৪০. পিলিন্দৰচ্ছৰগ্গো

১. পিলিন্দৰচ্ছত্থেরঅপদানৰণ্ণনা

চত্তালীসমৰগ্গে অপদানে নগরে হংসৰতিযাতিআদিকং আযস্মতো পিলিন্দৰচ্ছত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে হংসৰতীনগরে দোৰারিককুলে নিব্বত্তো মহদ্ধনো মহাভোগো অহোসি. সো কোটিসন্নিচিতধনরাসিং ওলোকেত্ৰা রহো নিসিন্নো ‘‘ইমং সব্বধনং মযা সম্মা গহেত্ৰা গন্তুং ৰট্টতী’’তি চিন্তেত্ৰা ‘‘বুদ্ধপ্পমুখস্স ভিক্খুসঙ্ঘস্স সব্বপরিক্খারদানং দাতুং ৰট্টতী’’তি সন্নিট্ঠানং কত্ৰা ছত্তসতসহস্সং আদিং কত্ৰা সব্বপরিভোগপরিক্খারানিপি সতসহস্সৰসেন কারেত্ৰা পদুমুত্তরং ভগৰন্তং নিমন্তেত্ৰা বুদ্ধপ্পমুখস্স ভিক্খুসঙ্ঘস্স মহাদানং অদাসি. এৰং সত্তাহং দানং দত্ৰা পরিযোসানদিৰসে নিব্বানাধিগমং পত্থেত্ৰা যাৰজীৰং পুঞ্ঞানি কত্ৰা জীৰিতপরিযোসানে দেৰলোকে নিব্বত্তো ছ কামাৰচরে দিব্বসম্পত্তিযো অনুভৰিত্ৰা মনুস্সেসু চ চক্কৰত্তিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে ব্রাহ্মণকুলে নিব্বত্তো সব্বসিপ্পেসু নিপ্ফত্তিং পত্তো গোত্তৰসেন পিলিন্দৰচ্ছোতি পাকটো অহোসি.

১. সো একদিৰসং সত্থু সন্তিকে ধম্মদেসনং সুত্ৰা পটিলদ্ধসদ্ধো পব্বজিত্ৰা নচিরস্সেৰ অরহা হুত্ৰা অত্তনো পুব্বকম্মং সরিত্ৰা সোমনস্সজাতো উদানৰসেন তং পকাসেন্তো নগরে হংসৰতিযাতিআদিমাহ. তস্সত্থো হেট্ঠা ৰুত্তোৰ. আসিং দোৰারিকো অহন্তি অহং হংসৰতীনগরে রঞ্ঞো গেহদ্ৰারে দ্ৰারপালকো আসিং অহোসিন্তি অত্থো. অক্খোভং অমিতং ভোগন্তি রঞ্ঞো ৰল্লভত্তা অঞ্ঞেহি খোভেতুং চালেতুং অসক্কুণেয্যং অমিতং অপরিমাণভোগং ধনং মম ঘরে সন্নিচিতং রাসীকতং অহোসীতি অত্থো.

৩. বহূ মেধিগতা ভোগাতি অনেকা ভোগা মে মযা অধিগতা পত্তা পটিলদ্ধাতি অত্থো. সত্থৰাসিআদীনং পরিক্খারানং নামানি নযানুযোগেন সুৰিঞ্ঞেয্যানি. পরিক্খারদানানিসংসানি চ সুৰিঞ্ঞেয্যানেৰাতি.

পিলিন্দৰচ্ছত্থেরঅপদানৰণ্ণনা সমত্তা.

দুতিযততিযচতুত্থপঞ্চমাপদানানি উত্তানানেৰাতি.

৬. বাকুলত্থেরঅপদানৰণ্ণনা

ছট্ঠাপদানে হিমৰন্তস্সাৰিদূরেতিআদিকং বাকুলত্থেরস্স অপদানং. অযং কির থেরো অতীতে ইতো কপ্পসতসহস্সাধিকস্স অসঙ্খ্যেয্যস্স মত্থকে অনোমদস্সিস্স ভগৰতো উপ্পত্তিতো পুরেতরমেৰ ব্রাহ্মণকুলে নিব্বত্তিত্ৰা ৰযপ্পত্তো তযো ৰেদে উগ্গণ্হিত্ৰা তত্থ সারং অপস্সন্তো ‘‘সম্পরাযিকত্থং গৰেসিস্সামী’’তি ইসিপব্বজ্জং পব্বজিত্ৰা পব্বতপাদে ৰিহরন্তো পঞ্চাভিঞ্ঞাঅট্ঠসমাপত্তীনং লাভী হুত্ৰা ৰিহরন্তো বুদ্ধুপ্পাদং সুত্ৰা সত্থু সন্তিকং গন্ত্ৰা ধম্মং সুত্ৰা সরণেসু পতিট্ঠিতো সত্থু ৰাতাবাধে উপ্পন্নে অরঞ্ঞতো ভেসজ্জানি আনেত্ৰা তং ৰূপসমেত্ৰা তং পুঞ্ঞং আরোগ্যত্থায পরিণামেত্ৰা ততো চুতো ব্রহ্মলোকে নিব্বত্তো একং অসঙ্খ্যেয্যং দেৰমনুস্সেসু সংসরন্তো পদুমুত্তরবুদ্ধকালে হংসৰতীনগরে একস্মিং কুলে নিব্বত্তো ৰিঞ্ঞুতং পত্ৰা সত্থু ধম্মদেসনং সুত্ৰা সত্থারং একং ভিক্খুং অপ্পাবাধানং অগ্গট্ঠানে ঠপেন্তং দিস্ৰা সযং তং ঠানন্তরং আকঙ্খন্তো পণিধানং কত্ৰা যাৰজীৰং কুসলকম্মং উপচিনিত্ৰা সুগতীসুযেৰ সংসরন্তো ৰিপস্সিস্স ভগৰতো উপ্পত্তিতো পুরেতরমেৰ বন্ধুমতীনগরে ব্রাহ্মণকুলে নিব্বত্তো সব্বসিপ্পেসু নিপ্ফত্তিং পত্তো তত্থ সারং অপস্সন্তো ইসিপব্বজ্জং পব্বজিত্ৰা ঝানাভিঞ্ঞালাভী হুত্ৰা পব্বতপাদে ৰসন্তো বুদ্ধুপ্পাদং সুত্ৰা সত্থু সন্তিকং গন্ত্ৰা সরণেসু পতিট্ঠায ভিক্খূনং তিণপুপ্ফকরোগে উপ্পন্নে তং ৰূপসমেত্ৰা তত্থ যাৰতাযুকং ঠত্ৰা ততো চুতো ব্রহ্মলোকে নিব্বত্তিত্ৰা ততো একনৰুতিকপ্পে দেৰমনুস্সেসু সংসরন্তো কস্সপস্স ভগৰতো কালে বারাণসিযং কুলগেহে নিব্বত্তিত্ৰা ঘরাৰাসং ৰসন্তো একং জিণ্ণং ৰিনস্সমানং মহাৰিহারং দিস্ৰা তত্থ উপোসথাগারাদিকং সব্বং আৰসথং কারাপেত্ৰা তত্থ ভিক্খুসঙ্ঘস্স সব্বং ভেসজ্জং পটিযাদেত্ৰা যাৰজীৰং কুসলং কত্ৰা একং বুদ্ধন্তরং দেৰমনুস্সেসু সংসরন্তো অম্হাকং ভগৰতো উপ্পত্তিতো পুরেতরমেৰ কোসম্বিযং সেট্ঠিকুলে নিব্বত্তি.

সো মাতুকুচ্ছিতো নিক্খমিত্ৰা ধাতীহি অরোগভাৰায যমুনাযং ন্হাপিযমানো তাসং হত্থতো মুচ্চিত্ৰা মচ্ছেন গিলিতো অহোসি. কেৰট্টা তং মচ্ছং জালায গহেত্ৰা বারাণসিযং সেট্ঠিভরিযায ৰিক্কিণিংসু. সা তং গহেত্ৰা ফালযমানা পুব্বে কতপুঞ্ঞফলেন অরোগং দারকং দিস্ৰা ‘‘পুত্তো মে লদ্ধো’’তি গহেত্ৰা পোসেসি. সো জনকেহি মাতাপিতূহি তং পৰত্তিং সুত্ৰা আগন্ত্ৰা ‘‘অযং অম্হাকং পুত্তো, দেথ নো পুত্ত’’ন্তি অনুযোগে কতে রঞ্ঞা ‘‘উভযেসম্পি সাধারণো হোতূ’’তি দ্ৰিন্নং কুলানং দাযাদভাৰেন ৰিনিচ্ছযং কত্ৰা ঠপিতত্তা বাকুলোতি লদ্ধনামো ৰযপ্পত্তো মহাসম্পত্তিং অনুভৰন্তো দ্ৰীসু সেট্ঠিকুলেসু একেকস্মিং ছমাসং ছমাসং ৰসতি. তে অত্তনো ৰারে সম্পত্তে নাৰাসঙ্ঘাটং বন্ধিত্ৰা তত্রূপরি রতনমণ্ডপং কারেত্ৰা পঞ্চঙ্গিকতূরিযে নিপ্ফাদেত্ৰা কুমারং তত্থ নিসীদাপেত্ৰা উভযনগরমজ্ঝট্ঠানং গঙ্গায আগচ্ছন্তি, অপরসেট্ঠিমনুস্সাপি এৰমেৰ সজ্জেত্ৰা তং ঠানং গন্ত্ৰা কুমারং তত্থ আরোপেত্ৰা গচ্ছন্তি. সো এৰং ৰড্ঢমানো আসীতিকো হুত্ৰা উভযসেট্ঠিপুত্তোতি পাকটো. সত্থু সন্তিকং গন্ত্ৰা ধম্মং সুত্ৰা পটিলদ্ধসদ্ধো পব্বজিত্ৰা সত্তাহং ৰাযমন্তো অট্ঠমে দিৰসে সহ পটিসম্ভিদায অরহত্তং পাপুণি.

৩৮৬. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ. তস্সত্থো হেট্ঠা ৰুত্তোৰ. অপদানপাল়িঅত্থোপি সুৰিঞ্ঞেয্যোৰ. সো অরহত্তং পত্ৰা ৰিমুত্তিসুখেন ৰিহরন্তো সট্ঠিৰস্সসতাযুকো হুত্ৰা পরিনিব্বাযীতি.

বাকুলত্থেরঅপদানৰণ্ণনা সমত্তা.

৭. গিরিমানন্দত্থেরঅপদানৰণ্ণনা

সত্তমাপদানে ভরিযা মে কালঙ্কতাতিআদিকং আযস্মতো গিরিমানন্দত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সুমেধস্স ভগৰতো কালে কুলগেহে নিব্বত্তো ৰযপ্পত্তো ঘরাৰাসং সণ্ঠপেত্ৰা ৰসন্তো অত্তনো ভরিযায চ পুত্তে চ কালঙ্কতে সোকসল্লসমপ্পিতো অরঞ্ঞং পৰিসিত্ৰা পৰত্তফলভোজনো রুক্খমূলে ৰিহাসি. তদা সুমেধো ভগৰা তস্সানুকম্পায তত্থ গন্ত্ৰা ধম্মং দেসেত্ৰা সোকসল্লং অব্বূল়্হেসি. সো ধম্মং সুত্ৰা পসন্নমানসো সুগন্ধপুপ্ফেহি ভগৰন্তং পূজেত্ৰা পঞ্চপতিট্ঠিতেন ৰন্দিত্ৰা সিরসি অঞ্জলিং কত্ৰা অভিত্থৰি.

সো তেন পুঞ্ঞেন দেৰমনুস্সেসু সংসরন্তো উভযত্থ সুখং অনুভৰিত্ৰা ইমস্মিং বুদ্ধুপ্পাদে রাজগহে বিম্বিসাররঞ্ঞো পুরোহিতস্স পুত্তো হুত্ৰা নিব্বত্তি, গিরিমানন্দোতিস্স নামং অহোসি. সো ৰিঞ্ঞুতং পত্ৰা সত্থু রাজগহাগমনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা সমণধম্মং করোন্তো কতিপযং দিৰসং গামকাৰাসে ৰসিত্ৰা সত্থারং ৰন্দিতুং রাজগহং অগমাসি. বিম্বিসারমহারাজা তস্স আগমনং সুত্ৰা তং উপসঙ্কমিত্ৰা ‘‘ইধেৰ, ভন্তে, ৰসথ, অহং চতূহি পচ্চযেহি উপট্ঠহামী’’তি সম্পৰারেত্ৰা গতোপি বহুকিচ্চত্তা তং ন সরি. ‘‘থেরো অব্ভোকাসেযেৰ ৰসতী’’তি. দেৰতা থেরস্স তেমনভযেন ৰস্সধারং ৰারেসুং. রাজা অৰস্সনকারণং উপধারেত্ৰা ঞত্ৰা থেরস্স কুটিকং কারাপেসি. থেরো কুটিকাযং ৰসন্তো সেনাসনসপ্পাযলাভেন চিত্তসমাধানং লভিত্ৰা ৰীরিযসমতং যোজেত্ৰা ৰিপস্সনং উস্সুক্কাপেত্ৰা অরহত্তং পাপুণি.

৪১৯. সো অরহত্তং পত্ৰা অত্তনো পুব্বকম্মং সরিত্ৰা সঞ্জাতসোমনস্সো পুব্বচরিতাপদানং পকাসেন্তো ভরিযা মে কালঙ্কতাতিআদিমাহ. তং ভগৰতো নিৰেদনঞ্চ ভগৰতা কতানুসাসনঞ্চ মগ্গং ফলাধিগমাপদানঞ্চ পাঠানুসারেন সুৰিঞ্ঞেয্যমেৰাতি.

গিরিমানন্দত্থেরঅপদানৰণ্ণনা সমত্তা.

অট্ঠমনৰমদসমাপদানানি উত্তানত্থানেৰাতি.

চত্তালীসমৰগ্গৰণ্ণনা সমত্তা.