১০. সুধাৰগ্গো

১. সুধাপিণ্ডিযত্থেরঅপদানৰণ্ণনা

পূজারহে পূজযতোতিআদিকং আযস্মতো সুধাপিণ্ডিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ভগৰতি ধরমানে পুঞ্ঞং কাতুমসক্কোন্তো পরিনিব্বুতে ভগৰতি তস্স ধাতুং নিদহিত্ৰা চেতিযে করীযমানে সুধাপিণ্ডমদাসি. সো তেন পুঞ্ঞেন চতুন্নৰুতিকপ্পতো পট্ঠায এত্থন্তরে চতুরাপাযমদিস্ৰা দেৰমনুস্সসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থরি পসীদিত্ৰা পব্বজিতো নচিরস্সেৰ অরহা অহোসি.

১-২. সো অপরভাগে অত্তনো পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং পকাসেন্তো পূজারহেতিআদিমাহ. তত্থ পূজারহা নাম বুদ্ধপচ্চেকবুদ্ধঅরিযসাৰকাচরিযুপজ্ঝাযমাতাপিতুগরুআদযো, তেসু পূজারহেসু মালাদিপদুমৰত্থাভরণচতুপচ্চযাদীহি পূজযতো পূজযন্তস্স পুগ্গলস্স পুঞ্ঞকোট্ঠাসং সহস্সসতসহস্সাদিৰসেন সঙ্খ্যং কাতুং কেনচি মহানুভাৰেনাপি ন সক্কাতি অত্থো. ন কেৰলমেৰ ধরমানে বুদ্ধাদযো পূজযতো, পরিনিব্বুতস্সাপি ভগৰতো চেতিযপটিমাবোধিআদীসুপি এসেৰ নযো.

৩. তং দীপেতুং চতুন্নমপি দীপানন্তিআদিমাহ. তত্থ চতুন্নমপি দীপানন্তি জম্বুদীপঅপরগোযানউত্তরকুরুপুব্বৰিদেহসঙ্খাতানং চতুন্নং দীপানং তদনুগতানং দ্ৰিসহস্সপরিত্তদীপানঞ্চ একতো কত্ৰা সকলচক্কৰাল়গব্ভে ইস্সরং চক্কৰত্তিরজ্জং করেয্যাতি অত্থো. একিস্সা পূজনাযেতন্তি ধাতুগব্ভে চেতিযে কতায একিস্সা পূজায এতং সকলজম্বুদীপে সত্তরতনাদিকং সকলং ধনং. কলং নাগ্ঘতি সোল়সিন্তি চেতিযে কতপূজায সোল়সক্খত্তুং ৰিভত্তস্স সোল়সমকোট্ঠাসস্স ন অগ্ঘতীতি অত্থো.

৪. সিদ্ধত্থস্স…পে… ফলিতন্তরেতি নরানং অগ্গস্স সেট্ঠস্স সিদ্ধত্থস্স ভগৰতো চেতিযে ধাতুগব্ভম্হি সুধাকম্মে করীযমানে পরিচ্ছেদানং উভিন্নমন্তরে ৰেমজ্ঝে, অথ ৰা পুপ্ফদানট্ঠানানং অন্তরে ফলন্তিযা মযা সুধাপিণ্ডো দিন্নো মক্খিতোতি সম্বন্ধো. সেসং সব্বত্থ উত্তানমেৰাতি.

সুধাপিণ্ডিযত্থেরঅপদানৰণ্ণনা সমত্তা.

২. সুচিন্তিকত্থেরঅপদানৰণ্ণনা

তিস্সস্স লোকনাথস্সাতিআদিকং আযস্মতো সুচিন্তিকত্থেরস্স অপদানং. অযম্পি পুরিমবুদ্ধেসু কতাধিকারো অনেকাসু জাতীসু নিব্বানাধিগমায পুঞ্ঞং উপচিনিত্ৰা তিস্সস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা সত্থু নিসীদনত্থায পরিসুদ্ধং সিলিট্ঠং কট্ঠমযমনগ্ঘপীঠমদাসি. সো তেন পুঞ্ঞকম্মেন সুগতিসুখমনুভৰিত্ৰা তত্থ তত্থ সংসরন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

৮. সো পত্তঅরহত্তফলো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিস্সস্স লোকনাথস্সাতিআদিমাহ. তং সব্বং উত্তানত্থমেৰাতি.

সুচিন্তিকত্থেরঅপদানৰণ্ণনা সমত্তা.

৩. অড্ঢচেল়কত্থেরঅপদানৰণ্ণনা

তিস্সস্সাহং ভগৰতোতিআদিকং আযস্মতো অড্ঢচেল়কত্থেরস্স অপদানং. অযম্পি থেরো পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে একেনাকুসলেন কম্মেন দুগ্গতকুলগেহে নিব্বত্তো ৰুদ্ধিমন্ৰায সদ্ধম্মদেসনং ঞত্ৰা পসন্নমানসো চীৰরত্থায অড্ঢভাগং একং দুস্সমদাসি. সো তেনেৰ পীতিসোমনস্সেন কালং কত্ৰা সগ্গে নিব্বত্তো ছ কামাৰচরসম্পত্তিমনুভৰিত্ৰা ততো চুতো মনুস্সেসু মনুস্সসম্পত্তীনং অগ্গভূতং চক্কৰত্তিসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং অদ্ধকুলে নিব্বত্তো ৰুদ্ধিপ্পত্তো সত্থু ধম্মদেসনং সুত্ৰা পসন্নমানসো পব্বজিত্ৰা নচিরস্সেৰ অরহা অহোসি.

১৪. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিস্সস্সাহং ভগৰতোতিআদিমাহ. তং সব্বং উত্তানত্থমেৰাতি.

অড্ঢচেল়কত্থেরঅপদানৰণ্ণনা সমত্তা.

৪. সূচিদাযকত্থেরঅপদানৰণ্ণনা

কম্মারোহং পুরে আসিন্তিআদিকং আযস্মতো সূচিদাযকত্থেরস্স অপদানং. অযম্পি পুরিমবুদ্ধেসু কতাধিকারো অন্তরন্তরা কুসলবীজানি পূরেন্তো ৰিপস্সিস্স ভগৰতো কালে অন্তরন্তরা কতেন একেন কম্মচ্ছিদ্দেন কম্মারকুলে নিব্বত্তো ৰুদ্ধিমন্ৰায সকসিপ্পেসু নিপ্ফত্তিং পত্তো সত্থু ধম্মদেসনং সুত্ৰা পসন্নমানসো চীৰরসিব্বনত্থায সূচিদানমদাসি, তেন পুঞ্ঞেন দিব্বসম্পত্তিং অনুভৰিত্ৰা অপরভাগে মনুস্সেসু উপ্পন্নো চক্কৰত্তাদযো সম্পত্তিযো চ অনুভৰন্তো উপ্পন্নুপ্পন্নভৰে তিক্খপঞ্ঞো ৰজীরঞাণো অহোসি. সো কমেন ইমস্মিং বুদ্ধুপ্পাদে নিব্বত্তো ৰুদ্ধিপ্পত্তো মহদ্ধনো সদ্ধাজাতো তিক্খপঞ্ঞো অহোসি. সো একদিৰসং সত্থু ধম্মদেসনং সুত্ৰা ধম্মানুসারেন ঞাণং পেসেত্ৰা নিসিন্নাসনেযেৰ অরহা অহোসি.

১৯. সো অরহা সমানো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো কম্মারোহং পুরে আসিন্তিআদিমাহ. তত্থ কম্মারোতি অযোকম্মলোহকম্মাদিনা কম্মেন জীৰতি রুহতি ৰুদ্ধিং ৰিরূল়্হিং আপজ্জতীতি কম্মারো, পুব্বে পুঞ্ঞকরণকালে কম্মারো আসিং অহোসিন্তি অত্থো. সেসং সব্বত্থ উত্তানমেৰাতি.

সূচিদাযকত্থেরঅপদানৰণ্ণনা সমত্তা.

৫. গন্ধমালিযত্থেরঅপদানৰণ্ণনা

সিদ্ধত্থস্স ভগৰতোতিআদিকং আযস্মতো গন্ধমালিযত্থেরস্স অপদান. অযম্পি পুরিমবুদ্ধেসু কতাধিকারো সিদ্ধত্থস্স ভগৰতো কালে কুলগেহে নিব্বত্তো মহদ্ধনো মহাভোগো অহোসি. সো সত্থরি পসীদিত্ৰা চন্দনাগরুকপ্পূরকস্সতুরাদীনি অনেকানি সুগন্ধানি ৰড্ঢেত্ৰা সত্থু গন্ধথূপং কারেসি. তস্সুপরি সুমনপুপ্ফেহি ছাদেসি, বুদ্ধঞ্চ অট্ঠঙ্গনমক্কারং অকাসি. সো তেন পুঞ্ঞকম্মেন দেৰমনুস্সেসু সম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

২৪. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ. তং সব্বং উত্তানত্থমেৰাতি.

গন্ধমালিযত্থেরঅপদানৰণ্ণনা সমত্তা.

৬. তিপুপ্ফিযত্থেরঅপদানৰণ্ণনা

মিগলুদ্দো পুরে আসিন্তিআদিকং আযস্মতো তিপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো অন্তরা কেনচি অকুসলচ্ছিদ্দেন ৰিপস্সিস্স ভগৰতো কালে নেসাদকুলে নিব্বত্তো মিগলুদ্দো হুত্ৰা অরঞ্ঞে ৰিহরতি. তদা ৰিপস্সিস্স ভগৰতো পাটলিবোধিং সম্পুণ্ণপত্তপল্লৰং হরিতৰণ্ণং নীলোভাসং মনোরমং দিস্ৰা তীহি পুপ্ফেহি পূজেত্ৰা পুরাণপত্তং ছড্ডেত্ৰা ভগৰতো সম্মুখা ৰিয পাটলিমহাবোধিং ৰন্দি. সো তেন পুঞ্ঞেন ততো চুতো দেৰলোকে উপ্পন্নো তত্থ দিব্বসম্পত্তিং অপরাপরং অনুভৰিত্ৰা ততো চুতো মনুস্সেসু জাতো তত্থ চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থু ধম্মদেসনং সুত্ৰা পটিলদ্ধসোমনস্সহদযো গেহং পহায পব্বজিত্ৰা নচিরস্সেৰ অরহা অহোসি.

৩১. সো এৰং সিদ্ধিপ্পত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো মিগলুদ্দো পুরে আসিন্তিআদিমাহ. তত্থ মরণায গচ্ছতি পাপুণাতীতি মিগো, অথ ৰা মগযমানো ইহতি পৰত্ততীতি মিগো, মিগানং মারণে লুদ্দো লোভী গেধোতি মিগলুদ্দো, পুরে ময্হং পুঞ্ঞকরণসমযে কাননসঙ্খাতে মহাঅরঞ্ঞে মিগলুদ্দো আসিন্তি সম্বন্ধো. পাটলিং হরিতং দিস্ৰাতি তত্থ পকারেন তলেন রত্তৰণ্ণেন ভৰতীতি পাটলি, পুপ্ফানং রত্তৰণ্ণতায পাটলীতি ৰোহারো, পত্তানং হরিততায হরিতং নীলৰণ্ণং পাটলিবোধিং দিস্ৰাতি অত্থো. সেসং সব্বত্থ উত্তানত্থমেৰাতি.

তিপুপ্ফিযত্থেরঅপদানৰণ্ণনা সমত্তা.

৭. মধুপিণ্ডিকত্থেরঅপদানৰণ্ণনা

ৰিৰনে কাননে দিস্ৰাতিআদিকং আযস্মতো মধুপিণ্ডিকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে নেসাদযোনিযং নিব্বত্তো মহাঅরঞ্ঞে পটিৰসতি. তদা ৰিৰেকাভিরতিযা সম্পত্তং সিদ্ধত্থং ভগৰন্তং দিস্ৰা সমাধিতো ৰুট্ঠিতস্স তস্স সুমধুরং মধুমদাসি. তত্থ চ পসন্নমানসো ৰন্দিত্ৰা পক্কামি. সো তেনেৰ পুঞ্ঞেন সম্পত্তিং অনুভৰন্তো দেৰমনুস্সেসু সংসরিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

৩৭. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিৰনে কাননে দিস্ৰাতিআদিমাহ. তত্থ ৰিৰনেতি ৰিসেসেন ৰনং পত্থটং ৰিৰনং, হত্থিঅস্সরথসদ্দেহি ভেরিসদ্দেহি চ ৰত্থুকামকিলেসকামেহি চ ৰিগতং ব্যাপগতন্তি অত্থো, কাননসঙ্খাতে মহাঅরঞ্ঞে ৰিৰনেতি সম্বন্ধো. ওসধিংৰ ৰিরোচন্তন্তি ভৰৰড্ঢকিজনানং ইচ্ছিতিচ্ছিতং নিপ্ফাদেতীতি ওসধং. ওজানিব্বত্তিকারণং পটিচ্চ যায তারকায উগ্গতায উদ্ধরন্তি গণ্হন্তীতি সা ওসধি. ওসধিতারকা ইৰ ৰিরোচন্তীতি ৰত্তব্বে গাথাবন্ধসুখত্থং ‘‘ওসধিংৰ ৰিরোচন্ত’’ন্তি চ ৰুত্তং. সেসং সব্বত্থ উত্তানমেৰাতি.

মধুপিণ্ডিকত্থেরঅপদানৰণ্ণনা সমত্তা.

৮. সেনাসনদাযকত্থেরঅপদানৰণ্ণনা

সিদ্ধত্থস্স ভগৰতোতিআদিকং আযস্মতো সেনাসনদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা অত্তনো ৰসনট্ঠানং ৰনন্তরং সম্পত্তস্স ভগৰতো পণামং কত্ৰা পণ্ণসন্থরং সন্থরিত্ৰা অদাসি. ভগৰতো নিসিন্নট্ঠানস্স সমন্ততো ভিত্তিপরিচ্ছেদং কত্ৰা পুপ্ফপূজমকাসি. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

৪৫. সো অপরভাগে অত্তনো পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং দস্সেন্তো সিদ্ধত্থস্স ভগৰতোতিআদিমাহ. তং সব্বং হেট্ঠা ৰুত্তনযত্তা উত্তানত্থমেৰাতি.

সেনাসনদাযকত্থেরঅপদানৰণ্ণনা সমত্তা.

৯. ৰেয্যাৰচ্চকরত্থেরঅপদানৰণ্ণনা

ৰিপস্সিস্স ভগৰতোতিআদিকং আযস্মতো ৰেয্যাৰচ্চকরত্থেরস্স অপদানং. তস্স উপ্পত্তিআদযো হেট্ঠা ৰুত্তনিযামেনেৰ দট্ঠব্বা.

ৰেয্যাৰচ্চকরত্থেরঅপদানৰণ্ণনা সমত্তা.

১০. বুদ্ধুপট্ঠাকত্থেরঅপদানৰণ্ণনা

ৰিপস্সিস্স ভগৰতোতিআদিকং আযস্মতো বুদ্ধুপট্ঠাকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে সঙ্খধমককুলে নিব্বত্তো ৰুদ্ধিমন্ৰায অত্তনো সিপ্পে সঙ্খধমনে ছেকো অহোসি, নিচ্চকালং ভগৰতো সঙ্খং ধমেত্ৰা সঙ্খসদ্দেনেৰ পূজেসি. সো তেন পুঞ্ঞেন দেৰমনুস্সেসু সংসরন্তো সব্বত্থ পাকটো মহাঘোসো মহানাদী মধুরস্সরো অহোসি, ইমস্মিং বুদ্ধুপ্পাদে একস্মিং পাকটকুলে নিব্বত্তো ৰুদ্ধিপ্পত্তো মধুরস্সরোতি পাকটো, সত্থরি পসীদিত্ৰা পব্বজিতো নচিরস্সেৰ অরহা অহোসি, অপরভাগে মধুরস্সরত্থেরোতি পাকটো.

৫১. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সিস্স ভগৰতোতিআদিমাহ. তং হেট্ঠা ৰুত্তমেৰ. অহোসিং সঙ্খধমকোতি সং সুট্ঠু খনন্তো গচ্ছতীতি সঙ্খো, সমুদ্দজলপরিযন্তে চরমানো গচ্ছতি ৰিচরতীতি অত্থো. তং সঙ্খং ধমতি ঘোসং করোতীতি সঙ্খধমকো, সোহং সঙ্খধমকোৰ অহোসিন্তি অত্থো. সেসং সব্বত্থ উত্তানমেৰাতি.

বুদ্ধুপট্ঠাকত্থেরঅপদানৰণ্ণনা সমত্তা.

দসমৰগ্গৰণ্ণনা সমত্তা.