৩৯. অৰটফলৰগ্গো

৯. সোণকোটিৰীসত্থেরঅপদানৰণ্ণনা

নৰমাপদানে পন ৰিপস্সিনো পাৰচনেতিআদিকং আযস্মতো সোণস্স কোটিৰীসত্থেরস্স অপদানং. অযম্পি থেরো পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে মহাৰিভৰে সেট্ঠিকুলে নিব্বত্তো ৰুদ্ধিপ্পত্তো সেট্ঠি হুত্ৰা উপাসকেহি সদ্ধিং ৰিহারং গন্ত্ৰা সত্থু ধম্মদেসনং সুত্ৰা পসন্নমানসো ভগৰতো চঙ্কমনট্ঠানে সুধায পরিকম্মং কারেত্ৰা একঞ্চ লেণং কারেত্ৰা নানাৰিরাগৰত্থেহি লেণভূমিযা সন্থরিত্ৰা উপরি ৰিতানঞ্চ কত্ৰা চাতুদ্দিসস্স সঙ্ঘস্স নিয্যাদেত্ৰা সত্তাহং মহাদানং দত্ৰা পণিধানং অকাসি. সত্থা অনুমোদনং অকাসি. সো তেন কুসলকম্মেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং কপ্পে পরিনিব্বুতে কস্সপদসবলে অনুপ্পন্নে অম্হাকং ভগৰতি বারাণসিযং কুলগেহে নিব্বত্তিত্ৰা ৰিঞ্ঞুতং পত্তো গঙ্গাতীরে পণ্ণসালং করিত্ৰা ৰসন্তং একং পচ্চেকবুদ্ধং তেমাসং চতূহি পচ্চযেহি সক্কচ্চং উপট্ঠহি. পচ্চেকবুদ্ধো ৰুট্ঠৰস্সো পরিপুণ্ণপরিক্খারো গন্ধমাদনমেৰ অগমাসি. সোপি কুলপুত্তো যাৰজীৰং তত্থ পুঞ্ঞানি কত্ৰা ততো চৰিত্ৰা দেৰমনুস্সেসু সংসরন্তো অম্হাকং ভগৰতো কালে চম্পানগরে অগ্গসেট্ঠিস্স গেহে পটিসন্ধিং গণ্হি. তস্স পটিসন্ধিগ্গহণকালতো পট্ঠায সেট্ঠিস্স মহাভোগক্খন্ধো অভিৰড্ঢি. তস্স মাতুকুচ্ছিতো নিক্খমনদিৰসে সকলনগরে মহালাভসক্কারসম্মানো অহোসি, তস্স পুব্বে পচ্চেকবুদ্ধস্স সতসহস্সগ্ঘনিকরত্তকম্বলপরিচ্চাগেন সুৰণ্ণৰণ্ণো সুখুমালতরো চ অত্তভাৰো অহোসি, তেনস্স সোণোতি নামং অকংসু. সো মহতা পরিৰারেন অভিৰড্ঢি. তস্স হত্থপাদতলানি বন্ধুজীৰকপুপ্ফৰণ্ণানি অহেসুং, তেসং সতৰারং ৰিহতকপ্পাসং ৰিয মুদুসম্ফস্সো অহোসি. পাদতলেসু মণিকুণ্ডলাৰট্টৰণ্ণলোমানি জাযিংসু. ৰযপ্পত্তস্স তস্স তিণ্ণং উতূনং অনুচ্ছৰিকে তযো পাসাদে কারাপেত্ৰা নাটকিত্থিযো উপট্ঠাপেসুং. সো তত্থ মহতিং সম্পত্তিং অনুভৰন্তো দেৰকুমারো ৰিয পটিৰসতি.

অথ অম্হাকং ভগৰতি সব্বঞ্ঞুতং পত্ৰা পৰত্তিতৰরধম্মচক্কে রাজগহং উপনিস্সায ৰিহরন্তে বিম্বিসাররঞ্ঞা পক্কোসাপিতো তেহি অসীতিযা গামিকসহস্সেহি সদ্ধিং রাজগহং আগতো সত্থু সন্তিকং গন্ত্ৰা ধম্মং সুত্ৰা পটিলদ্ধসদ্ধো মাতাপিতরো অনুজানাপেত্ৰা ভগৰতো সন্তিকে পব্বজিত্ৰা লদ্ধূপসম্পদো সত্থু সন্তিকে কম্মট্ঠানং গহেত্ৰা জনসংসগ্গপরিহরণত্থং সীতৰনে ৰিহাসি. সো তত্থ ৰসন্তো ‘‘মম সরীরং সুখুমালং, ন চ সক্কা সুখেনেৰ সুখং অধিগন্তুং, কাযং কিলমেত্ৰাপি সমণধম্মং কাতুং ৰট্টতী’’তি চিন্তেত্ৰা ঠানচঙ্কমমেৰ অধিট্ঠায পধানমনুযুঞ্জন্তো পাদতলেসু ফোটেসু উট্ঠিতেসুপি ৰেদনং অজ্ঝুপেক্খিত্ৰা দল়্হং ৰীরিযং করোন্তো অচ্চারদ্ধৰীরিযতায ৰিসেসং নিব্বত্তেতুং অসক্কোন্তো ‘‘এৰং অহং ৰাযমন্তোপি মগ্গফলানি নিব্বত্তেতুং ন সক্কোমি, কিং মে পব্বজ্জায, হীনাযাৰত্তিত্ৰা ভোগে চ ভুঞ্জামি, পুঞ্ঞানি চ করিস্সামী’’তি চিন্তেসি. অথ সত্থা তস্স চিত্তাচারং ঞত্ৰা তত্থ গন্ত্ৰা ৰীণোপমোৰাদেন (মহাৰ. ২৪৩) ওৰদিত্ৰা ৰীরিযসমতাযোজনৰিধিং দস্সেন্তো কম্মট্ঠানং সোধেত্ৰা গিজ্ঝকূটং গতো. সোণোপি খো সত্থু সন্তিকা ওৰাদং লভিত্ৰা ৰীরিযসমতং যোজেত্ৰা ৰিপস্সনং উস্সুক্কাপেত্ৰা অরহত্তে পতিট্ঠাসি.

৪৯. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সিনো পাৰচনেতিআদিমাহ. তত্থ ৰিপস্সীতি ৰিসেসেন, ৰিৰিধং ৰা পস্সতীতি ৰিপস্সী. পাৰচনেতি পকারেন ৰুচ্চতীতি পাৰচনং, পিটকত্তযং. তস্স ৰিপস্সিনো তস্মিং পাৰচনেতি অত্থো. লেণন্তি লিনন্তে নিলীযন্তে এত্থাতি লেণং ৰিহারং. বন্ধুমারাজধানিযাতি বন্ধন্তি কুলপরম্পরায ৰসেন অঞ্ঞমঞ্ঞং সম্বজ্ঝন্তীতি বন্ধূ, ঞাতকা. তে এত্থ পটিৰসন্তীতি বন্ধুমা, বন্ধু অস্স অত্থীতি ৰা বন্ধুমা. রাজূনং ৰসনট্ঠানন্তি রাজধানী, বন্ধুমা চ সা রাজধানী চেতি বন্ধুমারাজধানী, তস্সা বন্ধুমারাজধানিযা, লেণং মযা কতন্তি সম্বন্ধো. সেসমেত্থ উত্তানত্থমেৰাতি.

সোণকোটিৰীসত্থেরঅপদানৰণ্ণনা সমত্তা.

১০. পুব্বকম্মপিলোতিকবুদ্ধঅপদানৰণ্ণনা

৬৪. দসমাপদানে অনোতত্তসরাসন্নেতি পব্বতকূটেহি পটিচ্ছন্নত্তা চন্দিমসূরিযানং সন্তাপেহি ওতত্তং উণ্হং উদকং এত্থ নত্থীতি অনোতত্তো. সরন্তি গচ্ছন্তি পভৰন্তি সন্দন্তি এতস্মা মহানদিযোতি সরো. সীহমুখাদীহি নিক্খন্তা মহানদিযো তিক্খত্তুং তিক্খত্তুং পদক্খিণং কত্ৰা নিক্খন্তনিক্খন্তদিসাভাগেন সরন্তি গচ্ছন্তীতি অত্থো. অনোতত্তো চ সো সরো চাতি অনোতত্তসরো. তস্স আসন্নং সমীপট্ঠানন্তি অনোতত্তসরাসন্নং, তস্মিং অনোতত্তসরাসন্নে, সমীপেতি অত্থো. রমণীযেতি দেৰদানৰগন্ধব্বকিন্নরোরগবুদ্ধপচ্চেকবুদ্ধাদীহি রমিতব্বং অল্লীযিতব্বন্তি রমণীযং, তস্মিং রমণীযে. সিলাতলেতি একগ্ঘনপব্বতসিলাতলেতি অত্থো. নানারতনপজ্জোতেতি পদুমরাগৰেল়ুরিযাদিনানাঅনেকেহি রতনেহি পজ্জোতে পকারেন জোতমানে. নানাগন্ধৰনন্তরেতি নানপ্পকারেহি চন্দনাগরুকপ্পূরতমালতিলকাসোকনাগপুন্নাগকেতকাদীহি অনেকেহি সুগন্ধপুপ্ফেহি গহনীভূতৰনন্তরে সিলাতলেতি সম্বন্ধো.

৬৫. গুণমহন্ততায সঙ্খ্যামহন্ততায চ মহতা ভিক্খুসঙ্ঘেন, পরেতো পরিৰুতো লোকনাযকো লোকত্তযসামিসম্মাসম্বুদ্ধো তত্থ সিলাসনে নিসিন্নো অত্তনো পুব্বানি কম্মানি ব্যাকরী ৰিসেসেন পাকটমকাসীতি অত্থো. সেসমেত্থ হেট্ঠা বুদ্ধাপদানে (অপ. থের ১.১.১ আদযো) ৰুত্তত্তা উত্তানত্থত্তা চ সুৰিঞ্ঞেয্যমেৰ. বুদ্ধাপদানে অন্তোগধম্পি ইধাপদানে কুসলাকুসলং কম্মসংসূচকত্তা ৰগ্গসঙ্গহৰসেন ধম্মসঙ্গাহকত্থেরা সঙ্গাযিংসূতি.

পুব্বকম্মপিলোতিকবুদ্ধঅপদানৰণ্ণনা সমত্তা.

একূনচত্তালীসমৰগ্গৰণ্ণনা সমত্তা.