১২. মহাপরিৰারৰগ্গো

১. মহাপরিৰারকত্থেরঅপদানৰণ্ণনা

ৰিপস্সী নাম ভগৰাতিআদিকং আযস্মতো মহাপরিৰারকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো উপ্পন্নসমযে যক্খযোনিযং নিব্বত্তো অনেকযক্খসতসহস্সপরিৰারো একস্মিং খুদ্দকদীপে দিব্বসুখমনুভৰন্তো ৰিহরতি. তস্মিঞ্চ দীপে চেতিযাভিসোভিতো ৰিহারো অত্থি, তত্থ ভগৰা অগমাসি. অথ সো যক্খসেনাধিপতি তং ভগৰন্তং তত্থ গতভাৰং দিস্ৰা দিব্বৰত্থানি গহেত্ৰা গন্ত্ৰা ভগৰন্তং ৰন্দিত্ৰা দিব্বৰত্থেহি পূজেসি, সপরিৰারো সরণমগমাসি. সো তেন পুঞ্ঞকম্মেন ততো চুতো দেৰলোকে নিব্বত্তিত্ৰা তত্থ ছ কামাৰচরসুখমনুভৰিত্ৰা ততো চুতো মনুস্সেসু অগ্গচক্কৰত্তিআদিসুখমনুভৰিত্ৰা অপরভাগে ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

১-২. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সী নাম ভগৰাতিআদিমাহ. তত্থ ৰিসেসং পরমত্থং নিব্বানং পস্সতীতি ৰিপস্সী, ৰিৰিধে সতিপট্ঠানাদযো সত্ততিংসবোধিপক্খিযধম্মে পস্সতীতি ৰা ৰিপস্সী, ৰিৰিধে অনেকপ্পকারে বোধনেয্যসত্তে ৰিসুং ৰিসুং পস্সতীতি ৰা ৰিপস্সী, সো ৰিপস্সী ভগৰা দীপচেতিযং দীপে পূজনীযট্ঠানং ৰিহারমগমাসীতি অত্থো. সেসং সব্বত্থ উত্তানমেৰাতি.

মহাপরিৰারকত্থেরঅপদানৰণ্ণনা সমত্তা.

২. সুমঙ্গলত্থেরঅপদানৰণ্ণনা

অত্থদস্সী জিনৰরোতিআদিকং আযস্মতো সুমঙ্গলত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে একস্মিং তল়াকসমীপে রুক্খদেৰতা হুত্ৰা নিব্বত্তি. তস্মিং সমযে ভগৰা ৰিহারতো নিক্খমিত্ৰা নহাযিতুকামো তস্স তল়াকস্স তীরং গন্ত্ৰা তত্থ ন্হত্ৰা একচীৰরো জলমানো ব্রহ্মা ৰিয সূরিযো ৰিয সুৰণ্ণবিম্বং ৰিয অট্ঠাসি. অথ সো দেৰপুত্তো সোমনস্সজাতো পঞ্জলিকো থোমনমকাসি, অত্তনো দিব্বগীততূরিযেহি উপহারঞ্চ অকাসি. সো তেন পুঞ্ঞকম্মেন দেৰমনুস্সেসু সম্পত্তিযো অনুভৰিত্ৰা অপরভাগে ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিত্ৰা নচিরস্সেৰ অরহা অহোসি.

১১. সো পচ্ছা পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অত্থদস্সী জিনৰরোতিআদিমাহ. তত্থ পরমত্থং নিব্বানং দক্খতি পস্সতীতি অত্থদস্সী, অথ ৰা সব্বসত্তানং চতুরারিযসচ্চসঙ্খাতং অত্থপযোজনং দস্সনসীলোতি অত্থদস্সী, কিলেসে অজিনি জিনাতি জিনিস্সতীতি জিনো. ৰরিতব্বো পত্থেতব্বো সব্বসত্তেহীতি ৰরো, অত্থদস্সী জিনো চ সো ৰরো চাতি অত্থদস্সী জিনৰরো. লোকজেট্ঠোতি লুজ্জতি পলুজ্জতীতি লোকো, লোকীযতি পস্সীযতি বুদ্ধাদীহি পারপ্পত্তোতি ৰা লোকো, লোকো চ লোকো চ লোকো চাতি লোকো. একসেসসমাসৰসেন ‘‘লোকা’’তি ৰত্তব্বে ‘‘লোকো’’তি ৰুত্তো. লোকস্স জেট্ঠো লোকজেট্ঠো, সো লোকজেট্ঠো নরাসভোতি অত্থো. সেসং সব্বত্থ উত্তানমেৰাতি.

সুমঙ্গলত্থেরঅপদানৰণ্ণনা সমত্তা.

৩. সরণগমনিযত্থেরঅপদানৰণ্ণনা

উভিন্নং দেৰরাজূনন্ত্যাদিকং আযস্মতো সরণগমনিযত্থেরস্স অপদানং. অযম্পি পুরিমবুদ্ধেসু কতাধিকারো উপ্পন্নুপ্পন্নভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরে ভগৰতি উপ্পন্নে অযং হিমৰন্তে দেৰরাজা হুত্ৰা নিব্বত্তি, তস্মিং অপরেন যক্খদেৰরঞ্ঞা সদ্ধিং সঙ্গামত্থায উপট্ঠিতে দ্ৰে অনেকযক্খসহস্সপরিৰারা ফলকাৰুধাদিহত্থা সঙ্গামত্থায সমুপব্যূল়্হা অহেসুং. তদা পদুমুত্তরো ভগৰা তেসু সত্তেসু কারুঞ্ঞং উপ্পাদেত্ৰা আকাসেন তত্থ গন্ত্ৰা সপরিৰারানং দ্ৰিন্নং দেৰরাজূনং ধম্মং দেসেসি. তদা তে সব্বে ফলকাৰুধানি ছড্ডেত্ৰা ভগৰন্তং গারৰবহুমানেন ৰন্দিত্ৰা সরণমগমংসু. তেসং অযং পঠমং সরণমগমাসি. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সত্থরি পসন্নো পব্বজিত্ৰা নচিরস্সেৰ অরহা অহোসি.

২০. সো অপরভাগে পুব্বকুসলং সরিত্ৰা সোমনস্সজাতো পুব্বচরিতাপদানং পকাসেন্তো উভিন্নং দেৰরাজূনন্তিআদিমাহ. তত্থ সুচিলোমখরলোমআল়ৰককুম্ভীরকুৰেরাদযো ৰিয নামগোত্তেন অপাকটা দ্ৰে যক্খরাজানো অঞ্ঞাপদেসেন দস্সেন্তো ‘‘উভিন্নং দেৰরাজূন’’ন্তিআদিমাহ. সঙ্গামো সমুপট্ঠিতোতি সং সুট্ঠু গামো কলহত্থায উপগমনন্তি সঙ্গামো, সো সঙ্গামো সং সুট্ঠু উপট্ঠিতো, একট্ঠানে উপগন্ত্ৰা ঠিতোতি অত্থো. অহোসি সমুপব্যূল়্হোতি সং সুট্ঠু উপসমীপে রাসিভূতোতি অত্থো.

২১. সংৰেজেসি মহাজনন্তি তেসং রাসিভূতানং যক্খানং আকাসে নিসিন্নো ভগৰা চতুসচ্চধম্মদেসনায সং সুট্ঠু ৰেজেসি, আদীনৰদস্সনেন গণ্হাপেসি ৰিঞ্ঞাপেসি বোধেসীতি অত্থো. সেসং সব্বত্থ উত্তানমেৰাতি.

সরণগমনিযত্থেরঅপদানৰণ্ণনা সমত্তা.

৪. একাসনিযত্থেরঅপদানৰণ্ণনা

ৰরুণো নাম নামেনাতিআদিকং আযস্মতো একাসনিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে ৰরুণো নাম দেৰরাজা হুত্ৰা নিব্বত্তি. সো ভগৰন্তং দিস্ৰা পসন্নমানসো গন্ধমালাদীহি গীতৰাদিতেহি চ উপট্ঠযমানো সপরিৰারো পূজেসি. ততো অপরভাগে ভগৰতি পরিনিব্বুতে তস্স মহাবোধিরুক্খং বুদ্ধদস্সনং ৰিয সব্বতূরিযতাল়াৰচরেহি সপরিৰারো উপহারমকাসি. সো তেন পুঞ্ঞেন ততো কালঙ্কত্ৰা নিম্মানরতিদেৰলোকে উপ্পজ্জি. এৰং দেৰসম্পত্তিমনুভৰিত্ৰা মনুস্সেসু চ মনুস্সভূতো চক্কৰত্তিসম্পত্তিং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্ৰা সত্থু সাসনে পব্বজিত্ৰা নচিরস্সেৰ অরহা অহোসি.

৩১. সো পচ্ছা সককম্মং সরিত্ৰা তং তথতো ঞত্ৰা সোমনস্সজাতো পুব্বচরিতাপদানং পকাসেন্তো ৰরুণো নাম নামেনাতিআদিমাহ. তত্থ যদা অহং সম্বোধনত্থায বুদ্ধং বোধিঞ্চ পূজেসিং, তদা ৰরুণো নাম দেৰরাজা অহোসিন্তি সম্বন্ধো.

৩৪. ধরণীরুহপাদপন্তি এত্থ রুক্খলতাপব্বতসত্থরতনাদযো ধারেতীতি ধরণী, তস্মিং রুহতি পতিট্ঠহতীতি ধরণীরুহো. পাদেন পিৰতীতি পাদপো, সিঞ্চিতসিঞ্চিতোদকং পাদেন মূলেন পিৰতি রুক্খক্খন্ধসাখাৰিটপেহি আপোরসং পত্থরিযতীতি অত্থো, তং ধরণীরুহপাদপং বোধিরুক্খন্তি সম্বন্ধো.

৩৫. সককম্মাভিরদ্ধোতি অত্তনো কুসলকম্মেন অভিরদ্ধো পসন্নো উত্তমে বোধিম্হি পসন্নোতি সম্বন্ধো. সেসং সব্বত্থ উত্তানমেৰাতি.

একাসনিযত্থেরঅপদানৰণ্ণনা সমত্তা.

৫. সুৰণ্ণপুপ্ফিযত্থেরঅপদানৰণ্ণনা

ৰিপস্সী নাম ভগৰাতিআদিকং আযস্মতো সুৰণ্ণপুপ্ফিযত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং ঠানে ভূমট্ঠকদেৰপুত্তো হুত্ৰা নিব্বত্তো তস্স ভগৰতো ধম্মং সুত্ৰা পসন্নমানসো চতূহি সুৰণ্ণপুপ্ফেহি পূজেসি. তানি পুপ্ফানি আকাসে সুৰণ্ণৰিতানং হুত্ৰা ছাদেসুং, সুৰণ্ণপভা চ বুদ্ধস্স সরীরপভা চ একতো হুত্ৰা মহাওভাসো অহোসি. সো অতিরেকতরং পসন্নো সকভৰনং গতোপি সরতিযেৰ. সো তেন পুঞ্ঞকম্মেন তুসিতভৰনাদিসুগতীসুযেৰ সংসরন্তো দিব্বসম্পত্তিং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থু ধম্মদেসনং সুত্ৰা সাসনে উরং দত্ৰা পব্বজিতো নচিরস্সেৰ অরহা অহোসি.

৪০. সো অপরভাগে পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং পকাসেন্তো ৰিপস্সী নাম ভগৰাতিআদিমাহ. তং হেট্ঠা ৰুত্তত্থমেৰ.

৪৪. পামোজ্জং জনযিত্ৰানাতি বলৰপীতিং উপ্পাদেত্ৰা ‘‘পামোজ্জং আমোদনা পমোদনা হাসো পহাসো ৰিত্তি ওদগ্যং অত্তমনতা চিত্তস্সা’’তিআদীসু (ধ. স. ৯, ৮৬; মহানি. ১) ৰিয অত্তমনতা সকভাৰং উপ্পাদেত্ৰাতি অত্থো. সেসং সব্বত্থ উত্তানমেৰাতি.

সুৰণ্ণপুপ্ফিযত্থেরঅপদানৰণ্ণনা সমত্তা.

৬. চিতকপূজকত্থেরঅপদানৰণ্ণনা

ৰসামি রাজাযতনেতিআদিকং আযস্মতো চিতকপূজকত্থেরস্স অপদানং. অযম্পি পুরিমবুদ্ধেসু কতাধিকারো ততো পরং উপ্পন্নুপ্পন্নভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে রাজাযতনরুক্খদেৰতা হুত্ৰা নিব্বত্তো অন্তরন্তরা দেৰতাহি সদ্ধিং ধম্মং সুত্ৰা পসন্নো ভগৰতি পরিনিব্বুতে সপরিৰারো গন্ধদীপধূপপুপ্ফভেরিআদীনি গাহাপেত্ৰা ভগৰতো আল়হনট্ঠানং গন্ত্ৰা দীপাদীনি পূজেত্ৰা অনেকেহি তূরিযেহি অনেকেহি ৰাদিতেহি তং পূজেসি. ততো পট্ঠায সকভৰনং উপৰিট্ঠোপি ভগৰন্তমেৰ সরিত্ৰা সম্মুখা ৰিয ৰন্দতি. সো তেনেৰ পুঞ্ঞেন তেন চিত্তপ্পসাদেন রাজাযতনতো কালং কতো তুসিতাদীসু নিব্বত্তো দিব্বসম্পত্তিং অনুভৰিত্ৰা ততো মনুস্সেসু মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো ভগৰতি উপ্পন্নচিত্তপ্পসাদো ভগৰতো সাসনে পব্বজিত্ৰা নচিরস্সেৰ অরহা অহোসি.

৪৯. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰসামি রাজাযতনেতিআদিমাহ. রাজাযতনেতি দেৰরাজূনং আযতনং রাজাযতনং, তস্স রুক্খস্স নামধেয্যো ৰা. পরিনিব্বুতে ভগৰতীতি পরিসমন্ততো কিঞ্চি অনৰসেসেত্ৰা খন্ধপরিনিব্বানকালে পরিনিব্বানসমযে পরিনিব্বানপ্পত্তস্স সিখিনো লোকবন্ধুনোতি সম্বন্ধো.

৫০. চিতকং অগমাসহন্তি চন্দনাগরুদেৰদারুকপ্পূরতক্কোলাদিসুগন্ধদারূহি চিতং রাসিগতন্তি চিতং, চিতমেৰ চিতকং, বুদ্ধগারৰেন চিতকং পূজনত্থায চিতকস্স সমীপং অহং অগমাসিন্তি অত্থো. তত্থ গন্ত্ৰা কতকিচ্চং দস্সেন্তো তূরিযং তত্থ ৰাদেত্ৰাতিআদিমাহ. তং সব্বং সুৰিঞ্ঞেয্যমেৰাতি.

চিতকপূজকত্থেরঅপদানৰণ্ণনা সমত্তা.

৭. বুদ্ধসঞ্ঞকত্থেরঅপদানৰণ্ণনা

যদা ৰিপস্সী লোকগ্গোতিআদিকং আযস্মতো বুদ্ধসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং ভূমট্ঠকৰিমানে দেৰপুত্তো হুত্ৰা নিব্বত্তি. তদা ৰিপস্সী ভগৰা আযুসঙ্খারং ৰোস্সজ্জি. অথ সকলদসসহস্সিলোকধাতু সসাগরপব্বতা পকম্পিত্থ. তদা তস্স দেৰপুত্তস্স ভৰনম্পি কম্পিত্থ. তস্মিং খণে সো দেৰপুত্তো সংসযজাতো – ‘‘কিং নু খো পথৰীকম্পায নিব্বত্তী’’তি চিন্তেত্ৰা বুদ্ধস্স আযুসঙ্খারৰোস্সজ্জভাৰং ঞত্ৰা মহাসোকং দোমনস্সং উপ্পাদেসি. তদা ৰেস্সৰণো মহারাজা আগন্ত্ৰা ‘‘মা চিন্তযিত্থা’’তি অস্সাসেসি. সো দেৰপুত্তো ততো চুতো তেন পুঞ্ঞেন দেৰমনুস্সেসু সংসরন্তো ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো ঘরাৰাসং পহায পব্বজিত্ৰা নচিরস্সেৰ অরহা অহোসি.

৫৭. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো যদা ৰিপস্সী লোকগ্গোতিআদিমাহ. আযুসঙ্খারমোস্সজ্জীতি আ সমন্ততো যুনোতি পালেতি সত্তেতি আযু, আযুস্স সঙ্খারো রাসিভাৰো আযুসঙ্খারো, তং আযুসঙ্খারং ওস্সজ্জি পরিচ্চজি জহাসীতি অত্থো. তস্মিং আযুসঙ্খারৰোস্সজ্জনে. জলমেখলাসাগরোদকমেখলাসহিতা সকলদসসহস্সচক্কৰাল়পথৰী কম্পিত্থাতি সম্বন্ধো.

৫৮. ওততং ৰিত্থতং ময্হন্তি ময্হং ভৰনং ওততং ৰিত্থতং চিত্তং ৰিচিত্তং সুচি সুপরিসুদ্ধং চিত্তং অনেকেহি সত্তহি রতনেহি ৰিচিত্তং সোভমানং পকম্পিত্থ পকারেন কম্পিত্থাতি অত্থো. সেসং সব্বত্থ উত্তানমেৰাতি.

বুদ্ধসঞ্ঞকত্থেরঅপদানৰণ্ণনা সমত্তা.

৮. মগ্গসঞ্ঞকত্থেরঅপদানৰণ্ণনা

পদুমুত্তরবুদ্ধস্সাতিআদিকং আযস্মতো মগ্গসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো ততো ওরং তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হিমৰন্তে দেৰপুত্তো হুত্ৰা নিব্বত্তো অরঞ্ঞং গন্ত্ৰা মগ্গমূল়্হানং মগ্গং গৰেসন্তানং তস্স সাৰকানং ভোজেত্ৰা মগ্গং আচিক্খি. সো তেন পুঞ্ঞেন দেৰমনুস্সসম্পত্তিমনুভৰিত্ৰা উপ্পন্নুপ্পন্নভৰে সব্বত্থ অমূল়্হো সঞ্ঞৰা অহোসি. অথ ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো ঘরাৰাসে অনল্লীনো পব্বজিত্ৰা নচিরস্সেৰ অরহা অহোসি.

৬৬. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরবুদ্ধস্সাতিআদিমাহ. সাৰকা ৰনচারিনোতি ভগৰতো ৰুত্তৰচনং সম্মা আদরেন সুণন্তীতি সাৰকা, অথ ৰা ভগৰতো দেসনানুসারেন ঞাণং পেসেত্ৰা সদ্ধম্মং সুণন্তীতি সাৰকা. ৰনচারিনো ৰনে ৰিচরণকা সাৰকা ৰিপ্পনট্ঠা মগ্গমূল়্হা মহাঅরঞ্ঞে অন্ধাৰ চক্খুৰিরহিতাৰ অনুসুয্যরে ৰিচরন্তীতি সম্বন্ধো. সেসং সব্বত্থ উত্তানমেৰাতি.

মগ্গসঞ্ঞকত্থেরঅপদানৰণ্ণনা সমত্তা.

৯. পচ্চুপট্ঠানসঞ্ঞকত্থেরঅপদানৰণ্ণনা

অত্থদস্সিম্হি সুগতেতিআদিকং আযস্মতো পচ্চুপট্ঠানসঞ্ঞকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে যক্খযোনিযং নিব্বত্তো ভগৰতি ধরমানে দস্সনস্স অলদ্ধত্তা পচ্ছা পরিনিব্বুতে মহাসোকপ্পত্তো ৰিহাসি. তদা হিস্স ভগৰতো সাগতো নাম অগ্গসাৰকো অনুসাসন্তো ভগৰতো সারীরিকধাতুপূজা ভগৰতি ধরমানে কতপূজা ৰিয চিত্তপ্পসাদৰসা মহপ্ফলং ভৰতী’’তি ৰত্ৰা ‘‘থূপং করোহী’’তি নিযোজিতো থূপং কারেসি, তং পূজেত্ৰা ততো চুতো দেৰমনুস্সেসু সক্কচক্কৰত্তিসম্পত্তিমনুভৰিত্ৰা ইমস্মিং বুদ্ধুপ্পাদে সাৰত্থিযং একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিত্ৰা নচিরস্সেৰ অরহা অহোসি.

৭২. সো অপরভাগে অত্তনো পুঞ্ঞকম্মং সরিত্ৰা সোমনস্সজাতো পুব্বচরিতাপদানং পকাসেন্তো অত্থদস্সিম্হি সুগতেতিআদিমাহ. তং হেট্ঠা ৰুত্তমেৰ. যক্খযোনিং উপপজ্জিন্তি এত্থ পন অত্তনো সকাসং সম্পত্তসম্পত্তে খাদন্তা যন্তি গচ্ছন্তীতি যক্খা, যক্খানং যোনি জাতীতি যক্খযোনি, যক্খযোনিযং নিব্বত্তোতি অত্থো.

৭৩. দুল্লদ্ধং ৰত মে আসীতি মে মযা লদ্ধযসং দুল্লদ্ধং, বুদ্ধভূতস্স সত্থুনো সক্কারং অকতত্তা ৰিরাধেত্ৰা লদ্ধন্তি অত্থো. দুপ্পভাতন্তি দুট্ঠু পভাতং রত্তিযা পভাতকরণং, ময্হং ন সুট্ঠুং পভাতন্তি অত্থো. দুরুট্ঠিতন্তি দুউট্ঠিতং, সূরিযস্স উগ্গমনং ময্হং দুউগ্গমনন্তি অত্থো. সেসং সব্বত্থ উত্তানমেৰাতি.

পচ্চুপট্ঠানসঞ্ঞকত্থেরঅপদানৰণ্ণনা সমত্তা.

১০. জাতিপূজকত্থেরঅপদানৰণ্ণনা

জাযং তস্স ৰিপস্সিস্সাতিআদিকং আযস্মতো জাতিপূজকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো ৰিঞ্ঞুতং পত্তো নক্খত্তপাঠকেহি ৰিপস্সিবোধিসত্তস্স ৰুত্তলক্খণনিমিত্তং সুত্ৰা ‘‘অযং কির কুমারো বুদ্ধো হুত্ৰা সকললোকস্স অগ্গো সেট্ঠো সুত্ৰা সব্বসত্তে সংসারতো উদ্ধরিস্সতী’’তি সুত্ৰা তং ভগৰন্তং কুমারকালেযেৰ বুদ্ধস্স ৰিয মহাপূজমকাসি. পচ্ছা কমেন কুমারকালং রাজকুমারকালং রজ্জকালন্তি কালত্তযমতিক্কম্ম বুদ্ধে জাতেপি মহাপূজং কত্ৰা ততো চুতো তুসিতাদীসু নিব্বত্তো দিব্বসুখমনুভৰিত্ৰা পচ্ছা মনুস্সেসু চক্কৰত্তাদিমনুস্সসুখমনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো সত্তট্ঠৰস্সকালেযেৰ ভগৰতি পসন্নো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহা অহোসি.

৮২. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো জাযং তস্স ৰিপস্সিস্সাতিআদিমাহ. তং হেট্ঠা ৰুত্তত্থমেৰ.

৮৪. নেমিত্তানং সুণিত্ৰানাতি এত্থ নিমিত্তং কারণং সুখদুক্খপ্পত্তিহেতুং জানন্তীতি নেমিত্তা, তেসং নেমিত্তানং নক্খত্তপাঠকানং ৰচনং সুণিত্ৰাতি অত্থো. সেসং সব্বত্থ উত্তানমেৰাতি.

জাতিপূজকত্থেরঅপদানৰণ্ণনা সমত্তা.

দ্ৰাদসমৰগ্গৰণ্ণনা সমত্তা.