১০. তিপদুমিযত্থেরঅপদানৰণ্ণনা

পদুমুত্তরো নাম জিনোতিআদিকং আযস্মতো তিপদুমিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হংসৰতিযং মালাকারকুলগেহে নিব্বত্তো ৰুদ্ধিপ্পত্তো মালাকারকম্মং কত্ৰা ৰসন্তো একদিৰসং অনেকৰিধানি জলজথলজপুপ্ফানি গহেত্ৰা রঞ্ঞো সন্তিকং গন্তুকামো এৰং চিন্তেসি – ‘‘রাজা ইমানি তাৰ পুপ্ফানি দিস্ৰা পসন্নো সহস্সং ৰা ধনং গামাদিকং ৰা দদেয্য, লোকনাথং পন পূজেত্ৰা নিব্বানামতধনং লভামি, কিং মে এতেসু সুন্দর’’ন্তি তেন ‘‘ভগৰন্তং পূজেত্ৰা সগ্গমোক্খসম্পত্তিযো নিপ্ফাদেতুং ৰট্টতী’’তি চিন্তেত্ৰা ৰণ্ণৰন্তং অতীৰ রত্তপুপ্ফত্তযং গহেত্ৰা পূজেসি. তানি গন্ত্ৰা আকাসং ছাদেত্ৰা পত্থরিত্ৰা অট্ঠংসু. নগরৰাসিনো অচ্ছরিযব্ভুতচিত্তজাতা চেলুক্খেপসহস্সানি পৰত্তযিংসু. তং দিস্ৰা ভগৰা অনুমোদনং অকাসি. সো তেন পুঞ্ঞেন দেৰমনুস্সেসু সম্পত্তিযো অনুভৰিত্ৰা ইমস্মিং বুদ্ধুপ্পাদে গহপতিকুলে নিব্বত্তো ৰুদ্ধিমন্ৰায সত্থরি পসীদিত্ৰা ধম্মং সুত্ৰা পটিলদ্ধসদ্ধো পব্বজিত্ৰা নচিরস্সেৰ অরহা অহোসি.

৪৮. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরো নাম জিনোতিআদিমাহ. তস্সত্থো হেট্ঠা ৰুত্তোৰ. সব্বধম্মান পারগূতি সব্বেসং নৰলোকুত্তরধম্মানং পারং নিব্বানং গতো পচ্চক্খং কতোতি অত্থো. দন্তো দন্তপরিৰুতোতি সযং কাযৰাচাদীহি দন্তো এতদগ্গে ঠপিতেহি সাৰকেহি পরিৰুতোতি অত্থো. সেসং সব্বত্থ সম্বন্ধৰসেন উত্তানত্থমেৰাতি.

তিপদুমিযত্থেরঅপদানৰণ্ণনা সমত্তা.

অট্ঠমৰগ্গৰণ্ণনা সমত্তা.