৬. কাল়ুদাযিত্থেরঅপদানৰণ্ণনা

ছট্ঠাপদানে পদুমুত্তরো নাম জিনোতিআদিকং আযস্মতো কাল়ুদাযিত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হংসৰতীনগরে কুলগেহে নিব্বত্তো ৰিঞ্ঞুতং পত্তো সত্থু ধম্মদেসনং সুণন্তো সত্থারং একং ভিক্খুং কুলপ্পসাদকানং অগ্গট্ঠানে ঠপেন্তং দিস্ৰা তজ্জং অভিনীহারকম্মং কত্ৰা তং ঠানন্তরং পত্থেসি. সত্থাপি ব্যাকাসি. সো যাৰজীৰং কুসলং কত্ৰা দেৰমনুস্সেসু সংসরন্তো অম্হাকং বোধিসত্তস্স মাতুকুচ্ছিযং পটিসন্ধিগ্গহণদিৰসে দেৰলোকতো চৰিত্ৰা কপিলৰত্থুস্মিংযেৰ অমচ্চকুলে পটিসন্ধিং গণ্হি. বোধিসত্তেন সহ একদিৰসেযেৰ জাতো, তংদিৰসংযেৰ নং দুকূলচুম্বটকেন নিপজ্জাপেত্ৰা বোধিসত্তস্স উপট্ঠানং নযিংসু. বোধিসত্তেন হি সদ্ধিং বোধিরুক্খো, রাহুলমাতা, চত্তারো নিধী, আরোহনিযহত্থী, কণ্ডকো, ছন্নো, কাল়ুদাযীতি ইমে সত্ত একদিৰসে জাতত্তা সহজাতা নাম অহেসুং. অথস্স নামগ্গহণদিৰসে সকলনগরস্স উদগ্গচিত্তদিৰসে জাতত্তা উদাযীত্ৰেৰ নামং করিংসু. থোকং কাল়ধাতুকত্তা পন কাল়ুদাযীতি পঞ্ঞাযিত্থ. সো বোধিসত্তেন সদ্ধিং কুমারকীল়ং কীল়ন্তো ৰুদ্ধিং অগমাসি.

অপরভাগে লোকনাথে মহাভিনিক্খমনং নিক্খমিত্ৰা অনুক্কমেন সব্বঞ্ঞুতং পত্ৰা পৰত্তিতৰরধম্মচক্কে রাজগহং উপনিস্সায ৰেল়ুৰনে ৰিহরন্তে সুদ্ধোদনমহারাজা তং পৰত্তিং সুত্ৰা পুরিসসহস্সপরিৰারং একং অমচ্চং ‘‘পুত্তং মে ইধানেহী’’তি পেসেসি. সো সত্থু ধম্মদেসনাৰেলাযং সত্থু সন্তিকং গন্ত্ৰা পরিসপরিযন্তে ঠিতো ধম্মং সুত্ৰা সপরিৰারো অরহত্তং পাপুণি. অথ নে সত্থা ‘‘এথ, ভিক্খৰো’’তি হত্থং পসারেসি. সব্বে তংখণংযেৰ ইদ্ধিমযপত্তচীৰরধরা ৰস্সসট্ঠিকত্থেরা ৰিয অহেসুং. অরহত্তপ্পত্ততো পট্ঠায অরিযা নাম মজ্ঝত্তাৰ হোন্তি, তস্মা রঞ্ঞা পেসিতসাসনং দসবলস্স নারোচেসি. রাজা নেৰ গতো আগচ্ছতি, ন সাসনং সুয্যতীতি অপরম্পি অমচ্চং পুরিসসহস্সপরিৰারং পেসেসি. তস্মিম্পি তথা পটিপন্নে অপরম্পীতি এতেন নযেন নৰপুরিসসহস্সপরিৰারে নৰ অমচ্চে পেসেসি. সব্বে গন্ত্ৰা অরহত্তং পত্ৰা তুণ্হীভূতা অহেসুং.

অথ রাজা চিন্তেসি – ‘‘এত্তকা জনা মযি সিনেহাভাৰেন দসবলস্স ইধাগমনত্থায ন কিঞ্চি কথযিংসু, অযং খো পন উদাযী দসবলেন সমৰযো সহপংসুকীল়িকো, মযি চ সিনেহৰা, ইমং পেসেস্সামী’’তি. অথ তং পক্কোসাপেত্ৰা, ‘‘তাত, ত্ৰং পুরিসসহস্সপরিৰারো গন্ত্ৰা দসবলং ইধানেহী’’তি ৰত্ৰা পেসেসি. সো পন গচ্ছন্তো ‘‘সচাহং, দেৰ, পব্বজিতুং লভিস্সামি, এৰাহং ভগৰন্তং ইধানেস্সামী’’তি ৰত্ৰা রঞ্ঞা ‘‘পব্বজিতোপি মম পুত্তং দস্সেহী’’তি ৰুত্তো রাজগহং গন্ত্ৰা সত্থু ধম্মদেসনাৰেলায পরিসপরিযন্তে ঠিতো ধম্মং সুত্ৰা সপরিৰারো অরহত্তং পত্ৰা এহিভিক্খুভাৰে পতিট্ঠাসি. সো অরহত্তং পত্ৰা – ‘‘ন তাৰাযং দসবলস্স কুলনগরং গন্তুং কালো, ৰস্সন্তে পন উপগতে পব্বতেসু ৰনসণ্ডেসু হরিততিণসঞ্ছন্নায ভূমিযা গমনকালো ভৰিস্সতী’’তি গমনকালং আগমেন্তো ৰস্সন্তে সম্পত্তে সত্থু কুলনগরং গন্তুং গমনৰণ্ণং সংৰণ্ণেসি. ৰুত্তঞ্চেতং থেরগাথায (থেরগা. ৫২৭-৫৩০) –

‘‘অঙ্গারিনো দানি দুমা ভদন্তে, ফলেসিনো ছদনং ৰিপ্পহায;

তে অচ্চিমন্তোৰ পভাসযন্তি, সমযো মহাৰীর ভাগী রসানং.

‘‘দুমানি ফুল্লানি মনোরমানি, সমন্ততো সব্বদিসা পৰন্তি;

পত্তং পহায ফলমাসসানা, কালো ইতো পক্কমনায ৰীর.

‘‘নেৰাতিসীতং ন পনাতিউণ্হং, সুখা উতু অদ্ধনিযা ভদন্তে;

পস্সন্তু তং সাকিযা কোল়িযা চ, পচ্ছামুখং রোহিনিযং তরন্তং.

‘‘আসায কসতে খেত্তং, বীজং আসায ৰপ্পতি;

আসায ৰাণিজা যন্তি, সমুদ্দং ধনহারকা;

যায আসায তিট্ঠামি, সা মে আসা সমিজ্ঝতু.

‘‘নাতিসীতং নাতিউণ্হং, নাতিদুব্ভিক্খছাতকং;

সদ্দলা হরিতা ভূমি, এস কালো মহামুনি. (অ. নি. অট্ঠ. ১.১.২২৫);

‘‘পুনপ্পুনঞ্চেৰ ৰপন্তি বীজং, পুনপ্পুনং ৰস্সতি দেৰরাজা;

পুনপ্পুনং খেত্তং কসন্তি কস্সকা, পুনপ্পুনং ধঞ্ঞমুপেতি রট্ঠং.

‘‘পুনপ্পুনং যাচনকা চরন্তি, পুনপ্পুনং দানপতী দদন্তি;

পুনপ্পুনং দানপতী দদিত্ৰা, পুনপ্পুনং সগ্গমুপেন্তি ঠানং.

‘‘ৰীরো হৰে সত্তযুগং পুনেতি; যস্মিং কুলে জাযতি ভূরিপঞ্ঞো;

মঞ্ঞামহং সক্কতি দেৰদেৰো, তযা হি জাতো মুনি সচ্চনামো.

‘‘সুদ্ধোদনো নাম পিতা মহেসিনো, বুদ্ধস্স মাতা পন মাযনামা;

যা বোধিসত্তং পরিহরিয কুচ্ছিনা, কাযস্স ভেদা তিদিৰম্হি মোদতি.

‘‘সা গোতমী কালকতা ইতো চুতা, দিব্বেহি কামেহি সমঙ্গিভূতা;

সা মোদতি কামগুণেহি পঞ্চহি, পরিৰারিতা দেৰগণেহি তেহি.

‘‘বুদ্ধস্স পুত্তোম্হি অসয্হসাহিনো, অঙ্গীরসস্সপ্পটিমস্স তাদিনো;

পিতুপিতা ময্হং তুৰংসি সক্ক, ধম্মেন মে গোতম অয্যকোসী’’তি. (থেরগা. ৫৩১-৫৩৬);

‘‘অম্বা পনসা কপিট্ঠা চ, পুপ্ফপল্লৰলঙ্কতা;

ধুৰপ্ফলানি সৰন্তি, খুদ্দামধুককূপমা;

সেৰমানো উভো পস্সে, গন্তুকালো মহাযস্স.

‘‘জম্বূ সুমধুরা নীপা, মধুগণ্ডিদিৰপ্ফলা;

তা উভোসু পজ্জোতন্তি, গন্তুকালো মহাযস.

‘‘তিণ্ডুকানি পিযালানি, সোণ্ণৰণ্ণা মনোরমা;

খুদ্দকপ্পফলা নিচ্চং, গন্তুকালো মহাযস.

‘‘কদলী পঞ্চমোচ্চি চ, সুপক্কফলভূসিতা;

উভোপস্সেসু লম্বন্তি, গন্তুকালো মহাযস.

‘‘মধুপ্ফলধরা নিচ্চং, মোররুক্খা মনোরমা;

খুদ্দকপ্পফলা নিচ্চং, গন্তুকালো মহাযস.

‘‘হিন্তালতালপন্তী চ, রজতক্খন্ধোৰ জোতরে;

সুপক্কফলসঞ্ছন্না, খুদ্দকপ্পা মধুস্সৰা;

ফলানি তানি খাদন্তে, গন্তুকালো মহাযস.

‘‘উদুম্বরারুণাৰণ্ণা, সদাসুমধুরপ্ফলা;

উভোপস্সেসু লম্বন্তি, গন্তুকালো মহাযস.

‘‘ইত্থম্ভূতা অনেকা তে, নানাফলধরা দুমা;

উভোপস্সেসু লম্বন্তি, গন্তুকালো মহাযস.

‘‘চম্পকা সলল়া নাগা, সুগন্ধা মালুতেরিতা;

সুপুপ্ফিতগ্গা জোতন্তি, সুগন্ধেনাভিপূজযুং;

সাদরা ৰিনতানেৰ, গন্তুকালো মহাযস.

‘‘পুন্নাগা গিরিপুন্নাগা, পুপ্ফিতা ধরণীরুহা;

সুপুপ্ফিতগ্গা জোতন্তি, সুগন্ধেনাভিপূজযুং;

সাদরা ৰিনতুগ্গগ্গা, গন্তুকালো মহাযস.

‘‘অসোকা কোৰিল়ারা চ, সোমনস্সকরা ৰরা;

সুগন্ধা কণ্ণিকা বন্ধা, রত্তৰণ্ণেহি ভূসিতা;

সাদরা ৰিনতুগ্গগ্গা, সমযো তে মহাযস.

‘‘কণ্ণিকারা ফুল্লিতা নিচ্চং, সোৰণ্ণরংসিজোতকা;

দিব্বগন্ধা পৰাযন্তি, দিসা সব্বানি সোভযং;

সাদরা ৰিনতানেৰ, সমযো তে মহাযস.

‘‘সুপত্তা গন্ধসম্পন্না, কেতকী ধনুকেতকী;

সুগন্ধা সম্পৰাযন্তি, দিসা সব্বাভিগন্ধিনো;

সাদরা পূজযন্তাৰ, সমযো তে মহাযস.

‘‘মল্লিকা জাতিসুমনা, সুগন্ধা খুদ্দমল্লিকা;

দিসা সব্বা পৰাযন্তি, উভো মগ্গে পসোভযং;

সাদরা তে পলম্বন্তি, সমযো তে মহাযস.

‘‘সিন্ধুৰারা সীতগন্ধা, সুগন্ধা মালুতেরিতা;

দিসা সব্বাভিপূজেন্তা, উভো মগ্গে পসোভযং;

সাদরা ৰিনতুগ্গগ্গা, সমযো তে মহাযস.

‘‘সীহা কেসরসীহা চ, চতুপ্পদনিসেৰিতা;

অচ্ছম্ভীতা সুরাপানে, মিগরাজা পতাপিনো.

‘‘সীহনাদেন পূজেন্তি, সাদরা তে মিগাভিভূ;

মগ্গম্হি উভতো ৰূল়্হা, সমযো তে মহাযস.

‘‘ব্যগ্ঘা সিন্ধৰা নকুলা, সাধুরূপা ভযানকা;

আকাসে সম্পতন্তাৰ, নিব্ভীতা যেন কেনচি;

তেহি তে সাদরা নতা, সমযো তে মহাযস.

‘‘তিধা পভিন্না ছদ্দন্তা, সুরূপা সুস্সরা সুভা;

সত্তপ্পতিট্ঠিতঙ্গা তে, উভো মগ্গেসু কূজিনো;

সাদরা হাসমানাৰ, সমযো তে মহাযস.

‘‘মিগা ৰরাহা পসদা, চিত্রাসাৰযৰা সুভা;

আরোহপরিণাহেন, সুরূপা অঙ্গসংযুতা;

উভো মগ্গে গাযমানাৰ, সমযো তে মহাযস.

‘‘গোকণ্ণা সরভা রুরূ, আরোহপরিণাহিনো;

সুরূপা অঙ্গসম্পন্না, সেৰমানাৰ অচ্ছরুং;

সেৰমানা তেহি তদা, সমযো তে মহাযস.

‘‘দীপী অচ্ছা তরচ্ছা চ, তুদরা ৰরুণা সদা;

তে দানি সিক্খিতা সব্বে, মেত্তায তৰ তাদিনো;

তে পচ্চসেৰকা অদ্ধা, সমযো তে মহাযস.

‘‘সসা সিঙ্গালা নকুলা, কলন্দকাল়কা বহূ;

কস্তুরা সূরা গন্ধা তে, কেৰলা গাযমানাৰ.

সমযো তে মহাযস;

‘‘মযূরা নীলগীৰা তে, সুসিখা সুভপক্খিকা;

সুপিঞ্ছা তে সুনাদা চ, ৰেল়ুরিযমণিসন্নিভা;

নাদং করোন্তা পূজেন্তি, কালো তে পিতুদস্সনে.

‘‘সুৰণ্ণচিত্রহংসা চ, জৰহংসা ৰিহাচরা;

তে সব্বে আসযা ছুদ্ধা, জিনদস্সনব্যাৰটা;

মধুরস্সরেন কূজন্তি, কালো তে পিতুদস্সনে.

‘‘হংসা কোঞ্চা সুনদা তে, চক্কৰাকা নদীচরা;

বকা বলাকা রুচিরা, জলকাকা সরকুক্কুটা;

সাদরাভিনাদিনো এতে, কালো তে পিতুদস্সনে.

‘‘চিত্রা সুরূপা সুস্সরা, সাল়িকা সুৰতণ্ডিকা;

রুক্খগ্গা সম্পতন্তা তে, উভো মগ্গেসু কূজিনো;

তেসু তেসু নিকূজন্তি, কালো তে পিতুদস্সনে.

‘‘কোকিলা সকলা চিত্রা, সদা মঞ্জুস্সরা ৰরা;

ৰিম্হাপিতা তে জনতং, সদ্ধিমিত্তাদিকে সুরা;

সরেহি পূজযন্তাৰ, কালো তে পিতুদস্সনে.

‘‘ভিঙ্কা কুররা সারা, পূরিতা কাননে সদা;

নিন্নাদযন্তা পৰনং, অঞ্ঞমঞ্ঞসমঙ্গিনো;

গাযমানা সরেনেৰ, কালো তে পিতুদস্সনে.

‘‘তিত্তিরা সুসরা সারা, সুসরা ৰনকুক্কুটা;

মঞ্জুস্সরা রামণেয্যা, কালো তে পিতুদস্সনে.

‘‘সেতৰালুকসঞ্ছন্না, সুপতিত্থা মনোরমা;

মধুরোদকসম্পুণ্ণা, সরা জোতন্তি তে সদা;

তত্থ ন্হত্ৰা পিৰিত্ৰা চ, সমযো তে ঞাতিদস্সনে.

‘‘কুম্ভীরামকরাকিণ্ণা, ৰলযা মুঞ্জরোহিতা;

মচ্ছকচ্ছপব্যাৰিদ্ধা, সরা সীতোদকা সুভা;

তত্থ ন্হত্ৰা পিৰিত্ৰা চ, সমযো তে ঞাতিদস্সনে.

‘‘নীলুপ্পলসমাকিণ্ণা, তথা রত্তুপ্পলেহি চ;

কুমুদুপ্পলসংকিণ্ণা, সরা সোভন্তিনেকধা;

তত্থ সীতলকা তোযা, সমযো তে ঞাতিদস্সনে.

‘‘পুণ্ডরীকেহি সঞ্ছন্না, পদুমেহি সমোহতা;

উভো মগ্গেসু সোভন্তি, পোক্খরঞ্ঞো তহিং তহিং;

তত্থোদকানি ন্হাযন্তি, সমযো তে ঞাতিদস্সনে.

‘‘সেতপুলিনসংকিণ্ণা, সুপতিত্থা মনোরমা;

সীতোদকমহোঘেহি, সম্পুণ্ণা তা নদী সুভা;

উভো মগ্গেহি সন্দন্তি, সমযো তে ঞাতিদস্সনে.

‘‘মগ্গস্স উভতোপস্সে, গামনিগমসমাকুলা;

সদ্ধা পসন্না জনতা, রতনত্তযমামকা;

তেসং সম্পুণ্ণসঙ্কপ্পো, সমযো তে ঞাতিদস্সনে.

‘‘তেসু তেসু পদেসেসু, দেৰা মানুস্সকা উভো;

গন্ধমালাভিপূজেন্তি, সমযো তে ঞাতিদস্সনে’’তি.

এৰং থেরো সট্ঠিমত্তাহি গাথাহি সত্থু গমনৰণ্ণং সংৰণ্ণেসি. অথ খো ভগৰা ‘‘কাল়ুদাযী মম গমনং পত্থেতি, পূরেস্সামিস্স সঙ্কপ্প’’ন্তি তত্থ গমনে বহূনং ৰিসেসাধিগমং দিস্ৰা ৰীসতিসহস্সখীণাসৰপরিৰুতো রাজগহতো অতুরিতচারিকাৰসেন ৰুত্তপ্পকারফলাফলে অনুভৰন্তো দ্ৰিপদচতুপ্পদাদিসমূহানং সেৰনপূজায পূজিযমানো ৰুত্তপ্পকারসুগন্ধপুপ্ফগন্ধেহি গন্ধিযমানো গামনিগমৰাসীনং সঙ্গহং কুরুমানো কপিলৰত্থুগামিমগ্গং পটিপজ্জি. থেরো ইদ্ধিযা কপিলৰত্থুং গন্ত্ৰা রঞ্ঞো পুরতো আকাসে ঠিতো অদিট্ঠপুব্বং ৰেসং দিস্ৰা, রঞ্ঞা – ‘‘কোসি ত্ৰ’’ন্তি পুচ্ছিতো ‘‘সচে অমচ্চপুত্তং তযা ভগৰতো সন্তিকে পেসিতং ন জানাসি, এৰং জানাহী’’তি ৰদন্তো –

‘‘বুদ্ধস্স পুত্তোম্হি অসয্হসাহিনো, অঙ্গীরসস্সপ্পটিমস্স তাদিনো;

পিতুপিতা ময্হং তুৰংসি সক্ক, ধম্মেন মে গোতম অয্যকোসী’’তি. (থেরগা. ৫৩৬) – গাথমাহ;

তত্থ বুদ্ধস্স পুত্তোম্হীতি সব্বঞ্ঞুবুদ্ধস্স উরে ৰাযামজনিতাহি ধম্মদেসনাহি জাততায ওরসপুত্তো অম্হি. অসয্হসাহিনোতি অভিসম্বোধিতো পুব্বে ঠপেত্ৰা মহাবোধিসত্তং অঞ্ঞেহি সহিতুং অসক্কুণেয্যত্তা অসয্হস্স সকলবোধিসম্ভারস্স, মহাকরুণাকরস্স চ সহনতো ততো পরম্পি অঞ্ঞেহি সহিতুং অভিভৰিতুং অসক্কুণেয্যত্তা অসয্হানং পঞ্চন্নং মারানং সহনতো অভিভৰনতো আসযানুসযচরিতাধিমুত্তিআদিৰিভাগাৰবোধেন যথারহং ৰেনেয্যানং দিট্ঠধম্মিকসম্পরাযিকপরমত্থেহি অনুসাসনীসঙ্খাতস্স অঞ্ঞেহি অসয্হস্স বুদ্ধকিচ্চস্স সহনতো তত্থ ৰা সাধুকারীভাৰতো অসয্হসাহিনো. অঙ্গীরসস্সাতি অঙ্গীকতসীলাদিসম্পত্তিকস্স. ‘‘অঙ্গমঙ্গেহি নিচ্ছরণকওভাসস্সা’’তি অপরে. কেচি পন ‘‘অঙ্গীরসো সিদ্ধত্থোতি ইমানি দ্ৰে নামানি পিতরাযেৰ গহিতানী’’তি ৰদন্তি. অপ্পটিমস্সাতি অনুপমস্স ইট্ঠাদীসু তাদিলখণসম্পত্তিযা তাদিনো. পিতুপিতা ময্হং তুৰংসীতি অরিযজাতিৰসেন ময্হং পিতু সম্মাসম্বুদ্ধস্স লোকৰোহারৰসেন ত্ৰং পিতা অসি. সক্কাতি ৰংসেন রাজানং আলপতি. ধম্মেনাতি সভাৰেন অরিযজাতিলোকিযজাতীহি দ্ৰিন্নং জাতীনং সভাৰসমোধানেন. গোতমাতি গোত্তেন রাজানং আলপতি. অয্যকোসীতি পিতামহো অহোসি. এত্থ চ ‘‘বুদ্ধস্স পুত্তোম্হী’’তিআদিং ৰদন্তো থেরো অঞ্ঞং ব্যাকাসি.

এৰং পন অত্তানং জানাপেত্ৰা হট্ঠতুট্ঠেন রঞ্ঞা মহারহে পল্লঙ্কে নিসীদাপেত্ৰা অত্তনো পটিযাদিতস্স নানগ্গরসভোজনস্স পত্তং পূরেত্ৰা পত্তে দিন্নে গমনাকারং দস্সেসি. ‘‘কস্মা গন্তুকামত্থ, ভুঞ্জথা’’তি ৰুত্তে, সত্থু সন্তিকং গন্ত্ৰা ভুঞ্জিস্সামীতি. কহং পন সত্থাতি? ৰীসতিসহস্সভিক্খুপরিৰারো তুম্হাকং দস্সনত্থায মগ্গং পটিপন্নোতি. তুম্হে ইমং পিণ্ডপাতং ভুঞ্জথ, অঞ্ঞং ভগৰতো হরথ. যাৰ চ মম পুত্তো ইমং নগরং পাপুণাতি, তাৰস্স ইতোযেৰ পিণ্ডপাতং হরথাতি. থেরো ভত্তকিচ্চং কত্ৰা রঞ্ঞো চ পরিসায চ ধম্মং দেসেত্ৰা সত্থু আগমনতো পুরেতরমেৰ রাজনিৰেসনং রতনত্তযগুণেসু অভিপ্পসন্নং করোন্তো সব্বেসং পস্সন্তানংযেৰ সত্থু আহরিতব্বভত্তপুণ্ণং পত্তং আকাসে ৰিস্সজ্জেত্ৰা সযম্পি ৰেহাসং অব্ভুগ্গন্ত্ৰা পিণ্ডপাতং উপনেত্ৰা সত্থু হত্থে ঠপেসি. সত্থাপি তং পিণ্ডপাতং পরিভুঞ্জি. এৰং সট্ঠিযোজনং মগ্গং দিৰসে দিৰসে যোজনং গচ্ছন্তস্স ভগৰতো রাজগেহতো ভত্তং আহরিত্ৰা অদাসি. ভগৰা কমেন কপিলৰত্থুনগরং পত্ৰা পুনদিৰসে রাজৰীথিযং পিণ্ডায চরতি. তং সুত্ৰা সুদ্ধোদনমহারাজা তত্থ গন্ত্ৰা, ‘‘মা এৰং কত্তব্বং মঞ্ঞি, নযিদং রাজৰংসপ্পৰেণী’’তি. ‘‘অযং তুম্হাকং, মহারাজ, ৰংসো, ঈদিসো অম্হাকং পন বুদ্ধৰংসো’’তি ৰত্ৰা –

‘‘উত্তিট্ঠে নপ্পমজ্জেয্য, ধম্মং সুচরিতং চরে;

ধম্মচারী সুখং সেতি, অস্মিং লোকে পরম্হি চ.

‘‘ধম্মং চরে সুচরিতং, ন নং দুচ্চরিতং চরে;

ধম্মচারী সুখং সেতি, অস্মিং লোকে পরম্হি চা’’তি. (ধ. প. ১৬৮-১৬৯) –

ধম্মং দেসেসি. রাজা সোতাপত্তিফলে পতিট্ঠহি. ততো রাজা বুদ্ধপ্পমুখং ভিক্খুসঙ্ঘং নিমন্তেত্ৰা সকমন্দিরে ভোজেত্ৰা সম্পৰারেত্ৰা ভোজনাৰসানে ধম্মপালজাতকং (জা. ১.১০.৯২ আদযো) সুত্ৰা সপরিসো অনাগামিফলে পতিট্ঠহি. অপরভাগে সেতচ্ছত্তস্স হেট্ঠা নিপন্নোৰ অরহত্তং পত্ৰা পরিনিব্বাযি.

ততো ভগৰা রাহুলমাতুযা বিম্বাদেৰিযা পাসাদং গন্ত্ৰা তস্সা ধম্মং দেসেত্ৰা সোকং ৰিনোদেত্ৰা চন্দকিন্নরীজাতকদেসনায (জা. ১.১৪.১৮ আদযো) পসাদং জনেত্ৰা নিগ্রোধারামং অগমাসি. অথ বিম্বাদেৰী পুত্তং রাহুলকুমারং আহ – ‘‘গচ্ছ, তৰ পিতু সন্তকং ধনং যাচাহী’’তি. কুমারো ‘‘দাযজ্জং, মে সমণ, দেহী’’তি ৰত্ৰা ভগৰন্তং অনুবন্ধিত্ৰা, ‘‘সুখা, তে সমণ, ছাযা’’তি ৰদন্তো গচ্ছতি. তং ভগৰা নিগ্রোধারামং নেত্ৰা ‘‘লোকুতরদাযজ্জং গণ্হাহী’’তি ৰত্ৰা পব্বাজেসি. অথ ভগৰা অরিযগণমজ্ঝে নিসিন্নো ‘‘এতদগ্গং, ভিক্খৰে, মম সাৰকানং ভিক্খূনং কুলপ্পসাদকানং যদিদং কাল়ুদাযী’’তি (অ. নি. ১.২১৯, ২২৫) থেরং এতদগ্গে ঠপেসি.

১৬৫. থেরো পত্তএতদগ্গট্ঠানো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরো নাম জিনোতিআদিগাথাযো অভাসি. তত্থ অনুত্তানপদমেৰ ৰণ্ণযিস্সাম.

১৬৬. গুণাগুণৰিদূতি গুণঞ্চ অগুণঞ্চ গুণাগুণং, ৰণ্ণাৰণ্ণং, কুসলাকুসলং ৰা তং জানাতীতি গুণাগুণৰিদূ. কতঞ্ঞূতি অঞ্ঞেহি কতগুণং জানাতীতি কতঞ্ঞূ, একদিৰসম্পি ভত্তদানাদিনা কতূপকারস্স রজ্জম্পি দাতুং সমত্থত্তা কতঞ্ঞূ. কতৰেদীতি কতং ৰিন্দতি অনুভৰতি সম্পটিচ্ছতীতি কতৰেদী. তিত্থে যোজেতি পাণিনেতি সব্বসত্তে নিব্বানপৰেসনুপাযে কুসলপথে মগ্গে ধম্মদেসনায যোজেতি সম্পযোজেতি পতিট্ঠাপেতীতি অত্থো. সেসং উত্তানত্থমেৰ. গমনৰণ্ণনগাথানমত্থো থেরগাথাযং ৰুত্তোযেৰাতি.

কাল়ুদাযিত্থেরঅপদানৰণ্ণনা সমত্তা.