১১. ভিক্খদাযিৰগ্গো

১. ভিক্খাদাযকত্থেরঅপদানৰণ্ণনা

সুৰণ্ণৰণ্ণং সম্বুদ্ধন্তিআদিকং আযস্মতো ভিক্খাদাযকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায ৰিভৰসম্পন্নো সদ্ধাজাতো ৰিহারতো নিক্খমিত্ৰা পিণ্ডায চরমানং সিদ্ধত্থং ভগৰন্তং দিস্ৰা পসন্নমানসো আহারমদাসি. ভগৰা তং পটিগ্গহেত্ৰা অনুমোদনং ৰত্ৰা পক্কামি. সো তেনেৰ কুসলেন যাৰতাযুকং ঠত্ৰা আযুপরিযোসানে দেৰলোকে নিব্বত্তো তত্থ ছ কামাৰচরসম্পত্তিযো অনুভৰিত্ৰা মনুস্সেসু চ মনুস্সসম্পত্তিমনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা নচিরস্সেৰ অরহা অহোসি.

১. সো অপরভাগে অত্তনো পুব্বকম্মং অনুস্সরিত্ৰা সোমনস্সজাতো পুব্বচরিতাপদানং পকাসেন্তো সুৰণ্ণৰণ্ণং সম্বুদ্ধন্তিআদিমাহ. তং সব্বং হেট্ঠা ৰুত্তনযমেৰ. পৰরা অভিনিক্খন্তন্তি পকারেন ৰরিতব্বং পত্থেতব্বন্তি পৰরং, রম্মভূততো ৰিৰেকভূততো সকৰিহারতো অভি ৰিসেসেন নিক্খন্তন্তি অত্থো. ৰানা নিব্বানমাগতন্তি ৰানং ৰুচ্চতি তণ্হা, ততো নিক্খন্তত্তা নিব্বানং, ৰাননামং তণ্হং পধানং কত্ৰা সব্বকিলেসে পহায নিব্বানং পত্তন্তি অত্থো.

২. কটচ্ছুভিক্খং দত্ৰানাতি করতলেন গহেতব্বা দব্বি কটচ্ছু, ভিক্খীযতি আযাচীযতীতি ভিক্খা, অভি ৰিসেসেন খাদিতব্বা ভক্খিতব্বাতি ৰা ভিক্খা, কটচ্ছুনা গহেতব্বা ভিক্খা কটচ্ছুভিক্খা, দব্বিযা ভত্তং দত্ৰাতি অত্থো. সেসং সব্বত্থ উত্তানত্থমেৰাতি.

ভিক্খাদাযকত্থেরঅপদানৰণ্ণনা সমত্তা.

২. ঞাণসঞ্ঞিকত্থেরঅপদানৰণ্ণনা

সুৰণ্ণৰণ্ণং সম্বুদ্ধন্তিআদিকং আযস্মতো ঞাণসঞ্ঞিকত্থেরস্স অপদানং. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে কুলগেহে নিব্বত্তো ৰুদ্ধিমন্ৰায সদ্ধাজাতো সদ্ধম্মস্সৰনে সাদরো সালযো ভগৰতো ধম্মদেসনানুসারেন ঞাণং পেসেত্ৰা ঘোসপমাণত্তা ভগৰতো ঞাণে পসন্নো পঞ্চঙ্গঅট্ঠঙ্গনমক্কারৰসেন পণামং কত্ৰা পক্কামি. সো ততো চুতো দেৰলোকেসু উপ্পন্নো তত্থ ছ কামাৰচরে দিব্বসম্পত্তিমনুভৰন্তো ততো চৰিত্ৰা মনুস্সলোকে জাতো তত্থগ্গভূতা চক্কৰত্তিসম্পদাদযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

৭. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সুৰণ্ণৰণ্ণং সম্বুদ্ধন্তিআদিমাহ. তং ৰুত্তত্থমেৰ. নিসভাজানিযং যথাতি গৰসতসহস্সজেট্ঠো নিসভো, নিসভো চ সো আজানিযো সেট্ঠো উত্তমো চেতি নিসভাজানিযো. যথা নিসভাজানিযো, তথেৰ ভগৰাতি অত্থো. লোকৰিসযসঞ্ঞাতং পঞ্ঞত্তিৰসেন এৰং ৰুত্তং. অনুপমেয্যো হি ভগৰা. সেসং সব্বত্থ উত্তানত্থমেৰাতি.

ঞাণসঞ্ঞিকত্থেরঅপদানৰণ্ণনা সমত্তা.

৩. উপ্পলহত্থিযত্থেরঅপদানৰণ্ণনা

তিৰরাযং নিৰাসীহন্তিআদিকং আযস্মতো উপ্পলহত্থকত্থেরস্স অপদানং. অযম্পি পুরিমজিনৰরেসু কতকুসলো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে মালাকারকুলে নিব্বত্তো ৰুদ্ধিমন্ৰায মালাকারকম্মেন অনেকানি পুপ্ফানি ৰিক্কিণন্তো জীৰতি. অথেকদিৰসং পুপ্ফানি গহেত্ৰা চরন্তো ভগৰন্তং রতনগ্ঘিকমিৰ চরমানং দিস্ৰা রত্তুপ্পলকলাপেন পূজেসি. সো ততো চুতো তেনেৰ পুঞ্ঞেন সুগতীসু পুঞ্ঞমনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সদ্ধাজাতো পব্বজিত্ৰা নচিরস্সেৰ অরহা অহোসি.

১৩. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিৰরাযং নিৰাসীহন্তিআদিমাহ. তত্থ তিৰরাতি তীহি ৰারেহি কারিতং সঞ্চরিতং পটিচ্ছন্নং নগরং, তস্সং তিৰরাযং নিৰাসী, ৰসনসীলো নিৰাসনট্ঠানগেহে ৰা ৰসন্তো অহন্তি অত্থো. অহোসিং মালিকো তদাতি তদা নিব্বানত্থায পুঞ্ঞসম্ভারকরণসমযে মালিকো মালাকারোৰ পুপ্ফানি কযৰিক্কযং কত্ৰা জীৰন্তো অহোসিন্তি অত্থো.

১৪. পুপ্ফহত্থমদাসহন্তি সিদ্ধত্থং ভগৰন্তং দিস্ৰা উপ্পলকলাপং অদাসিং পূজেসিন্তি অত্থো. সেসং সব্বত্থ উত্তানত্থমেৰাতি.

উপ্পলহত্থকত্থেরঅপদানৰণ্ণনা সমত্তা.

৪. পদপূজকত্থেরঅপদানৰণ্ণনা

সিদ্ধত্থস্স ভগৰতোতিআদিকং আযস্মতো পদপূজকত্থেরস্স অপদানং. অযম্পি পুরিমবুদ্ধেসু কতাধিকারো সিদ্ধত্থস্স ভগৰতো কালে কুলগেহে নিব্বত্তো ৰুদ্ধিমন্ৰায সত্থরি পসন্নো সুমনপুপ্ফেন পাদমূলে পূজেসি. সো তেন পুঞ্ঞেন দেৰমনুস্সেসু সংসরন্তো সক্কসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো ৰিপস্সনং ৰড্ঢেত্ৰা অরহত্তফলে পতিট্ঠাসি.

১৯. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ. জাতিপুপ্ফমদাসহন্তি জাতিসুমনপুপ্ফং অদাসিং অহন্তি ৰত্তব্বে গাথাবন্ধসুখত্থং সুমনসদ্দস্স লোপং কত্ৰা ৰুত্তং. তত্থ জাতিযা নিব্বত্তো ৰিকসমানোযেৰ সুমনং জনানং সোমনস্সং করোতীতি সুমনং, পুপ্ফনট্ঠেন ৰিকসনট্ঠেন পুপ্ফং, সুমনঞ্চ তং পুপ্ফঞ্চাতি সুমনপুপ্ফং, তানি সুমনপুপ্ফানি সিদ্ধত্থস্স ভগৰতো অহং পূজেসিন্তি অত্থো. সেসং সব্বত্থ উত্তানমেৰাতি.

পদপূজকত্থেরঅপদানৰণ্ণনা সমত্তা.

৫. মুট্ঠিপুপ্ফিযত্থেরঅপদানৰণ্ণনা

সুদস্সনো নাম নামেনাতিআদিকং আযস্মতো মুট্ঠিপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে মালাকারকুলে নিব্বত্তো ৰুদ্ধিমন্ৰায সকসিপ্পে নিপ্ফত্তিং পত্তো একদিৰসং ভগৰন্তং দিস্ৰা পসন্নমানসো জাতিসুমনপুপ্ফানি উভোহি হত্থেহি ভগৰতো পাদমূলে ওকিরিত্ৰা পূজেসি. সো তেন কুসলসম্ভারেন দেৰমনুস্সেসু সংসরন্তো উভো সম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো পুব্বৰাসনাৰসেন সত্থরি পসীদিত্ৰা পব্বজিতো নচিরস্সেৰ অরহা অহোসি.

১৪-২৫. সো অপরভাগে অত্তনো পুব্বকম্মং অনুস্সরিত্ৰা সোমনস্সজাতো পুব্বচরিতাপদানং পকাসেন্তো সুদস্সনো নাম নামেনাতিআদিমাহ. তত্থ সুদস্সনোতি আরোহপরিণাহরূপসণ্ঠানযোব্বঞ্ঞসোভনেন সুন্দরো দস্সনোতি সুদস্সনো, নামেন সুদস্সনো নাম মালাকারো হুত্ৰা জাতিসুমনপুপ্ফেহি পদুমুত্তরং ভগৰন্তং পূজেসিন্তি অত্থো. সেসং সব্বত্থ উত্তানমেৰাতি.

মুট্ঠিপুপ্ফিযত্থেরঅপদানৰণ্ণনা সমত্তা.

৬. উদকপূজকত্থেরঅপদানৰণ্ণনা

সুৰণ্ণৰণ্ণং সম্বুদ্ধন্তিআদিকং আযস্মতো উদকপূজকত্থেরস্স অপদানং. অযম্পি পুরিমজিনৰরেসু পূরিতকুসলসঞ্চযো তত্থ তত্থ ভৰে ৰিৰট্টূপনিস্সযানি পুঞ্ঞানি পরিপূরিযমানো পুদুমুত্তরস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায কুসলাকুসলং জানন্তো পদুমুত্তরস্স ভগৰতো আকাসে গচ্ছতো নিক্খন্তছব্বণ্ণবুদ্ধরংসীসু পসন্নো উভোহি হত্থেহি উদকং গহেত্ৰা পূজেসি. তেন পূজিতং উদকং রজতবুব্বুলং ৰিয আকাসে অট্ঠাসি. সো অভিপ্পসন্নো তেনেৰ সোমনস্সেন তুসিতাদীসু নিব্বত্তো দিব্বসম্পত্তিযো অনুভৰিত্ৰা অপরভাগে মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

২৯. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সুৰণ্ণৰণ্ণং সম্বুদ্ধন্তিআদিমাহ. তং হেট্ঠা ৰুত্তমেৰ. ঘতাসনংৰ জলিতন্তি ঘতং ৰুচ্চতি সপ্পি, ঘতস্স আসনং আধারন্তি ঘতাসনং, অগ্গি, অথ ৰা তং অসতি ভুঞ্জতীতি ঘতাসনং, অগ্গিযেৰ. যথা ঘতে আসিত্তে অগ্গিম্হি অগ্গিসিখা অতীৰ জলতি, এৰং অগ্গিক্খন্ধং ইৰ জলমানং ভগৰন্তন্তি অত্থো. আদিত্তংৰ হুতাসনন্তি হুতং ৰুচ্চতি পূজাসক্কারে, হুতস্স পূজাসক্কারস্স আসনন্তি হুতাসনং, জলমানং সূরিযং ইৰ দ্ৰত্তিংসমহাপুরিসলক্খণেহি ব্যামপ্পভামণ্ডলেহি ৰিজ্জোতমানং সুৰণ্ণৰণ্ণং সম্বুদ্ধং অনিলঞ্জসে আকাসে গচ্ছন্তং অদ্দসন্তি সম্বন্ধো. সেসং সব্বত্থ উত্তানমেৰাতি.

উদকপূজকত্থেরঅপদানৰণ্ণনা সমত্তা.

৭. নল়মালিযত্থেরঅপদানৰণ্ণনা

পদুমুত্তরবুদ্ধস্সাতিআদিকং আযস্মতো নল়মালিযত্থেরস্স অপদানং. এসোপি পুরিমজিনৰরেসু কতাধিকারো অনেকাসু জাতীসু ৰিৰট্টূপনিস্সযানি কুসলকম্মানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা কামে আদীনৰং দিস্ৰা গেহং পহায তাপসপব্বজ্জং পব্বজিত্ৰা হিমৰন্তে ৰসন্তো তত্থাগতং ভগৰন্তং দিস্ৰা পসন্নো ৰন্দিত্ৰা তিণসন্থরং সন্থরিত্ৰা তত্থ নিসিন্নস্স ভগৰতো নল়মালেহি বীজনিং কত্ৰা বীজেত্ৰা অদাসি. পটিগ্গহেসি ভগৰা তস্সানুকম্পায, অনুমোদনঞ্চ অকাসি. সো তেন পুঞ্ঞেন দেৰমনুস্সেসু সংসরন্তো উপ্পন্নুপ্পন্নভৰে পরিল়াহসন্তাপৰিৰজ্জিতো কাযচিত্তচেতসিকসুখপ্পত্তো অনেকসুখমনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায পুব্বৰাসনাবলেন সত্থরি পসন্নো পব্বজিত্ৰা নচিরস্সেৰ অরহা অহোসি.

৩৬. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরবুদ্ধস্সাতিআদিমাহ. তং হেট্ঠা ৰুত্তমেৰ.

৩৭. নল়মালং গহেত্ৰানাতি নল়তি অসারো নিস্সারো হুত্ৰা ৰেল়ুৰংসতোপি তনুকো সল্লহুকো জাতোতি নল়ো, নল়স্স মালা পুপ্ফং নল়মালং, তেন নল়মালেন বীজনিং কারেসিন্তি সম্বন্ধো. বীজিস্সতি জনিস্সতি ৰাতো অনেনাতি বীজনী, তং বীজনিং বুদ্ধস্স উপনামেসিং, পটিগ্গহেসিন্তি অত্থো. সেসং সব্বত্থ উত্তানমেৰাতি.

নল়মালিযত্থেরঅপদানৰণ্ণনা সমত্তা.

সত্তমভাণৰারৰণ্ণনা সমত্তা.

৮. আসনুপট্ঠাহকত্থেরঅপদানৰণ্ণনা

কাননং ৰনমোগ্গয্হাতিআদিকং আযস্মতো আসনুপট্ঠাহকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে কুলগেহে নিব্বত্তো ঘরাৰাসং ৰসন্তো তত্থ দোসং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তে ৰসন্তো তত্থ সম্পত্তং ভগৰন্তং দিস্ৰা পসন্নো সীহাসনং অদাসি, তত্থ নিসিন্নং ভগৰন্তং মালাকলাপং গহেত্ৰা পূজেত্ৰা তং পদক্খিণং কত্ৰা পক্কামি. সো তেন পুঞ্ঞেন দেৰমনুস্সেসু সংসরন্তো নিব্বত্তনিব্বত্তভৰে উচ্চকুলিকো ৰিভৰসম্পন্নো অহোসি. সো কালন্তরেন ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি.

৪৭. সো অরহা সমানো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো কাননং ৰনমোগ্গয্হাতিআদিমাহ. তং সব্বং হেট্ঠা ৰুত্তত্থমেৰাতি.

আসনুপট্ঠাহকত্থেরঅপদানৰণ্ণনা সমত্তা.

৯. বিল়ালিদাযকত্থেরঅপদানৰণ্ণনা

হিমৰন্তস্সাৰিদূরেতিআদিকং আযস্মতো বিল়ালিদাযকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰিঞ্ঞুতং পত্তো ঘরাৰাসং ৰসন্তো তত্থাদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তে ৰসন্তো অতীৰ অপ্পিচ্ছসন্তুট্ঠো আলুৰাদীহি যাপেন্তো ৰসতি. তদা পদুমুত্তরো ভগৰা তস্স অনুকম্পায তং হিমৰন্তং অগমাসি. তং দিস্ৰা পসন্নো ৰন্দিত্ৰা বিল়ালিযো গহেত্ৰা পত্তে ওকিরি. তং তথাগতো তস্সানুকম্পায সোমনস্সুপ্পাদযন্তো পরিভুঞ্জি. সো তেন কম্মেন ততো চুতো দেৰমনুস্সেসু উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তিত্ৰা ৰুদ্ধিমন্ৰায সত্থরি পসন্নো সাসনে পব্বজিত্ৰা নচিরস্সেৰ অরহা অহোসি.

৫৩. সো অপরভাগে অত্তনো কুসলকম্মং সরিত্ৰা সোমনস্সজাতো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. তং সব্বং হেট্ঠা ৰুত্তনযত্তা উত্তানত্থমেৰ. আলুৰকরম্ভাদযো তেসং তেসং কন্দজাতীনং নামানেৰাতি.

বিল়ালিদাযকত্থেরঅপদানৰণ্ণনা সমত্তা.

১০. রেণুপূজকত্থেরঅপদানৰণ্ণনা

সুৰণ্ণৰণ্ণং সম্বুদ্ধন্তিআদিকং আযস্মতো রেণুপূজকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো ৰুদ্ধিমন্ৰায সত্থরি পসন্নো ৰিঞ্ঞুতং পত্তো অগ্গিক্খন্ধং ৰিয ৰিজ্জোতমানং ভগৰন্তং দিস্ৰা পসন্নমানসো নাগপুপ্ফকেসরং গহেত্ৰা পূজেসি. অথ ভগৰা অনুমোদনমকাসি.

৬২-৩. সো তেন পুঞ্ঞেন ততো চুতো দেৰমনুস্সেসু সংসরন্তো উভযসম্পত্তিযো অনুভৰিত্ৰা উপ্পন্নুপ্পন্নভৰে সব্বত্থ পূজিতো ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো পুব্বৰাসনাবলেন সত্থরি পসন্নো সাসনে পব্বজিতো নচিরস্সেৰ অরহা হুত্ৰা দিব্বচক্খুনা অত্তনো পুব্বকম্মং দিস্ৰা সোমনস্সজাতো পুব্বচরিতাপদানং পকাসেন্তো সুৰণ্ণৰণ্ণং সম্বুদ্ধন্তিআদিমাহ. তং হেট্ঠা ৰুত্তত্থমেৰ. সতরংসিংৰ ভাণুমন্তি সতমত্তা সতপ্পমাণা রংসি পভা যস্স সূরিযস্স সো সতরংসি, গাথাবন্ধসুখত্থং সতরংসীতি ৰুত্তং, অনেকসতস্স অনেকসতসহস্সরংসীতি অত্থো. ভাণু ৰুচ্চতি পভা, ভাণু পভা যস্স সো ভাণুমা, ভাণুমসঙ্খাতং সূরিযং ইৰ ৰিপস্সিং ভগৰন্তং দিস্ৰা সকেসরং নাগপুপ্ফং গহেত্ৰা অভিরোপযিং পূজেসিন্তি অত্থো. সেসং উত্তানমেৰাতি.

রেণুপূজকত্থেরঅপদানৰণ্ণনা সমত্তা.

একাদসমৰগ্গৰণ্ণনা সমত্তা.