২. পুণ্ণকত্থেরঅপদানৰণ্ণনা

২৯. দুতিযাপদানে পব্ভারকূটং নিস্সাযাতিআদিকং আযস্মতো পুণ্ণকত্থেরস্স অপদানং. তত্থ হিমৰন্তে যক্খসেনাপতি হুত্ৰা পরিনিব্বুতস্স পচ্চেকবুদ্ধস্স আল়হনকরণমেৰ নানত্তং. সেসং পাঠানুসারেন সুৰিঞ্ঞেয্যমেৰ.

৪৫. ততিযাপদানে হিমৰন্তস্সাৰিদূরেতিআদিকং আযস্মতো মেত্তগুত্থেরস্স অপদানং. তত্থ হিমৰন্তসমীপে অসোকপব্বতে সো তাপসো হুত্ৰা পণ্ণসালাযং ৰসন্তো সুমেধসম্বুদ্ধং দিস্ৰা পত্তং গহেত্ৰা সপ্পিপূরণং ৰিসেসো. সেসং পুঞ্ঞফলানি চ সুৰিঞ্ঞেয্যানেৰ. অপদানগাথানং অত্থো চ পাকটোযেৰ.

৭২. চতুত্থাপদানে গঙ্গা ভাগীরথী নামাতিআদিকং আযস্মতো ধোতকত্থেরস্স অপদানং. তত্রাপি ব্রাহ্মণো হুত্ৰা ভাগীরথীগঙ্গায তরমানে ভিক্খূ দিস্ৰা পসন্নমানসো সেতুং কারাপেত্ৰা বুদ্ধপ্পমুখস্স ভিক্খুসঙ্ঘস্স নিয্যাদিতভাৰোযেৰ ৰিসেসো. পুঞ্ঞফলপরিদীপনগাথানং অত্থো নযানুসারেন সুৰিঞ্ঞেয্যোৰ.

১০০. পঞ্চমাপদানে হিমৰন্তস্সাৰিদূরেতিআদিকং আযস্মতো উপসিৰত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰিঞ্ঞুতং পত্তো ঘরাৰাসং পহায ইসিপব্বজ্জং পব্বজিত্ৰা হিমৰন্তে পদুমুত্তরং ভগৰন্তং দিস্ৰা তিণসন্থরং সন্থরিত্ৰা তত্থ নিসিন্নস্স ভগৰতো সালপুপ্ফপূজং অকাসীতি অযং ৰিসেসো, সেসমুত্তানমেৰ.

১৬১. ছট্ঠাপদানে মিগলুদ্দো পুরে আসিন্তিআদিকং আযস্মতো নন্দকত্থেরস্স অপদানং. অযং কির পদুমুত্তরস্স ভগৰতো কালে করৰিকসকুণো হুত্ৰা মধুরকূজিতং করোন্তো সত্থারং পদক্খিণং অকাসি. অপরভাগে মযূরো হুত্ৰা অঞ্ঞতরস্স পচ্চেকবুদ্ধস্স ৰসনগুহাদ্ৰারে পসন্নমানসো দিৰসস্স তিক্খত্তুং মধুরেন ৰস্সিতং ৰস্সি. এৰং তত্থ তত্থ ভৰে পুঞ্ঞানি কত্ৰা অম্হাকং ভগৰতো কালে সাৰত্থিযং কুলগেহে নিব্বত্তো নন্দকোতি লদ্ধনামো সত্থু সন্তিকে ধম্মং সুত্ৰা পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো মিগলুদ্দো পুরে আসিন্তিআদিমাহ. তত্থ পচ্চেকবুদ্ধস্স মণ্ডপং কত্ৰা পদুমপুপ্ফেহি ছদনমেৰ ৰিসেসো.

১৮৩. সত্তমাপদানে পব্ভারকূটং নিস্সাযাতিআদিকং আযস্মতো হেমকত্থেরস্স অপদানং. তত্থাপি ইসিপব্বজ্জং পব্বজিত্ৰা হিমৰন্তে ৰসন্তো পিযদস্সিং ভগৰন্তং উপগতং দিস্ৰা রতনমযং পীঠং অত্থরিত্ৰা অট্ঠাসি. তত্থ নিসিন্নস্স কুম্ভমত্তং জম্বুফলং আহরিত্ৰা অদাসি. ভগৰা তস্স চিত্তপ্পসাদত্থায তং ফলং পরিভুঞ্জি. এত্তকমেৰ ৰিসেসো.

২২৪. অট্ঠমাপদানে রাজাসি ৰিজযো নামাতিআদিকং আযস্মতো তোদেয্যত্থেরস্স অপদানং. তত্থ রাজাসি ৰিজযো নামাতি দহরকালতো পট্ঠায সব্বসঙ্গামেসু জিনতো, চতূহি সঙ্গহৰত্থূহি জনং রঞ্জনতো অল্লীযনতো ৰিজযো নাম রাজা অহোসীতি অত্থো. কেতুমতীপুরুত্তমেতি কেতু ৰুচ্চন্তি ধজপটাকা. অথ ৰা নগরসোভনত্থায নগরমজ্ঝে উস্সাপিতরতনতোরণানি, তে কেতূ নিচ্চং উস্সাপিতা সোভযমানা অস্সা অত্থীতি কেতুমতী. পূরেতি ধনধঞ্ঞেহি সব্বজনানং মনন্তি পুরং. কেতুমতী চ সা পুরঞ্চ সেট্ঠট্ঠেন উত্তমঞ্চেতি কেতুমতীপুরুত্তমং, তস্মিং কেতুমতীপুরুত্তমে. সূরো ৰিক্কমসম্পন্নোতি অভীতো ৰীরিযসম্পন্নো ৰিজযো নাম রাজা অজ্ঝাৰসীতি সম্বন্ধো. ইত্থং ভূতং পুরঞ্চ সব্বৰত্থুৰাহনঞ্চ ছড্ডেত্ৰা হিমৰন্তং পৰিসিত্ৰা ইসিপব্বজ্জং পব্বজিত্ৰা ৰসন্তো সুমেধভগৰন্তং দিস্ৰা সোমনস্সং উপ্পাদেত্ৰা চন্দনেন পূজাকরণমেৰ ৰিসেসো.

২৭৬. নৰমাপদানে নগরে হংসৰতিযাতিআদিকং আযস্মতো জতুকণ্ণিত্থেরস্স অপদানং. তত্থ সেট্ঠিপুত্তো হুত্ৰা সুৰণ্ণপাসাদে ৰসনভাৰো চ পঞ্চহি কামগুণেহি সমঙ্গী হুত্ৰা ৰসনভাৰো চ সব্বদেসৰাসীনং সব্বসিপ্পৰিঞ্ঞূনঞ্চ আগন্ত্ৰা সেৰনভাৰো চ ৰিসেসো.

৩৩০. দসমাপদানে হিমৰন্তস্সাৰিদূরেতিআদিকং আযস্মতো উদেনত্থেরস্স অপদানং. তত্থ হিমৰন্তসমীপে পদুমপব্বতং নিস্সায তাপসপব্বজ্জং পব্বজিত্ৰা ৰসন্তেন পদুমুত্তরস্স ভগৰতো পদুমপুপ্ফং গহেত্ৰা পূজিতভাৰোৰ ৰিসেসো. সেসং সব্বত্থ উত্তানমেৰাতি.

একচত্তালীসমৰগ্গৰণ্ণনা সমত্তা.