৪. কাল়যক্খিনীৰত্থু

ন হি ৰেরেনাতি ইমং ধম্মদেসনং সত্থা জেতৰনে ৰিহরন্তো অঞ্ঞতরং ৰঞ্ঝিত্থিং আরব্ভ কথেসি.

একো কির কুটুম্বিকপুত্তো পিতরি কালকতে খেত্তে চ ঘরে চ সব্বকম্মানি অত্তনাৰ করোন্তো মাতরং পটিজগ্গি. অথস্স মাতা ‘‘কুমারিকং তে, তাত, আনেস্সামী’’তি আহ. ‘‘অম্ম, মা এৰং ৰদেথ, অহং যাৰজীৰং তুম্হে পটিজগ্গিস্সামী’’তি. ‘‘তাত, খেত্তে চ ঘরে চ কিচ্চং ত্ৰমেৰ করোসি, তেন ময্হং চিত্তসুখং নাম ন হোতি, আনেস্সামী’’তি. সো পুনপ্পুনং পটিক্খিপিত্ৰা তুণ্হী অহোসি. সা একং কুলং গন্তুকামা গেহা নিক্খমি. অথ নং পুত্তো ‘‘কতরং কুলং গচ্ছথা’’তি পুচ্ছিত্ৰা ‘‘অসুককুলং নামা’’তি ৰুত্তে তত্থ গমনং পটিসেধেত্ৰা অত্তনো অভিরুচিতং কুলং আচিক্খি. সা তত্থ গন্ত্ৰা কুমারিকং ৰারেত্ৰা দিৰসং ৰৰত্থপেত্ৰা তং আনেত্ৰা তস্স ঘরে অকাসি. সা ৰঞ্ঝা অহোসি. অথ নং মাতা, পুত্ত, ত্ৰং অত্তনো রুচিযা কুমারিকং আণাপেসি, সা ইদানি ৰঞ্ঝা জাতা, অপুত্তকঞ্চ নাম কুলং ৰিনস্সতি, পৰেণী ন ঘটীযতি, তেন অঞ্ঞং তে কুমারিকং আনেমীতি. তেন ‘‘অলং, অম্মা’’তি ৰুচ্চমানাপি পুনপ্পুনং কথেসি. ৰঞ্ঝিত্থী তং কথং সুত্ৰা ‘‘পুত্তা নাম মাতাপিতূনং ৰচনং অতিক্কমিতুং ন সক্কোন্তি, ইদানি অঞ্ঞং ৰিজাযিনিং ইত্থিং আনেত্ৰা মং দাসিভোগেন ভুঞ্জিস্সতি. যংনূনাহং সযমেৰ একং কুমারিকং আনেয্য’’ন্তি চিন্তেত্ৰা একং কুলং গন্ত্ৰা তস্সত্থায কুমারিকং ৰারেত্ৰা ‘‘কিং নামেতং, অম্ম, ৰদেসী’’তি তেহি পটিক্খিত্তা ‘‘অহং ৰঞ্ঝা, অপুত্তকং নাম কুলং ৰিনস্সতি, তুম্হাকং পন ধীতা পুত্তং ৰা ধীতরং ৰা লভিত্ৰা কুটুম্বিকস্স সামিনী ভৰিস্সতি, ময্হং সামিকস্স নং দেথা’’তি যাচিত্ৰা সম্পটিচ্ছাপেত্ৰা আনেত্ৰা সামিকস্স ঘরে অকাসি.

অথস্সা এতদহোসি – ‘‘সচাযং পুত্তং ৰা ধীতরং ৰা লভিস্সতি, অযমেৰ কুটুম্বস্স সামিনী ভৰিস্সতি. যথা দারকং ন লভতি, তথেৰ নং কাতুং ৰট্টতী’’তি. অথ নং সা আহ – ‘‘অম্ম, যদা তে কুচ্ছিযং গব্ভো পতিট্ঠাতি, অথ মে আরোচেয্যাসী’’তি. সা ‘‘সাধূ’’তি পটিস্সুণিত্ৰা গব্ভে পতিট্ঠিতে তস্সা আরোচেসি. ইতরিস্সা পন সা সযমেৰ নিচ্চং যাগুভত্তং দেতি, অথস্সা আহারেনেৰ সদ্ধিং গব্ভপাতনভেসজ্জমদাসি, গব্ভো পতি. দুতিযম্পি গব্ভে পতিট্ঠিতে আরোচেসি, ইতরা দুতিযম্পি তথেৰ পাতেসি. অথ নং পটিৰিস্সকিত্থিযো পুচ্ছিংসু – ‘‘কচ্চি তে সপত্তি অন্তরাযং করোতী’’তি? সা তমত্থং আরোচেত্ৰা ‘‘অন্ধবালে, কস্মা এৰমকাসি, অযং তৰ ইস্সরিযভযেন গব্ভস্স পাতনভেসজ্জং যোজেত্ৰা দেতি, তেন তে গব্ভো পততি, মা পুন এৰমকত্থা’’তি ৰুত্তা ততিযৰারে ন কথেসি. অথ সা ইতরিস্সা উদরং দিস্ৰা ‘‘কস্মা ময্হং গব্ভস্স পতিট্ঠিতভাৰং ন কথেসী’’তি ৰত্ৰা ‘‘ত্ৰং মং আনেত্ৰা ৰঞ্চেত্ৰা দ্ৰে ৰারে গব্ভং পাতেসি, কিমত্থং তুয্হং কথেমী’’তি ৰুত্তে ‘‘নট্ঠা দানিম্হী’’তি চিন্তেত্ৰা তস্সা পমাদং ওলোকেন্তী পরিণতে গব্ভে ওকাসং লভিত্ৰা ভেসজ্জং যোজেত্ৰা অদাসি. গব্ভো পরিণতত্তা পতিতুং অসক্কোন্তো তিরিযং নিপতি, খরা ৰেদনা উপ্পজ্জি, জীৰিতসংসযং পাপুণি. সা ‘‘নাসিতম্হি তযা, ত্ৰমেৰ মং আনেত্ৰা ত্ৰমেৰ তযোপি ৰারে দারকে নাসেসি, ইদানি অহম্পি নস্সামি, ইতো দানি চুতা যক্খিনী হুত্ৰা তৰ দারকে খাদিতুং সমত্থা হুত্ৰা নিব্বত্তেয্য’’ন্তি পত্থনং পট্ঠপেত্ৰা কালং কত্ৰা তস্মিংযেৰ গেহে মজ্জারী হুত্ৰা নিব্বত্তি. ইতরম্পি সামিকো গহেত্ৰা ‘‘তযা মে কুলূপচ্ছেদো কতো’’তি কপ্পরজণ্ণুকাদীহি সুপোথিতং পোথেসি. সা তেনেৰাবাধেন কালং কত্ৰা তত্থেৰ কুক্কুটী হুত্ৰা নিব্বত্তা.

কুক্কুটী ন চিরস্সেৰ অণ্ডানি ৰিজাযি, মজ্জারী আগন্ত্ৰা তানি অণ্ডানি খাদি. দুতিযম্পি ততিযম্পি খাদিযেৰ. কুক্কুটী চিন্তেসি – ‘‘তযো ৰারে মম অণ্ডানি খাদিত্ৰা ইদানি মম্পি খাদিতুকামাসী’’তি. ‘‘ইতো চুতা সপুত্তকং তং খাদিতুং লভেয্য’’ন্তি পত্থনং কত্ৰা ততো চুতা অরঞ্ঞে দীপিনী হুত্ৰা নিব্বত্তি. ইতরা মিগী হুত্ৰা নিব্বত্তি. তস্সা ৰিজাতকালে দীপিনী আগন্ত্ৰা তযো ৰারে পুত্তকে খাদি. মিগী মরণকালে ‘‘অযং মে তিক্খত্তুং পুত্তকে খাদিত্ৰা ইদানি মম্পি খাদিস্সতি, ইতো দানি চুতা এতং সপুত্তকং খাদিতুং লভেয্য’’ন্তি পত্থনং কত্ৰা ইতো চুতা যক্খিনী হুত্ৰা নিব্বত্তি. দীপিনীপি তথেৰ ততো চুতা সাৰত্থিযং কুলধীতা হুত্ৰা নিব্বত্তি, সা ৰুদ্ধিপ্পত্তা দ্ৰারগামকে পতিকুলং অগমাসি, অপরভাগে চ পুত্তং ৰিজাযি. যক্খিনীপি তস্সা পিযসহাযিকাৰণ্ণেন আগন্ত্ৰা ‘‘কুহিং মে সহাযিকা’’তি ‘‘অন্তোগব্ভে ৰিজাতা’’তি ৰুত্তে ‘‘পুত্তং নু খো ৰিজাতা, উদাহু ধীতরন্তি পস্সিস্সামি ন’’ন্তি গব্ভং পৰিসিত্ৰা পস্সন্তী ৰিয দারকং গহেত্ৰা খাদিত্ৰা গতা. পুন দুতিযৰারেপি তথেৰ খাদি. ততিযৰারে ইতরা গরুভারা হুত্ৰা সামিকং আমন্তেত্ৰা, ‘‘সামি, ইমস্মিং ঠানে একা যক্খিনী মম দ্ৰে পুত্তে খাদিত্ৰা গতা, ইদানি মম কুলগেহং গন্ত্ৰা ৰিজাযিস্সামী’’তি কুলগেহং গন্ত্ৰা ৰিজাযি.

তদা সা যক্খিনী উদকৰারং গতা হোতি. ৰেস্সৰণস্স হি যক্খিনিযো ৰারেন অনোতত্তদহতো সীসপরম্পরায উদকমাহরন্তি. তা চতুমাসচ্চযেনপি পঞ্চমাসচ্চযেনপি মুচ্চন্তি. অপরা যক্খিনিযো কিলন্তকাযা জীৰিতক্খযম্পি পাপুণন্তি. সা পন উদকৰারতো মুত্তমত্তাৰ ৰেগেন তং ঘরং গন্ত্ৰা ‘‘কুহিং মে সহাযিকা’’তি পুচ্ছি. ‘‘কুহিং নং পস্সিস্সসি, তস্সা ইমস্মিং ঠানে জাতজাতদারকে যক্খিনী আগন্ত্ৰা খাদতি, তস্মা কুলগেহং গতা’’তি. সা ‘‘যত্থ ৰা তত্থ ৰা গচ্ছতু, ন মে মুচ্চিস্সতী’’তি ৰেরৰেগসমুস্সাহিতমানসা নগরাভিমুখী পক্খন্দি. ইতরাপি নামগ্গহণদিৰসে নং দারকং ন্হাপেত্ৰা নামং কত্ৰা, ‘‘সামি, ইদানি সকঘরং গচ্ছামা’’তি পুত্তমাদায সামিকেন সদ্ধিং ৰিহারমজ্ঝে গতমগ্গেন গচ্ছন্তী পুত্তং সামিকস্স দত্ৰা ৰিহারপোক্খরণিযা ন্হাত্ৰা সামিকে ন্হাযন্তে উত্তরিত্ৰা পুত্তস্স থঞ্ঞং পাযমানা ঠিতা যক্খিনিং আগচ্ছন্তিং দিস্ৰা সঞ্জানিত্ৰা, ‘‘সামি, ৰেগেন এহি, অযং সা যক্খিনী, ৰেগেন এহি, অযং সা যক্খিনী’’তি উচ্চাসদ্দং কত্ৰা যাৰ তস্স আগমনং সণ্ঠাতুং অসক্কোন্তী নিৰত্তেত্ৰা অন্তোৰিহারাভিমুখী পক্খন্দি.

তস্মিং সমযে সত্থা পরিসমজ্ঝে ধম্মং দেসেসি. সা পুত্তং তথাগতস্স পাদপিট্ঠে নিপজ্জাপেত্ৰা ‘‘তুম্হাকং মযা এস দিন্নো, পুত্তস্স মে জীৰিতং দেথা’’তি আহ. দ্ৰারকোট্ঠকে অধিৰত্থো সুমনদেৰো নাম যক্খিনিযা অন্তো পৰিসিতুং নাদাসি. সত্থা আনন্দত্থেরং আমন্তেত্ৰা ‘‘গচ্ছ, আনন্দ, তং যক্খিনিং পক্কোসাহী’’তি আহ. থেরো পক্কোসি. ইতরা ‘‘অযং, ভন্তে, আগচ্ছতী’’তি আহ. সত্থা ‘‘এতু, মা সদ্দমকাসী’’তি ৰত্ৰা তং আগন্ত্ৰা ঠিতং ‘‘কস্মা এৰং করোসি, সচে তুম্হে মাদিসস্স বুদ্ধস্স সম্মুখীভাৰং নাগমিস্সথ, অহিনকুলানং ৰিয অচ্ছফন্দনানং ৰিয কাকোলূকানং ৰিয চ কপ্পট্ঠিতিকং ৰো ৰেরং অভৰিস্স, কস্মা ৰেরং পটিৰেরং করোথ. ৰেরঞ্হি অৰেরেন উপসম্মতি, নো ৰেরেনা’’তি ৰত্ৰা ইমং গাথমাহ –

৫. ‘‘ন হি ৰেরেন ৰেরানি, সম্মন্তীধ কুদাচনং;

অৰেরেন চ সম্মন্তি, এস ধম্মো সনন্তনো’’তি.

তত্থ ন হি ৰেরেনাতি যথা হি খেল়সিঙ্ঘাণিকাদীহি অসুচীহি মক্খিতং ঠানং তেহেৰ অসুচীহি ধোৰন্তা সুদ্ধং নিগ্গন্ধং কাতুং ন সক্কোন্তি, অথ খো তং ঠানং ভিয্যোসোমত্তায অসুদ্ধতরঞ্চেৰ দুগ্গন্ধতরঞ্চ হোতি; এৰমেৰ অক্কোসন্তং পচ্চক্কোসন্তো পহরন্তং পটিপহরন্তো ৰেরেন ৰেরং ৰূপসমেতুং ন সক্কোতি, অথ খো ভিয্যো ভিয্যো ৰেরমেৰ করোতি. ইতি ৰেরানি নাম ৰেরেন কিস্মিঞ্চি কালে ন সম্মন্তি, অথ খো ৰড্ঢন্তিযেৰ. অৰেরেন চ সম্মন্তীতি যথা পন তানি খেল়াদীনি অসুচীনি ৰিপ্পসন্নেন উদকেন ধোৰিযমানানি নস্সন্তি, তং ঠানং সুদ্ধং হোতি সুগন্ধং; এৰমেৰ অৰেরেন খন্তিমেত্তোদকেন যোনিসো মনসিকারেন পচ্চৰেক্খণেন ৰেরানি ৰূপসম্মন্তি পটিপ্পস্সম্ভন্তি অভাৰং গচ্ছন্তি. এস ধম্মো সনন্তনোতি এস অৰেরেন ৰেরূপসমনসঙ্খাতো পোরাণকো ধম্মো; সব্বেসং বুদ্ধপচ্চেকবুদ্ধখীণাসৰানং গতমগ্গোতি.

গাথাপরিযোসানে যক্খিনী সোতাপত্তিফলে পতিট্ঠহি. সম্পত্তপরিসাযপি ধম্মদেসনা সাত্থিকা অহোসি.

সত্থা তং ইত্থিং আহ – ‘‘এতিস্সা তৰ পুত্তং দেহী’’তি. ‘‘ভাযামি, ভন্তে’’তি. ‘‘মা ভাযি, নত্থি তে এতং নিস্সায পরিপন্থো’’তি আহ. সা তস্সা পুত্তমদাসি. সা তং চুম্বিত্ৰা আলিঙ্গেত্ৰা পুন মাতুযেৰ দত্ৰা রোদিতুং আরভি. অথ নং সত্থা ‘‘কিমেত’’ন্তি পুচ্ছি. ‘‘ভন্তে, অহং পুব্বে যথা ৰা তথা ৰা জীৰিকং কপ্পেন্তীপি কুচ্ছিপূরং নালত্থং, ইদানি কথং জীৰিস্সামী’’তি. অথ নং সত্থা ‘‘মা চিন্তযী’’তি সমস্সাসেত্ৰা তং ইত্থিমাহ – ‘‘ইমং নেত্ৰা অত্তনো গেহে নিৰাসাপেত্ৰা অগ্গযাগুভত্তেহি পটিজগ্গাহী’’তি. সা তং নেত্ৰা পিট্ঠিৰংসে পতিট্ঠাপেত্ৰা অগ্গযাগুভত্তেহি পটিজগ্গি, তস্সা ৰীহিপহরণকালে মুসলগ্গেন মুদ্ধং পহরন্তং ৰিয উপট্ঠাসি. সা সহাযিকং আমন্তেত্ৰা ‘‘ইমস্মিং ঠানে ৰসিতুং ন সক্কোমি, অঞ্ঞত্থ মং পতিট্ঠাপেহী’’তি ৰত্ৰা মুসলসালায উদকচাটিযং উদ্ধনে নিব্বকোসে সঙ্কারকূটে গামদ্ৰারে চাতি এতেসু ঠানেসু পতিট্ঠাপিতাপি ইধ মে মুসলেন সীসং ভিন্দন্তং ৰিয উপট্ঠাতি, ইধ দারকা উচ্ছিট্ঠোদকং ওতারেন্তি, ইধ সুনখা নিপজ্জন্তি, ইধ দারকা অসুচিং করোন্তি, ইধ কচৰরং ছড্ডেন্তি, ইধ গামদারকা লক্খযোগ্গং করোন্তীতি সব্বানি তানি পটিক্খিপি. অথ নং বহিগামে ৰিৰিত্তোকাসে পতিট্ঠাপেত্ৰা তত্থ তস্সা অগ্গযাগুভত্তাদীনি হরিত্ৰা পটিজগ্গি. সা যক্খিনী এৰং চিন্তেসি – ‘‘অযং মে সহাযিকা ইদানি বহূপকারা, হন্দাহং কিঞ্চি পটিগুণং করোমী’’তি. সা ‘‘ইমস্মিং সংৰচ্ছরে সুব্বুট্ঠিকা ভৰিস্সতি, থলট্ঠানে সস্সং করোহি, ইমস্মিং সংৰচ্ছরে দুব্বুট্ঠিকা ভৰিস্সতি, নিন্নট্ঠানেযেৰ সস্সং করোহী’’তি সহাযিকায আরোচেতি. সেসজনেহি কতসস্সং অতিউদকেন ৰা অনোদকেন ৰা নস্সতি, তস্সা অতিৰিয সম্পজ্জতি. অথ নং সেসজনা, ‘‘অম্ম, তযা কতসস্সং নেৰ অচ্চোদকেন, ন অনুদকেন নস্সতি, সুব্বুট্ঠিদুব্বুট্ঠিভাৰং ঞত্ৰা কম্মং করোসি, কিং নু খো এত’’ন্তি পুচ্ছিংসু. ‘‘অম্হাকং সহাযিকা যক্খিনী সুব্বুট্ঠিদুব্বুট্ঠিভাৰং আচিক্খতি, মযং তস্সা ৰচনেন থলেসু নিন্নেসু সস্সানি করোম, তেন নো সম্পজ্জতি. কিং ন পস্সথ? নিবদ্ধং অম্হাকং গেহতো যাগুভত্তাদীনি হরিযমানানি, তানি এতিস্সা হরীযন্তি, তুম্হেপি এতিস্সা অগ্গযাগুভত্তাদীনি হরথ, তুম্হাকম্পি কম্মন্তে ওলোকেস্সতী’’তি. অথস্সা সকলনগরৰাসিনো সক্কারং করিংসু. সাপি ততো পট্ঠায সব্বেসং কম্মন্তে ওলোকেন্তী লাভগ্গপ্পত্তা অহোসি মহাপরিৰারা. সা অপরভাগে অট্ঠ সলাকভত্তানি পট্ঠপেসি. তানি যাৰজ্জকালা দীযন্তিযেৰাতি.

কাল়যক্খিনীৰত্থু চতুত্থং.