১০. চুন্দসূকরিকৰত্থু

ইধ সোচেতীতি ইমং ধম্মদেসনং সত্থা ৰেল়ুৰনে ৰিহরন্তো চুন্দসূকরিকং নাম পুরিসং আরব্ভ কথেসি.

সো কির পঞ্চপণ্ণাস ৰস্সানি সূকরে ৰধিত্ৰা খাদন্তো চ ৰিক্কিণন্তো চ জীৰিকং কপ্পেসি. ছাতকালে সকটেন ৰীহিং আদায জনপদং গন্ত্ৰা একনাল়িদ্ৰেনাল়িমত্তেন গামসূকরপোতকে কিণিত্ৰা সকটং পূরেত্ৰা আগন্ত্ৰা পচ্ছানিৰেসনে ৰজং ৰিয একং ঠানং পরিক্খিপিত্ৰা তত্থেৰ তেসং নিৰাপং রোপেত্ৰা, তেসু নানাগচ্ছে চ সরীরমলঞ্চ খাদিত্ৰা ৰড্ঢিতেসু যং যং মারেতুকামো হোতি, তং তং আল়ানে নিচ্চলং বন্ধিত্ৰা সরীরমংসস্স উদ্ধুমাযিত্ৰা বহলভাৰত্থং চতুরস্সমুগ্গরেন পোথেত্ৰা, ‘‘বহলমংসো জাতো’’তি ঞত্ৰা মুখং ৰিৰরিত্ৰা অন্তরে দণ্ডকং দত্ৰা লোহথালিযা পক্কুথিতং উণ্হোদকং মুখে আসিঞ্চতি. তং কুচ্ছিং পৰিসিত্ৰা পক্কুথিতং করীসং আদায অধোভাগেন নিক্খমতি, যাৰ থোকম্পি করীসং অত্থি, তাৰ আৰিলং হুত্ৰা নিক্খমতি, সুদ্ধে উদরে অচ্ছং অনাৰিলং হুত্ৰা নিক্খমতি. অথস্স অৰসেসং উদকং পিট্ঠিযং আসিঞ্চতি. তং কাল়চম্মং উপ্পাটেত্ৰা গচ্ছতি. ততো তিণুক্কায লোমানি ঝাপেত্ৰা তিখিণেন অসিনা সীসং ছিন্দতি. পগ্ঘরণতং লোহিতং ভাজনেন পটিগ্গহেত্ৰা মংসং লোহিতেন মদ্দিত্ৰা পচিত্ৰা পুত্তদারমজ্ঝে নিসিন্নো খাদিত্ৰা সেসং ৰিক্কিণাতি. তস্স ইমিনাৰ নিযামেন জীৰিকং কপ্পেন্তস্স পঞ্চপণ্ণাস ৰস্সানি অতিক্কন্তানি. তথাগতে ধুরৰিহারে ৰসন্তে একদিৰসম্পি পুপ্ফমুট্ঠিমত্তেন পূজা ৰা কটচ্ছুমত্তং ভিক্খদানং ৰা অঞ্ঞং ৰা কিঞ্চি পুঞ্ঞং নাম নাহোসি. অথস্স সরীরে রোগো উপ্পজ্জি, জীৰন্তস্সেৰ অৰীচিমহানিরযসন্তাপো উপট্ঠহি. অৰীচিসন্তাপো নাম যোজনসতে ঠত্ৰা ওলোকেন্তস্স অক্খীনং ভিজ্জনসমত্থো পরিল়াহো হোতি. ৰুত্তম্পি চেতং –

‘‘তস্স অযোমযা ভূমি, জলিতা তেজসাযুতা;

সমন্তা যোজনসতং, ফরিত্ৰা তিট্ঠতি সব্বদা’’তি. (ম. নি. ৩.২৬৭; অ. নি. ৩.৩৬);

নাগসেনত্থেরেন পনস্স পাকতিকগ্গিসন্তাপতো অধিমত্ততায অযং উপমা ৰুত্তা – ‘‘যথা, মহারাজ, কূটাগারমত্তো পাসাণোপি নেরযিকগ্গিম্হি পক্খিত্তো খণেন ৰিলযং গচ্ছতি, নিব্বত্তসত্তা পনেত্থ কম্মবলেন মাতুকুচ্ছিগতা ৰিয ন ৰিলীযন্তী’’তি (মি. প. ২.৪.৬). তস্স তস্মিং সন্তাপে উপট্ঠিতে কম্মসরিক্খকো আকারো উপ্পজ্জি. গেহমজ্ঝেযেৰ সূকররৰং রৰিত্ৰা জণ্ণুকেহি ৰিচরন্তো পুরত্থিমৰত্থুম্পি পচ্ছিমৰত্থুম্পি গচ্ছতি. অথস্স গেহমানুসকা তং দল়্হং গহেত্ৰা মুখং পিদহন্তি. কম্মৰিপাকো নাম ন সক্কা কেনচি পটিবাহিতুং. সো ৰিরৰন্তোৰ ইতো চিতো চ ৰিচরতি. সমন্তা সত্তসু ঘরেসু মনুস্সা নিদ্দং ন লভন্তি. মরণভযেন তজ্জিতস্স পন বহিনিক্খমনং নিৰারেতুং অসক্কোন্তো সব্বো গেহজনো যথা অন্তোঠিতো বহি ৰিচরিতুং ন সক্কোতি, তথা গেহদ্ৰারানি থকেত্ৰা বহিগেহং পরিৰারেত্ৰা রক্খন্তো অচ্ছতি. ইতরো অন্তোগেহেযেৰ নিরযসন্তাপেন ৰিরৰন্তো ইতো চিতো চ ৰিচরতি. এৰং সত্তদিৰসানি ৰিচরিত্ৰা অট্ঠমে দিৰসে কালং কত্ৰা অৰীচিমহানিরযে নিব্বত্তি. অৰীচিমহানিরযো দেৰদূতসুত্তেন (ম. নি. ৩.২৬১ আদযো; অ. নি. ৩.৩৬) ৰণ্ণেতব্বোতি.

ভিক্খূ তস্স ঘরদ্ৰারেন গচ্ছন্তা তং সদ্দং সুত্ৰা, ‘‘সূকরসদ্দো’’তি সঞ্ঞিনো হুত্ৰা ৰিহারং গন্ত্ৰা সত্থু সন্তিকে নিসিন্না এৰমাহংসু – ‘‘ভন্তে, চুন্দসূকরিতস্স গেহদ্ৰারং পিদহিত্ৰা সূকরানং মারিযমানানং অজ্জ সত্তমো দিৰসো, গেহে কাচি মঙ্গলকিরিযা ভৰিস্সতি মঞ্ঞে. এত্তকে নাম, ভন্তে, সূকরে মারেন্তস্স একম্পি মেত্তচিত্তং ৰা কারুঞ্ঞং ৰা নত্থি, ন ৰত নো এৰরূপো কক্খল়ো ফরুসো সত্তো দিট্ঠপুব্বো’’তি. সত্থা – ‘‘ন, ভিক্খৰে, সো ইমে সত্তদিৰসে সূকরে মারেতি, কম্মসরিক্খকং পনস্স ৰিপাকং উদপাদি, জীৰন্তস্সেৰ অৰীচিমহানিরযসন্তাপো উপট্ঠাসি. সো তেন সন্তাপেন সত্ত দিৰসানি সূকররৰং রৰন্তো অন্তোনিৰেসনে ৰিচরিত্ৰা অজ্জ কালং কত্ৰা অৰীচিম্হি নিব্বত্তো’’তি ৰত্ৰা, ‘‘ভন্তে, ইধ লোকে এৰং সোচিত্ৰা পুন গন্ত্ৰা সোচনট্ঠানেযেৰ নিব্বত্তো’’তি ৰুত্তে, ‘‘আম, ভিক্খৰে, পমত্তা নাম গহট্ঠা ৰা হোন্তু পব্বজিতা ৰা, উভযত্থ সোচন্তিযেৰা’’তি ৰত্ৰা ইমং গাথমাহ –

১৫. ‘‘ইধ সোচতি পেচ্চ সোচতি,

পাপকারী উভযত্থ সোচতি;

সো সোচতি সো ৰিহঞ্ঞতি;

দিস্ৰা কম্মকিলিট্ঠমত্তনো’’তি.

তত্থ পাপকারীতি নানপ্পকারস্স পাপকম্মস্স কারকো পুগ্গলো ‘‘অকতং ৰত মে কল্যাণং, কতং পাপ’’ন্তি একংসেনেৰ মরণসমযে ইধ সোচতি, ইদমস্স কম্মসোচনং. ৰিপাকং অনুভৰন্তো পন পেচ্চ সোচতি. ইদমস্স পরলোকে ৰিপাকসোচনং. এৰং সো উভযত্থ সোচতিযেৰ. তেনেৰ কারণেন জীৰমানোযেৰ সো চুন্দসূকরিকোপি সোচতি. দিস্ৰা কম্মকিলিট্ঠন্তি অত্তনো কিলিট্ঠকম্মং পস্সিত্ৰা নানপ্পকারকং ৰিলপন্তো ৰিহঞ্ঞতীতি.

গাথাপরিযোসানে বহূ সোতাপন্নাদযো অহেসুং. মহাজনস্স সাত্থিকা ধম্মদেসনা জাতাতি.

চুন্দসূকরিকৰত্থু দসমং.