কাল়ত্থেরো পন উট্ঠায সমুট্ঠায ঘরাৰাসং চিন্তেতি, পুত্তদারং অনুস্সরতি. ‘‘ভাতিকো মে অতিভারিযং কম্মং করোতী’’তি চিন্তেতি.

অথেকা কুলধীতা তংমুহুত্তসমুট্ঠিতেন ব্যাধিনা সাযন্হসমযে অমিলাতা অকিলন্তা কালমকাসি. তমেনং ঞাতকাদযো দারুতেলাদীহি সদ্ধিং সাযং সুসানং নেত্ৰা সুসানগোপিকায ‘‘ইমং ঝাপেহী’’তি ভতিং দত্ৰা নিয্যাদেত্ৰা পক্কমিংসু. সা তস্সা পারুতৰত্থং অপনেত্ৰা তংমুহুত্তমতং পীণিতপীণিতং সুৰণ্ণৰণ্ণং সরীরং দিস্ৰা, ‘‘ইমং অয্যস্স দস্সেতুং পতিরূপং আরম্মণ’’ন্তি চিন্তেত্ৰা গন্ত্ৰা থেরং ৰন্দিত্ৰা, ‘‘ভন্তে, এৰরূপং নাম আরম্মণং অত্থি, ওলোকেথ অয্যা’’তি আহ. থেরো ‘‘সাধূ’’তি ৰত্ৰা পারুপনং নীহরাপেত্ৰা পাদতলতো যাৰ কেসগ্গা ওলোকেত্ৰা ‘‘অতিপীণিতমেতং রূপং সুৰণ্ণৰণ্ণং অগ্গিম্হি নং পক্খিপিত্ৰা মহাজালাহি গহিতমত্তকালে ময্হং আরোচেয্যাসী’’তি ৰত্ৰা সকট্ঠানমেৰ গন্ত্ৰা নিসীদি. সা তথা কত্ৰা থেরস্স আরোচেসি. থেরো গন্ত্ৰা ওলোকেসি. জালায পহটপহটট্ঠানং কবরগাৰিযা ৰিয সরীরৰণ্ণং অহোসি, পাদা নমিত্ৰা ওলম্বিংসু, হত্থা পটিকুটিংসু, ঊরুনলাটং নিচ্চম্মং অহোসি. থেরো ‘‘ইদং সরীরং ইদানেৰ ওলোকেন্তানং অপরিযন্তকরং হুত্ৰা ইদানেৰ খযং পত্তং ৰযং পত্ত’’ন্তি রত্তিট্ঠানং গন্ত্ৰা নিসীদিত্ৰা খযৰযং সম্পস্সমানো –

‘‘অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি. (দী. নি. ২.২২১, ২৭২; সং. নি. ১.১৮৬; ২.১৪৩; জা. ১.১.৯৫) –

গাথং ৰত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পাপুণি.

তস্মিং অরহত্তং পত্তে সত্থা ভিক্খুসঙ্ঘপরিৰুতো চারিকং চরমানো সেতব্যং গন্ত্ৰা সিংসপাৰনং পাৰিসি. চূল়কাল়স্স ভরিযাযো ‘‘সত্থা কির অনুপ্পত্তো সিংসপাৰন’’ন্তি সুত্ৰা ‘‘অম্হাকং সামিকং গণ্হিস্সামা’’তি পেসেত্ৰা সত্থারং নিমন্তাপেসুং. বুদ্ধানং পন অপরিচিণ্ণট্ঠানে আসনপঞ্ঞত্তিং আচিক্খন্তেন একেন ভিক্খুনা পঠমতরং গন্তুং ৰট্টতি. বুদ্ধানঞ্হি মজ্ঝিমট্ঠানে আসনং পঞ্ঞাপেত্ৰা তস্স দক্খিণতো সারিপুত্তত্থেরস্স, ৰামতো মহামোগ্গল্লানত্থেরস্স, ততো পট্ঠায উভোসু পস্সেসু ভিক্খুসঙ্ঘস্স আসনং পঞ্ঞাপেতব্বং হোতি. তস্মা মহাকাল়ত্থেরো চীৰরপারুপনট্ঠানে ঠত্ৰা, ‘‘চূল়কাল়, ত্ৰং পুরতো গন্ত্ৰা আসনপঞ্ঞত্তিং আচিক্খা’’তি চূল়কাল়ং পেসেসি. তস্স দিট্ঠকালতো পট্ঠায গেহজনা তেন সদ্ধিং পরিহাসং করোন্তা নীচাসনানি সঙ্ঘত্থেরস্স কোটিযং অত্থরন্তি, উচ্চাসনানি সঙ্ঘনৰকস্স কোটিযং. ইতরো ‘‘মা এৰং করোথ, নীচাসনানি উপরি মা পঞ্ঞাপেথ, উচ্চাসনানি উপরি পঞ্ঞাপেথ, নীচাসনানি হেট্ঠা’’তি আহ. ইত্থিযো তস্স ৰচনং অসুণন্তিযো ৰিয ‘‘ত্ৰং কিং করোন্তো ৰিচরসি, কিং তৰ আসনানি পঞ্ঞাপেতুং ন ৰট্টতি, ত্ৰং কং আপুচ্ছিত্ৰা পব্বজিতো, কেন পব্বজিতোসি, কস্মা ইধাগতোসী’’তি ৰত্ৰা নিৰাসনপারুপনং অচ্ছিন্দিত্ৰা সেতকানি নিৰাসেত্ৰা সীসে চ মালাচুম্বুটকং ঠপেত্ৰা, ‘‘গচ্ছ সত্থারং আনেহি, মযং আসনানি পঞ্ঞাপেস্সামা’’তি পহিণিংসু. ন চিরং ভিক্খুভাৰে ঠত্ৰা অৰস্সিকোৰ উপ্পব্বজিতত্তা লজ্জিতুং ন জানাতি, তস্মা সো তেন আকপ্পেন নিরাসঙ্কোৰ গন্ত্ৰা সত্থারং ৰন্দিত্ৰা বুদ্ধপ্পমুখং ভিক্খুসঙ্ঘং আদায আগতো. ভিক্খুসঙ্ঘস্স পন ভত্তকিচ্চাৰসানে মহাকাল়স্স ভরিযাযো ‘‘ইমাহি অত্তনো সামিকো গহিতো, মযম্পি অম্হাকং সামিকং গণ্হিস্সামা’’তি চিন্তেত্ৰা পুনদিৰসে সত্থারং নিমন্তযিংসু. তদা পন আসনপঞ্ঞাপনত্থং অঞ্ঞো ভিক্খু অগমাসি. তা তস্মিং খণে ওকাসং অলভিত্ৰা বুদ্ধপ্পমুখং ভিক্খুসঙ্ঘং নিসীদাপেত্ৰা ভিক্খং অদংসু. চূল়কাল়স্স পন দ্ৰে ভরিযাযো, মজ্ঝিমকাল়স্স চতস্সো, মহাকাল়স্স পন অট্ঠ. ভিক্খূপি ভত্তকিচ্চং কাতুকামা নিসীদিত্ৰা ভত্তকিচ্চমকংসু, বহি গন্তুকামা উট্ঠায অগমংসু. সত্থা পন নিসীদিত্ৰা ভত্তকিচ্চং করি. তস্স ভত্তকিচ্চপরিযোসানে তা ইত্থিযো, ‘‘ভন্তে, মহাকাল়ো অম্হাকং অনুমোদনং কত্ৰা আগচ্ছিস্সতি, তুম্হে পুরতো গচ্ছথা’’তি ৰদিংসু. সত্থা ‘‘সাধূ’’তি ৰত্ৰা পুরতো অগমাসি. গামদ্ৰারং পত্ৰা ভিক্খূ উজ্ঝাযিংসু ‘‘কিং নামেতং সত্থারা কতং, ঞত্ৰা নু খো কতং, উদাহু অজানিত্ৰা. হিয্যো চূল়কাল়স্স পুরতো গতত্তা পব্বজ্জন্তরাযো জাতো, অজ্জ অঞ্ঞস্স পুরতো গতত্তা অন্তরাযো নাহোসি. ইদানি মহাকাল়ং ঠপেত্ৰা আগতো, সীলৰা খো পন ভিক্খু আচারসম্পন্নো, করিস্সতি নু খো তস্স পব্বজ্জন্তরায’’ন্তি. সত্থা তেসং ৰচনং সুত্ৰা নিৰত্তিত্ৰা ঠিতো ‘‘কিং কথেথ, ভিক্খৰে’’তি পুচ্ছি. তে তমত্থং আরোচেসুং. ‘‘কিং পন তুম্হে, ভিক্খৰে, চূল়কাল়ং ৰিয মহাকাল়ং সল্লক্খেথা’’তি? ‘‘আম, ভন্তে’’. তস্স হি দ্ৰে পজাপতিযো, ইমস্স অট্ঠ. ‘‘অট্ঠহি পরিক্খিপিত্ৰা গহিতো কিং করিস্সতি, ভন্তে’’তি? সত্থা ‘‘মা, ভিক্খৰে, এৰং অৰচুত্থ, চূল়কাল়ো উট্ঠায সমুট্ঠায সুভারম্মণবহুলো ৰিহরতি, পপাতে ঠিতো দুব্বলরুক্খসদিসো. ময্হং পন পুত্তো মহাকাল়ো অসুভানুপস্সী ৰিহরতি, ঘনসেলপব্বতো ৰিয অচলো’’তি ৰত্ৰা ইমা গাথা অভাসি –

৭. ‘‘সুভানুপস্সিং ৰিহরন্তং, ইন্দ্রিযেসু অসংৰুতং;

ভোজনম্হি চামত্তঞ্ঞুং, কুসীতং হীনৰীরিযং;

তং ৰে পসহতি মারো, ৰাতো রুক্খংৰ দুব্বলং.

৮. ‘‘অসুভানুপস্সিং ৰিহরন্তং, ইন্দ্রিযেসু সুসংৰুতং;

ভোজনম্হি চ মত্তঞ্ঞুং, সদ্ধং আরদ্ধৰীরিযং;

তং ৰে নপ্পসহতী মারো, ৰাতো সেলংৰ পব্বত’’ন্তি.

তত্থ সুভানুপস্সিং ৰিহরন্তন্তি সুতং অনুপস্সন্তং, ইট্ঠারম্মণে মানসং ৰিস্সজ্জেত্ৰা ৰিহরন্তন্তি অত্থো. যো হি পুগ্গলো নিমিত্তগ্গাহং অনুব্যঞ্জনগ্গাহং গণ্হন্তো ‘‘নখা সোভনা’’তি গণ্হাতি, ‘‘অঙ্গুলিযো সোভনা’’তি গণ্হাতি, ‘‘হত্থপাদা, জঙ্ঘা, ঊরু, কটি, উদরং, থনা, গীৰা, ওট্ঠা, দন্তা, মুখং, নাসা, অক্খীনি, কণ্ণা, ভমুকা, নলাটং, কেসা, সোভনা’’তি গণ্হাতি, ‘‘কেসা, লোমা, নখা, দন্তা, তচো, সোভনা’’তি গণ্হাতি, ৰণ্ণো সুভো, সণ্ঠানং সুভন্তি, অযং সুভানুপস্সী নাম. এৰং তং সুভানুপস্সিং ৰিহরন্তং. ইন্দ্রিযেসূতি চক্খাদীসু ছসু ইন্দ্রিযেসু. অসংৰুতন্তি চক্খুদ্ৰারাদীনি অরক্খন্তং. পরিযেসনমত্তা পটিগ্গহণমত্তা পরিভোগমত্তাতি ইমিস্সা মত্তায অজাননতো ভোজনম্হি চামত্তঞ্ঞুং. অপিচ পচ্চৰেক্খণমত্তা ৰিস্সজ্জনমত্তাতি ইমিস্সাপি মত্তায অজাননতো অমত্তঞ্ঞুং, ইদং ভোজনং ধম্মিকং, ইদং অধম্মিকন্তিপি অজানন্তং. কামচ্ছন্দব্যাপাদৰিহিংসাৰিতক্কৰসিতায কুসীতং. হীনৰীরিযন্তি নিব্বীরিযং চতূসু ইরিযাপথেসু ৰীরিযকরণরহিতং. পসহতীতি অভিভৰতি অজ্ঝোত্থরতি. ৰাতো রুক্খংৰ দুব্বলন্তি বলৰৰাতো ছিন্নপপাতে জাতং দুব্বলরুক্খং ৰিয. যথা হি সো ৰাতো তস্স দুব্বলরুক্খস্স পুপ্ফফলপল্লৰাদীনিপি পাতেতি, খুদ্দকসাখাপি ভঞ্জতি, মহাসাখাপি ভঞ্জতি, সমূলকম্পি তং রুক্খং উপ্পাটেত্ৰা উদ্ধংমূলং অধোসাখং কত্ৰা গচ্ছতি, এৰমেৰ এৰরূপং পুগ্গলং অন্তো উপ্পন্নো কিলেসমারো পসহতি, বলৰৰাতো দুব্বলরুক্খস্স পুপ্ফফলপল্লৰাদিপাতনং ৰিয খুদ্দানুখুদ্দকাপত্তিআপজ্জনম্পি করোতি, খুদ্দকসাখাভঞ্জনং ৰিয নিস্সগ্গিযাদিআপত্তিআপজ্জনম্পি করোতি, মহাসাখাভঞ্জনং ৰিয তেরসসঙ্ঘাদিসেসাপত্তিআপজ্জনম্পি করোতি, উপ্পাটেত্ৰা উদ্ধং, মূলকং হেট্ঠাসাখং কত্ৰা পাতনং ৰিয পারাজিকাপত্তিআপজ্জনম্পি করোতি, স্ৰাক্খাতসাসনা নীহরিত্ৰা কতিপাহেনেৰ গিহিভাৰং পাপেতীতি এৰং এৰরূপং পুগ্গলং কিলেসমারো অত্তনো ৰসে ৰত্তেতীতি অত্থো.

অসুভানুপস্সিন্তি দসসু অসুভেসু অঞ্ঞতরং অসুভং পস্সন্তং পটিকূলমনসিকারে যুত্তং কেসে অসুভতো পস্সন্তং লোমে নখে দন্তে তচং ৰণ্ণং সণ্ঠানং অসুভতো পস্সন্তং. ইন্দ্রিযেসূতি ছসু ইন্দ্রিযেসু. সুসংৰুতন্তি নিমিত্তাদিগ্গাহরহিতং পিহিতদ্ৰারং. অমত্তঞ্ঞুতাপটিক্খেপেন ভোজনম্হি চ মত্তঞ্ঞুং. সদ্ধন্তি কম্মস্স চেৰ ফলস্স চ সদ্দহনলক্খণায লোকিকায সদ্ধায চেৰ তীসু ৰত্থূসু অৰেচ্চপ্পসাদসঙ্খাতায লোকুত্তরসদ্ধায চ সমন্নাগতং. আরদ্ধৰীরিযন্তি পগ্গহিতৰীরিযং পরিপুণ্ণৰীরিযং. তং ৰেতি এৰরূপং তং পুগ্গলং যথা দুব্বলৰাতো সণিকং পহরন্তো একগ্ঘনং সেলং চালেতুং ন সক্কোতি, তথা অব্ভন্তরে উপ্পজ্জমানোপি দুব্বলকিলেসমারো নপ্পসহতি, খোভেতুং ৰা চালেতুং ৰা ন সক্কোতীতি অত্থো.

তাপি খো তস্স পুরাণদুতিযিকাযো থেরং পরিৰারেত্ৰা ‘‘ত্ৰং কং আপুচ্ছিত্ৰা পব্বজিতো, ইদানি গিহী ভৰিস্সসি ন ভৰিস্সসী’’তিআদীনি ৰত্ৰা কাসাৰং নীহরিতুকামা অহেসুং. থেরো তাসং আকারং সল্লক্খেত্ৰা নিসিন্নাসনা ৰুট্ঠায ইদ্ধিযা উপ্পত্তিত্ৰা কূটাগারকণ্ণিকং দ্ৰিধা ভিন্দিত্ৰা আকাসেনাগন্ত্ৰা সত্থরি গাথা পরিযোসাপেন্তেযেৰ সত্থু সুৰণ্ণৰণ্ণং সরীরং অভিত্থৰন্তো আকাসতো ওতরিত্ৰা তথাগতস্স পাদে ৰন্দি.

গাথাপরিযোসানে সম্পত্তভিক্খূ সোতাপত্তিফলাদীসু পতিট্ঠহিংসূতি.

মহাকাল়ত্থেরৰত্থু ছট্ঠং.