৯. তিমিরৰগ্গো

১. তিমিরপুপ্ফিযত্থেরঅপদানৰণ্ণনা

চন্দভাগানদীতীরেতিআদিকং আযস্মতো তিমিরপুপ্ফিযত্থেরস্স অপদানং. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে একস্মিং কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা ৰসন্তো কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা চন্দভাগায নদিযা সমীপে ৰসতি, ৰিৰেককামতায হিমৰন্তং গন্ত্ৰা নিসিন্নং সিদ্ধত্থং ভগৰন্তং দিস্ৰা ৰন্দিত্ৰা তস্স গুণং পসীদিত্ৰা তিমিরপুপ্ফং গহেত্ৰা পূজেসি. সো তেন পুঞ্ঞেন দেৰেসু চ মনুস্সেসু চ সম্পত্তিমনুভৰন্তো সংসরিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

১. সো অপরভাগে পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চন্দভাগানদীতীরেতিআদিমাহ. তস্সত্থো হেট্ঠা ৰুত্তোৰ. অনুভোতং ৰজামহন্তি গঙ্গায আসন্নে ৰসনভাৰেন সব্বত্থ রম্মভাৰেন গঙ্গাতো হেট্ঠা সোতানুসারেন অহং ৰজামি গচ্ছামি তত্থ তত্থ ৰসামীতি অত্থো. নিসিন্নং সমণং দিস্ৰাতি সমিতপাপত্তা সোসিতপাপত্তা সমণসঙ্খাতং সম্মাসম্বুদ্ধং দিস্ৰাতি অত্থো.

২. এৰং চিন্তেসহং তদাতি অযং ভগৰা সযং তিণ্ণো সব্বসত্তে তারযিস্সতি সংসারতো উত্তারেতি সযং কাযদ্ৰারাদীহি দমিতো অযং ভগৰা পরে দমেতি.

৩. সযং অস্সত্থো অস্সাসম্পত্তো, কিলেসপরিল়াহতো মুত্তো সব্বসত্তে অস্সাসেতি, সন্তভাৰং আপাপেতি. সযং সন্তো সন্তকাযচিত্তো পরেসং সন্তকাযচিত্তং পাপেতি. সযং মুত্তো সংসারতো মুচ্চিতো পরে সংসারতো মোচযিস্সতি. সো অযং ভগৰা সযং নিব্বুতো কিলেসগ্গীহি নিব্বুতো পরেসম্পি কিলেসগ্গীহি নিব্বাপেস্সতীতি অহং তদা এৰং চিন্তেসিন্তি অত্থো.

৪. গহেত্ৰা তিমিরপুপ্ফন্তি সকলং ৰনন্তং নীলকাল়রংসীহি অন্ধকারং ৰিয কুরুমানং খাযতীতি তিমিরং পুপ্ফং তং গহেত্ৰা কণ্ণিকাৰণ্টং গহেত্ৰা মত্থকে সীসস্স উপরি আকাসে ওকিরিং পূজেসিন্তি অত্থো. সেসং উত্তানত্থমেৰাতি.

তিমিরপুপ্ফিযত্থেরঅপদানৰণ্ণনা সমত্তা.

২. গতসঞ্ঞকত্থেরঅপদানৰণ্ণনা

জাতিযা সত্তৰস্সোহন্তিআদিকং আযস্মতো গতসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে একস্মিং কুলগেহে নিব্বত্তো পুরাকতৰাসনাৰসেন সদ্ধাজাতো সত্তৰস্সিককালেযেৰ পব্বজিতো ভগৰতো পণামকরণেনেৰ পাকটো অহোসি. সো একদিৰসং অতীৰ নীলমণিপ্পভানি নঙ্গলকসিতট্ঠানে উট্ঠিতসত্তপুপ্ফানি গহেত্ৰা আকাসে পূজেসি. সো যাৰতাযুকং সমণধম্মং কত্ৰা তেন পুঞ্ঞেন দেৰমনুস্সেসু সংসরন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

১০. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো জাতিযা সত্তৰস্সোহন্তিআদিমাহ. তত্থ জাতিযা সত্তৰস্সোতি মাতুগব্ভতো নিক্খন্তকালতো পট্ঠায পরিপুণ্ণসত্তৰস্সিকোতি অত্থো. পব্বজিং অনগারিযন্তি অগারস্স হিতং আগারিযং কসিৰাণিজ্জাদিকম্মং নত্থি আগারিযন্তি অনগারিযং, বুদ্ধসাসনে পব্বজিং অহন্তি অত্থো.

১২. সুগতানুগতং মগ্গন্তি বুদ্ধেন গতং মগ্গং. অথ ৰা সুগতেন দেসিতং ধম্মানুধম্মপটিপত্তিপূরণৰসেন হট্ঠমানসো তুট্ঠচিত্তো পূজেত্ৰাতি সম্বন্ধো. সেসং সব্বত্থ উত্তানত্থমেৰাতি.

গতসঞ্ঞকত্থেরঅপদানৰণ্ণনা সমত্তা.

৩. নিপন্নঞ্জলিকত্থেরঅপদানৰণ্ণনা

রুক্খমূলে নিসিন্নোহন্তিআদিকং আযস্মতো নিপন্নঞ্জলিকত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে কুলগেহে নিব্বত্তো ৰুদ্ধিপ্পত্তো পব্বজিত্ৰা রুক্খমূলিকঙ্গং পূরযমানো অরঞ্ঞে ৰিহরতি. তস্মিং সমযে খরো আবাধো উপ্পজ্জি, তেন পীল়িতো পরমকারুঞ্ঞপ্পত্তো অহোসি. তদা ভগৰা তস্স কারুঞ্ঞেন তত্থ অগমাসি. অথ সো নিপন্নকোৰ উট্ঠিতুং অসক্কোন্তো সিরসি অঞ্জলিং কত্ৰা ভগৰতো পণামং অকাসি. সো ততো চুতো তুসিতভৰনে উপ্পন্নো তত্থ সম্পত্তিমনুভৰিত্ৰা এৰং ছ কামাৰচরসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি, পুরাকতপুঞ্ঞৰসেন নিপন্নঞ্জলিকত্থেরোতি পাকটো.

১৬. সো অপরভাগে অত্তনো পুঞ্ঞসম্পত্তিযো ওলোকেত্ৰা সোমনস্সজাতো পুব্বচরিতাপদানং পকাসেন্তো রুক্খমূলে নিসিন্নোহন্তিআদিমাহ. তত্থ রুহতি পটিরুহতি উদ্ধমুদ্ধং আরোহতীতি রুক্খো, তস্স রুক্খস্স মূলে সমীপেতি অত্থো. ব্যাধিতো পরমেন চাতি পরমেন অধিকেন খরেন কক্খল়েন ব্যাধিনা রোগেন ব্যাধিতো, ব্যাধিনা অহং সমন্নাগতোতি অত্থো. পরমকারুঞ্ঞপ্পত্তোম্হীতি পরমং অধিকং কারুঞ্ঞং দীনভাৰং দুক্খিতভাৰং পত্তোম্হি অরঞ্ঞে কাননেতি সম্বন্ধো.

২০. পঞ্চেৰাসুং মহাসিখাতি সিরসি পিল়ন্ধনত্থেন সিখা ৰুচ্চতি চূল়া. মণীতি জোতমানং মকুটং তস্স অত্থীতি সিখো, চক্কৰত্তিনো একনামকা পঞ্চেৰ চক্কৰত্তিনো আসুং অহেসুন্তি অত্থো. সেসং সব্বত্থ উত্তানত্থমেৰাতি.

নিপন্নঞ্জলিকত্থেরঅপদানৰণ্ণনা সমত্তা.

৪. অধোপুপ্ফিযত্থেরঅপদানৰণ্ণনা

অভিভূ নাম সো ভিক্খূতিআদিকং আযস্মতো অধোপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা অপরভাগে কামেসু আদীনৰং দিস্ৰা তং পহায ইসিপব্বজ্জং পব্বজিত্ৰা পঞ্চাভিঞ্ঞাঅট্ঠসমাপত্তিলাভী ইদ্ধীসু চ ৰসীভাৰং পত্ৰা হিমৰন্তস্মিং পটিৰসতি. তস্স সিখিস্স ভগৰতো অভিভূ নাম অগ্গসাৰকো ৰিৰেকাভিরতো হিমৰন্তমগমাসি. অথ সো তাপসো তং অগ্গসাৰকত্থেরং দিস্ৰা থেরস্স ঠিতপব্বতং আরুহন্তো পব্বতস্স হেট্ঠাতলতো সুগন্ধানি ৰণ্ণসম্পন্নানি সত্ত পুপ্ফানি গহেত্ৰা পূজেসি. অথ সো থেরো তস্সানুমোদনমকাসি. সোপি তাপসো সকস্সমং অগমাসি. তত্থ একেন অজগরেন পীল়িতো অপরভাগে অপরিহীনজ্ঝানো তেনেৰ উপদ্দৰেন উপদ্দুতো কালং কত্ৰা ব্রহ্মলোকপরাযনো হুত্ৰা ব্রহ্মসম্পত্তিং ছকামাৰচরসম্পত্তিঞ্চ অনুভৰিত্ৰা মনুস্সেসু মনুস্সসম্পত্তিযো চ খেপেত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিপ্পত্তো ভগৰতো ধম্মং সুত্ৰা পসন্নমানসো পব্বজিত্ৰা নচিরস্সেৰ অরহা অহোসি. সো অপরভাগে অত্তনো কতপুঞ্ঞনামেন অধোপুপ্ফিযত্থেরোতি পাকটো.

২২. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অভিভূ নাম সো ভিক্খূতিআদিমাহ. তত্থ সীলসমাধীহি পরে অভিভৰতীতি অভিভূ, খন্ধমারাদিমারে অভিভৰতি অজ্ঝোত্থরতীতি ৰা অভিভূ, সসন্তানপরসন্তানগতকিলেসে অভিভৰতি ৰিহেসেতি ৰিদ্ধংসেতীতি ৰা অভিভূ. ভিক্খনসীলো যাচনসীলোতি ভিক্খু, ছিন্নভিন্নপটধরোতি ৰা ভিক্খু. অভিভূ নাম অগ্গসাৰকো সো ভিক্খূতি অত্থো, সিখিস্স ভগৰতো অগ্গসাৰকোতি সম্বন্ধো.

২৭. অজগরো মং পীল়েসীতি তথারূপং সীলসম্পন্নং ঝানসম্পন্নং তাপসং পুব্বে কতপাপেন ৰেরেন চ মহন্তো অজগরসপ্পো পীল়েসি. সো তেনেৰ উপদ্দৰেন উপদ্দুতো অপরিহীনজ্ঝানো কালং কত্ৰা ব্রহ্মলোকপরাযণো আসি. সেসং সব্বত্থ উত্তানমেৰাতি.

অধোপুপ্ফিযত্থেরঅপদানৰণ্ণনা সমত্তা.

৫. রংসিসঞ্ঞকত্থেরঅপদানৰণ্ণনা

পব্বতে হিমৰন্তম্হীতিআদিকং আযস্মতো রংসিসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তেসু তেসু ভৰেসু ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা অজিনচম্মধরো হিমৰন্তম্হি ৰাসং কপ্পেসি. তস্মিং সমযে ৰিপস্সী ভগৰা হিমৰন্তমগমাসি. অথ সো তাপসো তমুপগতং ভগৰন্তং দিস্ৰা তস্স ভগৰতো সরীরতো নিক্খন্তছব্বণ্ণবুদ্ধরংসীসু পসীদিত্ৰা অঞ্জলিং পগ্গয্হ পঞ্চঙ্গেন নমক্কারমকাসি. সো তেনেৰ পুঞ্ঞেন ইতো চুতো তুসিতাদীসু দিব্বসম্পত্তিযো অনুভৰিত্ৰা অপরভাগে মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা তত্থাদীনৰং দিস্ৰা গেহং পহায পব্বজিত্ৰা নচিরস্সেৰ অরহা অহোসি.

৩০. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পব্বতে হিমৰন্তম্হীতিআদিমাহ. তত্থ পব্বতেতি পকারেন ব্রূহতি ৰড্ঢেতীতি পব্বতো, হিমো অস্স অত্থীতি হিমৰন্তো, হিমৰন্তো চ সো পব্বতো চাতি হিমৰন্তপব্বতো. হিমৰন্তপব্বতেতি ৰত্তব্বে গাথাৰচনসুখত্থং ‘‘পব্বতে হিমৰন্তম্হী’’তি ৰুত্তং. তস্মিং হিমৰন্তম্হি পব্বতে ৰাসং কপ্পেসিং পুরে অহন্তি সম্বন্ধো. সেসং সব্বত্থ নযানুসারেন উত্তানমেৰাতি.

রংসিসঞ্ঞকত্থেরঅপদানৰণ্ণনা সমত্তা.

৬. দুতিযরংসিসঞ্ঞকত্থেরঅপদানৰণ্ণনা

পব্বতে হিমৰন্তম্হীতিআদিকং আযস্মতো দুতিযরংসিসঞ্ঞকত্থেরস্স অপদানং. অযম্পি পুরিমবুদ্ধেসু কতকুসলো উপ্পন্নুপ্পন্নভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা তত্থ দোসং দিস্ৰা তং পহায তাপসপব্বজ্জং পব্বজিত্ৰা হিমৰন্তপব্বতে ৰসন্তো ৰাকচীরনিৰসনো ৰিৰেকসুখেন ৰিহরতি. তস্মিং সমযে সো ফুস্সং ভগৰন্তং তং পদেসং সম্পত্তং দিস্ৰা তস্স সরীরতো নিক্খন্তছব্বণ্ণবুদ্ধরংসিযো ইতো চিতো ৰিধাৰন্তিযো দণ্ডদীপিকানিক্খন্তৰিপ্ফুরন্তমিৰ দিস্ৰা তস্মিং পসন্নো অঞ্জলিং পগ্গহেত্ৰা ৰন্দিত্ৰা চিত্তং পসাদেত্ৰা তেনেৰ পীতিসোমনস্সেন কালং কত্ৰা তুসিতাদীসু নিব্বত্তো তত্থ ছ কামাৰচরসম্পত্তিযো চ অনুভৰিত্ৰা অপরভাগে মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো পুব্বৰাসনাৰসেন পব্বজিত্ৰা নচিরস্সেৰ অরহা অহোসি.

৩৫. সো অপরভাগে পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পব্বতে হিমৰন্তম্হীতিআদিমাহ. তং সব্বং উত্তানত্থমেৰাতি.

দুতিযরংসিসঞ্ঞকত্থেরঅপদানৰণ্ণনা সমত্তা.

৭. ফলদাযকত্থেরঅপদানৰণ্ণনা

পব্বতে হিমৰন্তম্হীতিআদিকং আযস্মতো ফলদাযকত্থেরস্স অপদানং. অযম্পি পুরিমবুদ্ধেসু কতকুসলসম্ভারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে একস্মিং কুলগেহে নিব্বত্তো সুখপ্পত্তো তং সব্বং পহায তাপসপব্বজ্জং পব্বজিত্ৰা খরাজিনচম্মধারী হুত্ৰা ৰিহরতি. তস্মিঞ্চ সমযে ফুস্সং ভগৰন্তং তত্থ সম্পত্তং দিস্ৰা পসন্নমানসো মধুরানি ফলানি গহেত্ৰা ভোজেসি. সো তেনেৰ কুসলেন দেৰলোকাদীসু পুঞ্ঞসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিত্ৰা নচিরস্সেৰ অরহা অহোসি.

৩৯. সো অপরভাগে অত্তনো পুব্বকম্মং অনুস্সরিত্ৰা পুব্বচরিতাপদানং পকাসেন্তো পব্বতে হিমৰন্তম্হীতিআদিমাহ. তং সব্বং হেট্ঠা ৰুত্তনযত্তা উত্তানত্থমেৰাতি.

ফলদাযকত্থেরঅপদানৰণ্ণনা সমত্তা.

৮. সদ্দসঞ্ঞকত্থেরঅপদানৰণ্ণনা

পব্বতে হিমৰন্তম্হীতিআদিকং আযস্মতো সদ্দসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে একস্মিং কুলগেহে নিব্বত্তো ৰুদ্ধিপ্পত্তো সদ্ধাজাতো তাপসপব্বজ্জং পব্বজিত্ৰা হিমৰন্তম্হি অরঞ্ঞাৰাসে ৰসন্তো অত্তনো অনুকম্পায উপগতস্স ভগৰতো ধম্মং সুত্ৰা ধম্মেসু চিত্তং পসাদেত্ৰা যাৰতাযুকং ঠত্ৰা অপরভাগে কালং কত্ৰা তুসিতাদীসু ছসু কামাৰচরসম্পত্তিযো চ মনুস্সেসু মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি.

৪৩. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পব্বতে হিমৰন্তম্হীতিআদিমাহ. তং সব্বং উত্তানত্থমেৰাতি.

সদ্দসঞ্ঞকত্থেরঅপদানৰণ্ণনা সমত্তা.

৯. বোধিসিঞ্চকত্থেরঅপদানৰণ্ণনা

ৰিপস্সিস্স ভগৰতোতিআদিকং আযস্মতো বোধিসিঞ্চকত্থেরস্স অপদানং. অযম্পি পুরিমবুদ্ধেসু কতাধিকারো অনেকাসু জাতীসু ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো সাসনে পব্বজিত্ৰা ৰত্তপটিপত্তিযা সাসনং সোভযন্তো মহাজনে বোধিপূজং কুরুমানে দিস্ৰা অনেকানি পুপ্ফানি সুগন্ধোদকানি চ গাহাপেত্ৰা পূজেসি. সো তেন পুঞ্ঞেন দেৰলোকে নিব্বত্তো ছ কামাৰচরসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা নচিরস্সেৰ অরহা অহোসি.

৪৬. সো অরহা হুত্ৰা ঝানফলসুখেন ৰীতিনামেত্ৰা পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সিস্স ভগৰতোতিআদিমাহ. তত্থ ৰিসেসং পরমত্থং নিব্বানং পস্সতীতি ৰিপস্সী, ৰিসেসেন ভব্বাভব্বজনে পস্সতীতি ৰা ৰিপস্সী, ৰিপস্সন্তো চতুসচ্চং পস্সনদক্খনসীলোতি ৰা ৰিপস্সী, তস্স ৰিপস্সিস্স ভগৰতো মহাবোধিমহো অহূতি সম্বন্ধো. তত্রাপি মহাবোধীতি বোধি ৰুচ্চতি চতূসু মগ্গেসু ঞাণং, তমেত্থ নিসিন্নো ভগৰা পটিৰিজ্ঝতীতি কণিকারপাদপরুক্খোপি বোধিচ্চেৰ ৰুচ্চতি, মহিতো চ সো দেৰব্রহ্মনরাসুরেহি বোধি চেতি মহাবোধি, মহতো বুদ্ধস্স ভগৰতো বোধীতি ৰা মহাবোধি, তস্স মহো পূজা অহোসীতি অত্থো. সেসং সব্বত্থ উত্তানত্থমেৰাতি.

বোধিসিঞ্চকত্থেরঅপদানৰণ্ণনা সমত্তা.

১০. পদুমপুপ্ফিযত্থেরঅপদানৰণ্ণনা

পোক্খরৰনং পৰিট্ঠোতিআদিকং আযস্মতো পদুমপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায পদুমসম্পন্নং একং পোক্খরণিং পৰিসিত্ৰা ভিসমুল়ালে খাদন্তো পোক্খরণিযা অৰিদূরে গচ্ছমানং ফুস্সং ভগৰন্তং দিস্ৰা পসন্নমানসো ততো পদুমানি ওচিনিত্ৰা আকাসে উক্খিপিত্ৰা ভগৰন্তং পূজেসি, তানি পুপ্ফানি আকাসে ৰিতানং হুত্ৰা অট্ঠংসু. সো ভিয্যোসোমত্তায পসন্নমানসো পব্বজিত্ৰা ৰত্তপটিপত্তিসারো সমণধম্মং পূরেত্ৰা ততো চুতো তুসিতভৰনমলং কুরুমানো ৰিয তত্থ উপ্পজ্জিত্ৰা কমেন ছ কামাৰচরসম্পত্তিযো চ মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো সদ্ধাজাতো পব্বজিত্ৰা নচিরস্সেৰ অরহা অহোসি.

৫১. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পোক্খরৰনং পৰিট্ঠোতিআদিমাহ. তত্থ পকারেন নল়দণ্ডপত্তাদীহি খরন্তীতি পোক্খরা, পোক্খরানং সমুট্ঠিতট্ঠেন সমূহন্তি পোক্খরৰনং, পদুমগচ্ছসণ্ডেহি মণ্ডিতং মজ্ঝং পৰিট্ঠো অহন্তি অত্থো. সেসং সব্বত্থ উত্তানমেৰাতি.

পদুমপুপ্ফিযত্থেরঅপদানৰণ্ণনা সমত্তা.

নৰমৰগ্গৰণ্ণনা সমত্তা.